[1] Ngài-têu pûn-ngìn chok-hi ke thi-chhit ngièn ńg-ngie̍t chhû-sṳ̍p, yû-têu Yî-set-lie̍t ke chóng-ló lòi chhô-to ngài mien-chhièn, hiong ngài mun Song-chú ke chṳ́-yi.
[2] Ke-sṳ̀, Song-chú lâu ngài kóng-fa;
[3] Kì kóng: “Ngìn-chṳ́ â, oi lâu Yî-set-lie̍t ke chóng-ló kóng, Chṳ-kô ke Song-chú án-ngiòng kóng: ‘Ngì-têu lòi mun Ngài ke chṳ́-yi he-mò? Ngài chṳ́-tén Ngài yún-yén ke sâng-miang fat-sṳ: M̀-chún ngì-têu mun. Ngài — Chṳ-kô ke Song-chú án-ngiòng siên-pu lé.’
[4] “Ngìn-chṳ́ â, ngì yû yi-phi hó oi siên-ko kì-têu ke chhui mò? Hó hi siên-ko lé! Pûn kì-têu sióng-tó kì-têu ke chú-siên só-cho ke-têu sià-ok ke sṳ.
[5] Ngì oi lâu kì-têu kóng, Ngài — Chṳ-kô ke Song-chú án-ngiòng kóng: Ngài kién-sién Yî-set-lie̍t — Ngâ-kok ke heu-thoi ke-sṳ̀, sṳt hiong kì-têu fat-sṳ; Ngài sṳt chhai Âi-khi̍p hiong kì-têu hién-mìn chhṳ-kâ, fat-sṳ kóng: ‘Ngài he Song-chú — ngì-têu ke Song-ti.’
[6] Ke-sṳ̀, Ngài yin-hí kì-têu, oi thu kì-têu chhut Âi-khi̍p, tai kì-têu to Ngài vi kì-têu só-sién ke-te liù-nen-lâu-me̍t tông-phì ke thú-thi, chhiu-he sṳ-kie chhut-sán chui fûng-fu ke thú-thi.
[7] Ngài min-lin kì-têu, tak-sà oi fit-thet kì-têu só fôn-hí ke-têu sià-ok ke ngiéu-siong, m̀-hó pai Âi-khi̍p ke ká-sṳ̀n lòi tá-lá-sap chhṳ-kâ, yîn-vi Ngài he Song-chú — kì-têu ke Song-ti.
[8] Chúng-he kì-têu phoi-ngia̍k Ngài, m̀-thâng Ngài kóng. Kì-têu mò vok-thet ke-têu sià-ok ke ngiéu-siong, ya mò fit-thet Âi-khi̍p ke ká-sṳ̀n. Ke-sṳ̀, Ngài oi tui kì-têu thai fat-khién, chhai Âi-khi̍p hiong kì-têu piang Ngài ke su-hi.
[9] Chúng-he Ngài mò án-ngiòng cho. Ngài mò-oi Ngài ke sṳn-miàng pien-cho fái miàng-sâng; yîn-vi Ngài sṳt chhai kì-têu chhiam-tai ke só-chhai ke ngìn-mìn mien-chhièn hiong Yî-set-lie̍t siên-pu kóng, Ngài oi thu kì-têu chhut Âi-khi̍p.
[10] “Só-yî, Ngài thu kì-têu chhut Âi-khi̍p, tai kì-têu to khóng-yâ.
[11] Ngài chiông Ngài ke kie-min su-pûn kì-têu, chiông Ngài ke fap-li̍t kau-thô kì-têu, sṳ́ chûn-hàng ke ngìn chhiòn-phu voi yû miang.
[12] Ngài ya min-lin kì-têu oi sú Ngài ke ôn-sit-ngit, cho ngài-têu li̍p-yok ke ki-ho, hó thì-siáng kì-têu, he Ngài — Song-chú sṳ́ kì-têu sàng-cho sṳ̀n-sṳn ke chṳ́-mìn.
