[1] Song-chú â, khiù Ngì ki-tet ngài-têu só tù-tó ke sṳ, kam-chhat ngài-têu só su ke vú-yu̍k.
[2] Ngài-têu ke sán-ngia̍p chhiòn-phu lo̍k chhai ngoi-chhu̍k-ngìn sú-chûng; ngoi-koet-ngìn khiòng-chiam ngài-têu ke vuk-sa.
[3] Ngài-têu sàng-cho mò yà ke kû-yì; ngài-têu ke â-mê sàng-cho koá-fu.
[4] Ngài-têu oi fu-chhièn chang yû súi lîm, ngài-têu sêu-chhèu ya oi yung mâi.
[5] Ngài-têu chhiong pà-tén ngiù-ak pûn-ngìn kiuk-lòi kiuk-hi, lò-luk to tông-khioi, m̀-sṳ́ sióng-oi hiet-khun.
[6] Vi-tó oi yû liòng-sṳ̍t chhûng-kî, ngài-têu chhiu chhûn-sú hiong Âi-khi̍p-ngìn lâu Â-sut-ngìn khiù-thó.
[7] Ngài-têu ke chú-siên fam-chhui, liá-ha kì-têu mò-chhôi lé, ngài-têu sa yîn-vi kì-têu ke chhui-ok lòi su chit-fa̍t.
[8] Ngài-têu liá-ha pûn nù-chhòi lòi kón; mò-ngìn nèn kiu ngài-têu lì-khôi kì-têu ke sú.
[9] Chhai khóng-yâ yû chhin-tô chhṳ̀-ngìn ke hiûng-sú; ngài-têu oi mo sâng-miang ke ngùi-hiám lòi chhìm-sṳ̍t.
[10] Ngài-têu yîn-vi kî-ngo lòi fat-sêu, phì-ngiuk fat-ngie̍t to chhiong fó-lù yit-yong.
[11] Ngài-têu ke fu-ngìn-kâ chhai Siak-ôn pûn-ngìn khiòng-kiên; ngài-têu ke ngìn-kâ-ńg chhai Yù-thai ke sàng-chṳ́n ya pûn-ngìn vú-yu̍k.
[12] Ngài-têu ke liâng-chhiu sûng-sú pûn-ngìn thak-tén tiau hí-lòi; ngài-têu ke ló-ngìn-kâ mò pûn-ngìn chûn-kin.
[13] Ngài-têu ke heu-sâng-ngìn pûn-ngìn pet-hi lâi mo-sa̍k; ngài-têu ke se-ngìn-è pà-chhèu pà-to vang hâ-hi.
[14] Ló-ngìn-kâ mò chai chhô chhai sàng-mùn-héu; heu-sâng-ngìn ya mò chai thàn-khìm cheu-ngo̍k.
[15] Ngài-têu ke sîm-chûng mò pan-si̍t khoai-lo̍k; thiau-vú pien-cho pî-sông.
[16] Ngài-têu ke miên-liù tui thèu-nà-táng tiet hâ-lòi; ngài-têu fam-chhui, liá-ha ngài-têu sṳ̀n-su châi-nan!
[17] Ngài-têu vi-tó liá-têu sṳ pien mò thèu-sṳ̀n; muk-chṳp liù-to ngài-têu ke muk-chû mùng-mùng.
[18] Yîn-vi Siak-ôn-sân pien tông fông-liòng, yâ-kiéu chhai fông-phû tú chhut-ngi̍p.
[19] Chúng-he Song-chú â, Ngì yún-yén chóng-khièn; Ngì ke thúng-chhṳ sṳ-sṳ thoi-thoi mò-thìn.
[20] Ngì oi yún-kiú m̀ ki-tet ngài-têu he-mò? Ngì cho-má-ke fit-thet ngài-têu án-kiú nè?
[21] Song-chú â, khiù Ngì sṳ́ ngài-têu fì-sîm chón-yi lòi kûi-hiong Ngì. Khiù Ngì fì-fu̍k ngài-têu ke kông-yùng chhiong thèu-pái ke-têu ngit-è!
[22] Kám-kóng Ngì oi yún-yén khî-chhie̍t ngài-têu? Kám-kóng Ngì ke fat-khién yún-kiú mò-thìn?