[1] Song-chú lâu ngài kóng-fa; Kì kóng:
[2] “Ngìn-chṳ́ â, yî-chhièn yû lióng-ke khiung-ôi ke chí-moi he̍t chhai Âi-khi̍p.
[3] Kì-têu heu-sâng ke sṳ̀ chhiu fong-thong chhiong kî-ńg, nen-kû pûn-ngìn káu, sóng-sṳt thùng-chṳ̂n.
[4] Â-chí ke miàng ôn-to Â-hò-lâ — thoi-péu Sat-mâ-li-â; ló-moi ke miàng ôn-to Â-hò-li-pâ — thoi-péu Yâ-lu-sat-lâng. Ngài thó kì lióng chí-moi; kì lióng-sà lâu Ngài kiung se-ngìn-è.
[5] Â-hò-lâ lâu Ngài kiet-fûn heu hàn-he chhiong kî-ńg. Kì thâm-lien ke-têu Â-sut ke chhìn-lòng.
[6] Kì-têu chhiòn-phu he chok làm-set chṳ-fu̍k ke kui-chhu̍k lâu kôn-chóng; kì-têu chhiòn-phu chhin heu-sâng yu sṳ̂-vùn, he khì-pîn-chhui ke yúng-sṳ.
[7] Kì lâu só-yû ke Â-sut kiûn-kôn hàng kiên-yìm, cho kì-têu ke chhìn-fu, pai kì-têu ke ngiéu-siong lòi tá-lá-sap chhṳ-kâ.
[8] Kì hàn-mò piong-thet chhai Âi-khi̍p só-hàng ke yìm-lon. Kì hàn heu-sâng ke sṳ̀, chhiu yû nàm-ngìn lâu kì soi, chiông kì chún-cho kî-ńg, miâ kì ke nen-kû, lâu kì hàng kiên-yìm.
[9] Só-yî, Ngài chiông kì kâu-pûn kì só thâm-lien ke Â-sut chhìn-lòng.
[10] Kì-têu chiông kì thot kông-kông, chok kì ke chṳ́-ńg, yèn-heu yung kiam chhiuk-sí kì. Kì pî-chhám ke po-yin sàng-cho fu-ngìn-kâ ke seu-khô.
[11] “Kiâ ló-moi Â-hò-li-pâ sûi-yèn khon-tó liá po-yin, chúng-he pí kiâ-chí Â-hò-lâ hàn-kha fái, hàn-kha fong-thong.
[12] Kì ya thâm-lien ke-têu Â-sut ke kui-chhu̍k lâu kôn-chóng — chok chiâng-chiâng chṳ-fu̍k ke kiûn-ngìn — lâu khì-pîn-chhui ke kiûn-kôn; kì-têu chhiòn-phu he sṳ̂-vùn ke chhiâng-ngièn.
[13] Ngài khon-tó kì pûn-ngìn châu-tha̍p, kì lâu kiâ-chí khiung-yong fong-thong.
[14] “Kì ke fong-thong yû-kâ mò-kám. Kì sṳm-chṳ pûn tiâu-khiet chhai piak-táng ke-têu Pâ-pí-lùn kiûn-kôn ke siong mì-tó; ke-têu ngìn ke siong he yung chû-fùng set va̍k ke,
[15] yêu-kiên chhiòn-phu kiê-tén yêu-tai, thèu-nà tai-tén yû fâ-piên ke pâu thèu-kîn, ke-têu ngìn he Kâ-le̍t-tí ke Pâ-pí-lùn kiûn-kôn.
[16] Kì yit-ha khon-tó ke-têu siong chhiu oi-tó kì-têu, phai-ngìn to Pâ-pí-lùn hi khon kì-têu.
[17] Pâ-pí-lùn-ngìn lòi lâu kì khiung-ha soi, chhin-liong châu-tha̍p kì; kì pûn-ngìn vú-yu̍k heu, chhiu tông-nâu kì-têu.
[18] Kì chhai thai-chung mien-chhièn hàng yìm-lon, mò chok sâm-fu, thai-kâ chhiòn-phu ngin-vì kì he chhông-kî. Ngài tông-nâu kì, chhiong yî-chhièn nâu kiâ-chí khiung-yong.
[19] Kì hàn mò piong-thet heu-sâng sṳ̀ chhai Âi-khi̍p só-hàng ke yìm-lon, yit-chhṳ̍t hàng kiên-yìm.
