[1] Anggo posuyaha mumangge Ala hou kumu soho kumu fani yori emoho deki, Ala Éné U ememere iri yohona Égé de baki. Damu Ala Éné U Égésé Ala kumu kotoféri égena. Damu Égé Uku Ala kéré.
[2] Damu anggo posuyaha mumangge Égé Uku Ala kumu kotoféri éyakena.
[3] Ala ahu damu kukuwoho haharemu égena damu kukuwoho fani haharemu égena de emu-hori-daha égéki yori emoho égéki, Égé kumu kotoféri emakena. Emohoni, Égé karakingkumaki, ahu damu kukuwoho haharemu égena damu kukuwoho fani haharemu égena de égéki fe fani éyon deyoho.
[4] Égé habigiyo de égéni, sifing harahaimu fimiri bohonané mahana égéki kuroho. Damu sifing harahaimu fimiri bohonané mahana égéki kuroho Égé ahu emu-hori-daha yoho niye Kakani Hori Égé Égé séré.
[5] Yesus Éné fi feki Kakani Hori Égé ememere iri yohona. Égé asukigito ékému kakani hori égé, damu asukigi égé fani Éné kakani hori égé égéki sifuhuni égé deyoho.
[6] Damu sawa feki Ala ahu besing fe kubumu yohoni daki. Éné fiki Yohanes.
[7] Égé deri Kakani Hori Égé ememere iri yohona Éné sisi égéki yobuwoméri yosumoho, nemohoni ahu emu-hori-daha yoho Énini fimiri bohonané.
[8] Damu Yohanes égé fani Kakani Hori Égé ememere iri yohona Égé deyoho. Emohote, égé Kakani Hori Égé Éné sisi égéki esumu yobuwoméri yosumon niye daki.
[9] Kakani Hori Égé ememere iri yohona Égésé haiyangne. Égé mése soho nokumu daki. Damu Égé ahu emu-hori-daha yoho bake emohoni, ahu énéyuhuwoho Égé Ala Éné sisi yobuwoméri yoho égéki nafamahana.
[10] Damu Kakani Hori Égé Égésé de soho nokumu baha. Damu Égé Ala kumu kotoféri soho nogoki yori emakenate, ahu soho nokumu bahana yoho Égéki fani nafamahana deyoho.
[11] Damu Égé Ukuné soho Énahu yoho bahana yoho bake dahate, Énahu yohote Égé etori fani hanikéri wayamu emahana deyoho.
[12] Emohote, ahu menohosé Égéki etori hanikéri wayamu emahana damu Énini fimiri bahana ememere bahana yoho bake yohona na kurohoni, ahu énéyuhuwohote Ala Énamkesiyo kiri bohonané.
[13] Damu ahu yoho Énini fimiri Ala Énamkesiyo kiri bahana égéki Alasé Uku emoho kéré. Mite, ahu yohona go kigina rahamo besing yang yaha rahamo damu ahu ukuné sifingmu fimoho rahamo fani ememere égenani, Ala Énamkesiyo kiri bahana deyoho.
[14] Ala Éné U ememere iri yohona Yesus Égé Uku soho nokumu ahu hayang kiri deri nuguna womu kumu éyaki. Damu nugu etoriyani Égé habigiyoméri baha. Égé Ala Énamu kamisige kigini, Ala emohoni Égé esumu habigiyoméri baha. Damu Égé emohoni, nugu nafamériyani nugu fani haiyangmu beriya deyohote, Ala Éné modu kuyoméri nuguki worumoho. Damu Égé Ala Éné u haiyangmu égé égéki kirimu yobuwoméri yosumohoni Alaki nafamériya.
[15] Yohanes égé Éné sisi égéki yobuwoméri u hanggeramu yori emiyoho, "Ahu nogoki nu mése yoréké Égé kéré. Nu mése moguri soho nokumu derete, Égé mo soho nokumu defené ememere yoréké Égé séré. Emohote, nu wadi asufiyon de égéki, Égé mése mumangge baki. Emohoni, Égé asuféri bahate, nu amiféri bere," emiyoho.
[16] Égé esumu Éné modu kuyomu nuguki kirimu worumoho. Emohoni, Égé nuguki esumu wayamu emesumoho, damu Égé nuguki tafe esumu wayamu emesumoho. Damu Égé ememere emesumoho égé fani modin deyoho, uku damu éyoné.
[17] Maha fima: Ala Éné hukum Musa bake kurohoni, Musa égéte Ala Éné hukum nugu bake yosumaki, emohoni nugu nafamériya. Emohote, Yesus Kristus emohoni nugu fani haiyangmu beriya deyohote, Ala Éné modu kuyoméri nuguki worumoho égéki nafamériya, damu Égé Ala Éné u haiyangmu yobuwoméri yohoni, nugu Alaki nafamériya.
[18] Damu ahu emu-hori-daha yoho yohona kiyomu fani Ala etahana deyoho. Emohote, Ala Énamu kamisige Uku Ala séré, damu Énabo kumu esumu arari égena Égésé Énabo Ala Éné sisi nugu bake yobuwoméri yoho kéré.
