[1] Thi sâm-sṳ̍p ngièn si-ngie̍t chhû-ńg, ngài lâu pûn-ngìn chok-hi ke Yù-thai-ngìn he̍t chhai Pâ-pí-lùn ke Kâ-pâ-lû hò-pa sùn. Ke-sṳ̀ thiên tá khôi-lòi, ngài khon-tó Song-ti ke yi-siong.
[2] (Liá-khien sṳ fat-sên chhai Yok-ngâ-kîn-vòng pûn-ngìn chok-hi ke thi-ńg ngièn.)
[3] Ngài — Pu-sî ke lai-é, chi-sṳ̂ Yî-sî-kiet — chhai Pâ-pí-lùn ke Kâ-pâ-lû hò-pa sùn thâng-tó Song-chú lâu ngài kóng-fa, yu kám-kok tó Song-chú ke nèn-li̍t chhûng-mân ngài.
[4] Ngài yit-khon, khon-tó khòng-fûng tui pet-fông chhôi-lòi; yû ngiap-lang tui yit thai-tôi yùn chhut-lòi, yùn ke si-vì fî-sòng kông, chhai ngiap-lang tông-chûng chhiu-chhiong yû fat-kông ke sùn-kîm.
[5] Ngài khon-tó khòng-fûng tûng-ông yû si-ke sâng-vu̍t; kì-têu khon hí-lòi chhiong he ngìn,
[6] chúng-he tak-ke sâng-vu̍t yû si-chak mien, si-chak yi̍t-kap.
[7] Kì-têu ke kiok chhṳ̍t-chhṳ̍t, kiok-phàn chhiong ngiù-thài, chhiòn-phu chhiong chhu̍t-to kîm-kîm ke thùng án-ngiòng hâu-kông.
[8] Tak-ke sâng-vu̍t yû si-chak mien, si-chak yi̍t-kap yî-ngoi, tak-chak yi̍t-kap hâ hàn-yû yit-chak ngìn ke sú.
[9] Tak-ke sâng-vu̍t hiong-ngoi chhûn-chhut lióng-chak yi̍t-kap, lâu kak-piak sâng-vu̍t ke yi̍t-kap chiap-tén, sàng-cho si-kok-hìn; si-ke khiung-ha sái thîn-thûng, m̀-sṳ́ chón-sṳ̂n.
[10] Si-ke sâng-vu̍t lûng-chúng yû si-chak mien: Thèu-chhièn chhiong ngìn ke mien, yu-phién chhiong sṳ̂-é ke mien, chó-phién chhiong ngiù ke mien, heu-poi chhiong ên-tiâu ke mien.
[11] Kì-têu ke yi̍t-kap yit-tui chhai táng-kô tá-khôi lòi pî, lâu kak-piak sâng-vu̍t ke yi̍t-kap chiap-tén, yit-tui chhai hâ-poi châ-tén chhṳ-kâ ke sṳ̂n-thí.
[12] Tak-ke sâng-vu̍t ke mien hiong-tén si-fông; lìn hiong nai-vi hàng, kì-têu chhiu hiong nai-vi hàng, m̀-sṳ́ chón-sṳ̂n.
[13] Si-ke sâng-vu̍t ke tông-chûng chhiong yû chho̍k-tén ke fó-than, chhiong fó-pá án-ngiòng sái-lòi sái-hi; fó-pá phun-chhut fó, fat-chhut thien-kông.
[14] Sâng-vu̍t pî-lòi pî-hi, chhiong ngiap-lang án-kiak.
[15] Ngài khon-tén sâng-vu̍t ke sṳ̀, khon-tó tak-ke sâng-vu̍t ke sùn-thèu kok yû yit-chak lin-é tap-tén thi-mien.
[16] Si-chak lin-é ke ngoi-hìn lâu cho-fap chhiòn-phu khiung-yong, chhiong pó-sa̍k án-ngiòng hâu-kông. Tak-chak lin-é lap-tén nang-ngoi yit-chak lin-é, chhṳ̍t-kok siông-chhiet;
[17] án-ngiòng, si-chak lin-é cho-tet hiong só-yû ke fông-hiong thîn-thûng, m̀-sṳ́ chón-hiong.
[18] Lin-khiông kô-to tet-ngìn-kiâng, si-chak lin-khiông yû chhin-tô muk-chû.
[19] Si-ke sâng-vu̍t sái thîn-thûng, si-chak lin-é thèn-tén thîn-thûng; sâng-vu̍t lì-khôi thi-mien, lin-é thèn-tén lì-khôi thi-mien.
[20] Lìn to nai-vi, sâng-vu̍t chhiu to nai-vi; sâng-vu̍t sông-to nai-vi, lin-é ya khiung-yong sông-to nai-vi, yîn-vi sâng-vu̍t ke lìn chhai lin-é tông-chûng.
[21] Só-yî, tak-pái sâng-vu̍t sái thîn-thûng, thìn-chṳ́, ya-he lì-khôi thi-mien, lin-é chhiu thèn-tén thîn-thûng, thìn-chṳ́, ya-he lì-khôi thi-mien, yîn-vi sâng-vu̍t ke lìn chhai lin-é tông-chûng.
[22] Si-ke sâng-vu̍t thèu-nà-táng yû kiûng-chhông ke hìn-chhong, chhiong chhiuk-muk ke súi-chîn án-kông.
[23] Chhai kiûng-chhông hâ-poi khî-tén liá si-ke sâng-vu̍t; kì-têu chhûn-chhut yit-tui yi̍t-kap, lâu kak-piak ke yi̍t-kap chiap-tén, yu yung nang-ngoi yit-tui yi̍t-kap châ-koi chhṳ-kâ ke sṳ̂n-thí.
[24] Ngài thâng-tó kì-têu pî ke sṳ̀ yi̍t-kap só fat-chhut ke sâng; chhiu-chhiong thai-súi ke sâng-yîm, ya chhiong thai-kiûn chhai thai-sâng sê, yu chhiong chhiòn-nèn Song-ti ke sâng-yîm. Kì-têu thìn hâ-lòi ke sṳ̀ chhiu chiông yi̍t-kap sû hí-lòi,
[25] chúng-he hàn-yû sâng tui kì-têu thèu-nà-táng ke kiûng-chhông táng-kô chhòn-lòi.
[26] Kiûng-chhông ke táng-kô yû yit-chho chhiong he yung làm-pó-sa̍k chho ke pó-chho; táng-kô chhô-tén ke tông-chhiong he ngìn.
[27] Ngài khon-tó kì ke yêu-khiên yî-song chhiu-chhiong he fat-kông ke sùn-kîm, nui-ngoi chhiòn-phu chhiong fó; kì ke yêu-khiên hâ-poi chhiong fó, si-vì chhiòn-phu fat-kông.
[28] Liá kông-chhái lâu lo̍k-yí thiên yùn-chûng ke kiûng khiung-yong. Liá chhiu-he hién-mìn Song-chú lìm-to ke yùng-kông. Ngài yit khon-tó liá kông-kín chhiu phu̍k-lo̍k chhai thi-song. Chiap-tén, ngài yu thâng-tó yit-ke kóng-fa ke sâng.