[1] Damu Sawa-Sabat, Yahudi nahu yoho gemu bahana égéki mése nahangkunggunana, sawa Minggu éné mimi asituhu sawa matahani, yang yoho Yesus Éné wosoho afu-afumenan niye yahang gobona fengféyahana égéki yeri Yesus Éné wosoho kufiyahana Éné béng ékému hohona.
[2] Hori etohonani, Yesus Éné wosoho kufiyahana Éné béng iyobégé féri ketanggena égéki abuwoméri pemoho otoho.
[3] Damu ékému osuri etohonani, Yohonabo Ahuyaha Yesus Éné wosoho fani égé deyoho.
[4] Damu yoho Yesus Éné wosoho anigigi égéki gugusanggeri fifimiri égena. Damu hakureyaha ahu ukuma yoho yang yoho méséri égena ita ékému égena. Yohona ifita esumu bang wimoho gahakumu égena.
[5] Yang yoho gagitoméri ahu énéyuhuwoho asuféri bahana ememere kubumenan niye bukumu tini uhung hohona. Emohoni, ahu ukuma yoho emiyohona, "Gugu fani Ahu mése dotoho Égéki ahu honubakigenato ékému fani agugumenan deyoho.
[6] Ala emohoni Égé mése dakamu dotoho. Emohoni, Égé nokumu fani baha deyoho. Gugu Égé kumu kotoféri Galilea soho fikoyaha ékému bakena égéki gugu bake u yoho yaki égéki dakamu finané.
[7] Égé emiyoho yaki, 'Ahu Ala bahato ékému daha Égé awe ahu dosa kemesumahana yoho bake kurohoné, damu debahae-abufiya ékému uri kufiyonané. Emohote, asu ukuma mohoka, yeya mimiki awe dakamu dotohoné.'"
[8] Damu yang yoho dagenaka, damu Yesus u yoho yaki égéki dakamu fimahana.
[9] Damu yoho Yesus Éné wosoho kufiyahana Éné béng ékému musuri hori Yesus Éné murid bibirikuma-ketahafi-woro (11) yoho kumu ahu aburoho Yesus kotoféyahana yoho kumu ememere égena yoho bake ukukuwoho mése éyakena égéki yohona.
[10] Yang yoho Magdala busu si Maria kumu Yohana kumu Yakobus énéni Maria kumu yang fe yoho yang nonéyuhuwoho kumu kotoféri bahana yoho kéré. Damu yoho ahu-rasul yoho bake sisi égéki yohona.
[11] Emohote, yang yoho u yohona égéki Yesus Éné murid yoho dagenaka, yoku yahamu yohona ememere fimahana, damu fani haiyangne ememere fimahana deyoho.
[12] Emohote, Petrus égé méséri kakumu Yesus Éné wosoho kufiyahana Éné béng ékému boniri hohoka, damu égé untoni hori iyobégé to fikoyaha ékému Yesus kufiyahana égéto ékému etohoni kamu tahano Yesus Éné wosoho fuhungguna remu égé. Emohoni, égé dakamu daha. Damu égé etoho yaki égéki éné modu kumu butumu fifimiri baha.
[13] Sawa Minggu égéki Yesus Éné murid yoho bahana ékému ahu ukuma yoho Yerusalem busu fikoyaha ékému musuri busu fe éné fi Emaus ékému bohohona. Emaus busu égéki Yerusalem busu kumu bibirikuma-ketahafi-kamisige (11) kilometer hamamu égé.
[14] Damu yoho asu yahamuto imarariya nogoki u emu-hori-daha égena yaki égéki u kutumu yori bohohona.
[15] Yoho u ememere kutumu yori undo-undoméri bohohona égéki, Yesus pumise deri yohoki takenamoho. Ememere Égé yoho kotoféri hohona.
[16] Emohote, ahu ukuma yoho Égé awe etohonate, yohona kiyo kufuhunggu gahakumu Égé fani femu etori nafamahana deyoho.
[17] Damu Yesus yoho bake abamu yoho, "U makerahae gugu yedi womu kumu kutumu yoro-yoroméri édahanae?" Emiyohoni, yoho dari ukuni budiyahangféri gugusanggeri égena.
[18] Damu yoho égena ékému ahu fe éné fi Kleopas utuhu haméri yoho, "Ha Nabo, ahu emu-hori-daha Yerusalem busu bahana yoho asu yahamuto imarariya nogoki u égena égéki nafamahana. Mite, kamu Gute esumu fani nafamoho deyohoe?" Ememere abamu yoho.
[19] Damu Égé tafe ahu ukuma yoho bake abamu yoho, "U égéte u makerahare?" Abamu yohoni, yoho utuhu haméri yohona, "Yesus Nazaret nahu Énéné ré. Égé ahu-nabi kéré. Damu Égé Ala Éné na habigiyo yeri ahu yoho bake haiyangmu yokukubumoho, damu ukukuwoho-mujizat ahu fani emesumahana de égéki emesumohoni, ahu yoho etahana.
