[1] Исраиль падишасы, Давут огълу Сулейманнынъ икметли сёзлери:
[2] Бу икметли сёзлер – икметнинъ ве огютнинъ манасына етмеге ве акъыллы лафларны анъламагъа,
[3] акъыл-ферасет, инсафлыкъ, адалетлик ве догърулыкъ акъкъында огютлерни алмагъа истеген адамлар ичюн.
[4] Саде адамгъа олар зекяны, яш огълангъа – бильги ве ферасетни берерлер.
[5] Оларны эшитип, икметли адам бильгилерини арттырыр ве акъыллы адам яхшы насиатлар тапар.
[6] Сонъ о, икметли сёзни ве кинаели икяени, акъыл саиплерининъ лафларыны ве оларнынъ тапмаджаларыны анълар.
[7] Бильгининъ башы – РАББИден къоркъмакътыр, огютни ве икметни бир шей ерине корьмеген адам – ахмакътыр.
[8] Динъле, огълум, бабанънынъ огютини ве ананънынъ эмирини ташлама.
[9] Олар башынъа – гузель тадж, бойнунъа да – ильвандыр.
[10] Огълум, эгер гуналы адамлар сени яманлыкъ япмагъа къандырсалар, разы олма.
[11] Эгер олар санъа: «Юр бизнен, тузакъта сакъланып, къабаатсыз адамны бир манасы олмайып беклермиз, ольдюрирмиз оны.
[12] О бир дюнья – тири алда адамларны, мезар – бутюн алда онъа тюшкенлерни киби, бойле де биз оларны тири ютармыз.
[13] Чешит тюрлю къыйметли мал-мульк алып, эвлеримизни гъаниметке толдурып-ташырармыз.
[14] Бизнен берабер джереп чекерсинъ, эпимизнинъ пара кисеси бир оладжакъ», – деселер,
[15] огълум, оларнен берабер ёлгъа чыкъма, оларнынъ ёлуна аягъынъ басмасын,
[16] чюнки оларнынъ аякълары яманлыкъкъа чапалар, олар къан тёкмеге ашыкъалар.
[17] Къушларнынъ козю огюнде тузакъны къоймакъ бошунадыр,
[18] олар исе озьлерининъ къаныны тёкмек ичюн, тузакъ япалар, сакъланып, джанларыны гъайып этелер.
[19] Адалетсиз къазанчкъа къызгъан эр кимнинъ сонъу бойледир: бу къазанч, онъа саип олгъан адамларнынъ джаныны ала.
[20] Икмет сокъакъларда къычыра, мейданларда сесини котере,
[21] топлашувларынынъ баш ерлеринде чагъыра, шеэрлернинъ араба къапусында бойле сёзлерни айта:
[22] «Эй, саде адамлар, саделикни не вакъыткъадже севеджексинъиз? Мыскъылджылар не вакъыткъадже мыскъылламакътан кейф чатаджакълар? Акъылсызларнынъ не вакъыткъадже бильгини корьмеге козьлери олмайджакъ?
[23] Меним опькеме къулакъ асынъыз, сонъ мен сизге озь рухумны тёкеджегим, сёзлеримни айтаджагъым.
[24] Мен чагъырдым – сиз эшитмединъиз, къолумны узаттым – абайлагъан адам олмады.
[25] Эписи насиатларымны ред эттинъиз, опькелеримни де къабул этмединъиз.
[26] Онынъ ичюн мен де сизинъ белянъыз устюнден кулерим, сизни дешет баскъанда, мен де сизни мыскъылларым.
[27] Сизни дешет фуртуна киби баскъанда ве беля къасыргъа киби сарып алгъанда, къайгъы ве сыкъынты тюбюнде къалгъанынъызда, къуванырым.
[28] О заман мени чагъыраджакълар, лякин мен эшитмейджегим, саба-танъдан мени къыдыраджакълар, лякин тапалмайджакълар.
[29] Олар бильгиден нефрет эттилер ве РАББИден къоркъуны озьлерине сайлап алмадылар.
[30] Олар насиатымны къабул этмедилер, опькелеримни де аякъ асты эттилер.
[31] Онынъ ичюн туткъан ёлларынынъ мейвасыны ашайджакълар, озь тюшюнджелеринден тояджакълар.
[32] Саделернинъ инатлыгъы озьлерини гъайып этеджек, акъылсызларнынъ гъамсызлыгъы озьлерининъ башына етеджек.
[33] Мени динълеген адам исе, яманлыкътан къоркъмайып, раат ве тынч яшайджакъ».