[1] Makambo nazali kokòma ezali ya solo; Kristo ayebi 'tè nazali koloba lokuta té. Se ya motema na ngai ezali koyebisa yango, ndenge Molimo Mosantu azali kolakisa ngai yango:
[2] Ya solo, natondi penza na mawa, pe nazali koyoka motema pasi mingi,
[3] likolo ya bandeko na ngai Bayuda, oyo tobotamá na bango ekolo moko. Nakokaki kolinga kutu 'tè Nzambe ábwakela ngai lisumá pe ákabola ngai na Kristo na esika na bango.
[4] Bazali bato ya Israel, ekolo oyo Nzambe aponaká lokola bana na ye; Nzambe apesaká bango lokumu na ye, asalaká ná bango boyokani ndenge na ndenge, ayebisaká bango Mibeko na ye pe ndenge basengeli kosambela, pe apesaká bango bilaka minene.
[5] Bazali bana ya Abraham, Izaak pe Jakob; Kristo abotamaki na ekolo na bango. Lokumu ézala na Nzambe seko! Ye azali Mokonzi ya biloko nyonso. Amen.
[6] Nzokande elaka ya Nzambe ekei pamba té. Kasi ba-Israelite nyonso té bato bazali bato oyo Nzambe aponá.
[7] Pe ata babotami na libota ya Abraham, bango nyonso té bato bazali bana ya solo, pamba té Nzambe alobaká na Abraham boye: “Nakobanda kobenga bobele bana ya libota ya Izaak nde bana na yo.”
[8] Elakisi 'tè: bana oyo Abraham abotaki, bango nyonso té bato bazali bana ya Nzambe. Kasi Nzambe akamataki lokola bana ya solo bobele baoyo babotamaki po na elaka na ye.
[9] Pamba té Nzambe apesaká Abraham elaka boye: “Mbula ekoya, nakozonga lisusu kaka na eleko oyo pe Sara akozala na Mwana ya mobali.”
[10] Ezalaká ndenge moko, tango Rebeka abotaki mapasa: bazalaki bana ya tata moko, koko na biso Izaak.
[11] Nzokande liboso 'tè bábotama, atako basalaki nanu likambo moko té ya malamu to ya mabe, Nzambe alobaká na Rebeka: “Kulutu akozala mosali ya leki.” Alobaká bongo po na kolakisa 'tè ye aponaka bobele ndenge ye moko alingi; alukaka bobele baoyo ye moko abengi, atalaka misala na bango té.
[13] Ekòmamá boye: “Nalingi Jakob koleka Ezau.”
[14] Bongo tóloba nini? Nzambe azangi bosembo? Ata moke té!
[15] Pamba té alobaká na Moize boye: “Moto oyo nalingi koyokela ye mawa, nakoyokela ye mawa; moto oyo nalingi kopesa ye bolamu, nakopesa ye bolamu.”
[16] Ezali té po moto yango alingi to asali makasi; ezali bobele po Nzambe ayokeli ye mawa.
[17] Ekòmamá 'tè Nzambe alobaki boye na mokonzi monene ya Ejipte: “Natie yo mokonzi bobele po nálakisa nguya na ngai, pe bato báyeba lokumu na ngai na mokili mobimba.”
[18] Yango wana, Nzambe soki alingi, ayokeli moto mawa; pe soki alingi, akómisi moto motú makasi.
[19] Mbala mosusu moto akoki kotuna ngai boye: “Soki ezali bongo, po na nini Nzambe asilikelaka bato? Pamba té nani akoki koboya makambo Nzambe alingi?”
[20] Kasi yo moto, ozali nani po na kotia tembe ná Nzambe? Nani asi'amoná nzungu ya mabelé etuni moto oyo asalaki yango: “Po na nini osalaki ngai boye?”
[21] Moto oyo asalaka banzungu ya mabelé akoki kosalela mabelé ndenge alingi. Akoki kokamata ndambo moko ya mabelé po na kosala banzungu mibale: moko ya talo, mosusu ya pamba. Boye té?
[22] Toyebi 'tè Nzambe alingaki kolakisa kanda na ye pe komonisa bato nguya na ye. Nzokande azalaki kaka kokanga motema po na baoyo basengelaki kozwa etumbu pe kobunga.
[23] Na ndenge wana pe amonisi lokumu na ye oyo eleki ndelo. Pamba té ayokeli bato mosusu mawa, aponaki bango po ákabela bango lokumu na ye.
[24] Ezali nde biso bato oyo ye abengi; touti kaka na ekolo ya Bayuda té, kasi pe na bikolo mosusu.
[25] Alobaká boye na monoko ya profete Ozé: “Liboso bazalaki ekolo na ngai té; sik'oyo nabengi bango ekolo na ngai. Liboso nazalaki kolinga bango té; sik'oyo nabengi bango bato na ngai ya bolingo.
[26] Nalobaki na bango 'tè: ‘Bino bozali bato na ngai té'; sik'oyo bakobanda kobenga bango bana ya Nzambe ya bomoi.”
[27] Ezaya pe alobaká boye po na bato ya Israel: “Ata bato ya Israel bakómi ebele lokola mbuma ya zelo na libongo ya ebale, bobele mwa-ndambo na bango nde bakobika.
[28] Pamba té etikali moke Nkolo ákokisa maloba na ye nyonso na mokili.”
[29] Ezaya alobaká lisusu boye: “Soki Nkolo ya nguya nyonso átikaka ndambo ya bato na biso té, mbele tokómi lokola vile ya Sodome; mbele tokokani na vile ya Gomore.”
[30] Bongo, tóloba nini? Tóloba boye: bato oyo bayebaki Nzambe té, Nzambe azali kokómisa bango bosembo na miso na ye, atako bazalaki koluka yango té. Bakómi bosembo na nzela ya bondimi.
[31] Nzokande bato ya Israel bazalaki koluka Mibeko oyo ekokaki kokómisa bango bosembo; kasi bakokaki kotosa Mibeko yango té.
[32] Po na nini? Ezali po bazalaki kolanda nzela ya bondimi té, kasi babandaki kotia mitema na misala na bango moko. Babetaki libaku na “libanga ya moselu.”
[33] Ekòmamá boye: “Bóyoka! Natie na mboka Sion moto moko, ye akozala lokola libanga ya moselu oyo ekobanda kokweisa bato. Kasi moto nyonso oyo atie motema epai na ye akoyoka soni ata moke té.”