[1] Song-chú kóng: “Ngìn-chṳ́ â, ngì oi nâ yit-kî li-kiam chún thi-thèu-tô, koat ngì ke fù-sî, thi ngì ke thèu-nà-mô, chiông sî lâu mô nâ-hi yung thiên-phìn chhṳn, yèn-heu pûn-cho sâm-fun.
[2] Sàng su pâu-vì ke ngit-khì mân yî-heu, ngì oi nâ sâm-fûn chṳ̂-yit ke sî lâu mô chhai sàng-tú sêu; nâ nang-ngoi sâm-fûn chṳ̂-yit to sàng-ngoi, kín-hàng kín-to̍k; yu nâ chhûn-tó ke sâm-fûn chṳ̂-yit ve chhai khûng-chûng pûn fûng chhôi-san; Ngài hàn-oi yung Ngài ke kiam hi-kiuk.
[3] Ngì oi liù yit-si̍t-é sî lâu mô, yung sâm-kok pâu-tén,
[4] yèn-heu nâ kí-thiàu sî lâu mô chhut-lòi, fit-to fó-tú sêu. Fó oi tui liá kí-thiàu sî lâu mô chhe-to Yî-set-lie̍t chhiòn-koet.”
[5] Chṳ-kô ke Song-chú kóng: “Liá chhiu-he Yâ-lu-sat-lâng! Ngài chiông kì piong chhai sṳ-kie ke tûng-ông, lie̍t-koet chhai kì ke si-vì.
[6] Chúng-he Yâ-lu-sat-lâng vì-poi Ngài ke kie-min, pí lie̍t-koet hàn-kha fái, pí si-vì ke koet-kâ hàn-kha phoi-ngia̍k. Yâ-lu-sat-lâng m̀ chûn-sú Ngài ke kie-min, fi-thet Ngài ke fap-li̍t.
[7] Só-yî, Yâ-lu-sat-lâng â, ngì oi thâng Ngài — Chṳ-kô ke Song-chú só-kóng ke fa. Ngì m̀ chûn-sú Ngài ke kie-min, fi-thet Ngài ke fap-li̍t, hi thèn lie̍t-koet ke fûng-siu̍k si̍p-koan, vi chhṳ-kâ ngiâ-tó ke mà-fàn pí lìn-koet hàn-kha tô.
[8] Só-yî, Ngài — Chṳ-kô ke Song-chú siên-pu, Ngài chhṳ-kâ oi cho ngì ke tui-thi̍t; Ngài oi chhai lie̍t-koet mien-chhièn sṳ́m-phan ngì.
[9] Yîn-vi ngì cho ke sṳ chhiòn-phu he Ngài só yen-hen ke, só-yî Ngài oi chit-fa̍t ngì. Ngài chhiùng-lòi m̀-sṳt án-ngiòng chit-fa̍t ko ngì, yî-heu ya m̀-voi chai án-ngiòng chit-fa̍t ngì.
[10] To chui-mî, chhai ngì ke tông-chûng, yà-ôi oi sṳ̍t chṳ́-ńg, chṳ́-ńg oi sṳ̍t yà-ôi. Ngài oi chit-fa̍t ngì, ya oi chiông só-chhûn ke ngìn chhiòn-phu kiuk-to tak só-chhai hi.
[11] “Só-yî, Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ: Ngì ki-yèn yung yit-chhiet khó-vu ke ngiéu-siong, yu cho Ngài só yen-hen ke sṳ lòi vû-ve Ngài ke sṳn-thien, Ngài chhiu oi sṳ́ ngì ngìn-su kám-séu, Ngài m̀ ngièu ngì, ya m̀ lìn-mén ngì.
[12] Sâm-fûn chṳ̂-yit ke ngìn-mìn oi chhai sàng-tú phiang-sí, ngo-sí; nang-ngoi sâm-fûn chṳ̂-yit oi chhai sàng-ngoi pûn tô-kiam chhṳ̀-sí; Ngài oi chiông só-chhûn ke sâm-fûn chṳ̂-yit fûn-san to si-fông, yung Ngài ke kiam kiuk kì-têu.
[13] “Ngài oi chiông só-yû ke fat-khién piang chhai ngì ke sṳ̂n-hong, piang-to chhiang-chhiang Ngài chang mân-chiuk. Án-ngiòng, ngì chhiu voi tî, Ngài — Song-chú só-kóng ke fa he chhut-yì chhit-tu ke sîm.
[14] Lìn-koet ke ngìn-mìn kîn-ko ke-vi, chhiòn-phu oi sâu-nat ngì, yén-yén lì-khôi ngì.
[15] “Ngài fat-khién, thai-thai chit-fa̍t ngì ke sṳ̀, ngì si-vì ke koet-kâ chhiòn-phu voi chhin chho̍k-kiâng. Kì-têu khon-tó liá tet-ngìn-kiâng ke chhìn-hìn chhiu voi chhṳ́-seu ngì, sâu-nat ngì, chiông ngì tông-cho kín-kie.
[16] Ngài oi chhiet-thôn ngì ke liòng-sṳ̍t, sṳ́ ngì ngo tú-sṳ́, pûn ngì tî tú-sṳ́ yâu ke thung-khú, chhiu-chhiong tông-li ke chien oi sêu-me̍t ngì.
[17] Ngài oi yung kî-fông lâu yâ-chhu sêu-me̍t ngì ke chṳ́-ńg, yu yung pot-vûn, phau-li̍t lâu chan-chên chhṳ̀ ngì. Ngài — Song-chú án-ngiòng siên-pu lé.”