[1] “Favass dutt da Awlmechtich nett en zeit setza fa richta? Un favass doon selli es een kenna, een nett sayna dess ausdrawwa?
[2] Mennah moofa di meik-shtay fa may land greeya, si shtayla shohf un doon si in iahra vayt.
[3] Si dreiva di aysla vekk es zu selli heahra es kenn eldra henn, un nemma di vitt-fraw iahra ox fa en fashprechnis.
[4] Si sheeva selli aus iahra vayk es noht henn, un di oahma im land missa sich fashtekla.
[5] Vi vildi aysla in di vildahnis, gayn di oahma rumm am gukka fa ess-sach. Sell is da vayk es si iahra kinnah feedra.
[6] Si geddahra's foodah im feld, un laysa uf vass ivvahrich is in di gottlohsa iahra vei-goahra.
[7] Si leiya in di nacht unni glaydah, un henn nix fa sich zu dekka im kalda.
[8] Si sinn nass fumm reyyah in di berga; si missa sich an di felsa nohch halda veil si kenn heisah henn.
[9] 'S kind es kenn daett hott vatt funn di muddah-brusht vekk grissa, un em oahma sei kind is funn eem gnumma fa en shuld betzawla.
[10] Di oahma gayn rumm nakkich, unni glaydah, si drawwa di shayb in di eahn, un doch gayn si hungahrich.
[11] In di ayl-goahra macha si ayl; un si dredda da vei raus in di vei-press, avvah gayn selvaht dashtich.
[12] Selli es am shtauva sinn yammahra in di shtatt, un di sayla funn selli es vay gedu sinn roofa naus fa hilf, avvah Gott dutt nix diveyya.
[13] 'S hott anri es sich geyyich's licht setza, si vissa da vayk fumm licht nett, un bleiva nett in di pawt fumm licht.
[14] Da doht-shlayyah shtayt uf meiyets am dawk, eah macht selli doht es oahm un in noht sinn, un nacht's shtayld eah vi en deeb.
[15] Es awk fumm aybrechah vatsht vi's dunkel vatt, un sawkt, ‘Nimmand kann mich sayna,’ eah dekt sei ksicht zu.
[16] Im dunkla brecha mennah in heisah nei, deich da dawk kumma si nett raus. Si halda sich vekk fumm licht.
[17] 'S dunkla is vi meiyets zu eena, si feicha sich nett veyyich di veeshta sacha funn di nacht.
[18] Si sinn vi shaum ovva uf em vassah, 's land es si aykna is faflucht, un nimmand gayt may zu sei vei-goahra.
[19] Vi di hitz un's drukkana es shnay-vassah vekk nemd, so nemd's grawb selli vekk es ksindicht henn.
[20] Iahra maemm es si gedrawwa hott fagest si; si vadda kfressa bei di veahm un vadda fagessa, ungettlichkeit vatt fabrocha vi en faulah bohm.
[21] Si doon letz zu di unfruchtboah fraw es kenn kinnah hott, un doon nix goodes fa di vitt-fraw.
[22] Gott zeekt di mechticha vekk bei sei gvald, eah shtayt uf, avvah nimmand kann shuah sei funn sei layva.
[23] Eah lost si layva unni furcht, un si henn roo, avvah eah hald sei awwa uf iahra vayya.
[24] Si sinn hohch-geaht fa en zeit, no sinn si nimmi datt, si vadda niddah gebrocht un vekk kshmissa vi alli-ebbah shunsht; si vadda abkshnidda vi di kebb funn frucht.
[25] Vann dess nett so is, kann ennich ebbah miah annahshtah veisa, un mei vadda nix veaht macha?”