[1] Noch sellem hott da Hiob sei maul uf gmacht un hott da dawk es eah geboahra voah fafluchet.
[2] Eah hott ksawt,
[3] “Loss da dawk es ich geboahra voah ausgrivva sei, un di nacht es es ksawt voah, ‘En boo is im muddahs-leib!’
[4] Loss sellah dawk dunkel sei, un loss Gott funn ovva-heah nix drumm gevva diveyya, un loss aw kenn licht druff sheina.
[5] Loss sellah dawk sei mitt dunkles un finshtahnis; loss en volk drivvah kumma; loss da dawk ivvah-kumma sei mitt shvatz dunkles.
[6] Loss heslichi dunkelheit ivvah selli nacht kumma; loss si nett gezayld sei mitt di dawwa fumm yoah; un aw nett mitt di moonada.
[7] Loss selli nacht unfruchtboah sei; un kenn fraylichi yacht keaht sei drinn.
[8] Loss selli es di dawwa faflucha, sellah dawk faflucha; un selli ess kenna, da Leviathan ufvekka.
[9] Loss di meiya-shtanna funn selli nacht dunkel sei; loss si voahra fa da dawk es nett kumma zayld, un aw nett di eahsht helling funn di sunn,
[10] veil's mei maemm iahra muddahs-leib nett zu gmacht hott, un mei awwa nett kalda hott funn druvvel sayna.
[11] Favass binn ich nett kshtauva in mei maemm iahra muddahs-leib, adda an di zeit es ich geboahra voah?
[12] Favass henn di gnee mich ohgnumma, adda di brusht, es ich sukla sett?
[13] Fa no hett ich mich shtill anna glaykt; ich veah am shlohfa un am roowa.
[14] Ich veah am shlohfa mitt kaynicha un roht-gevvah, es sich heisah viddah ufgebaut henn es nunnah kfalla voahra.
[15] Ich veah am shlohfa mitt roolahs, es iahra heisah kfild henn mitt gold un silvah.
[16] Favass voah ich nett fagrawva vi en doht-geboahra kind, vi en kind es es licht fumm dawk nett ksenna hott?
[17] Datt doon di ungettlicha shtobba druvvel macha, un selli es matt sinn greeya roo.
[18] Datt henn di kfangana fridda, si heahra di shtimm nett funn iahra meishtah.
[19] Di grohsa un di glenna sinn datt, da deensht-gnecht is frei funn seim meishtah.
[20] Favass is licht gevva zu selli es soffahra, un layva gevva zu di bedreebda im hatz,
[21] adda zu selli es voahra fa da doht es nett kumd, zu selli es da doht sucha vi en keshtlich ding,
[22] un sinn kfild mitt frayt, un froiya sich vann si's grawb finna?
[23] Favass is licht gevva zumm mann es nett vayst vass eem foah is, zumm mann es eigringd is bei Gott?
[24] Fa in blatz funn essa muss ich hatt shnaufa, mei geyammah lawft raus vi vassah.
[25] Vass ich kfeicht habb, is uf mich kumma; vass ich angsht katt habb, hott blatz gnumma.
[26] Ich habb kenn fridda un binn nett shtill; ich habb kenn roo, avvah yusht druvvel.”