[20] Kì pûn ke-têu sṳ̂n-thí chhiong yâ-lì án hiùng-thèu, chîn-li̍t chhiong yâ-mâ án-yúng ke chhìn-lòng mì-tó.
[21] (Â-hò-li-pâ â, ngì chhin-sióng ko heu-sâng sṳ̀ chhai Âi-khi̍p hàng kiên-yìm, pûn-ngìn káu nen-kû, sṳt-thet thùng-chṳ̂n ke-chúng fong-thong ke sên-fa̍t.)
[22] “Só-yî, Â-hò-li-pâ â, Ngài — Chṳ-kô ke Song-chú tui ngì án-ngiòng kóng: Ngì nâu thèu-pái ke ke-têu chhìn-lòng, chúng-he Ngài oi sṳ́ kì-têu fat-khién, tai kì-têu lòi vì-kûng ngì.
[23] Ngài oi tai-liâng só-yû ke Pâ-pí-lùn-ngìn lâu Kâ-le̍t-tí-ngìn, Pí-kot-ngìn, Sû-â-ngìn, Kô-â-ngìn, lâu só-yû ke Â-sut-ngìn lòi. Ngài oi seu-si̍p só-yû heu-sâng sṳ̂-vùn ke kui-chhu̍k, kôn-chóng, chhung-yeu kôn-yèn, lâu kô-kip kiûn-kôn chhiòn-phu khì-tén mâ lòi.
[24] Kì-têu oi tai-liâng thai-kiûn, chún-phi chan-chhâ lâu yun-liòng chhâ, tui pet-fông kûng-kit ngì. Kì-têu oi yung thai-thai se-se ke tún-phài lâu thiet-mo fòng-sṳ̂n, lòi vì-kûng ngì. Ngài oi ham kì-têu lòi hìn-fa̍t ngì, cheu kì-têu ke fap-li̍t sṳ́m-phan ngì.
[25] Yîn-vi ngì ngiâ Ngài fat-khién, Ngài oi pûn kì-têu tui ngì thai fat-khién. Kì-têu oi kot-thet ngì ke phi-kûng lâu ngí-kûng, chok-chéu ngì ke chṳ́-ńg; mò pûn-ngìn chhṳ̀-thet ke ngìn, voi pûn-ngìn sâng-sâng sêu-sí.
[26] Kì-têu oi thot-kông ngì ke sâm-fu, chhióng-chéu ngì ke chû-pó.
[27] Ngài oi chhù-thet ngì ke yìm-lon, kiet-suk ngì chhai Âi-khi̍p ho̍k-tó ke fong-thong sên-fa̍t, sṳ́ ngì mò chai ngióng-mong ngì ke chhìn-lòng, ya mò chai ki-ngiam Âi-khi̍p.”
[28] Chṳ-kô ke Song-chú án-ngiòng kóng: “Ngài oi chiông ngì kâu-pûn ngì só-nâu, ngì só yen-hen ke ngìn.
[29] Kì-têu yîn-vi yen-hen ngì, oi chhióng-chéu ngì sat-mâng tá-piang tet-lòi ke chhòi-vu̍t, chiông ngì pok-kông, sṳ́ ngì mò chok sâm-fu, chhiong kî-ńg khiung-yong. Liá chhiòn-phu he ngì ke yìm-lon lâu fong-thong ngiâ-lòi ke.
[30] Ngì lâu lie̍t-koet hàng kiên-yìm, ngì pai kì-têu ke ngiéu-siong lòi tá-lá-sap chhṳ-kâ.
[31] Ngì thèn ngiâ-chí hàng ke lu, só-yî Ngài oi chiông kì lîm-ko chit-fa̍t ke chiú-pî kâu-pûn ngì lîm.”
[32] Chṳ-kô ke Song-chú án-ngiòng kóng: Ngì oi lîm ngiâ-chí ke chiú-pî; liá-chak pî-é yu chhṳ̂m yu thai. Ngìn oi sâu-nat ngì; liá pî-é chông-mân chit-fa̍t.
[33] Ngiâ-chí Sat-mâ-li-â ke chiú-pî, chhiu-he chhin tet-ngìn-kiâng, chhî-liòng ke chiú-pî, oi sṳ́ ngì chṳ-to chiú-chui, pî-chhám.
