[1] Nan maten, sakrifikatè prensipal yo pran yon desizyon ansanm ak ansyen yo ak pwofesè lalwa yo ak tout Konsèy la. Yo mare Jezi mennen ale. Yo livre l bay Pilat.
[2] Pilat mande li: Èske ou se wa Juif yo? Jezi reponn li, li di: Ou di li!
[3] Sakrifikatè prensipal yo t ap akize li pou anpil bagay.
[4] Epi Pilat poze l kesyon ankò. Li di: Ou pa reponn anyen? Gade! Y ap temwaye yon bann bagay kont ou.
[5] Men, Jezi pa t reponn anyen ankò. Konsa, Pilat te sezi.
[6] Jou fèt, nenpòt prizonye moun yo te mande a, Pilat te konn lage l pou yo.
[7] Te gen yon prizonye yo rele Barabas ki te nan prizon avèk kèk konplotè parèy li. Yo te asasinen yon moun nan yon soulèvman.
[8] Foul la pran rele. Yo kòmanse mande pou Pilat fè menm sa li te toujou fè pou yo a.
[9] Men, Pilat reponn yo, li di: Èske nou vle mwen lage wa Juif yo pou nou?
[10] Li di sa, paske li te konnen se jalouzi sakrifikatè prensipal yo ki te lakòz yo fè arete Jezi.
[11] Men, sakrifikatè prensipal yo te chofe foul la pou yo te fè Pilat lage Barabas pou yo pito.
[12] Pilat reponn ankò, li di yo: Donk, kisa nou vle m fè ak nonm sa a, nou rele Wa Juif yo?
[13] Yo rele ankò: Krisifye li!
[14] Alò, Pilat di yo: Men, ki mal li fè? Yo rele pi rèd: Krisifye li!
[15] Pilat te vle fè pèp la plezi. Li lage Barabas pou yo. Li fè bat Jezi ak raso. Epi, li livre l pou yo krisifye li.
[16] Sòlda yo mennen li andedan lakou a, sa vle di nan palè gouvènè a. Epi, yo rasanble tout rejiman an.
[17] Yo abiye li an wouj fonse. Yo trese yon kouwòn pikan mete sou tèt li.
[18] Epi, yo kòmanse salye li: Viv wa Juif yo!
[19] Yo frape li nan tèt ak yon wozo. Yo krache sou li. Epi, yo ajenou kòmsi yo t ap adore li.
[20] Lè yo fin pase l nan betiz, yo retire rad wouj fonse a sou li, yo abiye l ak pwòp rad pa l, epi yo mennen l deyò pou yo krisifye li.
[21] Yon moun Sirèn t ap pase soti andeyò. Se te Simon, papa Aleksann ak Rifis. Yo fòse l pote kwa Jezi a.
[22] Yo mennen Jezi kote yo rele Gòlgota a. Sa vle di: Plas Zo Tèt.
[23] Yo ba li bwè diven melanje ak lami. Men, li pa pran.
[24] Lè yo fin krisifye li, yo separe rad li yo. Yo fè tirajosò pou yo deside kisa yo chak ka pran.
[25] Lè yo te krisifye l la, se te twazyèm è.
[26] Men ki pawòl yo te ekri kòm rezon kondanasyon li: WA JUIF YO.
[27] Yo te krisifye de malfektè avèk li: Youn adwat li, youn agoch li.
[28] Se konsa pawòl ki te ekri a te akonpli lè li te di: Yo mete li nan gwoup moun rebèl.
[29] Moun ki t ap pase yo t ap denigre li. Yo t ap souke tèt yo, epi yo t ap di: Ahaa! Se pa ou menm sa, ki detui tanp lan pou w bati l nan twa jou a!
[30] Sove tèt ou! Desann sou kwa a.
[31] Konsa tou, sakrifikatè prensipal yo ak pwofesè lalwa yo t ap pase l nan betiz. Youn t ap di lòt: Li sove lòt yo, men, li pa kapab sove tèt li.
[32] Se pou Kris la ki Wa Izrayèl la desann kwa a kounye a pou nou ka wè epi pou nou ka kwè nan li. Menm moun yo te krisifye avèk li yo t ap repwoche li.
[33] Lè sizyèm è a rive, vin gen fènwa sou tout peyi a, jis nan nevyèm è a.
[34] Nan nevyèm è a, Jezi rele byen fò. Li di: Eloyi, Eloyi, lama sabaktani? Sa vle di: Bondye mwen, Bondye mwen, poukisa w abandone mwen?
[35] Lè kèk nan moun ki te kanpe la yo tande sa, yo di: Men l ap rele Eli!
[36] Yon moun kouri plen yon eponj ak vinèg. Li mete li sou yon wozo. Li ba li bwè. Epi, li di: Tann. Annou wè si Eli ap vin desann li atè.
[37] Men, Jezi pouse yon gwo rèl. Epi, li rann dènye souf li.
[38] Rido tanp lan fann de bò, depi anwo jis anba.
[39] Santenye a te kanpe anfas Jezi. Lè li wè kijan Jezi rele epi kijan li rann dènye souf li, li di: An verite, nonm sa a te Pitit Bondye.
[40] Te gen kèk medam ki te rete lwen ap gade. Pami yo tou, te genyen Mari, moun Magdala; Mari, manman Ti Jak ak Joz; epi Salome.
[41] Se yo tou ki te suiv li epi ki te sèvi li lè li te Galile. Te genyen anpil lòt medam ki te monte Jerizalèm avèk li tou.
[42] Aswè te deja fin rive. Epitou, se te Preparasyon, sa vle di: jou lavèy saba a.
[43] Donk, Jozèf, moun Arimate, ale kareman devan Pilat pou li mande l kò Jezi. Li te yon manm respektab nan Konsèy la. Li menm tou, li t ap tann wayòm Bondye a.
[44] Men, Pilat te sezi tande Jezi te deja mouri. Li rele santenye a, li mande li si Jezi te mouri lontan.
[45] Lè santenye a fè li konnen ki lè, alò Pilat fè Jozèf kado kadav la.
[46] Jozèf achte twal len. Lè li desann kò a atè, li vlope l nan len an. Li mete li nan yon tonm yo te taye nan wòch. Epi, li woule yon wòch devan pòt tonm nan.
[47] Men, Mari, moun Magdala ak Mari, manman Joz, t ap gade kibò yo t ap mete li.