[13] Chúng-he Yî-set-lie̍t-ngìn chhai khóng-yâ chhiu phoi-ngia̍k Ngài. Kì-têu m̀ chûn-hàng Ngài ke fap-li̍t, vok-thet Ngài ke kie-min — sûi-yèn chûn-hàng ke ngìn voi yû miang. Kì-têu chha̍t-tái tá-lá-sap Ngài ke ôn-sit-ngit. Ngài pún-lòi sióng-oi chhai khóng-yâ chiông Ngài ke thai fat-khién hiong kì-têu piang-to chhiang-chhiang, chiông kì-têu sêu-me̍t thet.
[14] Chúng-he Ngài mò án-ngiòng cho. Ngài mò-oi Ngài ke sṳn-miàng pien-cho fái miàng-sâng, yîn-vi lie̍t-koet chhiòn-phu khon-tó Ngài thu Yî-set-lie̍t-ngìn chhut Âi-khi̍p.
[15] Só-yî, Ngài chhai khóng-yâ fat-sṳ, Ngài m̀ thu kì-têu to Ngài oi su-pûn kì-têu ke-te liù-nen-lâu-me̍t ke thú-thi, chhiu-he sṳ-kie chhut-sán chui fûng-fu ke thú-thi.
[16] Ngài án-ngiòng fat-sṳ; yîn-vi kì-têu vok-thet Ngài ke kie-min, m̀ chûn-hàng Ngài ke fap-li̍t, tá-lá-sap Ngài ke ôn-sit-ngit. Kì-têu chúng-he oi pai kì-têu ke ngiéu-siong.
[17] “Sûi-yèn án-ngiòng, Ngài hàn-he lìn-mén kì-têu, kiet-thin mò-oi chhai khóng-yâ sêu-me̍t kì-têu.
[18] Ngài chhai khóng-yâ kín-ko kì-têu ke heu-sâng-ngìn kóng: M̀-hó sú chú-siên só-thin ke li-kûi; m̀-hó thèn kì-têu ke fûng-siu̍k; m̀-hó pai ngiéu-siong lòi tá-lá-sap chhṳ-kâ.
[19] Ngài he Song-chú — ngì-têu ke Song-ti. Ngì-têu oi chûn-chhiùng Ngài ke fap-li̍t, kie-min,
[20] sú Ngài ke ôn-sit-ngit cho sṳ̀n-sṳn ke ngit-è, cho ngài-têu li̍p-yok ke ki-ho, hó thì-siáng ngì-têu, Ngài he Song-chú — ngì-têu ke Song-ti.
[21] “Chúng-he, ke-thoi ngìn ya phoi-ngia̍k Ngài. Kì-têu m̀ chûn-hàng Ngài ke fap-li̍t, kie-min — sûi-yèn chûn-hàng ke ngìn voi yû miang. Kì-têu ya tá-lá-sap Ngài ke ôn-sit-ngit. Ngài pún-lòi sióng-oi chhai khóng-yâ chiông Ngài ke thai fat-khién hiong kì-têu piang-to chhiang-chhiang, chiông kì-têu sêu-me̍t thet,
[22] chúng-he Ngài mò án-ngiòng cho. Ngài mò-oi Ngài ke sṳn-miàng pien-cho fái miàng-sâng, yîn-vi lie̍t-koet chhiòn-phu khon-tó Ngài thu Yî-set-lie̍t-ngìn chhut Âi-khi̍p.
[23] Só-yî, Ngài chhai khóng-yâ yu fat-sṳ, oi chiông kì-têu fûn-san to chhiòn sṳ-kie.
[24] Ngài án-ngiòng cho he yîn-vi kì-têu m̀ chûn-hàng Ngài ke fap-li̍t lâu kie-min, tá-lá-sap Ngài ke ôn-sit-ngit, pai kì-têu chú-siên pai-ko ke ngiéu-siong.
