[1] Song-chú lâu ngài kóng-fa; Kì kóng:
[2] “Ngìn-chṳ́ â, ngì oi vi Thai-ngì chhong ôi-kô,
[3] chûi-tho ke khî chhai kóng-héu, lâu chhin-tô hói-tó koet-kâ cho sên-lî ke kóng-héu. Oi lâu Thai-ngì kóng, Chṳ-kô ke Song-chú án-ngiòng kóng: Thai-ngì â, ngì khoâ-khiéu chhṳ-kâ he sṳ̍p-chhiòn sṳ̍p-mî ke sàng-sṳ.
[4] Ngì chiông thai-hói tông-cho vuk-hâ; ngì pûn-ngìn hí-to chhiong he chhin-chiâng ke sòn-è.
[5] Kì-têu yung Het-mùn-sân ke chhiùng-su cho sòn-piông, yung Lì-pâ-nun ke hiông-pak-su cho sòn-chhû.
[6] Kì-têu yung Pâ-sân ke siong-su cho sòn-chióng, yung Sai-phú-lu-sṳ̂ ke chhiùng-su siông siong-ngà cho sòn mien-táng ke piông.
[7] Ngì ke fàm-pu yung song-tén ke siu-fâ mà-sâ cho ke, he Âi-khi̍p chhut-sán ke, yén-yén khon-hi chhiu tông mìn-hién. Ngì ke phùng-pu yung chui-hó ke pu-liau cho ke, he tui Yî-li-sâ-tó yun-lòi ke làm-set, chṳ́-set pu.
[8] Vi ngì chhang-sòn ke he Sî-tun-ngìn, Â-fat-ngìn; vi ngì hon-thò ke he pún-thi sṳ̂-fu.
[9] Sòn-táng ke muk-siong he Kâ-pâ-le̍t lòi ke ló sú-lu, tû chhai ngì ke chûng-kiên cho pú sòn-phung ke kûng-chok; hói-song ke sòn lâu sòn-yèn chhiòn-phu chhai ngì ke tiam-tú cho sên-lî.
[10] “Ngì ke kiûn-chhui yû Pô-sṳ̂, Lî-tí-â lâu Fut chhiáng-lòi ke chan-sṳ. Kì-têu chiông tún-phài lâu thiet-mo koa chhai ngì ke yàng-fòng. Kì-têu vi ngì chên-chhí kông-yùng.
[11] Â-fat lâu Kî-li-kâ lòi ke chan-sṳ vi ngì chóng sàng-chhiòng; Kâ-mâ-tí lòi ke chan-sṳ thoi ngì pó-fu sàng-lèu. Kì-têu chiông tún-phài koa chhai ngì ke chhiòng-thèu táng. Kì-têu sṳ́ ngì sṳ̍p-chhiòn sṳ̍p-mî.
[12] “Ngì lâu Thâ-sṳ̂-ngìn cho sên-lî, yung ngì fûng-fu ke chhòi-vu̍t kâu-von kì-têu ke ngiùn, thiet, siak lâu yèn.
[13] Ngì lâu Hî-lia̍p-ngìn, Thú-pâ-ngìn, Mí-sat-ngìn cho sên-lî, yung ngì ke fo-vu̍t kâu-von kì-têu ke nù-chhòi lâu thùng-hi.
[14] Ngì lâu Thò-kâ-mâ-ngìn cho sên-lî, yung ngì ke fo-vu̍t kâu-von kì-têu ke mâ, chan-mâ lâu lò-è.
[15] Ngì lâu Lò-tet-ngìn cho sên-lî, yung ngì ke fo-vu̍t kâu-von hói-sùn kok-thi ke siong-ngà lâu vû-sîm-sa̍k ke su-liau.
[16] Ngì lâu Â-làn-ngìn cho sên-lî, yung ngì chhûng-chiuk ke chṳ-phín kâu-von kì-têu ke liu̍k-pó-sa̍k, chṳ́-set pu, siu-fâ pu, song-tén mà-sâ, sân-fù lâu fùng-pó-sa̍k.
[17] Ngì lâu Yù-thai-ngìn pin Yî-set-lie̍t-ngìn cho sên-lî, yung ngì ke fo-vu̍t kâu-von kì-têu ke thai-ma̍k, phûng-thòng, kám-lám-yù lâu hiông-liau.
