[1] Song-chú lâu ngài kóng-fa;
[2] Kì kóng: “Ngìn-chṳ́ â, ngì oi kóng yi-ngièn chit-phi Yî-tûng,
[3] tui kì-têu kóng, Ngài — Chṳ-kô ke Song-chú án-ngiòng kóng: Yî-tûng-sân â, Ngài oi lâu ngì cho tui-thi̍t! Ngài oi chhûn-sú kûng-tá ngì, sṳ́ ngì fông-fi.
[4] Ngài oi sṳ́ ngì ke sàng-sṳ fông-fi; Ngài oi sṳ́ ngì ke thú-thi fông-liòng; án-ngiòng, ngì chhiu voi tî Ngài he Song-chú.
[5] “Ngì lâu Yî-set-lie̍t sṳ-sṳ thoi-thoi yû yên-sù. Yî-set-lie̍t yîn-vi chhṳ-kâ ke chhui tù-tó châi-nan, su chui-mî sṳ́m-phan ke sṳ̀, ngì chiông kì kâu chhai thi̍t-ngìn ke tô-kiam chṳ̂-ha.
[6] Só-yî, Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ: Ngì chu-thin voi me̍t-mòng, chéu m̀-thet. Ngì fam chhṳ̀-ngìn ke chhui, hiet-chai yit-thin oi yung hiet phòi-sóng.
[7] Ngài oi sṳ́ Yî-tûng-sân chha̍t-tái fông-thet, chhṳ̀-sí só-yû lu-ko ke-vi ke ngìn.
[8] Ngài oi sṳ́ Yî-tûng-sân mân-phien he sṳ̂-thí, sṳ́ sân-kông, sân-lak, hò-pa, tak só-chhai yû chan-sí ke ngìn.
[9] Ngài oi sṳ́ ngì yún-yén fông-thet, ngì ke sàng-sṳ m̀-voi chai yû-ngìn he̍t. Án-ngiòng, ngì chhiu voi tî Ngài he Song-chú.
[10] “Sṳ-sṳ̍t-song, Ngài — Song-chú he Yù-thai lâu Yî-set-lie̍t lióng-koet ke Song-ti, ngì ngióng kám-kóng kì-têu he ngì ke, oi cham-liâng kì-têu ke thú-thi!
[11] Só-yî, Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ: Ngì ngióng-pân yen-hen, chhit-tu, nâu Ngài ke chṳ́-mìn, Ngài ya oi cheu án-ngiòng tui-fu ngì. Kì-têu oi tî, Ngài án-ngiòng chit-fa̍t ngì he thoi kì-têu sṳ̂n-yên.
[12] Ke-sṳ̀ ngì chhiu voi tî, Ngài — Song-chú sṳt thâng-tó ngì fí-pong Yî-set-lie̍t kóng: ‘Liá-têu sân chhiòn-phu fông-thet lé, voi pûn ngài-têu sṳ̍t-thet.’
[13] Ngì khôi-choi kóng chhṳ-thai ke fa kûng-kit Ngài, Ngài chhiòn-phu thâng-tó lé.”
[14] Chṳ-kô ke Song-chú kóng: “Chhiòn sṳ-kie fôn-fû ke sṳ̀-chiet, Ngài voi sṳ́ ngì pien fông-liòng.
[15] Ngì sṳt yîn-vi Yî-set-lie̍t-ngìn ke thú-thi pien fông-liòng lòi fôn-hí, só-yî Ngài oi cheu ngì só-hàng ke tui-thai ngì. Sî-ngí-sân â, Yî-tûng chhiòn-thi â, ngì-têu voi pien fông-liòng. Ke-sṳ̀, sà-sà chhiu voi tî Ngài he Song-chú.”