[1] Ngài-têu pûn-ngìn chok-hi ke thi sṳ̍p-ngi ngièn sṳ̍p-ngi ngie̍t chhû-yit, Song-chú lâu ngài kóng-fa.
[2] Kì kóng: “Ngìn-chṳ́ â, ngì oi kín-ko Âi-khi̍p-vòng, vi kì cho ôi-kô, hiong kì chhòn Ngài ke fa kóng: Yî-chhièn ngì chhai lie̍t-koet chûng chhiong seu-chong sṳ̂-é; liá-ha ngì kha chhiong he hò-pa tú ke ngo̍k-ǹg thin-thin. Ngì chhai hò-pa tú luk-súi, yung kiok kiâu hò-pa tú ke nài, sṳ́ hò-pa súi pien vùn-vùn.
[3] Chhin-tô koet-kâ ke ngìn-mìn chhi-si̍p ke sṳ̀, Ngài — Chṳ-kô ke Song-chú oi ve Ngài ke mióng-è chok ngì, ham kì-têu chiông mióng-è lâi sông-lòi.
[4] Ngài oi chiông ngì fit chhai thi-song, vok chhai fông-thi, ham só-yû khûng-chûng ke fî-niâu lâu thi-song ke chéu-chhu lòi sṳ̍t ngì.
[5] Ngài oi yung ngì mièn-thet ke sṳ̂-thí phû-mân sân-liâng, thùn-mân sân-lak;
[6] Ngài oi yung ngì liù-chhut ke hiet, nâ-hi mân-phien kín phat, sṳ́ kì tui sân-táng yit-chhṳ̍t liù-ngi̍p hò-pa.
[7] Ngài fí-me̍t ngì ke sṳ̀ oi châ-tén thiên, sṳ́ sên-é am-thet, yung vû-yùn tí-tén ngit-thèu, ngie̍t-kông ya mò fat-kông.
[8] Ngài oi koân-thet thiên-táng só-yû ke kông, sṳ́ ngì ke thú-thi pien-cho vû-am. Ngài — Chṳ-kô ke Song-chú án-ngiòng siên-pu lé.
[9] “Ngài chiông ngì me̍t-mòng ke sêu-sit chhòn-to ngì m̀-sṳt ke koet-kâ, ke-têu ngìn-mìn ke sîm voi tông yù-sèu.
[10] Ngài chhai chhin-tô koet-mìn lâu koet-vòng mien-chhièn hiong ngì pí yit-ha kiam, ke-têu koet-vòng lâu koet-mìn chhiu voi chho̍k-kiâng hí-lòi. Kì-têu khon-tó Ngài ngióng-pân sêu-me̍t ngì, yit sióng-tó chhṳ-kâ ke miang-yun chhiu mò-kat mò-sat.”
[11] Chṳ-kô ke Song-chú kóng: “Ngì yit-thin voi sṳ̀n-tó Pâ-pí-lùn-vòng ke tô-kiam.
[12] Ngài oi ham ke-têu tông-ok ke koet-kâ lòi kûng-tá ngì; kì-têu ke yúng-sṳ oi yung kiam chhṳ̀-thet ngì ke ngìn-mìn. Âi-khi̍p só-yû ke ngìn-mìn lâu Âi-khi̍p só khoâ-khiéu ke yit-chhiet chhiòn-phu oi sêu-me̍t-thet.
[13] Ngài oi chhai hò-pa sùn chhṳ̀-thet ngì ke thèu-sâng; m̀-voi chai yû-ngìn ya-he thèu-sâng lòi kiâu hò-pa tú ke nài, sṳ́ hò-pa súi pien vùn-vùn.
[14] Ngài oi sṳ́ Nì-lò-hò ke súi pien-chhîn; Ngài oi sṳ́ hò-pa súi chhiong yù liù án-man. Ngài — Chṳ-kô ke Song-chú án-ngiòng siên-pu lé.
[15] Ngài sṳ́ Âi-khi̍p fông-fi, sṳ́ liá-thi só chhûng-mân ke chhie̍t-thet, sêu-me̍t kì ke ngìn-mìn ke-sṳ̀, kì-têu chhiu voi tî Ngài he Song-chú.
[16] Liá kín-ko voi sàng-cho yit-sú ôi-kô. Kok-koet ke fu-ngìn-kâ chhiòn-phu oi vi Âi-khi̍p lâu kì ke ngìn-mìn chhong liá-sú ôi-kô. Ngài — Chṳ-kô ke Song-chú án-ngiòng siên-pu lé.”
[17] Ngài-têu pûn-ngìn chok-hi ke thi sṳ̍p-ngi ngièn sṳ̍p-ngi ngie̍t sṳ̍p-ńg, Song-chú lâu ngài kóng-fa.
[18] Kì kóng: “Ngìn-chṳ́ â, ngì oi vi Âi-khi̍p ke ngìn-mìn thai-kieu, yèn-heu chiông Âi-khi̍p súng-ngi̍p yîm-kiên; pûn kì lâu ke-têu khiòng-koet ke ngìn-mìn khiung-yong lo̍k-hi yîm-kiên chui-chhṳ̂m ke só-chhai, thùng só-yû lo̍k chhai ke tî-poi ke ngìn khiung-ha.
[19] Ngì oi tui kì-têu kóng: Ngì láu-tó ngì pí phe̍t-ngìn kha-chiâng he-mò? Lo̍k-hi yîm-kiên, lâu mò kin-khièn ke ngìn vang khiung-ha.
