[1] Yohanes Yesus Égéki baptismohoka, damu Yesus Égéte uré Yordan ékému musuri dakamu daha égéki, Ala Éné Ubana Hayo Yesus Éné modu afuyeri bahani, Égé habigiyomoho. Damu Ala Éné Ubana Hayo hafuféri égéni, Égé siyanto soho ékému hoho.
[2] Damu ékému sawa 40 moho damu hate asu 40 moho. Damu sawa ememere baha égéki, hohoi yohona ahuhabang Iblis deri Yesus Égéki dosa afén rahamo ememere ikuhamoho. Damu sawa 40 ememere égena égéki fani ohoru fe énggé deyoho. Emohoni, sawa akimamaga égena égéki Égé esumu areyakigi.
[3] Damu hohoi yohona ahuhabang Iblis Yesus bake yori emiyoho, "Gu Ala Énamu kéré. Emohoni, iyobégé nogo bake nouni, du-roti kiné damu na," emiyoho.
[4] Emohote, Yesus Égé utuhu hamoho, "Ala Éné Buku ékému mése ememere yori kara uniyéré, " 'Ahu hayang fani kamu ohoru remu énggamusuméri baha deyoho,' " emiyoho.
[5] Damu ememere emohoka, hohoi yohona ahuhabang Iblis égé hate tafe Yesus hafuféri égéni, Yesus hori soho haibe esumu siyaha ékému osugu. Osuri baha égéki, hohoi yohona ahuhabang Iblis soho nokumu ahuhabang-raja emu-hori-daha yoho soho fikoyaha yeri ahu soho ékému bahana yohoki hafuféri égena égéki hakureyaha kubumohoni, Yesus Égé etoho.
[6] Damu hohoi yohona ahuhabang Iblis Yesus bake yori emiyoho, "Anggo posuyahaki Ala mése nu bake nané na habigiyo kurohoni, nu ahuhabang-raja emu-hori-daha yohoki hafuféri éréyéré. Damu kukuwoho emu-hori-daha soho fikoyaha ékému esumu habigiyoméri manggohomu égena égéki nané na we. Emohoni, nané na ememere égena égéki nu awe habigiyoméri Gu bake awe kurahae. Nu awe ahu menohoki hanikiye kumaki, égé bake awe kurahae.
[7] Emoho nemohoni, Gu bukumu tini uhung hori nanaukumongkumaki, soho fikoyaha emu-hori-daha nogoki damu kukuwoho emu-hari-daha soho fikoyaha ékému égena nogoki nu awe Gu bake kurahae. Emohoni, Gute hafuféri bohoné," emiyoho.
[8] Ememere hohoi yohona ahuhabang Iblis Yesus Égéki ikuhamohote, Yesus Égéte hohoi yohona ahuhabang Iblis bake yori emiyoho, "Ala Éné Buku mése ememere kara uniyéré: " 'Gugu esumu Nugunabo Ala bake sembayang yeri Égé bake ememere yori Énaukunané, "Nabo, Gusé nané Ala kéré." Damu gugu kamu Éné u remu dari bunané.' "
[9] Damu hohoi yohona ahuhabang Iblis égé Yesus hafuféri yeri Yerusalem busu fikoyaha ékému hoho. Hori hafuféri yohoni, Yesus Égéte Ala Éné Afahang miru teyo kumu esumu siyaha égéto ékému osugu. Osuri bahani, damu hohoi yohona ahuhabang Iblis égé Yesus bake yori emiyoho, "Gu Ala Énamu kingkumaki, Guku siyaha nokumu peroho nou!
[10] Ala Éné Buku womu kara mése ememere uniyéré: " 'Ala awe yohoné malaikat yoho awe Gu ahukuni éyonané.'
[11] Damu hate emiyoho, 'Damu Gu awe yohona bero teyo kumu ogutatuné. Emohoni, iyobégé Gané bégé fani inggemon deyoho,' " emiyoho.
[12] Damu Yesus dagika, Égé hohoi yohona ahuhabang Iblis bake yori emiyoho, "Emohote, Ala Éné Buku womu kara ememere uniyéré: 'Ala nuguna Ala kéré. Emohoni, ahu fe Nugunabo Ala fani ikuhamon deyoho. Menefé,' " emiyoho.