[25] “Heu-lòi, Ngài yù-chhai kì-têu hàng m̀-hó ke li-kûi, sú m̀-voi pûn ngìn yû sâng-miang ke kie-min,
[26] pûn kì-têu yung chhṳ-kâ ke chi-vu̍t tá-lá-sap chhṳ-kâ, ya pûn kì-têu hien chhṳ-kâ ke chóng-chṳ́ cho sên-ngì. Liá he oi hìn-fa̍t kì-têu, sṳ́ kì-têu tî Ngài he Song-chú.
[27] “Só-yî, ngìn-chṳ́ â, oi lâu Yî-set-lie̍t-ngìn kóng, Ngài — Chṳ-kô ke Song-chú án-ngiòng kóng: Ngì-têu ke chú-siên tui Ngài mò chûng-sîm, chai yit-pái vú-yu̍k Ngài.
[28] Ngài tai-liâng kì-têu to Ngài yin-hí pûn kì-têu ke thú-thi. Kì-têu yit khon-tó thai-sân lâu chhin-chiâng ke su-é, chhiu chhai ke-vi hien-chi. Kì-têu só-hien chhîn-hiông ke sên-ngì lâu kin-sṳ̀n ke chiú ngiâ Ngài su-hi.
[29] Ngài chit-phi kì-têu: Ngì-têu hi ke ke-têu kô-thi cho-má-ke? Tui án-ngiòng, ke-têu só-chhai chhiu yit-chhṳ̍t ôn-to ‘Kô-thi’.
[30] Só-yî, ngì oi chón-ko Yî-set-lie̍t-ngìn, Ngài — Chṳ-kô ke Song-ti án-ngiòng kóng: Ngì-têu cho-má-ke hàn-he fam ngì-têu chú-siên fam-ko ke chhui, pai kì-têu pai-ko ke ngiéu-siong?
[31] Chhiu-son kîm-pû-ngit, ngì-têu hàn-he hien kì-têu só-hien ke sên-ngì, chiông chhṳ-kâ ke lai-é tông-cho sên-ngì sêu-pûn kì-têu só-pai ke ngiéu-siong lòi tá-lá-sap chhṳ-kâ. Ngì liá-têu Yî-set-lie̍t-ngìn hàn-kám lòi khiù-mun Ngài ke chṳ́-yi! Ngài — Chṳ-kô ke Song-chú chṳ́-tén Ngài yún-yén ke sâng-miang hiong ngì-têu fat-sṳ: M̀-chún ngì-têu khiù-mun!
[32] Ngì-têu yí-kîn kiet-thin ho̍k lie̍t-koet, chhiong ngoi-koet ngìn-mìn án-ngiòng pai su-thèu lâu sa̍k-thèu. Ngì-têu liá-chúng sîm-yi chhie̍t-tui m̀-voi sṳ̍t-hien!
[33] “Ngài — Chṳ-kô ke Song-chú chṳ́-tén Ngài yún-yén ke sâng-miang hiong ngì-têu fat-sṳ: Ngài kín-ko ngì-têu, Ngài oi yung thai khièn-nèn ke sú, chit-fa̍t ke sú, chhin-piang thai fat-khién lòi thúng-chhṳ ngì-têu.
[34] Ngài chiông ngì-têu si̍p-ha̍p hí-lòi, tui si-san ke kok-koet thu chón-lòi ke sṳ̀, Ngài oi ham ngì-têu thí-ngiam tó Ngài thai khièn-nèn ke sú, chit-fa̍t ke sú, lâu chhin-piang ke thai fat-khién.
[35] Ngài oi chiông ngì-têu tai-to ‘Van-mìn ke Khóng-yâ’, chhai ke-vi tông-mien sṳ́m-phan ngì-têu.
[36] Ngài yî-chhièn ngióng-pân chhai Âi-khi̍p ke khóng-yâ chit-fa̍t ngì-têu ke chú-siên, liá-ha Ngài oi cheu-yong chit-fa̍t ngì-têu.” Chṳ-kô ke Song-chú án-ngiòng siên-pu lé.
[37] “Ngài oi ngiàm-kiet lòi-kón ngì-têu, sṳ́ ngì-têu chûn-sú Ngài ke yok.