[19] Sisi nogoki ahu baptismusumoho nahu Yohanes éné kiyomu etohoki égéki yobuwoméri yoho: Yahudi nahu Yerusalem busu fikoyaha bahana yoho ahu-imam damu Lewi nahu yahamuto yoho bake yohonani, yohote hori Yohanes bake abamu yohona, "Gute ahu menoho gu sere?" ememere yohona.
[20] Damu Yohanes égé fani yahamu yoho deyoho. Égé yori emiyoho, "Nu Kristus, u feki Ala Énamuki kubumu yohoni Ahuhabang kiri baha Égé deyoho," emiyoho.
[21] Damu yoho tafe Yohanes bake abamu yohona, "Elia gusé rahamohoe?" Damu Yohanes égé utuhu hamoho, "Nu Elia deyoho." Damu yoho tafe Yohanes bake abamu yohona, "Ahu-nabi, ahu Ala Éné u dari yosumoho, égé rahamohoe?" ememere abamu yohona. Damu égé tafe utuhu hamoho, "Égé deyoho," emiyoho.
[22] Damu yoho tafe Yohanes bake abamu yohona, "Gute ahu menohosé re? Gu nouni, nugu hori ahu nugu bake yohonani deriya yoho bake yohowané," ememere yohona.
[23] Ememere yohonani, anggo posuyahaki Ala ahu-nabi Yesaya bake Yohanes éné sisi yaki hamemere Yohanes utuhu haméri yoho: "Nusé siyanto soho kumu u hanggeramu yosuméré. Nugunabo Ahuyaha awe defené mohoni, Égé gebufunan niye guguna modu wayamu fengféyonané," ememere utuhuhamoho.
[24] Damu ahu yoho yohonani hohona ékému Farisi nahu yoho kotoféri hohona.
[25] Damu ahu énéyuhuwoho hate Yohanes bake abamu yori emiyahana, "Gu fani ahu-nabi Elia deyoho, hate ahu-nabi fe deyoho, damu hate Ala Énamuki kubumu yohoni Ahuhabang kiri defené moho Égé deyoho. Ememere de éyongkumaka, makemohore ahu baptismusumohoe?"
[26] Ememere abamu yohonani, Yohanes dagika, damu yoho bake utuhu hamoho, "Nu ahu oho féri baptismusuméré. Damu Ahu fe Égé gugu bahana womu kumu de baha. Emohote, Égéki gugu fani femu nafamahana deyoho.
[27] Nu mése moguri derete, Égé awe Nané mo defené. Emohote, Égé esumu habigiyoméri baha, damu nu fani habigiyoméri Égé mahamu eme deyoho: U feki nu fani habigiyoméri Éné bégésabo yuhu fani abuwome deyoho," emiyoho.
[28] Damu u nogoki Yohanes Betania busu ékému uré Yordan afi sawa musuguto ékému ahu baptismusumoho égéki, u emu-hori-daha égéki emoho kéré.
[29] Yeya mimiki, ahu baptismusumoho nahu Yohanes etohoni Yesus égé bake daha. Damu Yohanes yori emiyoho, "Gugu, Ala Éné Wi-Domba Amuke etahané! Égé wi-domba gahakumu ahu soho nokumu bahana yohona dosa tobunsumon niye Éné aduwosoho Ala bake kurohoné awe akumoné.
[30] Damu Ahu nogoki nu mése yoréké Égé kéré: 'Nu mése moguri soho nokumu derete, Égé mo soho nokumu defené.' Emohote, nu wadi asufiyon de égéki, Égé mése mumangge baki. Emohoni, Égé asuféri bahate, nu amiféri bere.
[31] Damu nuku hate ahu menohosé Égé séré fani femu nafaméréké deyoho. Emohote, katugo nogo Égéki nafaméré. Damu nu deri ahu oho féri baptisméréni, Israel nahu gugu Égéki nafamenané. Ala Égéki kubumu yohoni Ahuhabang kiri baha Égé séré," emiyoho.
[32] Damu Yohanes égé pumise u etoho yaki Éné sisi égéki yobuwoméri emiyoho, "Anggo feki nu hate ahu menohosé Égé séré fani femu nafaméréké deyoho. Emohote, Ala nu bake emiyoho yaki, 'Gu oho féri ahu baptisnu. Gu oho féri ahu baptismoné moho égéki awe etohoné, Nané Ubana Hayo hou siyaha hosumu é-merpati gahakumu miri ahu fe éné haha kumu ogusuri bohoné. Damu gu nafamoné Ahu Égésé Nané Ubana Hayo féri baptismoné moho Égé kéré.' Ememere u yakiye mohoni, nu mése etoréni Ala Éné Ubana Hayo Égé é-merpati gahakumu Égé kotoféri bohonan niye Égé bake monu miri ogusugu.
[34] Nuku mése nané kiyomu pumise etoré, damu nu yobuwoméri emiyoré, 'Égé Ala Énamu kéré,'" emiyoho.
