[1] “Avvah nau selli es yingah sinn es ich, fashpodda mich; ich hett als iahra feddah fa'acht, un si nett mitt mei shohf-hund gedu.
[2] Vass goot voahra di grefta funn iahra hend zu miah, siddah es si so shvachi mennah voahra?
[3] Si voahra dinn un dah funn hungahs-noht, un sinn rumm gloffa im drukka land, in di vildahnis deich di nacht.
[4] Si henn sals-graut ksammeld funn di hekka-putsha, un iahra ess-sach voah di vatzla funn baym.
[5] Si voahra unnich di leit vekk gedrivva; di leit henn gegrisha ivvah si es vann si deeb veahra.
[6] Si henn missa voona in di gracha an di grikka nohch, in di lechah im grund un in di felsa.
[7] Kshvissich di hekka-putsha henn si naus gegrisha, un unnich di dishtla henn si sich fasammeld.
[8] Si sinn gottlohsi leit es kenn nohma henn; si voahra aus em land gedrivva.
[9] Nau fashpodda iahra kinnah mich, un singa shpott-leedah; ich binn yusht en shpott-vatt zu eena.
[10] Ich binn grausam zu eena un si halda sich vekk funn miah, un shemma sich nett fa in mei ksicht shpautza.
[11] Gott hott mei bowstring lohs glost un mich shvach gmacht, fasell braucha si sich nett zrikk hayva fannich miah.
[12] Uf mei rechtsi seit doon si ufgenga geyyich mich, si macha mich hinnahsich gay, un rishta sich fa mich umbringa.
[13] Si shneida mei pawt ab un broviahra mich umbringa, un's is nimmand fa si shtobba.
[14] Si kumma an mich vi deich en loch in di vand, ivvah's sach rolla si rei.
[15] Ich binn ivvah-kumma un fagelshtaht, mei eah is fatt geblohsa vi bei em vind, un mei hofning fagayt vi en volk.
[16] Un nau is es layva funn mei sayl am ausgleaht vadda; di dawwa funn aylend henn mich ivvah-gnumma.
[17] Deich di nacht boaht's deich mei gnocha, un di shmatza es an miah fressa, shlohfa nett.
[18] Mitt grohsi gvald vadda mei glaydah runslich, dee shmatza henka an miah vi da kallah funn mei rokk.
[19] Gott hott mich in da drekk kshmissa, un ich binn vi shtawb un esh.
[20] Ich roof zu diah, oh Gott, fa hilf, avvah du gebsht mich kenn andvat; ich shtay uf, avvah du guksht yusht an mich.
[21] Du hosht shreklich geyyich mich gedrayt; mitt di macht funn dei hand dusht du mich fafolka.
[22] Du haybsht mich uf un dreibsht mich fannich em vind, du shmeisht mich rumm im shtoahm.
[23] Fa ich vays es du mich zumm doht bringa zaylsht, an da blatz vo awl di levendicha zammah kumma.
[24] Dutt nett aynah es nunnah gebrocha is sei hand naus shtrekka, un in sei noht roofa fa hilf?
[25] Habb ich nett keild ivvah selli es en hatt layva henn? Voah nett mei sayl bedreebt ivvah selli in noht?
[26] Avvah vo ich koft habb fa goodes sayna, is evil kumma; vo ich gvoaht habb fa helling, is es dunkla kumma.
[27] Ich binn am innahlich farissa vadda, un's shtobt nett, dawwa funn soffahra sinn fannich miah.
[28] Ich gay rumm un binn shvatz gmacht, avvah nett bei di sunn; ich shtay uf in di fasamling un roof fa hilf.
[29] Ich binn en broodah vadda zu di faxa, un en kumrawt zu di ostriches.
[30] Mei haut drayt shvatz, un mei gnocha brenna mitt feevah.
[31] Mei harf shpeeld yusht fa di bedreebda, un mei flute fa selli es veina.”