[18] Ngì lâu Thai-mâ-sṳ-kiet-ngìn cho sên-lî, yung ngì chhin-tô ke chṳ-phín kâu-von kì-têu Het-pún chhut-sán ke chiú lâu Sâ-ha̍p chhut-sán ke yòng-mô.
[19] Kì-têu ya yung chhin-hó ke kî-hi lâu hiông-liau kâu-von ngì ke fo-vu̍t.
[20] Tí-tan-ngìn yung phû mâ-ôn ke thán-è kâu-von ngì ke fo-vu̍t.
[21] Â-lâ-pak-ngìn lâu Kî-tha̍t yit-tai ke liâng-chhiu yung se yòng-è, mièn-yòng-kú, sân-yòng kâu-von ngì ke fo-vu̍t.
[22] Sṳ-pâ lâu Lâ-mâ ke sên-lî-ngìn yung chû-pó, kîm lâu kô-kip hiông-liau kâu-von ngì ke fo-vu̍t.
[23] Ha̍p-làn, Kôn-nì, Yî-thien ke-têu sàng, Sṳ-pâ ke sên-lî-ngìn, Â-sut lâu Kî-mat ke-têu sàng chhiòn-phu lâu ngì cho sên-lî.
[24] Kì-têu chiông chhâ-fà ke sâm-fu, chṳ́-set pu, siu-fâ pu, chhái-set ke thi-thán, chhin-chiâng ke tai-é, yung sok-è khún-tén mai-pûn ngì.
[25] Ngì yung Thâ-sṳ̂ chui-thai ke sông-sòn chû-sṳ̀n sòn-chhui chông-yun fo-vu̍t. Ngì chhiong chhai hói-song hàng-sòn ke thai-sòn, chông-mân fo-vu̍t.
[26] Chhang-sòn ke chiông ngì chhang-to ngoi-hói; tûng-fûng chhai hói-song kûng-kit ngì.
[27] Chhṳ̀m-sòn ke sṳ̀, só-yû kui-chhung ke fo-vu̍t, chhiòn-phu sòn-yèn lâu hon-thò ke ngìn, sòn-táng ke muk-siong lâu sên-lî-ngìn, sòn-táng só-yû ke kiûn-ngìn lâu ngìn-mìn, chhiòn-phu chhṳ̀m-to hói-tái hi.
[28] Chhṳ̀m-sòn ke sṳ̀, sòn-yèn hêm kiu-miang ke sâng chṳ-to chhai hói-sùn ke thi-phì ya voi chûn.
[29] Só-yû ke sòn-è chhiòn-phu pûn-ngìn fit-thet; tak-ke sòn-yèn lâu chhang-sòn ke ngìn chhiòn-phu phà-sông hói-sùn.
[30] Kì-têu vi ngì khôi-sâng thai-kieu, ve nài-fún chhai thèu-nà-táng, chhai fó-fôi tông-chûng chan-lòi chan-hi.
[31] Kì-têu thi-kông-thèu, chok mà-sâm; kì-têu vi ngì sông-sîm chhin-kieu.
[32] Kì-têu vi ngì chhong liá-sú ôi-kô: Nai-chho sàng cho-tet lâu Thai-ngì pí nè? Nai-chak sàng cho-tet lâu ke chhṳ̀m-to hói-tái ke Thai-ngì pí nè?
[33] Ngì hiong hói-ngoi yun-sung fo-vu̍t ke sṳ̀, lie̍t-koet chhiòn-phu tet-tó kiûng-yin. Ngì ke chhòi-fu lâu fo-vu̍t sṳ́ thi-song ke kiûn-vòng pien hó-ngiak.
[34] Liá-ha, ngì tù-tó hói-nan; ngì chhṳ̀m-to hói-tái. Ngì só-yû ke fo-vu̍t lâu ngì ke chung-ngìn chhiòn-phu lâu ngì khiung-ha chhṳ̀m-to hói-tú hi.
[35] “Chung hói-tó ke ngìn chhiòn-phu yîn-vi ngì ke miang-yun chho̍k-kiâng; kì-têu ke kiûn-vòng ya chhiòn-phu kiâng-to mân-mien yù-sèu.
[36] Ngì chhám lé, yún-yén me̍t-mòng lé! Sṳ-kiên tak só-chhai ke sên-lî-ngìn chhiòn-phu chho̍k-kiâng, kiâng-pha voi tù-tó lâu ngì khiung-yong ke miang-yun.”