[1] Song-ti ham ngài vi Yî-set-lie̍t ke chung vòng-chṳ́ cho liá-sú ôi-kô:
[2] Ngiâ-mê he sṳ̂-mà, phu̍k chhai kûi-khiùn kûng-sṳ̂ chûng; kì chhai seu-chong sṳ̂-é tông-chûng hiuk se sṳ̂-é.
[3] Kì hiuk-thai yit-chak se sṳ̂-é sàng-cho seu-chong sṳ̂-é; seu-chong sṳ̂-é ho̍k-voi tá-lia̍p, ho̍k-voi sṳ̍t ngìn.
[4] Lie̍t-koet thâng-tó, chiông kì koái-ngi̍p chhṳ̂m-hâng; kì-têu yung kiêu-é chiông kì thô-to Âi-khi̍p.
[5] Sṳ̂-mà tén-to sîm chho̍k-kip chhie̍t-mong; kì yu nang-ngoi hiuk-thai yit-chak se sṳ̂-é sàng-cho seu-chong sṳ̂-é.
[6] Seu-chong sṳ̂-é thèn-tén kûi-khiùn sṳ̂-é tak só-chhai chéu-lòi chéu-hi; kì ya ho̍k-voi tá-lia̍p, ho̍k-voi sṳ̍t ngìn.
[7] Kì pho-fái sàng-pó, tá-fái sàng-sṳ; kì thai-sâng hô, chhiòn-thi ke ngìn kiâng-to pi̍t-pi̍t-chhat.
[8] Lie̍t-koet tui si-mien pat-fông lòi vì kì; kì-têu tá-khôi lò-mióng, chiông kì koái-ngi̍p chhṳ̂m-hâng.
[9] Kì-têu yung kiêu-é chiông kì thô-ngi̍p lûng-é, tai-to Pâ-pí-lùn-vòng ke-vi; kì-têu chiông kì koân-ngi̍p kâm-ngiu̍k, Yî-set-lie̍t ke khiùn-sân mò chai thâng-tó kì chhin-sê ke sâng.
[10] Ngiâ-mê chhiong yit-thèu chung chhai hâi-súi sùn ke phù-thò-su, yîn-vi súi fûng-fu, kî-ya̍p cha̍t-cha̍t, kó-chṳ́ tông-kiet.
[11] Kì ke su-khoá chhin-ngang, hó cho vòng ke chhóng-è; kì ke su-sṳ̂n kô-thai, chhêu-ko khì-thâ su-é ke kî-ya̍p; kì ke su-mî kô-to tù-thiên, yén-yén chhiu khon tet-tó.
[12] Chúng-he, yû fat-khién ke sú chiông kì lièn-kîn pâng-hí, vok chhai thi-song, pûn tûng-fûng chhôi-châu, su-khoá áu-thôn, kó-chṳ́ châu-thet, pûn fó-sêu chhiang-chhiang.
[13] Liá-ha kì pûn-ngìn chung chhai khóng-yâ, tông-châu mò-súi ke só-chhai.
[14] Su-koáng chho̍k-fó, su-khoá lâu kó-chṳ́ chhiòn-phu sêu-thet; kì sa mò chhin-ngang ke su-khoá, hó cho vòng ke chhóng-è. Liá he yit-sú ôi-kô; liá-sú ôi-kô yit-chhṳ̍t liù-chhòn.