[1] Yesus Éné murid yoho bake emiyoho, "Ahu menohosé soho nokumu baha égé ahu fe bake yahamu yohoni, ahu fe égéte dosa aféngkumaki, égé u yoho égé ukuné ha kumoné. Ahu ahu fe ikuhamoné moho égéki soho nokumu de esemu égenate, ahu menohosé ahu fe bake yahamu yohoni damu ahu fe égéte dosa aféngkumaki, égé u yoho égé ukuné ha kumoné.
[2] Ahu menohosé ahu Nanini fimiri amiféri baha égé bake yahamu yohoni, ahu égéte dosa yari Nanini fani fimiri bohon dekumaki, Ala ahu yokuni yoho égé bake esumu hakereméri poréyahamu emoné. Ala ahu yokuni yoho nogo bake poréyahamu emoné moho égéki esumu bodukigi. Emohote, ahu égé ememere dosa fikoyaha afén de, dakasuhumu iyobégé fikoyaha féri kapebégé kumu yuhu féri guma asuri pemoné otori kiyohouyaha kumu oguwoné égéki fani esumu bodukigi deyoho.
[3] Damu guguna matahai Alani fimiri bahana ékému ahu kamisige égé gu bake dosa aféngkumaka, guku égé bake hori kamu gu kumu égé kumu ememere bahana ékému u fe poréyahamu emoho égéki kubuméri nou. Ahu égé dagika, damu dosa yaha égéki ukuni yobuwoméri yori poréyahamu emoné moho égéki modingkumaki, guku ahu égé kumu dakamu bero kutumu ayoméri feyahafunu.
[4] Ahu mekenohosé gu bake dosa afénéka, damu égé dosa yaha égéki butumu fifimiri gu bake deri yori emiyoho, 'Gu nu fani degemu poréyahamu emon deyoho,' ememere yohongkumaki, gu égé fani poréyahamu emon de bero kutumu aiyoméri feyahafunu. Damu ahu égé sawa kamisige égéki tafe aburohomu dosa afénéka, aburohomu ogoho-maraha méri éné dosa yaha égéki butumu fifimiri gu bake deri yori emiyoho, 'Gu nu fani degemu poréyahamu emon deyoho,' ememere yohongkumaki, égéki fani poréyahamu emon de bero kutumu aiyoméri feyahafunu," emiyoho.
[5] Damu ahu-rasul, u feki Yesus kubumu yohoni Éné sisi yo hohosumahana nahu yoho Nugunabo Yesus bake emiyohona, "Nugu mahamu enu! Emohoni, nugu tafe komukuni Guki esumu kirimu fimiri bohowané," emiyohona.
[6] Damu Nabo Yesus yoho bake emiyoho, "Gugu fimiri Ala habigiyoméri awe esumu emoné ememere yahamutomu fimenangkumaka, gugu debahae-ara bake ememere nouwané, 'Debahae-arawa, égéto ékému kosege musuri hori kiyohouyaha hokumu kimiri ena!' Ememere yohonangkumaka, debahae-ara égéki gugu u yohonato hamemere éyoné," emiyoho.
[7] Damu Yesus u tafe yoho, "Gugu bahana ékému ofo amgebu fe égé ofo moku gahakumu beri énabo furubo yahate aneséyang fani yaha deyoho. Damu égé sawa yorong giyong hori soho kuwoho rahamo wi-domba etori baha rahamo ememere eméri yaki dakamu afahang daha égéki, énabo ofo amgebu égé bake fani hanikéri ememere yohon deyoho, 'Fake deri kakumu na!'
[8] Emohote, énabo amgebu égé bake awe emiyohoné, 'Ohoru fengféna, emohoni nu awe are. Damu gané ifita degemu kuni nu awe are-amiméré égéki mahamu enu. Damu ememere emonéka, gu fake mo naka, nemi!' emiyohoné.
[9] Damu égé énabo u yoho égéki dari éné furubo yeri feyahafumoho égéki, énabo égé bake degi kuroho fani ememere yoho deyoho. Damu égé uku éné furubo éné bero teyo kumu égena égéki yaha, nemohoni énabo fani degi kuroho ememere yohon deyoho.
