[1] Damu Yesus ahu aburoho yoho bake u emu-hori-daha égéki yori feyahafungguka, damu kusumu hori Kapernaum busu fikoyaha ékému osugu.
[2] Ékému Roma nahu yohona tentara méké asuféri beri ahu-tentara 100mu hafuféri baha égé de baha. Damu égé éné afahang énahu amiféri beri éné u dari éné furubo yeri bahana fe égéki worumoho. Ahu égéki katugo kumangkéri wowiyokéri bahani, mése akumoné bemoho.
[3] Damu ahu-tentara méké asuféri baha égé Yesus Éné sisi égéki dagika, damu égé Yahudi nahu yohona yeyoho matahai yahamuto yoho kusumohoni yohote hori Yesus bake yohonani, Égé deri ahu-tentara méké asuféri baha éné furubo yaha nahu égéki ahafu afénéka, damu gogeriméri hanikin niye hohona.
[4] Damu Yahudi nahu yoho Yesus bake deri Égé ahu-tentara méké asuféri baha égéki mahamu emon niye fisini emiyohona, "Nabo, Roma nahu yohona tentara méké asuféri baha égé Yahudi nahu nuguki esumu woruméri kuyoméri emoho. Égé Yahudi nahu nugu niye nuguna sunafahang égéki sigi. Emohoni, ahu égé ememere wayamu emohoni, Gu esumu égé mahamu enu," emiyohona.
[6] Emohoni, Yesus u égéki dagika, damu yoho kumu kotoféri hori yakenana, afahang takenamahana. Emohote, ahu-tentara méké asuféri baha égéte éné hogigiyoho bake yohoni éné hogigiyoho Yesus bake deri emiyohona, "Nabo, Roma nahu yohona tentara méké asuféri baha égéte emiyoho, 'Nabo, wiyaha menefé! Gu esumu asuféri baha, damu nu amiféri bere. Emohoni, Gu fani nané afahang atun deyoho.
[7] Damu Nabo Yesus Gu hate esumu asuféri baha, damu nu amiféri bere. Emohoni, nu fani deri Nabo Gu samame deyoho. Nuku hate nané ahuhabang éné u yoho égéki femu wayamu dari éré. Damu nu hate ahu-tentara 100mu hafuféri bere. Emohoni, nané matahai amiféri bahana yoho hamemere nané u dari égena. Nu nané matahai fe bake yori fake nohoi ememere yahaekumaka, égé hamemere hoho. Damu nané matahai fe bake nokumu do ememere yahaekumaka, égé hamemere maraha. Damu ahu nané na kiri nané furubo yaha égé bake furubo nogoki neri ememere yahaekumaka, égé hamemere furubo égéki yaha. Hamemere Gu asuféri habigiyoméri bahani, kamu Gané umu nou. Emohoni, ahu nané furubo yaha égé awe gogeriméri haniyakiné,' " emiyoho.
[9] Damu Yesus dagika, damu Égé esemu hanikéri éhéng ememere habang gonggongmoho. Damu Égé abuméri katugo ahu Égé kotoféri hohona yoho bake yori emiyoho, "Nu katugo gugu bake u yahae méré nogoki femu narané: Ahu nogoki fani Israel nahu deyohote, kamu égésé Nanini kirimu fimiri baha. Israel nahu gugu bahana nokumu Nu fani ahu fe ememere éné modu fikomu Nanini fimiri baha égéki fani etori gebuuri deyoho," emiyoho.
[10] Damu Roma nahu yohona tentara méké asuféri baha égé yohoni éné hogigiyoho dahana yoho kusumu dakumu Roma nahu éné afahang hori etahanani, ahu furubo yeri baha nahu mése gogeriméri haniyakigi.
[11] Ememere emohoka, fani kebekigi de Yesus kumu Éné murid yoho kumu ahu aburoho yoho kumu ememere kotoféri Nain busu fikoyaha ékému hohona.
[12] Yakenana ogori busu hai siri to gumahahanato éné afite fikoyaha botakenamahana égéki, ahu yoho abuge uni ahu wosoho égéki kokuni busu ékému yeri musuguna. Ahu kunggu égéki uku ofo besing ne, damu ahamo fe énamu kamisige ye. Énéni égé énamu éné wosoho mo kumu hoho, damu ahu aburoho busu ékému bahana yoho efe uri yang égéki aumukuni hohona.
[13] Nugunabo Yesus ememere yang égéki etori woruméri damu égé bake yori emiyoho, "Wadi, fani efe aun deyoho, menefé!"
[14] Emiyohoka, Yesus ememere abuge ahu wosoho kokungguna égéki takenaméri damu Éné bero féri abuge égéki gohomoho. Damu ahu wosoho yeri hohona yoho ukunggunaka, damu Yesus ahu kunggu égé bake yori emiyoho, "Hai ofo subang, Nu katugo yahae gu doto nohoi," emiyoho.