[35] Yeya sawa égéki, Yohanes kumu éné murid ukuma Égé kotoféyahana yoho kumu Betania busu ékému uré Yordan afi sawa musuguto ékému dakumu ogori méséri égena.
[36] Damu Yohanes Yesus deri bonahangkunggu égéki etohoka, égé yori emiyoho, "Etahané! Nogoki Ala Éné Wi-Domba Amuke gahakumu baha!"
[37] Emiyohoni, damu éné murid ukuma yoho hori Yesus Éné mo kumu éri kotoféri hohona.
[38] Emohote, Yesus abuméri mo kumu etohoni, yoho Éné mo kumu éri Égé kotoféri hohona. Égé yoho bake abamu yoho, "Gugute makemoho niye yagugunae?" Emiyohoni, yoho utuhu hamahana, "Rabi, makuma kumu bahare?" (Rabi éné u feki Bafa-guru kéré.)
[39] Damu Yesus yoho bake yori emiyoho, "Deri etahané." Emohoni, yoho Égé kotoféri damu Égé bahato ékému hori etohona. Sawa égéki bohahukigi sawakiyo sanggeremu kubuméri bahani, yoho Égé kotoféri bahana.
[40] Ahu baptismusumoho nahu Yohanes éné murid ahu ukuma yoho Yohanes éné u dagenaka, Yesus kotoféyahana. Ahu ukuma yoho égena ékému ahu feki Andreas. Égé uku Simon Petrus éné yahagisi fe kiye.
[41] Damu Andreas mumangge musuri hori éné yahagisi Simon efefeméri gebuuri emiyoho, "Nu kumu nohogi kumu kotoféri Mesias, u feki Ala Énamu kubumu yohoni Ahuhabang kiri baha, Égéki gebuuriya," emiyoho. (Damu u Mesias égéki Yunani nahu yohona u féri Kristus ememere iri yohona.)
[42] Damu Andreas Simonki yeri Yesus bake ogahana. Damu Yesus Simon égéki etori damu Égé bake yori emiyoho, "Guki Simon kéré. Yohanes énamu kiye. Gané fi feki Kefas ememere ainané," emiyoho. (Damu Yahudi nahu yohona u féri Kefas ememere iri yohona, emohote Yunani nahu yohona u féri Petrus ememere iri yohona.)
[43] Yeya sawa kigi Yesus Galilea soho fikoyaha ékému ahainé moho. Damu Égé Filipus gebuuri égé bake yori emiyoho, "Marari Nu kotoféna," emiyoho.
[44] Filipus égé uku Betsaida busu fiko nahu we. Busu fiko égéki uku Andreas kumu éné yahagisi Petrus kumu ememere ékému bahana kiye.
[45] Filipus égé Yesus Éné u dagika, damu hori éné hogi Natanael gebuuri damu égé bake yori emiyoho, "Nuguna yahae Musa éné Buku damu ahu-nabi yohona Buku womu kumu kara uni u yoré yakena Égéki gebuuriya. Égéki Uku Yesus Nazaret busu nahu Yusuf énamu kéré," emiyoho.
[46] Damu Natanael égé bake utuhu haméri emiyoho, "Nazaret busu re? Ukukuwoho wayamu égé égéki nugu niye fani Nazaret busu ékému éyon de kiyoho," emiyoho.
[47] Damu Filipus dagika, damu utuhu hamoho, "Nohogi, maha deri eta!" Emiyohoka, yoho Yesus bake ogahana. Ogahana égéki, Yesus Natanael Égé bake daha égéki etori Uku égére emiyoho, "Maha eta! Ahu nogoki Israel éné go fe esumu haiyangmu baha kéré. Égé fani ahu yoho bake yahamu yosumoho deyoho," emiyoho.
[48] Damu Natanael égé dagika, damu Égé bake abamu yoho, "Nabo gute makemohore nuki nafamohoe?" Ememere abamu yohoni, Yesus dari utuhu haméri emiyoho, "Filipus deri gu bake Nané sisi fani yohon de égéki Nu mése guki etoréni debahae-ara fu ékému égé. Damu égé deri gu bake yoho," emiyoho.
[49] Damu Natanael dagika, damu Égé bake yori emiyoho, "Bafa-Guru, Gu Ala Énamu kéré. Nabo Gu Israel nahu yohona Ahuhabang kéré," emiyoho.
[50] Damu Yesus égé bake utuhu haméri emiyoho, "Nu mése guki etoréni, debahae-ara fu kumu égé ememere yoré, emohoni gu haiyangne Nusé Ala Énamu kéré ememere fimoho. Gu awe ukukuwoho emu-hori-daha esemu fikomu éyoné moho égéki etohoné," emiyoho.
[51] Damu Yesus hate ukukuwoho esumu fikoyaha égéki égé bake yori emiyoho, "Nu katugo gu bake u yahae méré nogoki haiyangne, femu nara: Gu awe etohoné hou womu hosumu taneri hori éyoné damu malaikat, Ala Éné u dari yosumahana yoho Ahu Ala bahato ékému dere Nu afike gahakumu éré ékému atuna-miyonaméri éyonané," emiyoho.