[1] Ke-ngìn tai ngài chón-to sṳn-thien ngoi-yen ke tûng-mùn. Liá-mùn he koân-tén ke.
[2] Song-chú lâu ngài kóng: “Liá-mùn yit-thin oi yún-yén koân-tén, cho-m̀-tet tá khôi-lòi. Só-yû ke ngìn cho-m̀-tet tui liá-mùn chhut-ngi̍p, yîn-vi Ngài — Song-chú, Yî-set-lie̍t ke Song-ti yí-kîn tui liá-mùn ngi̍p-hi. Liá-mùn oi yún-yén koân-tén.
[3] Chṳ́-yû chhai-vi ke kiûn-vòng, kì cho-tet to liá-vi lòi, chhô chhai Ngài mien-chhièn sṳ̍t kiûng-piáng. Kì yit-thin oi tui ngoi-yen ke mùn-lòng chhut-ngi̍p.”
[4] Chiap-tén, ke-ngìn tai ngài thûng-ko pet-mùn, lòi-to sṳn-thien thèu-chhièn. Ngài yit-khon, chhiu khon-tó Song-chú ke yùng-kông chhûng-mân Kì ke sṳn-thien; ngài chhiu phu̍k chhai thi-song.
[5] Song-chú lâu ngài kóng: “Ngìn-chṳ́ â, oi chu-yi ngì só khon-tó, só thâng-tó ke yit-chhiet. Ngài oi chiông liá sṳn-thien ke kûi-chet thiàu-li lâu ngì kóng. Ngì oi chu-yi nai-chúng ngìn cho-tet ngi̍p-hi sṳn-thien, nai-chúng ngìn cho-m̀-tet ngi̍p-hi sṳn-thien.
[6] “Ngì oi lâu ke-têu phoi-ngia̍k ke Yî-set-lie̍t-ngìn kóng, Ngài — Chṳ-kô ke Song-chú m̀-voi chai thûn-ngiûn kì-têu só-cho yit-chhiet sià-ok ke sṳ.
[7] Kì-têu hiong Ngài hien sên-ngì ke yù lâu hiet ke sṳ̀, ya pûn ke-têu mò chiap-su kot-lî, m̀ fu̍k-chhiùng Ngài ke ngoi-chhu̍k-ngìn ngi̍p-to sṳn-thien, lòi tá-lá-sap Ngài ke sṳn-thien. Ngài ke chṳ́-mìn cho liá yit-chhiet sià-ok ke sṳ, vì-poi Ngài ke yok.
[8] Kì-têu chhṳ-kâ mò chhai Ngài ke sṳn-thien chṳp-hàng yû-koân sṳn-vu̍t ke kûi-kí, fán-chón ham ngoi-chhu̍k-ngìn lòi fu-chit.
[9] “Ngài — Chṳ-kô ke Song-chú án-ngiòng siên-pu: Mò chiap-su kot-lî, m̀ fu̍k-chhiùng Ngài ke ngoi-chhu̍k-ngìn, cho-m̀-tet ngi̍p-hi Ngài ke sṳn-thien, lièn he̍t chhai Yî-set-lie̍t-ngìn tông-chûng ke ngoi-chhu̍k-ngìn ya cho-m̀-tet ngi̍p-hi.”
[10] Song-chú lâu ngài kóng: “Yû-têu Li-vi kî-chhu̍k ke ngìn thèn khì-thâ ke Yî-set-lie̍t-ngìn hàng chhâ-lu, lì-khôi Ngài yén-yén, hi pai ngiéu-siong, kì-têu yit-thin oi tâm-tông chhṳ-kâ ke chhui-ko.
[11] Kì-têu cho-tet chhai Ngài ke sṳn-thien cho chóng-mùn ke, chhai sṳn-thien cho kûng-ngìn. Kì-têu cho-tet thoi ngìn-mìn chhṳ̀ thèu-sâng cho sêu-fa-chi lâu khì-thâ ke chi-vu̍t, lùn-pân khî-tén vi ngìn-mìn fu̍k-vu.
[12] Chúng-he, kì-têu sṳt thoi Yî-set-lie̍t-ngìn chú-chhṳ̀ pai ngiéu-siong ke sṳ, hoi ngìn-mìn fam-chhui, só-yî, Ngài — Chṳ-kô ke Song-chú fat-sṳ, kì-têu yit-thin oi tâm-tông chhṳ-kâ ke chhui-ko.
[13] Kì-têu cho-m̀-tet cho chi-sṳ̂ lòi sṳ-fung Ngài, ya cho-m̀-tet chiap-khiun Ngài ke sṳn-vu̍t ya-he ngi̍p-hi chṳ-sṳn-só. Liá chhiu-he kì-têu cho ke-têu sià-ok ke sṳ yin-kôi su ke hìn-fa̍t.
[14] Ngài oi phai kì-têu cho kûng-ngìn, chóng sṳn-thien, pin phan-lî khì-chûng yit-chhiet ke sṳ-vu̍t.”
