[1] Sawa feki Yesus soho fe ékému beri Ala bake u éyoho. Damu Égé Ala bake u yori feyahafungguka, Éné murid fe Yesus bake abamu yoho, "Nabo Yesus, Yohanes égé éné murid yoho bake Ala bake u makemere yohonané mahana égéki yokukubumoho. Hamemere Ala bake u yohowané mériya égéki nugu bake yokukubunu," emiyoho.
[2] Emohoni, Yesus yoho bake yori emiyoho, "Gugu Ala bake u yohonané mahana égéki ememere nouwané: " 'Nugunabo Ala, Gusé enuni ahu emu-hori-daha yoho Gusé Ala kéré ememere yori Ganaukumenané. Damu nugu fisini yohowané, "Gusé Ahuhabang kiri nugu damu ahu emu-hori-daha yohoki awe hafuféri enu!"
[3] Nugu ohoruni fimiriyani, asu-sawa nugu ohoru fe wayamu kuro.
[4] Damu ahu fe nuguki keiyongmu emoho égéki mése u kutumu yori bero ayoméri feyahafuniya. Emohoni, nugu ahu fe yoho bake keiyongmu emériya égéki tobunsunu. Damu Gu nuguki modini nuguki ikuhamenané, emohoni nugu fani dosa aféyan deyoho.' "
[5] Ememere yori feyahafungguka, damu Yesus tafe Éné murid yoho bake sisi fe yoho, "Nané murid yohoniya, gugu bahana nogoki ahu fe ukusi fe ememere emoho nogoki fima. Sisi ememere égé: Asu gugunukigini, gu gohogi éné afahang hori yori emiyoho, 'Nohogi, nohogi fe égé busu fe ahain niye bohori hakureyaha busu nokumu deri katugo ahu kefo kiri nu bake maraha. Damu nu ohoru égé bake kurahae méréte, ohoru karawoho. Emohoni, nu du-roti ukumasiyo kuro. Sawa feki du-roti fe ukumasiyo afeka, dakamu gu bake kurahae,' emiyoho.
[7] Damu éné hogi afahang baha égé yori emiyoho, 'Gu fani nu nenefimon deyoho, menefé! Mése asugugutokigini, afite mése ketaméri égé, damu namkesiyo kumu nu kumu ememere kunu aiyané bemeriya. Nu fani habigiyoméri dotori gu bake du-roti kurahae deyoho.' " Ememere yori Yesus u aseméri yoho égéki feyahafunggu.
[8] Damu Yesus Éné murid yoho bake tafe yoho, "Nu katugo gugu bake u yahae méré nogoki femu narané: Gusé afahang nesi éné hogi kigini, égé fani hanikéri dotori kukuwoho fe gu bake kurohon de kiyoho. Mite, gu afahang nesi bake fani hosumon de guku damu éri nenefimoho, emohoni afahang nesi égé dotori kukuwohoni fimoho égéki gu bake kurohoné."
[9] Emoho nemohoni, Nu gugu bake yahae, "Kukuwoho fe fimenangkumaka, Ala bake agugoméri yosuméri nouwané. Gugu awe afénané. Kukuwoho feni efefemenangkumaka, efefenané, damu tafe efefenané, damu tafe efefenané. Emohoni, gugu awe gebuuri afénané. Damu gugu afite bogogonané, emohoni gugu niye afite awe abuwomoné.
[10] Ahu mekenohosé Ala bake kukuwoho feni modu botokéri yohongkumaki, ahu kukuwoho fe aféné fimoho égéki awe aféné. Damu ahu menohosé kukuwoho feni modu botokéri efefemongkumaki, kukuwoho fe efefemoho égéki aféné. Damu ahu menohosé afite bogogomongkumaki, awe énéné afite abuwomoné.
[11] "Damu gugu bahana nogoki ofo mekenohosé énabo bake ahaeni yohongkumaka, énabo esumu fani égé bake usi féri kurohon deyoho, mite esumu ahae féri kurohoné.
[12] Damu ofo mekenohosé énabo bake ayamu mugoni yohongkumaki, énabo fani égé bake haberoku féri kurohon deyoho, mite esumu ayamu mugo égéki kurohoné.
[13] Gugu keiyongkéri bahanate, gugu kukuwoho manggohokigi égéki gugunasiyoni kurohonané mahana égéki nafaméri hamemere kurohonané. Nugunabo Ala Éné busu mene baha Égésé esumu nafamohoni, ahu menohosé Ala bake yohongkumaki, Égé awe kukuwoho manggohomu égé égéki kurohoné, damu hate Ala Éné Ubana Hayo kurohoné. Ala Éné Ubana Hayo Égéki ukukuwoho esumu manggohomu égé égé kéré."
[14] Sawa feki Yesus hohoi keiyong uwahafunggu. Hohoi keiyong égé ahu osuri bahani, ahu égéte u rekigini baha. Damu Yesus hohoi keiyong égéki uwahafungguni, égéte musuri hoho. Emohoni, ahu égé damu u yoho. Damu ahu aburoho yoho etori Yesus Égé esumu habigiyomoho ememere fimiri mokéri hanikigina.
[15] Emohote, ahu aburoho bahana ékému ahu yahamuto yoho ememere yohona, "Hohoi yohona ahuhabang Iblis, éné fi feki Beelzebul, Yesus Éné modu osugu. Emohoni, Yesus Égéki afuri bahani, Égéte hohoi uwahafunggu," ememere yohona.
[16] Hate ahu tuhuremu yoku Yesus Égéki ikuhaméri u fe gebufunan niye ememere yohona, "Bafa-guruwa, Ala Éné habigiyo féri ukukuwoho-mujizat enu! Ememere emongkumaki, nugu awe etori nafamowané Ala mése Guki kusumohoni daha," ememere yohona.
