[1] Yesus yokukubuméri éyaha éné sawa égéki, ahu yahamuto ékému égena yoho Yesus bake Galilea nahu yohona sisi égéki ememere yohona: Galilea nahu yoho ohoru uri aguto Ala bake kurohona éné sawa égéki, ahuhabang-gubernur Pilatus yohoni éné tentara yoho deri Galilea nahu yohoki homuuri kufiyahana.
[2] Yesus sisi égéki dagika, damu ahu yoho bake emiyoho, "Galilea nahu yoho ememere homuuri kufiyahana égéki gugu etori yoho esumu dosa aburohomu yahanani yoho homuuri kufiyahana, mite Galilea nahu tuhuremu emu-hori-daha yoho dosa yahamutomu yahanani, yoho fani homuuri kufiyahana deyoho ememere fimahana rahamohoe?
[3] Karawoho. Nu katugo gugu bake u yahae méré nogoki femu narané: Gugu dosa yahana égéki fani ukuni modinan dekumaka, Ala hakereméri gugu bake poréyahamu emoné, gugu hate hamemere awe akumenanéka, damu indo fani bunéri égé de éné busu ékému atunané.
[4] Damu sisi feki finané! Siloam busu ékému ahu yoho abuge-menara si osuri kufe etori bohonan niye iyobégé féri sigina. Damu abuge-menara esumu siyahakigi égé subakéri miri ahu 18mu awiyakemohoni, hosanggiyakena. Gugu ahu hosanggiyakena yohoki etori ahu énéyuhuwoho esumu dosa aburohomu yahanani hosanggiyakenate, ahu tuhuremu emu-hori-daha Yerusalem busu fikoyaha kumu bahana yoho dosa yahamutomu yahanani, fani hosangkigina deyoho ememere fimahanae?
[5] Karawoho. Nu katugo gugu bake u yahae méré nogoki femu narané: Gugu dosa yahana égéki fani ukuni fani tafe dosa afénan dekumaka, Ala hakereméri gugu bake poréyahamu emoné, gugu hate ahu emu-hori-daha hamemere awe akumenanéka, damu indo fani bunéri égé de éné busu ékému atunané," emiyoho.
[6] Damu Yesus u nogoki tafe aseméri yoho, "Ahu fe égé giyong-anggur ékému debahae-ara kamisige kuhungguni baha. Damu ahu égé debahae-ara égéki éné yo fe éyoné etohoné méri hoho-daha méri efefemoho. Emohote, égé fani yo gebuugu deyoho.
[7] Emohoni, giyong-anggur nesi égé ahu giyong-anggur etori baha égé bake u nogoki ememere yoho, 'Nu mése sufébégé ukumasiyomu horé-dere méri efefeméréte, yo fani gebuuri deyoho. Emohoni, soho nogo uku kukuwoho fe kuhumon niye debahae-ara nogoki éné yo fani fiyoho de, emohoni nou.'
[8] Damu u égéki ememere yohoni, ahu giyong-anggur etori baha nesi égé u égéki dagika, damu égé utuhu haméri ememere yoho, 'Nabo, maha dakasuhumu modiyané. Sufébégé fenikini, yo fani fiyon dekumaka, auwa. Emohoni, nu awe debahae ékému soho kuri awiwime. Damu wi moku yohona o égéki yeri deri kemukume.
[9] Maha dakasuhumu sufébégé fe hogo éyoné, debahae-ara nogo awe yo fiyon kiyoho. Mite, yo fani fiyon dekumaka, nugu debahae-ara nogo auwa.' "
[10] Sawa-Sabat, Yahudi nahu gemu bahana éné sawa égéki, Yesus Égé Yahudi nahu yohona sunafahang ékému osuri yokukubumoho.
[11] Damu ékému yang fe de baha. Yang égé hohoi keiyong osuguni kumangkéri bamohoni, mése sufébégé 18 kigi. Damu yang égé habigiyoméri méséri éyoné moho égéki éné mobigi bégé haimoho. Yang égé pahaki hoho. Damu égé ememere hoho-daha méri baha.
[12] Emohoni, Yesus yang égéki etori yohoni, yang égéte Yesus bake daha. Damu Yesus yang égé bake emiyoho, "Wadi, gu kumangkigi bamoho égéki mése ahafu yaréni, gogeriméri haniyakigi," ememere yoho.
