[1] Song-chú ke Lìn chiông ngài khià hí-lòi, tai ngài to sṳn-thien ke tûng-mùn. Ngài chhai tûng-mùn fu-khiun khon-tó ngi-sṳ̍p ńg-ke ngìn, tông-chûng yû lióng-ke mìn-kiên liâng-chhiu — Ap-sok ke lai-é Ngâ-sat-nì-â lâu Pí-nâ-ngâ ke lai-é Pí-lâ-thì.
[2] Song-chú lâu ngài kóng: “Ngìn-chṳ́ â, liá-têu ngìn chhai sàng-tú kie-va̍k kiên-cha ke sṳ, kúi-kie tô-tôn.
[3] Kì-têu kóng: ‘Ngài-têu mò kí-kiú chhiu oi chhùng-kien kâ-yèn. Liá-chho sàng chhiong vo̍k-thèu, ngài-têu chhiong tî-poi ke ngiuk, tet-tó vo̍k-thèu ke pó-fu.’
[4] Só-yî, ngìn-chṳ́ â, ngì oi kóng yi-ngièn, yung Ngài ke fa chit-phi kì-têu.”
[5] Song-chú ke Lìn fut-yèn-kiên lìm-to ngài. Song-chú lâu ngài kóng, oi hiong ngìn-mìn chhòn liá sin-sit: “Yî-set-lie̍t-ngìn â, ngì-têu ke choi só-kóng, sîm só-sióng ke, Ngài chhiòn-phu tî.
[6] Ngì-têu chhai liá sàng-tú chhṳ̀-sí án-tô ngìn, kiê-lu hong tôi-mân sṳ̂-thí.
[7] “Só-yî, Ngài — Chṳ-kô ke Song-chú án-ngiòng kóng: Mò m̀-chho̍k, liá-chho sàng chhiu-he vo̍k-thèu; vo̍k-thèu tú ke ngiuk he ngì-têu chhṳ̀-sí ke sṳ̂-thí. Ngì-têu m̀-voi chhai sàng-tú, yîn-vi Ngài oi chiông ngì-têu fit-chhut sàng-ngoi.
[8] Ngì-têu kiâng tô-kiam mò? Ngài oi yung tô-kiam kûng-tá ngì-têu.
[9] Ngài oi tai ngì-têu to sàng-ngoi, chiông ngì-têu kâu-pûn ngoi-koet ngìn. Ngài yí-kîn phan ngì-têu sí-hìn.
[10] Ngì-têu oi yîn-vi chan-chên sí chhai chhṳ-kâ ke koet-kâ. Án-ngiòng ngì-têu chhiu voi tî Ngài he Song-chú.
[11] Liá-chho sàng chhie̍t-tui mò phan-fap pó-fu ngì-têu, chhiong vo̍k-thèu pó-fu vo̍k-thèu tú ke ngiuk án-ngiòng. Mò-lun ngì-têu chhai Yî-set-lie̍t má-ke só-chhai, Ngài chhiòn-phu oi chit-fa̍t ngì-têu.
[12] Ngì-têu oi tî Ngài he Song-chú. Ngì-têu thèn lìn-koet ke fûng-siu̍k si̍p-koan chhiu-he fam Ngài ke fap-li̍t, vì-poi Ngài ke min-lin.”
[13] Ngài chang kóng yi-ngièn ke sṳ̀, Pí-nâ-ngâ ke lai-é Pí-lâ-thì fut-yèn-kiên sí-thet. Ngài phu̍k chhai thi-song thai-sâng hêm: “Chṳ-kô ke Song-chú â, lièn Yî-set-lie̍t chhûn hâ-lòi ke ngìn, Ngì ya oi chhiòn-phu sêu-me̍t he-mò?”
[14] Song-chú lâu ngài kóng-fa;
[15] Kì kóng: “Ngìn-chṳ́ â, Yâ-lu-sat-lâng ke ngìn-mìn kóng-tó ngì thùng ngì khiung-ha pûn-ngìn chok-hi ke Yî-set-lie̍t thùng-pâu ke sṳ̀, kì-têu kóng: ‘Ke-têu pûn-ngìn chok-hi ke thùng-pâu lì-khôi Song-chú ke sṳn-só thet-yén lé. Song-chú yí-kîn chiông liá-te thú-thi su-pûn ngài-têu.’
[16] “Só-yî, Ngì oi chiông Ngài ke fa chhòn-pûn lâu ngì khiung-ha pûn-ngìn chok-hi ke thùng-pâu. Sûi-yèn Ngài chiông kì-têu kiuk-to yén-yén ke lie̍t-koet, si-san chhai mò khiung-yong ke só-chhai; chúng-he Ngài hàn-he oi lâu kì-têu khiung-ha, chhai kì-têu pûn-ngìn chok-hi ke só-chhai, cho kì-têu chhiam-sṳ̀ ke sṳn-só.
[17] “Só-yî, ngì oi chiông Ngài — Chṳ-kô ke Song-chú só-kóng ke fa lâu kì-têu kóng. Ngài sṳt chiông kì-têu si-san to lie̍t-koet hi; Ngài oi chiông kì-têu si̍p-ha̍p hí-lòi, tai kì-têu lì-khôi ke-vi; Ngài oi chiông Yî-set-lie̍t ke thú-thi vàn kì-têu.
[18] Kì-têu to-chón hi yî-heu yit-thin oi chhù-thet só-yû sià-ok ke ngiéu-siong.
[19] Ngài oi chiông ha̍p-yit ke sîm su-pûn kì-têu, chiông sîn ke lìn piong chhai kì-têu tî-poi; Ngài oi chhù-thet kì-têu chhiong sa̍k-thèu án-ngang ke sîm, su-pûn kì-têu yû-hiet yû-ngiuk ke sîm.
[20] Án-ngiòng, kì-têu chhiu voi chûn-sú Ngài ke fap-li̍t, chûng-sîm sun-fu̍k Ngài só-yû ke min-lin. Kì-têu oi cho Ngài ke chṳ́-mìn; Ngài oi cho kì-têu ke Song-ti.
[21] Kóng-tó ke-têu sîm-chûng fôn-hí pai sià-ok ngiéu-siong ke ngìn, Ngài oi chit-fa̍t kì-têu. Ngài oi cheu kì-têu ke hàng-vì chit-fa̍t kì-têu.” Chṳ-kô ke Song-chú án-ngiòng siên-pu lé.
[22] Kî-lu-pak tá-khôi yi̍t-kap, lin-é thèn-tén kì-têu; Yî-set-lie̍t Song-ti ke yùng-kông chhai kì-têu táng-kô.
[23] Song-chú ke yùng-kông sṳ̂n sông-hi, lì-khôi sàng, thìn chhai sàng tûng-phién ke-chho sân-táng.
[24] Chhai yi-siong chûng, Song-ti ke Lìn chiông ngài khià hí-lòi, tai-chón pûn-ngìn chok-hi Pâ-pí-lùn ke thùng-pâu ke-vi. Yèn-heu ngài só khon-tó ke yi-siong chhiu m̀ kien-thet lé.
[25] Ngài chhiu chiông Song-chú chṳ́-sṳ ngài só-yû ke sṳ-chhìn lâu pûn-ngìn chok-hi ke-vi ke thùng-pâu kóng.