[1] “Vaysht du vann di vilda gays yungi greeya? Hosht du di glenna hash ksenna geboahra vadda?
[2] Kansht du di moonada zayla es si di yunga drawwa? Vaysht du di zeit vann si geboahra vadda?
[3] Si bikka sich nunnah, bringa di yunga raus, un sinn no di shmatza lohs.
[4] Di yunga vadda shteik un vaxa uf draus im uffena, si falossa un kumma nimmi zrikk zu eena.
[5] Veah hott da vild aysel frei gay glost, veah hott'n lohs gmacht un en gay glost?
[6] Ich habb eem di vildahnis gevva fa sei haymet, un's salsich land fa drinn voona.
[7] Eah lacht ivvah di vatshaft in di shtatt, un heaht's gegreish nett funn demm vo foaht.
[8] Eah gayt ivvah di hivla fa sei vayt, un sucht fa alli gree ding.
[9] Is da vild ox villing fa shaffa fa dich? Bleibt eah bei deim foodah-drohk ivvah-nacht?
[10] Kansht du een macha in di blooks-feich bleiva mitt en shtrikk? Kansht du een macha di ayk zeeya vann du een fiahsht?
[11] Kansht du dich falossa uf een veil eah shteik is? Losht du dei shveahri eahvet fa een?
[12] Kansht du eem drauwa fa dei frucht rei bringa, un see zammah geddahra uf em dresha-floah?
[13] Da ostrich is fraylich un flapped sei flikkel, avvah sei flikkel sinn nix vi di feddahra fumm stork.
[14] See laykt iahra oiyah uf da bodda, un lost da grund si veahma.
[15] See fagest es en foos di oiyah fabrecha kann, adda es en vild diah si fadredda kann.
[16] See is veesht zu iahra yungi, es vann si nett iahri veahra, un see gebt nix drumm es iahra eahvet fa nix voah.
[17] Fa Gott hott iahra di veisheit vekk gnumma un hott iahra kenn goodah fashtand gevva.
[18] Avvah vann see sich risht fa shpringa, dann lacht see ivvah da gaul un sei reidah.
[19] Kansht du em gaul sei grefta gevva, adda sei hals glaydah mitt en mohna?
[20] Kansht du een tshumba macha vi en hoi-shrekk? Eah blohst aus di naws un fagelshtaht leit.
[21] Eah shtambt eahnshtlich uf da bodda un froit sich ivvah sei graft. Eah shpringd fassich un gayt geyyich di feinda mitt iahra greeks-ksha.
[22] Eah lacht an furcht un feicht sich nett; eah drayt nett zrikk veyyich em shvatt.
[23] Uf eem rabbeld da arrow-sakk, un di grohs un glay shpiah glitzahra.
[24] Eah is eifahrich un ziddaht, un fleekt ivvah da grund; eah kann sich nett shtill hayva vann's blohs-hann blohst.
[25] Eah blohst aus di naws vann eah's blohs-hann heaht, un shmakt di fecht eb eah nayksht kumd, veil eah di yacht heaht funn di foah-gengah am greisha.
[26] Is es deich dei veisheit es da voi fleekt, un shtrekt sei flikkel geyyich di saut?
[27] Haysht du da awdlah fa hohch fleeya, un sei nesht bauwa drovva in di hay?
[28] Eah voond drovva uf en felsa-vand, un macht sei haymet unnich di shpitzicha felsa.
[29] Funn datt vatsht eah fa sei ess-sach, un sei awwa sayna's funn veit ab.
[30] Sei yungi saufa's bloot un vo ebbes dohdes is, datt is eah.”