[1] No hott da Hah andvat gevva zumm Hiob aus em shtoahm. Eah hott ksawt:
[2] “Veah is dess es mei roht fadunkeld mitt vadda, mitt vadda es kenn fashtand drinn henn?
[3] Shtay uf un risht dich vi en mann; ich zayl dich sacha frohwa, un du gebsht miah andvat.
[4] Vo voahsht du vo ich di foundation glaykt habb fa di eaht? Sawk miah's, vann du so feel vaysht.
[5] Veah hott ausgmacht vi grohs es di eaht sei soll? Veah hott si gmessa mitt en shnuah? Du setsht dess geviss vissa!
[6] Uf vass voah da fuddah ksetzt? Adda veah hott da ekk-shtay glaykt,
[7] diveil es di meiya-shtanna mitt-nannah ksunga henn, un awl di kinnah Gottes gegrisha henn mitt frayt?
[8] Veah hott da say eikshlossa hinnich doahra, vo eah raus gebrocha is es vi aus en muddahs-leib,
[9] vo ich di volka gmacht habb fa sei glaydah sei, un en eigvikkeld habb mitt dunkelheit vi mitt vindla,
[10] vo ich een zrikk kshpatt habb bei doahra ufsetza mitt rikkel,
[11] un vo ich ksawt habb, ‘So veit daufsht du kumma un nett veidah; do is vo dei shtolsi vella shtobba zayla’?
[12] In dei zeit, hosht du selayva em meiya ksawt vass zu du, adda da dawk gmacht ohfanga?
[13] Hosht du da dawk gmacht di ekkah funn di eaht nemma, un di gottlohsa raus shidla?
[14] Vi's dawk vatt, fa'ennaht's di eaht vi vayyichah clay es gedrukt vatt bei en seal nei drikka, di hivla shtayn raus vi runsla in glaydah.
[15] Di gottlohsa greeya iahra lichtah vekk gnumma, un iahra ufkohvanah oahm is fabrocha.
[16] Bisht du in di vassah-shpringa fumm say ganga, adda uf em bodda fumm say gloffa?
[17] Voahra di doahra fumm doht gvissa zu diah; hosht du di doahra ksenna fumm deef dunkla?
[18] Hosht du fashtanna vi brayt es di eaht is? Sawk miah's, vann du awl dess vaysht.
[19] Vels is da vayk zu di helling iahra haymet? Vo voond's dunkla?
[20] Kansht du si an iahra blatz nemma? Vaysht du da vayk zu iahra heisah?
[21] Yau, du musht dess geviss vissa, veil du no shund geboahra voahsht! Du hosht shund so feel yoahra glaybt!
[22] Bisht du in di shtoah-heisah ganga es da shnay haybt; hosht du di shtoah-heisah ksenna es di shlohsa drinn sinn,
[23] selli es ich zrikk hayb fa di zeit funn druvvel, fa di zeit funn shtreit un greek?
[24] Vo is da blatz es di helling sich fadayld, un vo da east vind sich ausnannah blohst ivvah di eaht?
[25] Veah hott en blatz gegrawva fa's hohch reyyah-vassah deich lawfa, adda en pawt gmacht fa's gviddah deich gay,
[26] fa reyya uf's land bringa vo nimmand voond, in di vildahnis vo kenn mensh is,
[27] fa's drukka un dashtich land vessahra, so es graws vaxa kann?
[28] Hott da reyya en daett? Veah is da daett fumm dau meiyets?
[29] Aus vemm sei muddahs-leib kumd's ice, adda da reifa fumm himmel,
[30] vann's vassah so hatt vatt es en shtay, un da deef say kfriaht ovva druff?
[31] Kansht du di sivva shtanna funn Pleiades zammah binna, adda da shtrikk fumm Orion lohs macha?
[32] Kansht du di shtanna macha raus kumma an di recht zeit, adda da Beah fiahra im himmel mitt sei yungi?
[33] Vaysht du di adnunga funn di himla; kansht du selli adnunga ufsetza ivvah di eaht?
[34] Kansht du dei shtimm uf hayva zu di volka, un si macha dich zu dekka mitt reyyah.
[35] Kansht du di gviddah shtraycha naus shikka so es si gayn un sawwa zu diah, ‘Do sinn miah’?
[36] Veah gebt veisheit in's hatz, adda veah dutt fashtand in di gedanka?
[37] Veah hott genunk veisheit fa di volka zayla; veah kann di vassah-ksharra fumm himmel ausleahra,
[38] vann da shtawb hatt vatt, un di sholla zammah shtekka?
[39] Kansht du em layb sei flaysh hunda fa een, un di yunga layva satt macha,
[40] vann si in iahra lechah leiya, adda vann si am voahra sinn im hohcha veetz?
[41] Veah bringd ess-sach zu di grabb, vann iahra yungi zu Gott roofa, un rumm fleeya unni ebbes zu essa?”