[20] Emohote, ahu-imam yohona ahuhabang yoho kumu Yahudi nahu asuféri bahana yoho kumu kotoféri Yesus Égéki yeri Roma nahu yohona ahuhabang-gubernur Pilatus bake kurohona. Emohoni, Pilatus égéte Égé debahae-abufiya kumu akumoné ememere yori inggemoho. Emohoni, éné tentara yoho mése Égéki debahae-abufiya kumu ugunani kunggu.
[21] Emohote, Ala u yahamaki hamemere Ala Énamuki kubumu yohoni, Égéte Nuguna Ahuhabang kiri Israel nahu nuguki nuguna kufe yoho bahana ékému umburomoné ememere fisini beriya. Emohote, fani ememere égé deyoho. Égé kunggu égéki asu ukuma mériyaka, yeya sawa nogoki sawa ukumasiyo kéré.
[22] Damu hate mimi nogoki Yesus Éné murid nugu beriya nokumu yang yahamuto yoho mése ahu wosoho kufiyosumahanato ékému hohonaka, damu hokumu Yesus Éné wosoho fani gebuuguna deyoho. Damu dakamu deri nugu bake emiyohona, 'Malaikat ukuma yoho kibikubuméri nugu bake emiyohona, "Égé mése dakamu dotoho." Ememere nugu bake yohonani, dariyaka, dakamu deri sisi nogoki Yesus Éné murid gugu bake yoriya.' Yang yoho ememere nugu bake yohonani, nugu dari hakurumériya.
[24] Damu nuguna hogi yahamuto yoho hate Yesus Éné wosoho kufiyahana Éné béng ékému hori etohona. Emohote, yang yoho yohona yaki égéki hamemere Yesus Éné wosoho fani égéni etohona deyoho." Ememere ahu ukuma yoho Yesus bake sisi yohona.
[25] Damu Yesus dagika, ahu ukuma yoho bake emiyoho, "Ha, gugu budokigina. Gugu fani ahu-nabi u yakena égéki fani haiyangne ememere fimiri femu nafamahana deyoho.
[26] Gugu esumu nafanané: Ahu-nabi yoho mése ememere u yakena. Kristus, u feki Ala Énamuki kubumu yohoni Ahuhabang kiri baha Égésé mumangge esumu kugutoméri baha. Ememere bahaka, damu Égé Ala Éné busu mene osuri Ahuhabang kiri Énabo Ala kumu kotoféri Énahu yoho hafuféri etori bohoné."
[27] Ememere Kristus Éné sisi égéki Ala Éné Buku emu-hori-daha ékému égena égéki Yesus ayoméri yoho. Mumangge Musa éné Buku égena ékému Éné sisi égéki ayoméri yori arohoriya ahu-nabi yohona Buku emu-hori-daha ékému Éné sisi égéki ayoméri yori feyahafunggu.
[28] Yoho ememere yakenani, Emaus busu ékému botakenamahanani, sawa mése hahu kigi. Yesus kusumu nahangkuni ahainé bemoho.
[29] Emohote, yoho Égé bake ditini emiyohona, "Sawa mése hahu kiri asu kigini, nugu kotoféri nokumu bohowa." Emiyohonani, Égé yoho kotoféri busu ékému osuguna.
[30] Ememereya, Égé beri yoho kotoféri ohoru arenané bemahana égéki, Égé du-roti yeri Ala bake degi kuroho ememere yohoka, damu ahahaméri yoho bake kemeroho.
[31] Égé ememere emoho égéki Ala emohoni, yoho ukuni Yesus Égéki etori nafamahana. Emohote, Égé yohona womu kumu fake anigigi.
[32] Yoho hate fete fe bake u katugo égé nogoki etori kutumu abubamu yohona, "Nugu womu fe kumu boderiyani, Égé Ala Éné Buku Kara ayoméri sisi yoho, damu nuguna modu uguni nugu esumu hanikiriya," emiyohona.
[33] Yoho ememere etohona égéki mése asu kigite, bagumu méséri dakumu Yerusalem busu fikoyaha ékému hohona. Damu hokumu Yesus Éné murid bibirikuma-ketahafi-kamisige (11) yoho kumu Yesus Éné murid fe yoho kumu bodukumahanani, yohoki gebuuguna.
[34] Damu Yesus Éné murid Yerusalem busuyaha ékému bahana yohote ahu ukuma yoho bake emiyohona, "Nohogigiyohoniya, Nugunabo Ahuyaha Yesus dakamu dotoho nogoki haiyangne. Damu Égé mése Simon Petrus bake kibikubumoho," emiyohona.
[35] Emiyohonani, dagenaka, damu ahu ukuma yoho hate Emaus busu ékému ahanané bohohona égéki womu fe kumu Yesus gebuuguna éné sisi égéki ahu dukumahana yoho bake yohona. Damu hate Égé du-roti ahahaméri éyaha égéki Ala emohoni yoho ukuni Yesus Égéki etori nafamahana éné sisi égéki yoho bake yohona.