[10] Ememere u égé nogoki gugu hate hamu hanéri égé. Gugu guguna Ahuhabang Ala gugu bake u yoho égéki wayamu feyahafumahana égéki, gugu ememere Ala bake nouwané, 'Nabo Ala, nugu ofo moku gahakumu beri Gané furubo homereyaha yeri beriya. Nabo, nugu bake degi kuroho fani ememere yohon deyoho, menefé. Gu Nugunabo kiri beri damu nugu bake furubo kurohoni, yeri kamu nuguna furubo esumu emamériya égéki emériya.' "
[11] Sawa feki Yesus damu Éné murid yoho damu Yerusalem busu fikoyaha ékému ahanan niye hohona égéki, yoho Samaria soho fikoyaha kumu Galilea soho fikoyaha kumu ememere égena éné goungmaga ékému nahangkungguna.
[12] Ememere busu fe osuguna égéki ahu besing bibirikuma (10) yohona haha ahayang miri bahana yoho Yesus bake dahana. Emohote, yoho méké hamuyahamu égena.
[13] Damu yoho u hanggeramu Égé bake yohona, "Nabo Ahuyaha Yesus, nugu worunu," emiyohona.
[14] Damu Yesus yohoki etori yoho bake emiyoho, "Gugu hori ahu-imam yohoki gebu nouwané. Damu ahu-imam yohote gugu mése gogeriméri haniyakigina rahamo kara rahamo ememere efefemenané." Emiyohoni dagenaka, ahu ahayang miri bahana yoho ahu-imam yoho bake womu fe ékému bohohona égéki yoho gogeriméri haniyakinané
[15] Emohote, ahu bibirikuma dukuméri égena ékému ahu kamisige égé uku etohoni égé mése gogeriméri haniyakigi. Damu égé dakamu Yesus bake daha. Damu dakamu bodaha égéki égé u fikomu yori Ala Énaukunggu.
[16] Damu égé Yesus bake deri Éné bégé fu kumu bukumu tini uhung hori damu Yesus bake degi kuroho ememere yoho. Ahu égéki Yahudi nahu deyoho. Uku Samaria nahu we.
[17] Damu Yesus égé bake abamu yoho, "Ha, ahu bibirikuma yoho esumu gogeriméri haniyakigina. Emohote, makemohore ahu birikumu-berahafi-sanggere (9) yoho fani dakamu Nu bake deri Ala Énaukumahana deyohoe?
[18] Ahu bibirikuma (10) égena ékému kamu ahu kamisige égé Nu bake dakamu deri Ala bake degi kuroho ememere yoho. Damu ahu nogoki fani Yahudi nahu deyoho," emiyoho.
[19] Damu Yesus Samaria nahu égé bake emiyoho, "Gu mése Nusé habigiyoméri ahayang miri baha égéki ahafu afe ememere fimoho. Emohoni, Nu mése guki ahafu yaréni gogeriméri karakigini, méséri dakamu kusumu nohoi," emiyoho.
[20] Sawa feki Farisi nahu yoho Yesus bake abamu yohona, "Sawa makerahae Ala soho nokumu Ahuhabang kiri Énahu yoho hafuféri etori bohone?" Ememere abamu yohoni, Yesus yoho bake utuhu hamoho, "Gugu Ala soho nokumu Ahuhabang kiri Énahu yohoki hafuféri etori baha égéki fani guguna kiyomu etohonan deyoho.
[21] Damu ahu fe fani ememere kubumu yohonan deyoho, 'Égé nokumu Ahuhabang kiri baha' rahamo 'Égé hokumu Ahuhabang kiri baha' rahamo ememere fani yohonan deyoho. Maha narané. Ala gugu bahana womu kumu éri katugo guguna Ahuhabang kiri mése age guguki hafuféri etori baha," emiyoho.
[22] Damu Égé Éné murid yoho bake emiyoho, "Embahae sawa fe awe defené, Ahu Ala bahato ékému dere Nu Ahuhabang kiri guguki hafuféri etori bahae. Ememere bere égéki gugu Nuki etohonané mahanate, gugu fani Nuki etohonan deyoho.
