[1] Ngài-têu pûn-ngìn chok-hi ke thi sṳ̍p-yit ngièn sâm-ngie̍t chhû-yit, Song-chú lâu ngài kóng-fa.
[2] Kì kóng: “Ngìn-chṳ́ â, ngì oi hiong Âi-khi̍p-vòng lâu kì só-yû ke ngìn-mìn kóng: Ngì án khiòng-thai ô! Má-ngìn cho-tet lòi lâu ngì pí nè?
[3] Ngì khon Â-sut-vòng yî-chhièn chhiong sâng chhai Lì-pâ-nun ke hiông-pak-su, su-khoá chhin-chiâng, su-ya̍p cha̍t-cha̍t, su-mî kô-to tù-thiên.
[4] Chhièn-súi chṳ̂-yun kì; thi-hâ súi sṳ́ kì kín-lòi kín-thai. Hò-pa súi liù-to su-lìm tú, fûn-chhâ chhut-lòi ke se hâng-súi, chṳ̂-yun su-lìm tú ke tak-thèu su.
[5] Só-yî, kì sâng-to pí khì-thâ ke su-é kha-kô; kì ke su-kî yu-chhòng yu-me̍t.
[6] Fî-niâu chhai su-táng cho-teu; yâ-chhu chhai su-hâ sên-sán; kok-koet chhai kì su-yáng hâ ôn-kî.
[7] Â, ngióng-pân án-chiâng ke thai-su! Su sâng-to kô-kô, su-khoá chhûn-to chhòng-chhòng; su-kîn tâng-to chhṳ̂m-chhṳ̂m, chhṳ̂m to thi-tái-hâ ke súi-ngièn.
[8] Song-ti yèn-tú ke hiông-pak-su mò pí kì kha-kô; chhiùng-su ke su-khoá mò pí kì kha-chhòng; fûng-su ke kî-khoá ya mò yàng-ko kì. Song-ti yèn-tú ke su-é mò yit-thèu chhiong kì án-chiâng.
[9] Ngài sṳ́ kì sâng-to chhin-chiâng, kî-ya̍p meu-sṳn; Song-ti Yî-thien yèn-tú ke su-é chhiòn-phu chhit-tu kì.
[10] “Só-yî, Ngài — Chṳ-kô ke Song-chú án-ngiòng kóng: Yîn-vi liá-thèu su án kô-thai, su-mî kô-to tù-thiên, kì ye̍t kô-thai chhiu ye̍t kiêu-ngau,
[11] Ngài chhiu chiông kì kâu-pûn lie̍t-koet chûng chui-khiòng ke thúng-chhṳ-chá lòi phan kì; Ngài yîn kì ke chhui-ok yí-kîn kiuk-chéu kì.
[12] Tông-ok ke ngoi-koet-ngìn chám-thôn kì, fit-thet kì, sṳ́ thai su-khoá san chhai koet-nui ke sân-táng lâu sân-lak chûng, se su-kî chhi-si̍p chhai ke thi-fông ke hò-pa sùn. Chhai kì su-yáng hâ he̍t ke kok-koet ngìn-mìn chhiòn-phu lì-khôi.
[13] Khûng-chûng ke fî-niâu thìn chhai vang-thet ke su-é táng-kô lo̍k-kiok; yâ-chhu soi chhai su-khoá chûng.
[14] Yî-heu, mò-lun súi-ngièn ngióng-pân chhûng-chiuk, m̀-voi chai yû yit-thèu su voi sâng-to án-kô án kiêu-ngau, su-mî kô-to tù-thiên. Só-yû ke su-é yit-thin voi châu-thet, chhiong ngìn voi sí-thet, lo̍k-to yîm-kiên, lâu sí-ngìn khiung-ha.”
[15] Chṳ-kô ke Song-chú án-ngiòng kóng: “Ke-thèu thai-su lo̍k yîm-kiên ke sṳ̀, Ngài ham thi-tái-hâ ke súi chim-thet kì, péu-sṳ ôi-sông. Ngài set-thet kông-hò, sṳ́ hâi-súi thìn-liù. Ngài sṳ́ vû-am châ-tén Lì-pâ-nun-sân, sṳ́ su-lìm tú ke su-é chhiòn-phu châu-thet.
[16] Ngài chiông kì fit-ngi̍p yîm-kiên, kì tiet lo̍k-hi ke hióng-sâng chṳ́n-thung lie̍t-koet. Yí-kîn chhai yîm-kiên ke su-é, chhiu-he Yî-thien-yèn ke su-é lâu Lì-pâ-nun súi-fun chhûng-chiuk, chhin-hó ke su-é, chhiòn-phu yîn-vi kì tiet lo̍k-hi tet-tó ôn-ví.
[17] Liá-têu su-é chhiòn-phu lâu ke-thèu thai-su lo̍k-to yîm-kiên, lâu ke-têu pûn tô chhṳ̀-sí ke ngìn khiung-ha. Só-yû sṳt he̍t chhai ke-thèu su-yáng hâ ke ngìn chhiòn-phu pûn-ngìn chok-to kok-koet hi.
[18] “Âi-khi̍p-vòng â, Yî-thien yèn-tú ke su-é chhiòn-phu mò-pí ngì kha-kô kha-chiâng. Chúng-he, ngì oi lâu Yî-thien yèn-tú ke su-é khiung-yong lo̍k-to yîm-kiên, lâu ke-têu mò kin-khièn, pûn tô chhṳ̀-sí ke ngìn khiung-ha. “Liá chhiu-he Âi-khi̍p-vòng lâu kì ngìn-mìn ke kiet-khiu̍k.” Chṳ-kô ke Song-chú án-ngiòng siên-pu lé.