[1] Song-chú ke thai-nèn lìm-to ngài sṳ̂n-song; Kì ke Lìn tai ngài to sân-lak tú. Ke sân-lak tú mân-phien he kut-hài.
[2] Kì tai ngài kîn-ko ke-têu kut-hài tông-chûng, ngài khon-tó sân-lak tú tôi-mân chhin-châu ke kut-thèu.
[3] Kì lâu ngài kóng: “Ngìn-chṳ́ â, liá-têu kut-hài voi fán-sâng mò?” Ngài en-kóng: “Chṳ-kô ke Song-chú â, chṳ́-yû Ngì chang tî!”
[4] Kì kóng: “Oi hiong liá-têu kut-hài kóng yi-ngièn, lâu châu kut-hài kóng, oi thâng Song-chú ke fa.
[5] Oi lâu kì-têu kóng, Ngài — Chṳ-kô ke Song-chú tui kì-têu kóng: Ngài oi phùn-hi ngi̍p ngì-têu tî-poi, sṳ́ ngì-têu fán-sâng.
[6] Ngài oi sṳ́ ngì-têu sâng-kîn yu sâng-ngiuk, yèn-heu pâu yit-chhèn phì. Ngài oi phùn-hi ngi̍p ngì-têu tî-poi, sṳ́ ngì-têu fán-sâng. Án-ngiòng, ngì-têu chhiu voi tî Ngài he Song-chú.”
[7] Só-yî, ngài cheu Song-chú ke min-lin kóng yi-ngièn. Ngài kóng ke sṳ̀, ngài thâng-tó thîn-thûng ke sâng, khon-tó kut-thèu lâu kut-thèu lièn-kiet hí-lòi.
[8] Ngài tông-khon ke sṳ̀, kut-thèu khôi-sṳ́ sâng-kîn yu sâng-ngiuk, yèn-heu pâu yit-chhèn phì, chúng-he sṳ̂n-thí hàn m̀-voi théu-hi.
[9] Song-chú lâu ngài kóng: “Ngìn-chṳ́ â, ngì oi hiong fûng kóng yi-ngièn, lâu kì kóng, Chṳ-kô ke Song-chú án-ngiòng kóng: Tui si-mien pat-fông chhôi-lòi, chhôi-ngi̍p liá-têu pûn-ngìn chhṳ̀-sí ke, sṳ́ kì-têu fán-sâng.”
[10] Só-yî, ngài cheu Song-chú ke min-lin kóng yi-ngièn, hi chin-ngi̍p to kì-têu tî-poi, kì-têu chhiu fán-sâng ko-lòi, yu khî hí-lòi. Kì-têu chhiu sàng-cho khi̍t-thai ke kiûn-chhui.
[11] Song-chú lâu ngài kóng: “Ngìn-chṳ́ â, Yî-set-lie̍t chhiòn-koet ngìn chhiu-chhiong liá-têu kut-hài. Kì-têu ngin-vì chhṳ-kâ kut-thèu châu-thet, yí-kîn mò hî-mong, pûn-ngìn sêu-me̍t chhiang-chhiang.
[12] Só-yî, ngì oi hiong Ngài ke chṳ́-mìn Yî-set-lie̍t kóng yi-ngièn, lâu kì-têu kóng, Ngài — Chṳ-kô ke Song-chú án-ngiòng kóng: Ngài oi tá-khôi ngì-têu ke fùn-mu, sṳ́ ngì-têu hong hí-lòi, thu ngì-têu chón-to Yî-set-lie̍t pún-thi.
[13] Ngài tá-khôi ngì-têu ke fùn-mu, sṳ́ ngì-têu hong hí-lòi yî-heu, ngì-têu chhiu voi tî Ngài he Song-chú.
[14] Ngài oi chiông Ngài ke Lìn phùn-ngi̍p ngì-têu tî-poi, sṳ́ ngì-têu fán-sâng, pûn ngì-têu he̍t chhai chhṳ-kâ ke thú-thi. Án-ngiòng, ngì-têu chhiu voi tî Ngài he Song-chú. Ngài kóng-ko ke, Ngài yit-thin voi sṳ̍t-hàng. Ngài — Song-chú án-ngiòng siên-pu lé.”