[36] Damu ememere Yesus Éné murid kotoféyahana yoho ahu ukuma yoho Yesus gebuuguna éné sisi égéki éyohonani dagena. Yoho sisi éyohonani dari égena womu ékému Yesus hakureyaha méséri éri yoho bake emiyoho, "Hai, gugu de bahanae? Nu Nabo Ala bake fisini yahae Égé guguki wayamu emoné," emiyoho.
[37] Damu yoho emuméri ememere fimahana, "Nugu kageto é irima we etoriya." Emohoni, yoho esemu mokéri hakurumahana.
[38] Emohote, Yesus yoho bake emiyoho, "Gugu fani mokéri hakurumenan deyoho. Nu dakamu dotoré égéki haiyang rahamo fani ememere butumu fimiri bohonan deyoho, meneféyané!
[39] Damu Yesus Nu séré. Gugu maha Nané bero ukuma damu Nané bégé ukuma nogo guku yeri femu etahané. Nuku Nané koru kumu Nané bégé kumu ememere de baha. Emohoni, Nu é irima deyoho," emiyoho.
[40] Damu Yesus u ememere yori feyahafungguka, Égé Éné bero ukuma damu Éné bégé ukuma égéki yoho bake kubumohoni yoho etahana.
[41] Damu yoho etori hanikiginate, damu mokéri fani kirimu haiyangne Yesus kéré ememere fimahana deyoho. Yoho ememere emahanani, Yesus yoho bake emiyoho, "Gugu ohoru nokumu arenané mahana égéki de ége?" emiyoho.
[42] Damu yoho ahae duguna égéki koru fe yeri Égé bake kurohona.
[43] Damu Égé ahae koru égéki yeri yoho emu-hori-daha yohona sama kumu énggé.
[44] Yesus yoho bake emiyoho, "Anggo feki Nu kumu gugu kumu kotoféri érékang égéki, gugu bake u yoréké égéki tafe katugo gugu bake yahae: Ala Nané sisi yobuwoméri yohoni, Nané sisi emu-hori-daha égéki Ala Éné Buku ékému kara uwangkenani égena. Damu Nané sisi égéki Musa éné Buku égena ékému damu ahu-nabi yohona Buku égena ékému damu Ala Éné Buku Mazmur ékému égena. Ememere Nané sisi égena égéki awe kakumu hamu hanéri éyoné haiyangkiné," emiyoho.
[45] Damu Yesus yohona sifing égéki abuwomohoni, anggo posuyahaki Yesus Éné sisi Ala Éné Buku kumu kara uwangkena égéki ahu yohote dari nafamahana.
[46] Yesus yoho bake emiyoho, "Nané sisi nogoki Ala Éné Buku kumu ememere kara uwangkena: 'Kristus Égésé awe kugutoméri akumoné. Asu ukuma mohoka, igirina mimi Égé ahu honubakiginato ékému awe dakamu dotohoné.
[47] Damu ahu Kristus Égé kotoféyahana nahu yoho Éné na habigiyo yeri Éné sisi égéki mumangge Yerusalem busuyaha ékému yobuwoméri yori busu fe busu fe soho emu-hori-daha hamu égena ékému hori esemu yo ahanané. Emohoni, ahu yohote dari yohona dosa kemahana égéki muni, dakamu abuméri Ala bake defenané. Emohoni, Ala yohona dosa tobunsumoné,' ememere kara uwangkenani égena.
[48] Damu gugu mése guguna kiyomu ukukuwoho emu-hori-daha égena égéki etori nafamahana. Emohoni, gugu mése guguna kiyomu etahana égéki ahu emu-hori-daha yoho bake nouwané.
[49] Damu Nabo Ala mése Éné Ubana Hayo guguki mahamu emoné ememere u yahamoho. Emohoni, Nu awe Ala Éné Ubana Hayo bake kubumu yahaeni, gugu bake defené. Emohoni, gugu fake Yerusalem busu fikoyaha nokumu bunané embahae Ala Éné busu mene bahato ékému Ala Éné Ubana Hayo kusumeni, deri guguki afuri bohoné," emiyoho.
[50] Damu Yesus yoho hafuféri yeri Yerusalem busu fikoyaha ékému musuri Betania busu takenamu égéto ékému hohona. Ékému Égé yoho niye Ala bake Éné bero ukuma kusumohoni osuguka, damu emiyoho, "Nabo Ala, ahu yohoki wayamu enu," emiyoho.
[51] Damu Égé yoho wayamu emon niye Ala bake éyoho égéki, yoho égena ékému mungguka, damu Ala Éné busu mene ékému atun niye Égé mése ogusugu.
[52] Damu yoho Yesus Énaukumenan niye bukumu tini uhung hohona. Damu yoho yohona modu esemu hanikéri dakamu Yerusalem busu fikoyaha ékému hohona.
[53] Damu yoho asu-sawa yoku damu Ala Énaukuni Ala Éné Afahang pama ékému fani mungguna deyoho. U fe karawoho.