[13] Damu yang égé éné mobigi haimohoni, habigiyoméri fani méséri égé de égéki Yesus Égé Éné bero égéki yang éné mobigi teyo ékému kufiyohoni, damu yang égé kakumu méséri wayamu asiri éri Ala Énaukunggu.
[14] Sawa-Sabat égéki Yesus ahu ahafu yahani, ahuhabang Yahudi nahu yohona sunafahang ékému hafuféri etori baha nahu égé ufuyori ahu aburoho yoho bake emiyoho, "Sawa birikuma-berahafi-kamisige (6) furubo afénané mahana égéki de égena. Sawa égena égéki gugu defenané, nemohoni ahu ahafu afénané. Emohote, fani Sawa-Sabat égé meneféyané!"
[15] Emiyohoni, dagika, Nabo Yesus utuhu hamoho, "Gugu ahu yahamu manggoho gahakumu bahana yohoniya, Sawa-Sabat égéki ahu emu-hori-daha guguna wi-sapi damu wi-keledai yohona afahang ékému suhungfiyahanaka, damu yeri hohonani, oho migina. Gugu furubo ememere yahana.
[16] Ériya nokumu Abraham éné go yang égé mése posuyaha sufébégé 18 moho égéki yuhu-rantai aragena gahakumu hohoi yohona ahuhabang Iblis aragini baha. Emohoni, Sawa-Sabat égéki yang égé kumangkéri kugutomoho ékému suhungfiyoho égéki demoho," emiyoho.
[17] Yesus u katugo yoho égéki ahu Yesus bake u kutumu ansakumahana yoho dagenaka, yoho esumu hosumahana, emohote ahu tuhuremu Yesus Ala Éné habigiyo féri ukukuwoho-mujizat, ahu fani emesumahana de égéki degemu emohoni, etori hanikigina.
[18] Yesus tafe emiyoho, "Ala Ahuhabang kiri soho nokumu Énahu yohoki hafuféri baha éné u égéki makerahare gahakumu ége? Damu usisi makemere awe aseméri yahaekumaki, femu wayamu nafamenane?
[19] Ala soho nokumu Ahuhabang kiri baha, damu ahu Éné u dari bahana yoho awe esumu aburohomu bohonané mahana éné u égéki ero-sawi éné sisi gahakumu égé: Ahu fe égé ero sawi esumu unaware égéki yeri giyong kumu hang fiyoho. Ero-sawi égé esumu unawarekigi. Emohote, éné sifo ungguméréya, esemu fikokigi. Damu debahae fikokéri idekiyo aburoho tataméri égena. Ememere égenani, é yoho deri damu idekiyo hamu a gesiri bahana," emiyoho.
[20] Hate sisi fe Yesus yoho bake tafe aseméri yoho, "Nu katugo Nabo Ala Ahuhabang kiri Énahu hafuféri etori baha éné sisi feki awe yahae.
[21] Yang fe tepung dumu gahakumu esumu aburohomu égena ékému kukuwoho-ragi égéki kotoféyahana. Kukuwoho-ragi esemu yahamutomu yeri tepung esumu aburoho égena ékému kokuméri kotoféri sesebumoho. Emohote, esemu fafani yeri osuguni du-roti kiri égé. Ememere Ala Ahuhabang kiri baha ékému ahu Énini fimiri Éné u dari bahana yoho yohona modu degemu wayamu beri wayamu emesumahana. Yoho wayamu bahana égéki kukuwoho-ragi gahakumu ahu fe yoho bake emahanani, ahu fe yohote hate yohona modu degemu wayamu beri wayamu emesuméri bahana. Damu ahu fe yoho tafe komukuni yohona modu degemu wayamu beri wayamu emesuméri bahana," emiyoho.
[22] Yesus Yerusalem busu fikoyaha ékému ahain niye busu fikoyaha hamu égena ékému damu busu égena ékému awiwiméri osu-musuméri ahu yoho bake yokukubuméri hoho.
[23] Ememere hoho égéki, ahu fe égé Yesus bake abamu yoho, "Nabo Yesus, ahu yahamuto yohona dosa kemahana égéki tobunsuméri umburomon nere?"
[24] Emiyohoni, Yesus ahu ékému égena yoho bake utuhu hamoho, "Ala soho nokumu Ahuhabang kiri baha ékému gugu Énahu kiri bohonané mahana égéki afahang éné afite unaware ékému atunané mahana gahakumu agefekigi. Emohoni, maha guku esumu afite unaware ékému atunan niye pafufonané. Nu gugu bake yahae: Ahu aburoho habigiyoméri afite unaware ékému atunané mahanate, fani osuguna deyoho. Hamemere ahu aburoho yoho Ala Énahu kiri bohonan niye pafufomahanate, yoho fani Énahu kiri bohonan deyoho.