[38] Ngài oi tui ngì-têu tông-chûng chhù-thet phoi-ngia̍k lâu tet-chhui Ngài ke ngìn. Ngài oi chiông kì-têu sái-chéu, sṳ́ kì-têu lì-khôi liá-ha chhiam-tai ke só-chhai; chúng-he Ngài chhie̍t-tui m̀-voi pûn kì-têu chón-to Yî-set-lie̍t ku-hiông. Án-ngiòng, ngì-têu chhiu voi tî Ngài he Song-chú.”
[39] Chṳ-kô ke Song-chú án-ngiòng kóng: “Só-yû ke Yî-set-lie̍t-ngìn â, yù-chhai ngì-têu ki-siu̍k pai ngì-têu ke ngiéu-siong â! Chúng-he Ngài kín-ko ngì-têu, yî-heu, ngì-têu yit-thin voi fu̍k-chhiùng Ngài, mò chai hien-chi pûn ngiéu-siong lòi vú-yu̍k Ngài ke sṳn-miàng.
[40] Ngì-têu só-yû Yî-set-lie̍t-ngìn oi chhai Ngài ke sṳn-sân táng, chhiu-he Yî-set-lie̍t ke kô-sân, kin-pai Ngài. Ngài voi fôn-hí chhai ke-vi chiap-na̍p ngì-têu, tén-tén ngì-têu tai chi-vu̍t, chui-hó ke chi-phín, lâu sṳ̀n-sṳn ke lî-vu̍t lòi hien-pûn Ngài.
[41] Ngài oi thu ngì-têu lì-khôi pûn-ngìn chok-hi ke só-chhai, chiông ngì-têu tui ngoi-koet si̍p-ha̍p hí-lòi; Ngài oi chiap-na̍p ngì-têu chhiong chhîn-hiông ke sên-ngì; lie̍t-koet ya voi tî Ngài he sṳ̀n-sṳn ke.
[42] Ngài thu ngì-têu chón-to Yî-set-lie̍t, to Ngài yin-hí pûn ngì-têu chú-siên ke thú-thi yî-heu, ngì-têu chhiu voi tî Ngài he Song-chú.
[43] Ke-sṳ̀, ngì-têu voi sióng-tó thèu-pái só-cho yit-chhiet kien-seu ke sṳ, fat-hien ngì-têu he ngióng-pân tá-lá-sap chhṳ-kâ. Ngì-têu oi yîn-vi chhṳ-kâ só-cho ke-têu fái-sṳ tông-nâu chhṳ-kâ.
[44] Ngài yung hàng-thung lòi vì-chhṳ̀ Ngài ke sṳn-miàng sṳ̀, ngì liá-têu Yî-set-lie̍t-ngìn chhiu voi tî Ngài he Song-chú, yîn-vi Ngài m̀ cheu ngì-têu ke fái hàng-vì lâu phai-fái lòi chit-fa̍t ngì-têu.” Chṳ-kô ke Song-chú án-ngiòng siên-pu lé.
[45] Song-chú lâu ngài kóng-fa;
[46] Kì kóng: “Ngìn-chṳ́ â, ngì hiong-nàm khon! Mien-tui nàm-fông ke su-lìm kóng yi-ngièn.
[47] Tui nàm-fông ke su-lìm kóng, oi thâng Chṳ-kô ke Song-chú só-kóng ke fa. Khon â, Ngài oi piong-fó! Oi sêu-chhiang su-lìm tú ke su-é, mò-lun he chhiâng ke ya-he châu ke, chhiòn-phu sêu kông-kông. Fó tông-mâng tá m̀-vû, tui nàm-fông yit-chhṳ̍t sêu-to pet-fông, tak-sà ke mien voi pûn thai-fó nat-tó.
[48] Kì-têu chhiòn-phu voi tî, ke he Ngài — Song-chú só piong ke fó, mò-ngìn nèn tá-vû.”
[49] Ngài chhiu kóng: “Chṳ-kô ke Song-chú â, kì-têu voi chṳ́-tén ngài kóng: ‘Kì kám m̀-he yu chhai kóng pí-yi lé!’ ”