[1] Ngài-têu pûn-ngìn chok-hi ke thi sṳ̍p-yit ngièn sṳ̍p-yit ngie̍t chhû-yit, Song-chú lâu ngài kóng-fa.
[2] Kì kóng: “Ngìn-chṳ́ â, Thai-ngì-sàng ke ngìn-mìn tông fôn-hí chhin-hêm: ‘Â-hâ! Yâ-lu-sat-lâng fí-me̍t lé! Kì sṳt-thet cho sên-lî ke nèn-li̍t! Kì m̀-voi chai cho ngài-têu kin-chên ke tui-sú lé!’
[3] “Só-yî, Ngài — Chṳ-kô ke Song-chú án-ngiòng kóng: Thai-ngì-sàng â, Ngài oi lâu ngì cho tui-thi̍t! Ngài oi seu-si̍p lie̍t-koet chhiong thai pô-long lòi kûng-tá ngì.
[4] Kì-têu oi pho-fái ngì ke sàng-chhiòng, chhak-thet ngì ke sàng-pó. Lièn nài-fún Ngài ya oi lâu kì koat-to chhiang-chhiang, chṳ́-yû liù-hâ kông-kông ke thai sa̍k-thèu.
[5] Thai-ngì voi kû-tân khî chhai hói-chûng; tá-ǹg ke voi chhai ke tó-hong sai ǹg-mióng. Ngài — Chṳ-kô ke Song-chú án-ngiòng siên-pu lé. Lie̍t-koet voi lòi chiông kì ke tûng-sî chhióng chhiang-chhiang;
[6] kì-têu voi yung kiam chhṳ̀-sí nui-liu̍k sàng-sṳ ke ngìn-mìn. Án-ngiòng, Thai-ngì chhiu voi tî Ngài he Song-chú.”
[7] Chṳ-kô ke Song-chú án-ngiòng kóng: “Ngài oi ham sṳ-kie chui-thai ke koet-vòng — Pâ-pí-lùn ke Nì-pu-kap-nì-sat-vòng lòi kûng-tá Thai-ngì. Kì tai-liâng thai-kiûn tui pet-fông lòi, yû pîn-mâ, chan-chhâ, lâu khì-pîn.
[8] Nui-liu̍k sàng-sṳ ke ngìn-mìn chhiòn-phu voi pûn-ngìn chhṳ̀-sí. Thi̍t-ngìn voi lòi chho kô-thòi, hí thú-tôi, khià tún-phài kûng-tá ngì.
[9] Kì-têu voi yung kûng-sàng ke chhùi-è chhong-vang sàng-chhiòng, yung thiet-kun chhak-thet sàng-lèu.
[10] Yit thai-khiùn ke chan-mâ chéu ko-hi, nài-fún pî-to mân-thiên mân-thi; khì-pîn thai-sâng sê, chan-chhâ lung-lung-kún, chṳ́n-thung sàng-chhiòng. Kì-têu chhṳ̍t-chhṳ̍t chhung-ngi̍p sàng-mùn, chhiu-chhiong chhung-ngi̍p yû pho-héu ke sàng.
[11] Khì-pîn chhai ngì ke thai-kiê séu-hong lon-chhong, yung kiam chhṳ̀-ngìn. Ngì sṳ̀n-meu kiên-ku ke chhû-é voi pûn-ngìn súng-vang.
[12] Thi̍t-ngìn oi chhióng ngì ke chhòi-pó, súng-vang sàng-chhiòng, fí-fái chhin-chiâng ke vuk-è, chiông sui-sa̍k, thôn-thet ke su-chiet-è te̍p-ngi̍p hói-tú.
[13] Ngài oi sṳ́ ngì-têu ke kô-sâng lâu khìm-sâng lûng-chúng thìn-thet.
[14] Ngài oi sṳ́ liá-chho sàng pien-cho kông-kông ke ngàm-sa̍k, tân-chhiang cho-tet pûn tá-ǹg ke ngìn chhai mien-táng sai mióng-è; ngì mò fap-thu chhùng-kien. Ngài — Chṳ-kô ke Song-chú án-ngiòng siên-pu lé.”
[15] Chṳ-kô ke Song-chú tui Thai-ngì án-ngiòng kóng: “Ngì pûn-ngìn cham-liâng ke sṳ̀, ngìn-mìn voi pûn-ngìn chhṳ̀-thet; hói-sùn ke ngìn-mìn thâng-tó kì-têu thai-sâng hêm kiu-miang, chhiu voi chhin chho̍k-kiâng.
[16] Hói-sùn ke-têu vòng chhiòn-phu voi lì-khôi kì-têu ke pó-chho, thot-hâ vòng-fu̍k lâu siu-fâ ke sâm, chhin chho̍k-kiâng chhô chhai thi-nài-hâ. Ngì ke miang-yun hoi kì-têu kiâng-to yit-chhṳ̍t kín-chûn.
[17] Kì-têu voi vi ngì chhong liá-sú pî-ôi ke kô: Chhut-miàng ke sàng-sṳ fí-me̍t lé! Kì ke-têu chhai hói-song ke sòn-è chhiòn-phu pûn-ngìn sêu-me̍t. Kì ke ngìn-mìn sṳt chhai hói-song cho vòng, hói-sùn ke ngìn-mìn sà-sà tû kiâng kì.
[18] Chúng-he, kì vang-thet ke-ngit, chung hói-tó chhiòn-phu pi̍t-pi̍t-chhat, tó-song ke ngìn-mìn chhiòn-phu yîn-vi án-ngiòng ke kiet-khiu̍k fî-sòng chho̍k-kiâng.”
[19] Chṳ-kô ke Song-chú án-ngiòng kóng: “Ngài oi sṳ́ ngì fông-fi, chhiong mò-ngìn he̍t ke sàng. Ngài oi yung chhṳ̂m-yên thai-hói ke súi chiông ngì chim-thet.
[20] Ngài oi chiông ngì súng-lo̍k yîm-kiên, sṳ́ ngì lâu sí-ngìn khiung-ha. Ngài oi chiông ngì koân chhai yîm-kiên, chhai ke yún-yén fông-liòng ke sàng lâu sí-ngìn khiung-ha. Ngì chhie̍t-tui m̀-voi chhùng-sîn chhut-hien chhai ngìn-kiên; yit-thin m̀-voi chai yû-ngìn he̍t chhai ngì ke-vi.
[21] Ngài oi sṳ́ ngì tù-tó tet-ngìn-kiâng ke kiet-khiu̍k, m̀-voi chai-yû ngì ke chhùn-chhai. Na-he yû-ngìn lòi chhìm ngì, chhie̍t-tui chhìm m̀-tó.” Chṳ-kô ke Song-chú án-ngiòng siên-pu lé.