[25] Sawa feniki afahang nesi méséri damu afite ketamongkumaka, gugu kebemu dahanani, awe pama kumu damu éri gogoméri yori emiyohonané, 'Nabo, afite abuwonu,' emiyohona. Emohote, afahang nesi égé utuhu haméri tafe yori emiyohoné, 'Gugu makuma kumu dahana nu fani nafaméré deyoho,' emiyohoné.
[26] Damu gugu awe utuhu hamenané, 'Nabo, nugu mése gu kotoféri éniya-miriya damu nabo gu mése nuguna busu fikoyaha yedi pama ékému yokukubumoho égéki dariya.'
[27] Emiyohonate, égé tafe yori emiyohoné, 'Nu esumu gugu makuma kumu dahana égéki fani nafaméré deyoho. Ahu keiyongmu emesuméri bahana gugu, Nané sama kumu musuri nohoyané!'
[28] "Damu gugu etohonané embahae Ala Éné busu mene ékému Ahuhabang kiri Énahu hafuféri etori bahato ékému guguna yahae Abraham, Ishak, Yakub, damu ahu-nabi ememere égenate, Ala guguki awe uwahafumoné, pama kumu éri efe uri soho asibubukuméri yohonané.
[29] Damu Yahudi nahu de yoho sawa musuguto damu sawa musuguto afi negemoho ékému defenané. Damu sawa oguguto damu sawa oguguto afi negemoho ékému defenané. Ememere Yahudi nahu de yoho emu-hori-daha deri Ala Éné busu mene ékému Ala Ahuhabang kiri Énahu yohoki hafuféri bahato womu kumu hanikéri ohoru éni bohonane.
[30] Damu Nu katugo yahae méré nogoki haiyangne: Ahu aburoho yoho katugo esemu asuféri bahana yoho awe amiféri bohonané. Damu ahu aburoho yoho katugo amiféri bahana yohote awe asuféri bohonané," emiyoho.
[31] Yesus u ememere yori feyahafungguka, damu kakumu Farisi nahu yahamuto yoho Yesus bake deri Égé bake emiyohona, "Ahuhabang-raja Herodes égé Guki funé bemoho. Emohoni, fani nokumu éyon de kusumu musuri degemu nohoi."
[32] Damu Yesus utuhu hamoho, "Gugu hori Herodes anggi keiyong gahakumu baha égé bake nouwané, 'Sawa nogo damu igirini, Nu damu hohoi keiyong ahu afuri bahana yohoki uwahafume, damu ahu kumangkesemahana yohoki ahafu afe. Ememereya asu ukuma mohoka, damu igiri mimiki awe Nané furubo feyahafume.'
[33] Anggo posuyahaki ahu-nabi yoho Yerusalem busu fikoyaha ékému uri kufiyahanani kuwangkena. Emohoni, Nu fani busu fe kumu akume deyoho. Sawa nogo damu igirini damu asu ukuma mohoka, damu igiri mimiki Nu Nané furubo égéki Nuku damu yo bohori Yerusalem busu fikoyaha ékému atu.
[34] "Ha Yerusalem nahu yohoniya, Yerusalem nahu yohoniya! Gugu ahu-nabi yoho bake iyobégé féri homuuri kufiyakena. Damu hate Ala kubumohoni Éné u yo hohomusumahana nahu yohoki iyobégé féri homuuri kufiyakena. Ayamu énéniyaha égé énamkesiyo tefiyo féri ahukuni égé hamemere Nu mése aburohomu guguki fimiri ahukume méréte, gugu mungguna.
[35] Emohoni, narané! Ala soho nokumu Éné Afahang guguna womu kumu égé ékému bahate, awe muni ahainé, fani tafe ékému bohon deyoho. Damu Nu katugo gugu bake u yahae méré nogoki femu narané: Sawa éyoré nogoki gugu Nu fani tafe etohonan deyoho. Embahae sawa akimamaga hamu hanéri éyoné, Nu awe dakumu defeka, damu gugu Nuki etori yori emiyohonané, " 'Ala kubumu yohoni, Égé Nugunabo Ahuyaha kiri degi maraha. Ala Nuguna Ahuhabang Égéki awe wayamu emoné,' emiyohonané."