[13] Damu hohoi yohona ahuhabang Iblis égé Yesus dosa afén rahamo ememere ikuhaméri feyahafungguka, damu Yesus Égéki muni kusumu hoho. Emohote, égé embahae sawa fe wayamu éyongkumaki, Yesus tafe ikuhamoné moho.
[14] Damu Yesus dakamu Galilea soho fikoyaha ékému daha égéki, Ala Éné Ubana Hayo Yesus Égéki afuyeri bahani, Égéte damu habigiyomoho. Damu Ukuné sisi égéki ahu yoho ahu Galilea soho fikoyaha emu-hori-daha ékému bahana yoho bake yosumahana.
[15] Damu Yesus Égé hori soho fikoyaha ékému Yahudi nahu yohona sunafahang égena ékému osu-musuméri ahu emu-hori-daha yoho bake yokukubumohoni, ahu énéyuhuwoho Yesus asuféri baha ememere Énaukungguna.
[16] Damu Yesus Éné busu, Nazaret busu ékému beri ahuyaha kiyaki ékému ogoho. Sawa-Sabat, sawa Yahudi nahu gemu bahana égéki, Yesus Égé Yahudi nahu yohona sunafahang osu-musuméri baha. Hamemere Nazaret busu ékému Sawa-Sabat égéki Égé Yahudi nahu yohona sunafahang ékému osugu. Damu Égé Yahudi nahu dukumahana yohona sama kumu Ala Éné Buku Kara etori yoho niye méséri égé.
[17] Damu ahu fe Yesus bake Ala Éné Kara fe abuni kufiyahana égéki yeri kuroho. Kara égéki ahu-nabi Yesaya Ala Éné u dari kara uwangki égé kéré. Yesus kara égéki yeri abuwoméri Kristus Éné u baha ékému gebuuguka, damu ememere etori u fikomu yoho:
[18] "Nabo Ala Nuki kubumu yohoni, Ala Éné Ubana Hayo Nu bake deri Nu kumu kotoféyoho, nemohoni Nute awe Ala Éné u manggoho ahu toto karakigina yoho bake yahae. Nabo Ala Nuki kubumu yohoni dere. Damu Nu ahu ememere bahana yoho bake yobuwoméri yahae: Ahu yoho ahu fe yoho kumu kutumu taki aragenani, yoho wakiginate, yohona kufe yoho habigiyoméri yohoki berahae yeri yohona soho kumu hori kufiyahana. Ahu ememere kugutoméri bahana yoho bake yahae, 'Gugu mése suhungfiyahana,' ememere yoho bake yahae, damu ahu kiyo poréyahakigina yoho bake yahae, 'Guguna kiyo mése daneri égena,' damu ahu fe yoho ahu yoho bake poréyahamu emahana. Emohoni, ahu kugutoméri bahana yoho bake yahae, 'Gugu kugutoméri bahana égéki mése karawoho,' ememere yahae.
[19] Damu Nabo Ala kusumohoni Nu dere. Nusé ahu yoho bake ememere u yobuwoméri yahae: 'Katugo nogoki Ala Égé u yahamaki hamemere ahu yoho bake Ala Éné modu kuyomu woruméri emoné moho éné sawa égé kéré.' "
[20] Ememere Kara égéki etori yori feyahafumohoka, damu Ala Éné Kara dakamu abuni ahu Yahudi nahu yohona sunafahang ékému furubo yeri baha égé bake kurohoka, damu baha. Ahu emu-hori-daha Yahudi nahu yohona sunafahang ékému bahana yohona kiyo esemu Égé bake butumu etahana.
[21] Damu Yesus yoho bake yori emiyoho, "Nu Ala Éné Buku Kara etori yoré gugu dagena égéki sawa nogoki Nusé age eméréni, awe hamu hanéri haiyangkéri éyoné," emiyoho.
[22] Damu ahu emu-hori-daha yoho Égé u yoho égéki dagenaka, mumangge hanikéri éhéng ememere yori habang gonggongméri emiyohona, "Égé u yokukubumoho égéki haiyangne, damu dariyani manggohokigi," ememere yohona. Emohote, yoho tafe emiyohona, "Égé u nogoki makemere wayamu nafamohore? Yahae, haiyangne. Nugu posuyaha nafamériyani, égé Yusuf Énamu kéré," emiyohona.