[15] Damu ofo subang mése kunggu égé dotori beri age u yoho. Emohoni, Yesus ofo subang égé énéni bake kuroho.
[16] Ahu emu-hori-daha yoho etahanaka, Ala esumu asuféri baha ememere fimiri mokigina. Damu hanikéri ememere yori Ala Énaukungguna, "Ahu-nabi fikoyaha Ala Éné u dari yosumoho nahu égé nugu ériya womu kumu maraha, damu Ala Énahu nugu wayamu emon niye maraha," ememere yohona.
[17] Ememere emohoka, Yesus Éné sisi égéki Yudea soho emu-hori-daha damu soho fikoyaha ita égena ékému yofiyahana hoho.
[18] Ahu baptismusumoho nahu Yohanes éné murid yoho Yesus u emu-hori-daha emesumoho égéki etori Yohanes bake yohona. Emohoni, Yohanes égéte dagika,
[19] damu éné murid ukuma yohona fi iri yoho bake emiyoho, "Gugu Yesus bake hori ememere abamu nouwané, 'Gusé anggo posuyaha Ahuhabang defené moho ememere u yahamaki Gusé rahamo daka hate ahu fe rahamohoe? Emohoni, nugu awe ahu énini kidabohowane?' " Yohanes égé ememere yohoka, damu yohoki kusumohoni hohona.
[20] Damu Yohanes éné murid ukuma yoho Yesus bake dahanaka, damu Égé bake emiyohona, "Ahu baptismusumoho nahu Yohanes égé Nugunabo Gu bake abamu yohoné nuguki kusumohoni nugu deriya. Damu égé abamu yoho, 'Nabo, anggo posuyaha Ahuhabang defené moho ememere u yahamaki Gusé rahamo daka hate ahu fe rahamohoe? Emohoni, nugu awe ahu énéné kidabohowane?' Ememere abamu yohona."
[21] Damu Yesus ahu aburoho yohoki ememere wayamu emesuméri emoho: Ahu kumangkeseméri kugutomahana yohoki ahafu kemoho, damu ahu hohoi keiyong afuri égena yohoki uwahafunggu, damu ahu kiyo ketanggenani bahana yohoki emohoni yohote kiyo daneri etahana.
[22] Yesus Yohanes éné murid yoho bake utuhu haméri yoho, "Gugu dakamu hori sawa nogoki u mése dagena damu guguna kiyomu kukuuri etahana égéki Yohanes égé bake nouwané: Ahu kiyo ketanggenani, yoréni kiyo danegena. Damu ahu darukiginani, yoréni méséri hohona, damu ahu yohona haha ahayang esumu kirimu migina yohoki ahafu yaréni gogeriméri haniyakigina. Emohoni, yoho dakamu yohonahu yoho kotoféri Ala bake sembayang yeri Énaukuni bahana. Damu ahu sunto to ketanggenani, yoréni ahu u dagena. Damu ahu hosanggiginani, yoréni dakumu dotohona, damu ahu toto kara nahu yoho bake Ala Éné u manggoho yofiyoho daha égéki yosuméré.
[23] Ahu menohosé Nuki etori Ahu Égésé Ahuhabang defené moho Égé séré ememere yori fani Nuki undomenan dekumaka, ahu énéyuhuwoho yohona modu esemu hanikinané," emiyoho.
[24] Ememere ahu Yohanes éné u yeri dahana yoho kusumu hohonaka, damu Yesus ahu aburoho yoho bake Yohanes éné sisi emiyoho, "Gugu makemoho niye siyanto soho ékému hori Yohanes égéki etori gebuugunae? Gugu siyanto soho ékému hori ahu éné modu fani botokéri bahana de éné modu derahaiyokigi égéki etohonan niye hohonae? Karawoho. Yohanes éné modu fani ememere baha deyoho.
[25] Damu fani ememere etohonan dekumaka, gugu hori makerahae etohonan nere? Gugu hori ahu ifita manggoho ememere kunggu égéki etohona rahamohoe? Karawoho! Ahu fe ifita manggoho ememere kunggu damu toto aburoho kufuri baha égé uku ahuhabang-raja éné afahang fikoyaha ékému bahana.
[26] Emohoni, gugute makemoho niye siyanto soho ékému hohonae? Hori ahu-nabi fe égéki etori Ala Éné u areyonan niye hohonae? Yahae, haiyangne! Nu u yahae méré nogoki narané: Ala Éné u katugo yosumoho nahu Yohanes égésé esemu asuféri égéte anggo posuyahaki ahu-nabi Ala Éné u yosumakena nahu yoho esemu amiféri bahana.