[20] “Âi-khi̍p-ngìn oi lâu ke-têu pûn tô-kiam chhṳ̀-sí ke ngìn vang khiung-ha. Âi-khi̍p yit-thin oi sí chhai tô-ha; oi chiông kì lâu su̍k kì ke chung-ngìn thô chhut-hi.
[21] Chui-yúng ke chan-sṳ oi chhai yîm-kiên ngiàng-chiap Âi-khi̍p-ngìn lâu pông-chhu Âi-khi̍p ke ngìn. Kì-têu hêm: ‘Ke-têu mò kin-khièn, pûn tô-kiam chhṳ̀-sí ke ngìn chhiòn-phu lo̍k-to yîm-kiên lòi lé; kì-têu chhiòn-phu vang chhai liá-vi!’
[22] “Â-sut chhai ke-vi, chû-vì chhiòn-phu he kì chan-sṳ ke chhúng-pû. Kì-têu chhiòn-phu he pûn tô-kiam chhṳ̀-sí ke.
[23] Kì-têu ke chhúng-pû chhai yîm-kiên chui-chhṳ̂m ke só-chhai. Kì só-yû ke chan-sṳ chhiòn-phu he pûn tô-kiam chhṳ̀-sí ke, kì-têu ke chhúng-pû vì-tén kì ke fùn-mu. Kì-têu hàn-sâng ke sṳ̀ hoi-ngìn kiâng-to pi̍t-pi̍t-chhat.
[24] “Yî-làn chhai ke-vi, chû-vì chhiòn-phu he kì ngìn-mìn ke chhúng-pû. Kì-têu lo̍k-to yîm-kiên he pûn tô-kiam chhṳ̀-sí ke; kì-têu he mò kin-khièn ke ngìn. Kì-têu hàn-sâng ke sṳ̀, sṳt hoi-ngìn kiâng-to pi̍t-pi̍t-chhat, liá-ha lâu lo̍k chhai yîm-kiên ke ngìn khiung-ha su vú-yu̍k.
[25] Yî-làn vang chhai chan-sí ke ngìn tông-chûng, chû-vì chhiòn-phu he kì ngìn-mìn ke chhúng-pû. Kì-têu chhiòn-phu he mò kin-khièn, pûn tô-kiam chhṳ̀-sí ke. Kì-têu hàn-sâng ke sṳ̀, sṳt hoi-ngìn kiâng-to pi̍t-pi̍t-chhat, liá-ha lâu lo̍k chhai yîm-kiên ke ngìn khiung-ha su vú-yu̍k.
[26] “Mí-sat lâu Thú-pâ ya chhai ke-vi, chû-vì chhiòn-phu he kì-têu ngìn-mìn ke chhúng-pû. Kì-têu chhiòn-phu he mò kin-khièn, pûn tô-kiam chhṳ̀-sí ke. Kì-têu hàn-sâng ke sṳ̀, sṳt hoi-ngìn kiâng-to pi̍t-pi̍t-chhat.
[27] Kì-têu mò chhiong thèu-pái ke yîn-hiùng, chong-lî chhin yû ôi-yùng, chok chhiòn-fu vú-chông, thèu chṳ́m tô-kiam, hiûng koi tún-phài, vang chhai yîm-kiên. Liá-têu yîn-hiùng hàn-sâng ke sṳ̀ sṳ̍p-fûn vî-fûng, sṳt hoi-ngìn kiâng-to pi̍t-pi̍t-chhat.
[28] “Âi-khi̍p-vòng â, ngì voi cheu-yong su fí-me̍t, vang chhai ke-têu mò kin-khièn, pûn tô-kiam chhṳ̀-sí ke ngìn tông-chûng.
[29] “Yî-tûng chhai ke-vi; kì ke kiûn-vòng lâu thúng-chhṳ-chá chhiòn-phu he chui yúng-kám ke chan-sṳ. Liá-ha kì-têu lâu ke-têu mò kin-khièn, pûn tô-kiam chhṳ̀-sí ke ngìn khiung-ha vang chhai yîm-kiên.
[30] “Só-yû pet-fông ke liâng-chhiu chhiòn-phu chhai ke-vi; Sî-tun-ngìn ya chhai ke-vi. Kì-têu ke sṳ-li̍t sṳt hoi-ngìn kiâng-to pi̍t-pi̍t-chhat. Liá-ha kì-têu lâu ke-têu mò kin-khièn, pûn tô-kiam chhṳ̀-sí ke ngìn khiung-ha to yîm-kiên su vú-yu̍k, vang chhai ke-vi.”
[31] Chṳ-kô ke Song-chú kóng: “Âi-khi̍p-vòng lâu kì ke kiûn-chhui yîn-vi khon-tó liá-têu pûn tô-kiam chhṳ̀-sí ke ngìn, chhiu voi tet-tó ôn-ví.
[32] “Ngài sṳt yung Âi-khi̍p-vòng hoi hàn-sâng ke ngìn kiâng-to pi̍t-pi̍t-chhat, chúng-he kì lâu kì ke kiûn-chhui chhiòn-phu oi pûn tô-kiam chhṳ̀-sí, lâu ke-têu mò kin-khièn, pûn tô-kiam chhṳ̀-sí ke ngìn vang khiung-ha.” Chṳ-kô ke Song-chú án-ngiòng siên-pu lé.