[1] Яхшы ад – буюк байлыкътан, урьмет де – кумюш ве алтындан яхшыдыр.
[2] Зенгин ве ёкъсул ян-янаша туралар: экисини РАББИ яратты.
[3] Зекялы адам келеяткъан беляны коре ве сакълана, саде исе, огге атылып, зарарлана.
[4] Алчакъгонъюлликнинъ ве РАББИ къоркъусынынъ пешинден зенгинлик, шурет ве яшайыш келир.
[5] Къара юрекли адамнынъ ёлу тикен ве къапкъангъа толудыр, джанына мукъайт олгъан адам ондан узакълашыр.
[6] Огъланны башындан догъру ёлгъа къой, къартайгъан сонъ да ондан таймаз.
[7] Зенгин адам фукъаренинъ саиби олур, борджкъа алгъан – борджкъа бергеннинъ къулу олур.
[8] Адалетсизлик сачкъан – беля джыяр, онынъ гъазабындан бир шей биле къалмаз.
[9] Озь отьмегини алып, фукъаренен пайлашкъан джумерт адам яхшы бахшышлар корер.
[10] Мыскъылджыны къуваласанъ, къавгъа битер, даванен сёгюнч де сонъуна етер.
[11] Юрек темизлигини севген адам гузель лаф эте ве падишанынъ достлугъыны къазаныр.
[12] РАББИ бильгини къорчалар, къара юреклининъ сёзлерини исе силип ташлар.
[13] «Тышарыда арслан бар! Сокъакъкъа чыкъсам, мени парчалар!» – дей тенбель.
[14] Башкъасынынъ апайынынъ агъзы – тюпсюз чукъур, РАББИнинъ гъазабына огърагъан анда тюшер.
[15] Огъланнынъ юреги ахмакълыкъкъа толу, амма тербие таягъы оны узакъ къувар.
[16] Байлыгъыны арттырмакъ ичюн, фукъаренинъ джаныны агъырткъан да, зенгин адамгъа бахшыш берген адам да ахыр-сонъу ёкъсуллыкъкъа огърар.
[17] Къулакъ асып, икметли адамларнынъ сёзлерини динъле, юрегинъ бильгиме дикъкъат этсин.
[18] Айткъанларымны ичинъде сакъласанъ, бахтлы олурсынъ, олар эр вакъыт агъзынъда азыр олурлар.
[19] Сен РАББИге ишаныр деп, мен бугунь оларны санъа огретем.
[20] -
[21] Акъикъатны бильдирмек ичюн, мен санъа насиаткъа ве бильгиге толу отуз ибаре яздым. Сонъ сен сени ёллагъанларгъа догъру джевап кетире билирсинъ.
[22] Ёкъсулны, фукъаре олгъаны ичюн, сыдырма, шеэрнинъ араба къапусы янында заваллынынъ джаныны агъырттырма.
[23] РАББИ оларнынъ давасыны чезер ве оларгъа залым эткен адамларнынъ джаныны алыр.
[24] Ачувлы адамнен дост олма, тез къызгъан адамгъа ёлдаш олма.
[25] Ёкъса оларнынъ ёлуна тюшип, джанынъа къапкъан къоярсынъ.
[26] Башкъасынынъ борджу ичюн къол берип, кефиль олмакътан къачын.
[27] Борджны къайтармакъ ичюн акъчанъ олмаса, яткъан тёшегинъни биле тартып чыкъарырлар.
[28] Баба-деделеринъ кечирген эски сынъырнынъ ерини денъиштирме.
[29] Ишини усталыкънен эткен адамны корьдинъми? О, адий адамлар огюнде турмаз, падишаларнынъ огюнде турар.