[15] Song-chú yu lâu ngài kóng-fa;
[16] Kì kóng: “Ngìn-chṳ́ â, ngì nâ yit-kî su kun-é lòi, táng-kô siá ‘Yù-thai vòng-koet’, yu nâ nang-ngoi yit-kî su kun-é lòi, táng-kô siá ‘Yî-set-lie̍t vòng-koet’,
[17] yèn-heu chiông lióng-kî su kun-é kha̍k chhai sú-chûng, lióng-thèu siông-chiap, lièn-cho yit-kî su kun-é.
[18] Na-he ngì ke thùng-pâu mun ngì, liá he má-ke yi-sṳ,
[19] ngì chhiu lâu kì-têu kóng, Ngài — Chṳ-kô ke Song-chú oi chiông thoi-péu Yî-set-lie̍t ke-kî su kun-é lâu thoi-péu Yù-thai ke-kî su kun-é chiap khiung-ha, sṳ́ lióng-kî su kun-é chhai Ngài sú-chûng sàng-cho yit-kî.
[20] “Ngì oi chhai ngìn-mìn mien-chhièn chiông ke lióng-kî yû siá-sṳ ke su kun-é kha̍k chhai sú-chûng, pûn kì-têu khon-tó.
[21] Yèn-heu, ngì oi lâu kì-têu kóng, Ngài — Chṳ-kô ke Song-chú oi chiông Ngài ke chṳ́-mìn tui kì-têu pûn-ngìn chok-hi ke kok-koet tai chhut-lòi, tui si-vì si̍p-ha̍p kì-têu, yèn-heu thu kì-têu chón-to pún-koet.
[22] Ngài oi chhai ke-vi, chhai Yî-set-lie̍t ke-têu sân-táng, chiông kì-têu lièn-ha̍p hí-lòi, sàng-cho yit-ke koet-kâ. Kì-têu voi su yit-ke kiûn-vòng ke thúng-chhṳ, m̀-voi chai fûn-cho lióng-chak koet-kâ.
[23] Kì-têu m̀-voi chai pai sià-ok ke ngiéu-siong tá-lá-sap chhṳ-kâ, ya m̀-voi chai phai-fái fam-chhui. Ngài oi kiu kì-têu lì-khôi fam-chhui lâu phoi-ngia̍k ke sên-fa̍t. Ngài oi sé-chhiang kì-têu. Kì-têu oi cho Ngài ke chṳ́-mìn; Ngài oi cho kì-têu ke Song-ti.
[24] Voi yû yit-ke chhiong Ngài phu̍k-ngìn Thai-ví ke kiûn-vòng chhut-hien; kì voi cho kì-têu ke vòng, cho kì-têu ke mu̍k-ngìn. Kì-têu voi sṳ̀n-sîm chûn-hàng Ngài ke fap-li̍t lâu kie-min.
[25] Kì-têu voi he̍t chhai Ngài su-pûn Ngài phu̍k-ngìn Ngâ-kok ke-te thú-thi, chhiu-he kì-têu ke chú-siên he̍t-ko ke thú-thi. Kì-têu lâu kì-têu ke heu-thoi voi yún-yén he̍t chhai ke-vi. Voi yû yit-ke chhiong Ngài phu̍k-ngìn Thai-ví ke kiûn-vòng yún-yén thúng-chhṳ kì-têu.
[26] Ngài oi lâu kì-têu li̍p phìn-ôn ke yok, he yún-yén ke yok. Ngài oi sṳ̂-ên cheu-ku kì-têu, pûn kì-têu ngìn-khiéu chen-kâ, yu oi sṳ́ Ngài ke sṳn-thien yún-yén sat-li̍p chhai kì-têu ke thú-thi.
[27] Ngài oi lâu kì-têu he̍t chhai ke-vi. Ngài oi cho kì-têu ke Song-ti; kì-têu oi cho Ngài ke chṳ́-mìn.
[28] Ngài sṳ́ Ngài ke sṳn-thien yún-yén sat-li̍p chhai kì-têu tông-chûng ke sṳ̀, van-koet chhiu voi tî Ngài — Song-chú kién-sién Yî-set-lie̍t, sṳ́ kì fûn-phe̍t vì-sṳn cho Ngài ke chṳ́-mìn.”