[1] Song-chú lâu ngài kóng-fa;
[2] Kì kóng: “Ngìn-chṳ́ â, oi lâu Thai-ngì-vòng kóng, Ngài — Chṳ-kô ke Song-chú án-ngiòng kóng: Ngì khoâ-khiéu kóng, ngì he sṳ̀n, ngì chhiong sṳ̀n-mìn chhô chhai hói tûng-ông ke pó-chho táng. Sûi-yèn ngì khon chhṳ-kâ chhiong sṳ̀n-mìn khiung-yong án chhûng-mìn, khì-sṳ̍t, ngì he ngìn, m̀-he sṳ̀n.
[3] Ngì chhṳ-ngin pí Tan-yî-lî chhûng-mìn, mìn-pha̍k khong-tén ke pi-me̍t.
[4] Ngì yung chhûng-mìn lâu chṳ-sṳt chhon chhin-tô chhièn, pó-khu tú chit-chhùn chhin-tô kîm-ngiùn.
[5] Ngì chhin tî cho sên-lî ke fông-fap, kín lòi kín hó-ngiak. Ngì yîn-vi chhṳ-kâ ke hó-ngiak sîm-tú kiêu-ngau!
[6] “Só-yî, Ngài — Chṳ-kô ke Song-chú án-ngiòng kóng: Yîn-vi ngì khon chhṳ-kâ chhiong sṳ̀n-mìn khiung-yong án chhûng-mìn,
[7] Ngài oi tai-liâng lie̍t-koet chûng chui hiûng-ok ke thi̍t-ngìn lòi kûng-tá ngì. Ngì yung chhûng-mìn lâu chṳ-sṳt só tet-tó ke ke-têu chiâng ke pó-vu̍t, chhiòn-phu voi pûn kì-têu yung tô-é fí-fái thet, sṳ́ ngì ke yùng-kông su siû-yu̍k.
[8] Kì-têu voi chiông ngì chhṳ̀-sí, fit-to hói-tú hi.
[9] Kì-têu lòi chhṳ̀ ngì ke sṳ̀, ngì hàn-kám khon chhṳ-kâ cho sṳ̀n-mìn mò? Ngì mien-tui chhṳ̀ ngì ke ngìn ke-sṳ̀, ngì chhiu voi tî chhṳ-kâ he ngìn, m̀-he sṳ̀n.
[10] Ngì oi sí chhai mò kin-khièn ke ngoi-koet-ngìn sú-chûng. Ngài — Chṳ-kô ke Song-chú án-ngiòng siên-pu lé.”
[11] Song-chú yu lâu ngài kóng-fa;
[12] Kì kóng: “Ngìn-chṳ́ â, ngì oi vi Thai-ngì-vòng chhong ôi-kô. Oi lâu kì kóng, Ngài — Chṳ-kô ke Song-chú án-ngiòng kóng: Ngì yî-chhièn he vàn-mî ke mù-fam, fî-sòng chhûng-mìn yu hó-khon.
[13] Ngì he̍t chhai Song-ti ke Yî-thien-yèn tú, yung fùng-pó-sa̍k, chon-sa̍k, vòng-pó-sa̍k, súi-chhông-ngiu̍k, fùng-mâ-nó, pit-ngiu̍k, làm-pó-sa̍k, liu̍k-pó-sa̍k lâu fùng-ngiu̍k lòi tá-pan chhṳ-kâ, ya yung kîm-hi tá-pan. Ngì su-chho ke-ngit, Ngài chhiu vi ngì chún-phi hó-se.
[14] Ngài sat-li̍p yit-ke kî-lu-pak hi pó-fu ngì; Ngài pûn ngì he̍t chhai Ngài ke sṳn-sân táng, chhai voi hâu-kông ke chû-pó tông-chûng hàng-lòi hàng-hi.
[15] Tui ngì su chhóng-chho to phai-fái yî-chhièn, ngì ke hàng-vì he mò hó-hiàm ke.
[16] To ngì sên-lî fat-tha̍t chhon thai-chhièn, ngì chhiu chhûng-mân phau-li̍t, sòng-sòng fam-chhui. Só-yî, Ngài pet ngì lì-khôi Ngài ke sṳn-sân; ke pó-fu ngì ke kî-lu-pak kiuk ngì lì-khôi voi hâu-kông ke chû-pó tông-chûng.
[17] Ngì yîn-vi chhṳ-kâ án yèn-tàu chhiu kiêu-ngau; ngì vi-tó miàng-sâng hoi chhṳ-kâ ngong-tong fú-phai. Só-yî Ngài chiông ngì piâng chhai thi-nài-hâ, yung án-ngiòng lòi kín-ko lie̍t-vòng.
[18] Ngì fái-sṳ cho-chhin, cho sên-lî mò kûng-tho, chṳ-to tá-lá-sap ngì ke-têu sṳn-só. Só-yî Ngài piong-fó sêu ngì, sṳ́ ngì pien-cho fó-fôi lòi-pûn ngìn khon.
[19] Ngì chhám lé, yún-yén me̍t-mòng lé. Ngin-sṳt ngì ke koet-kâ chhiòn-phu voi chho̍k-kiâng, kiâng kì-têu voi tù-tó lâu ngì khiung-yong ke kiet-khiu̍k.”
[20] Song-chú lâu ngài kóng-fa; Kì kóng:
[21] “Ngìn-chṳ́ â, ngì oi kóng yi-ngièn chit-phi Sî-tun-sàng.
[22] Oi lâu kì-têu kóng, Ngài — Chṳ-kô ke Song-chú án-ngiòng kóng: Sî-tun â, Ngài oi lâu ngì cho tui-thi̍t! Ngìn oi yîn-vi Ngài chit-fa̍t ngì lòi chhṳ̂n-siung Ngài. Ngài yit hién-mìn Ngài ke sṳ̀n-sṳn, sṳ̂-hàng sṳ́m-phan, kì-têu chhiu voi tî Ngài he Song-chú.
[23] Ngài oi sṳ́ chhiòn-sàng pot-vûn, hiet-liù mân-kiê. Thi̍t-ngìn voi tui si-mien pat-fông lòi kûng-tá ngì, chhṳ̀-thet ngì ke ngìn-mìn. Án-ngiòng, ngì chhiu voi tî Ngài he Song-chú.”
[24] Song-chú kóng: “Pún-lòi khon-khiâng Yî-set-lie̍t si-vì ke koet-kâ, m̀-voi chai chhiong net-è án-ngiòng chhiuk-sông Yî-set-lie̍t; ngìn chhiu voi tî Ngài he Chṳ-kô ke Song-chú.”
[25] Chṳ-kô ke Song-chú án-ngiòng kóng: “Ngài oi chiông si-san chhai kok-koet ke Yî-set-lie̍t-ngìn tai chón-lòi; án-ngiòng, lie̍t-koet chhiu voi tî Ngài he sṳ̀n-sṳn ke. Yî-set-lie̍t-ngìn voi he̍t chhai kì-têu chhṳ-kâ ke thú-thi song, chhiu-he Ngài su-pûn Ngài phu̍k-ngìn Ngâ-kok ke thú-thi.
[26] Kì-têu voi hí vuk-è, khôi-khién phù-thò-yèn, chhai ke-vi ôn-kî lo̍k-ngia̍p. Ngài oi chit-fa̍t khon-khiâng Yî-set-lie̍t ke lìn-koet, Yî-set-lie̍t chhiu voi hióng-su phìn-ôn. Án-ngiòng, kì-têu chhiu voi tî Ngài he Song-chú — kì-têu ke Song-ti.”