[27] Yohanes égé Nu fani dere de mése moguri deri ahu yoho Nu gebuuri wayamu emenan niye yohona modu fengféyoho égé séré. Damu anggo posuyahaki Ala Éné Buku kumu Yohanes éné sisi ememere kara uniyéré: " 'Maha u nogoki femu nara! Ahu fe Nané u yo ahainé moho nahu égésé Gu moguri kusumeni ahainé. Emohoni, égéte hori Gu awe defen niye Gané yedi fengféyoné,' emiyoho.
[28] Nu katugo gugu bake u yahae méré nogoki femu narané: Soho nogoki ahu énéni asufiyohoni bahana yoho fete fani baptismusumoho nahu Yohanes hamemere bahana deyoho, mite Yohanes égéte esumu asuféri baha. Emohote, sawa Ala katugo soho nokumu Ahuhabang kiri harahaimu Énahu yohoki hafuféri etori baha égéki, ahu menohosé Ala Énahu kiri bohongkumaki, égésé asuféri bahate, ahu baptismusumoho nahu Yohanes égésé amiféri baha damu Ala Énahu kiri bahana ékému ahu fe esumu amiféri baha égésé asuféri bahate, Yohanes égéte amiféri baha," emiyoho.
[29] Ahu emu-hori-daha yoho Yohanes Ala Éné u yohoni dagenaka, damu yohote yobuwoméri yohona, "Ala u ememere yoho égéki haiyangne: Nugu esumu nuguna dosa kemériya égéki ukuni modiyanéka, damu Ala bake deri Éné u dari bohowané." Ememere yobuwoméri emiyohonaka, damu yoho baptismenan niye yohonani, Yohanes égésé ahu énéyuhuwoho yohoki baptismusumoho. Damu ahu aneséyang kemesuméri ahuhabang-kaisar bake kurosumahana yoho hate hamemahana.
[30] Emohote, Farisi nahu yoho damu bafa-guru Musa éné hukum yokukubumahana nahu yoho Yohanes Ala Éné u yoho égéki dagenate, fani hanikigina deyoho damu Yohanes baptismoné moho égéki mungguna. Yoho ememere eméri Ala Ukuné sifingmu fimiri yoho niye emoné moho égéki undomahana.
[31] Damu Yesus tafe u yori emiyoho, "Emohoni, katugo nogo ahu Yohanes damu Nuki undoméri bahana égéki Nusé makemere yahae? Ahu yoho Nu u aseméri yahae méré nokumu amkesiyo yoho gahakumu bahana. Amkesiyo yoho ahu dukumusumahanato ékému beri ememere habahae yahana. Amkesiyo gogo ukumamu habahae yeri gogo fe gogo fe yoho bake u hanggeramu yohona: " 'Nugu wikito guni uri kubu iriyate, gugu fani hanikéri gong kigina deyoho. Damu nugu berosi bahana éné kubu égéki iriyate, gugu fani habahae yeri efe uguna deyoho.'
[33] Damu u aseméri yoré égéki ememere kubumoho: Yohanes ahu baptismusumoho nahu daha égéki, ohoru fani énggé de damu ero-anggur noho fani migi deyoho. Ememere baha, nemohoni ahu yoho u ememere yori Yohanes égéki undomahana, 'Yohanes égé hohoi osuri bahani, ero-anggur noho fani migi deyoho,' emiyohona.
[34] Damu katugo ahu Ala bahato ékému dere Nusé ohoru éné damu anggur noho miri ememere eméré égéki, ahu yoho etori damu yori emiyahana, 'Ahu égé aren wiyaha énggé, damu ero-anggur noho miri wambumoho. Damu Énohogigiyoho ahu aneséyang kemesuméri ahuhabang-kaisar bake kurosumahana yoho damu ahu fani Musa éné hukum dagena de dosa kemesumahana yoho séré.' Ahu yoho ememere yori Nuki undomahana.
[35] Emohote, ahu Ala kotoféyahana yoho Ala Éné u yoho égéki dari hamemere eméri wayamu bahanani, ahu fe yoho etori Ala Éné sifing fimiri emoné moho nogoki haiyangne ememere nafamahana," emiyoho.
[36] Ememere Farisi nahu fe éné fi Simon Yesus bake deri Égé bake emiyoho, "Nabo, nané afahang kumu kotoféri hori ohoru areya," emiyoho. Emohoni, Yesus ahu kefo kiri ékému hoho. Deri abuge-arenané mahanato ékému beri ohoru béénggé.