[23] Ahu Ala bahato ékému dere Nu awe defe méré égéki ememere éyoné: Bang sawa musuguto ékému uwaneri kakani hori égé yaki sawa oguguto ékému ogohoni, ahu emu-hori-daha yoho etohonané. Hamemere ahu soho emu-hori-daha bahana yoho Nu awe defe méré égéki awe etohonané. Emoho nemohoni, ahu gugu bake yori emiyohonané, 'Etahané, Ahu Ala bahato ékému daha Égé de hokumu baha' damu 'Etahané! Égé nokumu de baha' ememere yohonangkumaki, gugu fani u nogoki haiyangne ememere fimenan deyoho. Damu gugu fani kotoféri hori etohonan deyoho, meneféyané!
[25] Emohote, dakasuhumu mumangge Ahu Ala bahato ékému dere Nusé awe esemu aburohomu ifiyo-tifiyomenanéka, damu awe kugutome. Damu ahu katugo bahana nogo Nuki ansakuméri modinané.
[26] "Sawa Ahu Ala bahato ékému dere Nusé dakumu soho nokumu defe méré égéki anggo posuyahaki Yahudi nahu nuguna yahae Nuh baki égéki, ahu yoho ukukuwoho emesuméri égena égéki emesuméri bakena hamemere bohonané.
[27] Ahu énéyuhuwoho homereyaha énggena hoho damu migina hoho ememere besing yang yaha damu hate yang hu yaha ememere bakena embahae Nuh égé osuri yufung-afahang fikoyaha ogugu. Damu hakureyaha ahai fikoyaha deri ahu énéyuhuwoho abubahamu kungguni, honubakiyakena.
[28] Hate sawa Nu dakamu defe méré égéki, anggo posuyaha Yahudi nahu nuguna yahae Lot baki égéki hamemere éyoné. Ahu yoho yoku homereyaha énggena hoho, damu migina hoho, damu kukuwoho tokunsuméri toto tokunsumahana, damu kukuwoho wayamu kuhunsumahana, damu afahang sigina.
[29] Emohote, Lot égé Sodom busu baha ékému musuri hoho. Sawa égéki indo kumu iyobégé indoneiyo waneseméri a gahakumu hou siyaha kumu waneseméri pesanggi miri ahu damu kukuwoho emu-hori-daha bahana yohoki dori ahamukuwangki.
[30] Hamemere sawa Ahu Ala bahato ékému dere Nu hakureyaha dakamu defe méré égéki ahu yoho fani fengféyonan deyoho.
[31] Sawa égéki ahu afahang pama kumu tahangkutosumahanato kumu bahana yoho fani tafe afahang osuri toto afénan deyoho. Damu ahu giyong kumu égena yoho fani afahang hori toto afénan deyoho.
[32] Lot énahamo makerahare emaki u ékému finané: Lot énahamo égé éné toto Sodom busu kumu égena égéki afén niye dakamu abuméri etoho. Emohoni, égé kuni uku damu hohoi-dase éné debahae kane bagokéri kotini égé.
[33] "Ahu menohosé uku soho nokumu esumu posu-posukéri bohon niye ukuni sifingmu fimiri bohongkumaka, emohoni égé awe fani Ala kumu kotoféri bohoné embahae posu-posukin deyoho. Emohote, ahu menohosé Nu kotoféyon niye uku énéné fimiri bohoné moho égéki modinéka, damu hate Nané niye ahu fe yoho hamu awe uri kufiyonané mahana égéki éné modu féri fengféyongkumaki, égé awe Ala kumu kotoféri bohoné embahae posu-posukiné.
[34] Nu katugo gugu bake u yahae méré nogoki femu narané: Nu defe méré asu égéki ahu besing ukuma yoho kunu igamsumahanato ékému kotoféri kunu igina. Damu Ala besing fe égéki yeri ahainé. Damu besing fe uku damu ékému éyoné.
[35] Damu yang ukuma du-gandum éné tama pesanggi miyoné moho éné kukuwoho iyobégé égéki abubuméri éyahana égéki, Ala yang feki ékému yeri ahainé, damu yang kamisige awe uku damu ékému éyoné." [
[36] Damu ahu ukuma giyong hori furubo éyahanani, Ala besing fe égéki yeri ahainé. Damu ahu besing kamisige uku damu ékému éyoné.]
[37] Damu Yesus Éné murid yoho Yesus bake abamu yohona, "Nabo, makuma kumu ememere éyone?" Abamu yohonani, dagika, Yesus utuhu hamoho, "Ohoru paha égena ékému é surahayo awiwiméri bung hohona," emiyoho.