[23] Damu Yesus dagika, damu yoho bake yori emiyoho, "Yahae, haiyangne. Gugu esumu Nu bake u aseméri égé nogoki yohonané mahana, 'Nabo dokter, kamu gané aduwosoho ahafu neri, awe gogerimoné karakiné,' ememere aseméri yohonané mahana. U feki Nu bake ememere ditini yohonané mahana, 'Nugu dariyani Gu busu fe, Kapernaum busu hori ukukuwoho emu-hori-daha Ala Éné habigiyo féri degemu wayamu emesumoho yaki hamemere Guku Gané busu, Nazaret busu nokumu enu,' ememere ditini yohonané mahana.
[24] Emohote, Nu katugo gugu bake yahae méré nogoki haiyangne. Ahu-nabi yoho yoku yohona busu hohona égéki, yohona busu nahu yoho fani hanikéri wayamu eméri ahu-nabi yohona u dagena deyoho.
[25] Nu katugo gugu bake usisi ukumamu tafe yahae méré nogoki haiyangne, gugu narané! Usisi kamisige égéki anggo posuyahaki Yahudi nahu nuguna yahae nabi Elia baki égéki, Israel soho nokumu yang ahamo yoho aburoho bakena. Damu Ala emohoni Israel nuguna soho fikoyaha nokumu a fani kigi de sufébégé ukumasiyo nahangkungguka, damu kamubégé birikumu-berahafi-kamisige (6) moho. Emohoni, ahu soho fikoyaha emu-hori-daha bahana yoho aren esumu kirimu karakigini bahana.
[26] Ememere bahanate, Ala fani Elia bake yohoni, égé énahu Yahudi nahu yohona yang ahamo yoho bahana fe bake ogoho deyoho. Emohote, Ala yohoni Yahudi nahu de yoho Sarfat busu Sidon busu fikoyaha takenamu égé ékému bahana yoho bake hori yang ahamo kamisige égé aren karakigini, mahamu emoho.
[27] Damu usisi fe égéki anggo posuyahaki ahu-nabi Elisa baki égéki, nuguna Israel soho fikoyaha nokumu ahu aburoho yoho ahayang miri bakena. Emohote, Ala yohoni nabi Elisa égé fani Yahudi nahu ahayang miri bahana fe égéki ahafu yaha deyoho, mite kamu Yahudi nahu de yoho kamisige Naaman égéki ahafu yahani gogeriméri haniyakigi. Naaman égé soho fikoyaha fe Siria soho ékému baki," emiyoho.
[28] Damu ahu aburoho Yahudi nahu yohona sunafahang ékému dukuméri bahana yoho Yesus u katugo yoho égéki dagenaka, damu esumu ufuyohona.
[29] Yoho méséri Yesus Égéki uwahafunggunaka, yohona busu fikoyaha pama kumu musuguna. Yohona busu, Nazaret busu égé haibe ékému sigina, emohoni yoho Yesus Égéki apupeméri yeri hori haibe maga ékému yeri hori pemenané oguwoné bemahana.
[30] Emohote, Yesus dakamu abuméri ahu aburoho égena womu kumu anggiyaméri kusumu hoho.
[31] Damu sawa feki Yesus Égé Kapernaum busu fikoyaha Galilea soho égé ékému ukoho. Ékému Sawa-Sabat, Yahudi nahu gemu bahana éné sawa égéki Yahudi nahu yohona sunafahang osu-musuméri Ala Éné u yokukubumoho.
[32] Ala Yesus kubuméri Éné na habigiyo kurohoni, Yesus esumu Éné na yeri habigiyoméri yokukubumoho. Emohoni, ahu yoho Yesus yokukubumoho égéki dari hanikéri éhéng ememere yori habang gonggongmahana.
[33] Yesus ememere Yahudi nahu yohona sunafahang ékému yokukubumoho ékému ahu fe hohoi osuguni baha, damu égé u hanggeramu emiyoho,
[34] "Ha Nazaret nahu Yesusa, nu nafaméréni Gute mekenoho Gu séré. Gusé esemu degemu manggohomu baha, damu dosa fani yaha deyoho, damu Gusé Ala Égé bahato ékému daha kéré. Hohoi keiyongkéri beriya nuguki fani abusahagiyomon deyoho, menefé! Gu deri nuguki poréyahamu emon nere?" emiyoho.