[15] Chṳ-kô ke Song-chú kóng: “Khì-thâ Yî-set-lie̍t-ngìn lì-khôi Ngài ke sṳ̀, Li-vi kî-chhu̍k, Sat-tuk heu-thoi ke chi-sṳ̂ ki-siu̍k chhai sṳn-thien sṳ̀n-sîm sṳ-fung Ngài. Só-yî, liá-ha chṳ́-yû kì-têu chang cho-tet chiap-khiun Ngài, sṳ-fung Ngài. Kì-têu oi chhai Ngài mien-chhièn hien sên-ngì ke yù lâu hiet.
[16] Chṳ́-yû kì-têu chang cho-tet ngi̍p-hi sṳn-thien, chhai Ngài ke chi-thàn chhièn sṳ-fung, chṳp-hàng Ngài só fûn-fu ke chit-ngim.
[17] Kì-têu ngi̍p nui-yen ke mùn, yit-thin oi chok mà-sâ ke sâm-fu. Kì-têu chhai nui-yen tú ya-he sṳn-thien chhṳ̍t-pân ke sṳ̀, chhie̍t-tui cho-m̀-tet chok yòng-mô ke sâm-fu.
[18] Kì-têu oi yung mà-sâ pâu thèu-nà, chok mà-sâ fu, chúng-he cho-m̀-tet chok voi sṳ́ sṳ̂n-thí chhut-hon ke sâm-fu.
[19] Kì-têu to ngoi-yen lâu ngìn-mìn chiap-khiun, oi siên thot-thet chhai sṳn-thien chhṳ̍t-pân sṳ̀ só-chok ke lî-fu̍k, piong chhai sṳn-thien ke vàng-vuk, chok phe̍t ke sâm-fu, chang m̀-voi sṳ́ sṳn-fu̍k sông-hoi ngìn-mìn.
[20] “Chi-sṳ̂ cho-m̀-tet thi-kông-thèu ya-he liù chhòng thèu-nà-mô. Thèu-nà-mô oi siû-chién.
[21] Chi-sṳ̂ ngi̍p-hi nui-yen yî-chhièn, só-yû ke chiú cho-m̀-tet lîm.
[22] Chi-sṳ̂ cho-m̀-tet lâu koá-fu ya-he lì-fûn ke fu-ngìn-kâ kiet-fûn. Chi-sṳ̂ tân-chhiang cho-tet lâu Yî-set-lie̍t ke thùng-chṳ̂n-ńg ya-he chi-sṳ̂ ke koá-fu kiet-fûn.
[23] “Chi-sṳ̂ oi kau-thô Ngài ke chṳ́-mìn fûn-phe̍t sṳn lâu siu̍k, lî-ngì song chhiang-li ke ya-he mò chhiang-li ke tûng-sî.
[24] Chi-sṳ̂ oi cheu Ngài ke fap-li̍t phan-ton kiu-fun. Kì-têu oi cheu Ngài ke kûi-chet thiàu-li chûn-sú chûng-kau chiet-khì, sú ôn-sit-ngit cho sṳn-ngit.
[25] “Chhù-liáu chhṳ-kâ ke yà-ôi, chṳ́-ńg, hiûng-thi, ya-he mò chhut-ka chí-moi ke sṳ̂-thí yî-ngoi, chi-sṳ̂ yîn-vi miâ-tó phe̍t-ngìn ke sṳ̂-thí voi sṳ́ chhṳ-kâ chhai lî-ngì song mò chhiang-li.
[26] Kì chhiang-li yî-heu, yit-thin oi tén chhit-ngit.
[27] Kì ngi̍p-hi sṳn-thien ke nui-yen, chhai sṳn-thien sṳ-fung ke-ngit, oi siên vi chhṳ-kâ hien su̍k-chhui-chi. Ngài — Chṳ-kô ke Song-chú án-ngiòng siên-pu lé.
[28] “Chi-sṳ̂ só pûn-tó ke sán-ngia̍p chhiu-he chi-sṳ̂ ke chṳt-fun. Kì-têu cho-m̀-tet chhai Yî-set-lie̍t chûng pûn thú-thi cho sán-ngia̍p. Ngài he kì-têu ke sán-ngia̍p.
[29] Su-chi, su̍k-chhui-chi, lâu su̍k-ko-sṳt-chi chhiòn-phu oi pûn chi-sṳ̂ cho sṳ̍t-vu̍t. Yî-set-lie̍t chûng só-yû hien-pûn Ngài ke tûng-sî chhiòn-phu oi pûn kì-têu.
[30] Tak-ngièn thi-yit pái sû-sṳ̀n ke nùng-chok-vu̍t lâu hien-pûn Ngài thi̍t-phe̍t ke lî-vu̍t chhiòn-phu oi pûn chi-sṳ̂. Ngìn-mìn phoi-piáng ke sṳ̀, oi chiông thi-yit te pûn chi-sṳ̂, án-ngiòng, Ngài chhiu su-fuk pûn kì-têu ke kâ.
[31] Chi-sṳ̂ cho-m̀-tet sṳ̍t chhṳ-yèn sí-thet ya-he pûn yâ-chhu ngâu-sí ke tiâu-é lâu thèu-sâng.”