[37] Damu busu fikoyaha égé ékému yang fe Ala Éné u fani dagi de dosa kemesuméri baha égé de baha. Yang égé dagini Yesus deri Farisi nahu fe éné afahang ékému osuri beri ohoru béénggé. Ememere dagika, égé oho-minyak gobona awokigi égéki yeri deri afahang ékému osugu. Oho-minyak gobona égéki botol ware iyobégé hayo féri emahana ékému kokungguni égé.
[38] Ememere Simon kumu éné kefo yoho kumu ohoru béénggenani, yang égé Yesus Éné mo kumu ayegiméri beri bégé ungsumohoni hori égé ékému bukumu tini yang égé efe uri éné kenoho pesanggi miri Yesus Éné bégé kumu ugu. Emohoni, yang égé kenoho égéki éné habangyong féri afunggu. Damu ememere yang égé Yesus Énaukuni worumohoni, Yesus Éné bégé égéki butumu fuméri oho-minyak gobona féri akusumu ugu.
[39] Farisi nahu égé yang emoho égéki etori éné modu kumu fimoho, "Yesus Égé esumu ahu-nabi kingkumaki, yang Éné haha gohomoho égéki yang dosa aburoho kemesuméri baha si ye ememere nafaméri emiyohoné, 'Nané haha fani gohomon deyoho, menefé.' Ememere yori angginekin kiyoho."
[40] Ememere fimohoni, Yesus Simon bake yori emiyoho, "Simon, nu u fe de égéni, gu bake yahae nara!" Simon utuhu haméri Égé bake yoho, "Bafa-guruwa, maha Guku fake nou."
[41] Damu Yesus u nogoki aseméri yoho, "Ahu fe aneséyang kemerohoka, damu aneséyang tafe komukuni kemesumoho égé de baha. Ahu égé ahu ukuma yoho bake aneséyang kemeroho yahana; fe égé aneséyang-dinar 500.000mu kurohoka, fe égé 50.000mu kuroho.
[42] Ahu ukuma yoho fani habigiyoméri aneséyang égéki dakamu kurohona deyoho. Emohoni, ahu éné aneséyang ahu ukuma yoho bake kemeroho égé éné modu kuyoméri ahu ukuma yoho bake emiyoho, 'Gugu nané aneséyang yahana égéki fani dakamu kurohonan deyoho,' " ememere yoho. Yesus ememere ukusi aseméri yohoka, damu Simon bake abamu yoho, "Ahu ukuma yoho égena égéki ahu menohosé esumu aburohomu worumohoe?"
[43] Ememere abamu yohoni, Simon utuhu hamoho, "Nu fimiri ahu aneséyang aburoho yaha égé kéré," emiyoho. Damu Yesus Simon bake utuhu haméri yoho, "Gu fimiri yoho égéki haiyangne."
[44] Damu Yesus Égé abuméri yang égéki etohoka, damu Égé Simon bake yori emiyoho, "Gu yang nogo emoho égéki finu! Nu ahu kefo kiri gané afahang musuréte, gu fani oho siri kurohoni, fani Nané bégé oho uroho kuni deyoho. Emohote, yang nogo efe uguni, éné kenoho miri Nané bégé uguni yaki suhukigi. Damu égé éné habangyong féri afu-afumoho.
[45] Damu gu Nu gebuugute, Nuki fani wofunggu deyoho. Emohote, gané afahang musuri égé féri yang nogo Nuki hanikéri uku Nané bégé wofunggu yaki uku damu niyaki.
[46] Damu oho-minyak gobona awokigi égéki Nanaukumon niye fani Nané habang teyo kumu fani akuugu deyoho. Emohote, yang égé oho-minyak gobona égé féri mése Nané bégé kumu akusumu ugu.
[47] Emohoni, Nu katugo gu bake yahae méré nogoki femu nara: Yang éné dosa aburoho égé égéki mése tobunsuméréni, égé esemu aburohomu Nuki worumoho kéré. Emohote, Nu ahu esemu kamukumamu éné dosa tobunsuméréni, ahu égé kamukumamu Nu worumoho kéré," emiyoho.
[48] Damu Yesus yang égé bake yori emiyoho, "Gané dosa mése tobunsuméré," emiyoho.
[49] Ahu kefo yoho ékému Yesus kotoféri ohoru béénggena yoho yohona modu kimiri ememere fimahana, "Ahu nogo fani dosa tobunsumon deyoho. Ememere dosa tobunsumoné moho éné na habigiyo karawoho. Kamu Ala Égésé awe dosa tobunsumoné," ememere fimahana.
[50] Emohote, Yesus tafe yang égé bake yori emiyoho, "Gu Nanini kirimu fimiri bahani, Ala gané dosa kemesumoho égéki tobunsuméri umburomoho. Emohoni, kusumu nohoi! Ala guki etori bohoné, gané modu awe gemu wayamu bohoné," emiyoho.