[35] Emohote, Yesus u hanggeramu yoho, "U fani tafe yohon de menefé! Damu ahu nogo musuri kusumu nohoi," emiyoho. Damu hohoi keiyong égé ahu aburoho égena womu ékému ahu égéki kusumoho budomohoka, damu musuri kusumu hoho, mite hohoi keiyong égé emohoni, ahu égé fani haha koru fani haimoho deyoho.
[36] Damu ahu emu-hori-daha ékému égena yoho mokéri hanikéri éhéng ememere yori habang gonggongmahana, damu fete fe bake emiyoho, "Yesus u yoho égéki fani asakigi deyoho. Haiyangne! Yesus Éné na yeri asuféri baha, damu Égé Éné habigiyo de égé. Emohoni, hohoi yoho bake yohoni, hohoi keiyong yoho dari musuri bibitakigina," ememere yori mokéri hanikigina.
[37] Emohoni, Yesus emoho u égéki yofiyahanani, busu hamu soho égena ékému hoho.
[38] Yesus Égé hohoi ahu afuyeri baha égéki uwahafungguka, damu Éné murid yoho kumu kotoféri Yahudi nahu yohona sunafahang ékému musuri hohona. Musuri hori Simon éné afahang ogohona. Ékému Simon énékuné inuwahae uguni baha, damu ahu yoho Yesus Simon énékuné ahafu afén niye Égé bake yohona.
[39] Emohoni, Yesus Simon énékuné bake ogori méséri kerouri etori inuwahae bake hagiyakéri u hanggeramu yoho, "Gogerinu! Wayamu bunu," ememere uwahafungguni, inuwahae égé undofiyoho. Damu kakumu Simon énékuné dakamu dotori Yesus damu Éné murid yoho bake ohoru kuroho.
[40] Yaki sawa mése baasukigini, ahu aburoho yoho ahu kumangkeseméri bahana yohoki Yesus bake yeri ogohona. Damu Yesus Éné bero féri ahu kumang hamu homuugu bahana yoho ahu-isige ahu-isige ememere yohona haha kumu hamu kufuri damu ahafu yahani, ahu kumangkesemahana yoho gogeriméri haniyakigina.
[41] Ememere emoho égéki, ahu aburoho hohoi afuri bahana yoho de ékému bahana. Hohoi ahu afuri bahana yohoki Yesus Égésé yori uwahafunggu. Emohoni, hohoi nonéyuhuwoho ahu yohoki munggunaka, musuri u hanggeramu ememere Yesus bake yo hohona, "Yesusa, Gusé Ala Énamu kéré," emiyohona. Damu Égé Ala kubumu yohoni Égéte Ahuhabang kiri baha égéki hohoi yohosé nafamahana. Damu Égé hohoi yoho bake ansakuméri u hanggeramu yori emiyoho, "Gugu u yohona nogoki fani tafe yohonan deyoho, meneféyané!" Ememere hohoi yoho bake yori angginekigi.
[42] Igiri mimi asituhu Yesus dotori afahang kumu musuri ogori fengkigito ékému hori baha. Emohote, ahu aburoho yoho Égéki agugumahanaka, damu Égéki gebuuri damu Égé bake emiyohona, "Nabo, Gu fani ahain deyoho, menefé!" Ememere yori undomahana.
[43] Damu Yesus Égé yoho bake emiyoho, "Emohote, Nu busu fe busu fe hori hate esumu Ala Éné u manggoho égéki yo ahai. U manggoho égéki Ala soho nokumu awe Ahuhabang kiri Énahu yoho hafuféri etori bohoné moho égé kéré. Ala kusumohoni Nu u nogoki ahu yoho bake yo ahain niye soho nokumu dere."
[44] Emiyohoka, damu hori Égé busu fe busu fe osu-musuméri Yahudi nahu yohona sunafahang Yudea soho fikoyaha égena ékému hamu osuri ahu yoho bake Ala Éné u manggoho égéki yobuwoméri yosumoho.