[34] Ngì oi lîm liá-pî, lièn phok ya thûn-thet; pî-é ke sui-phién oi kot-lan ngì ke nen-kû. Ngài — Chṳ-kô ke Song-chú án-ngiòng siên-pu lé.
[35] Só-yî, Chṳ-kô ke Song-chú án-ngiòng kóng: “Yîn-vi ngì m̀ ki-tet Ngài, fit-thet Ngài, ngì oi yîn-vi ngì ke yìm-lon lâu fong-thong su-chhin thung-khú.”
[36] Song-chú lâu ngài kóng: “Ngìn-chṳ́ â, ngì yû chún-phi hó oi sṳ́m-phan Â-hò-lâ lâu Â-hò-li-pâ mò? Ngì oi chṳ́-chhut kì-têu sià-ok ke hàng-vì.
[37] Kì-têu hàng kiên-yìm lâu chhṳ̀-ngìn ke chhui — chhiu-he pai ngiéu-siong, chhṳ̀ kì-têu lâu Ngài kiung ke chṳ́-ńg. Kì-têu chiông Ngài ke chṳ́-ńg cho sên-ngì sêu-hien pûn kì-têu ke ngiéu-siong.
[38] M̀-tân-chhiang án-ngiòng, kì-têu hàn tá-lá-sap Ngài ke sṳn-thien, vì-fam Ngài só chṳ-thin ke ôn-sit-ngit.
[39] Kì-têu chhṳ̀ Ngài ke chṳ́-ńg, chiông kì-têu cho sên-ngì sêu-hien pûn ngiéu-siong; khiung-ngit, kì-têu yu ngi̍p-to Ngài ke sṳn-thien hi, chiông kì tá-lá-sap!
[40] “Kì-têu yit-pái yu yit-pái phai sṳ́-chá to yén-yén ke só-chhai hi chhiáng ngìn lòi, ke-têu ngìn chhiu lòi. Lióng chí-moi chhiu sé-sṳ̂n, tá-pan, va̍k muk-mì-mô, tai chû-pó.
[41] Kì-têu chhô chhai chhin-chiâng ke mìn-chhòng, thèu-chhièn pài-tén yit-chông chok, chok-táng pài-mân Ngài sung-pûn kì-têu ke hiông-liau lâu kám-lám-yù.
[42] Yit-khiùn tui khóng-yâ lòi ke lù-màn lâu chiú-kúi thùng kì-têu khiung-ha chok-ngo̍k chhàu-nau. Kì-têu chiông sú-ak tai chhai lióng chí-moi sú-hong, chiông chiâng mo-é tai chhai kì lióng-sà thèu-nà táng.
[43] Ngài sîm-kôn sióng: ‘Kì-têu chhiong-he lâu ngièn-ló sôi-ngio̍k ke kî-ńg hàng kiên-yìm’.
[44] Liá-têu ngìn yit-pái yu yit-pái lòi chhìm Â-hò-lâ lâu Â-hò-li-pâ hàng kiên-yìm, chhiu-chhiong lâu kî-ńg hàng kiên-yìm khiung-yong.
[45] Kûng-chṳn ke ngìn oi phan kì-têu hàng kiên-yìm lâu chhṳ̀-ngìn ke chhui; yîn-vi kì-têu he yìm-fu, mân-sú kò-tén chhṳ̀-ngìn ke hiet.”
[46] Chṳ-kô ke Song-chú án-ngiòng kóng: “Oi seu-si̍p chhin-tô ngìn lòi khiúng-hak kì-têu, chhióng kì-têu.
[47] Ke-têu ngìn yung sa̍k-thèu te̍p kì-têu, yung kiam chhiuk kì-têu, yu chhṳ̀-sí kì-têu ke chṳ́-ńg, piong-fó sêu-thet kì-têu ke vuk.
[48] Ngài oi chhù-thet chhiòn-koet yìm-lon ke sên-fa̍t, lòi kín-ko só-yû fu-ngìn-kâ cho-m̀-tet ho̍k kì-têu ke fong-thong.
[49] Ngì lióng chí-moi â, Ngài oi chit-fa̍t ngì-têu ke yìm-lon lâu pai ngiéu-siong ke chhui. Án-ngiòng, ngì-têu chhiu voi tî Ngài he Chṳ-kô ke Song-chú.”