[17] Emohote, Yesus Uku ahu yoho yohona sifing fimahana égéki mése nafamoho. Emohoni, ukusi kamukumamu yoho bake aseméri yoho, "Ahuhabang soho fikoyaha hafuféri etori baha. Damu ahuhabang égé kumu ahu soho ékému bahana yoho kumu ememere ahahaméri dukuméri kutumu homufunangkumaka, soho ékému ahu karakiné. Damu hate ahu fe uku énahamo kumu énamkesiyo kumu ememere kutumu uma afénangkumaka, yoho awe yeyemokinané, damu ahu fe karakiné.
[18] Nu ukusi yoré égéki gugu Nu bake mése ememere yori yakena kéré, 'Hohoi yohona ahuhabang Iblis égé Yesus Éné modu osuri afuri égéni, Iblis éné habigiyo féri hohoi keiyong ahu afuri baha égéki uwahafunggu,' emiyori yakena. Emohote, ememere yohona égéki haiyangmu éyongkumaki, hohoi yohona ahuhabang Iblis égé éné hohoi mumuro yohoki uwahafunggu. Ememere emongkumaki, énahu yoho awe karakiné, damu égé fani yohona ahuhabang kiri bohon deyoho.
[19] "Emohoni, hohoi yohona ahuhabang Iblis égé Nané modu osuri afuri égéni, Nusé Iblis éné habigiyo féri hohoi keiyong ahu afuri baha égéki uwahafumekumaki, guguna matahai yahamuto yoho hate hamemahanae? Guguna matahai énéyuhuwoho hohoi keiyong ahu afuri bahana yohoki uwahafusuméri bahana yoho menoho éné habigiyo féri hohoi yohoki uwahafumahanae? Hohoi yohona ahuhabang Iblis éné habigiyo féri hohoi yohoki uwahafungguna rahamohoe? Karawoho, guguna matahai yoho yoku nafamahanani yoho Ala Éné habigiyo féri emahana. Emohoni, gugu Nu bake hahafeyahana égéki guguna matahai yoho awe gugu bake emiyohonané, 'Gugu mése yori yakena égéki degemu poréyahamu égé,' ememere yohonané.
[20] Emohote, Ala Nu bake Éné habigiyo kurohoni, Ala Éné habigiyo féri hohoi keiyong yohoki uwahafuni. Emohoni, Nu hohoi keiyong yohoki uwahafuni nogoki gugusé etori nafamahanani Ala kusumoné Ahuhabang soho nokumu deri Énahu yoho hafuféri etori bohoné ememere u yahamaki Égésé mése daha.
[21] "Nu ukusi feki aseméri yahae, 'Afahang nesi éné habigiyo botokéri éné hase dibisi féri éné na, kukuwoho éné afahang kumu égena égéki etori bohongkumaki, ahu fe fani afahang osuri éné na, kukuwoho éné afahang kumu égena égéki fani afén deyoho.
[22] Emohote, ahu fe éné habigiyo esumu botokéri baha égé hori afahang nesi égéki kutumu taki aragenani, afahang nesi égé wakigi. Emohote, ahu éné habigiyo esumu botokéri baha égé habigiyomohoni, afahang nesi éné hase dibisi fisini etori baha égéki yeri uwomoho otohoka, damu afahang nesi éné na kukuwoho keméri éné matahai yoho bake kemeroho.'
[23] "Damu ahu menohosé fani Nu kotoféyon dekumaki, égé Nané kufe kéré. Damu Nu ahu Ala bake defenané mahana yohoki mahamu eméré. Emohote, ahu menohosé ahu Nu kotoféyonané mahana yoho fani mahamu emon dekumaka, égé ahu nonéyuhuwoho yohoki uwahafumoné ahahaméri bohonané," emiyoho.
[24] Damu Yesus ukusi fe tafe aseméri emiyoho, "Ahu fe emohoni, hohoi keiyongkéri baha égé ahu afuri baha ékému musuri hoho. Hori awiwiméri damu siyanto busu ékému hori ahu fe égé afuri bohon niye efefemoho. Hohoi égé haing wayamu éyoné tahangkutomon niye efefemohote, fani ahu harahai égé gebuugu deyoho. Emohoni, égé fimoho, 'Nu awe ahu mumangge afuri bereké égé bake dakamu hori bahae.'
[25] Ememere fimiri dakumu hori etohoni, ahu égé ememere égé: Afahang esumu tobunsuméri wayamu égéte, ahu karawoho. Hamemere ahu hohoi mumangge afuri baki égé ememere baha kéré.
[26] Ememere etohoka, hohoi égé hori hohoi fe birikumu-berahafi-ukuma (7) esemu keiyongkéri bahana yoho kumu kotoféyonan niye yoho bake yokunggu. Damu yoho kotoféri ahu mumangge hohoi kamisige afuri baki égé bake hori afuri bahana. Emohoni, ahu hohoi afuri baha égéki mumangge hohoi kamisige baki égéki fani esumu poréyahakigi deyohote, katugo hohoi aburoho bahana égéki esumu kirimu poréyahakigi," emiyoho.
[27] Yesus ememere u éyoho égéki, ahu aburoho égena ékému yang fe Yesus bake u hanggeramu yori emiyoho, "Géni Gu wayamu asuféri ong kunggu égésé éné modu hanikina," emiyoho.
[28] Emohote, Yesus ememere utuhu hamoho, "Ahu Ala Éné u dari hamemere emesuméri bahana yohosé yohona modu esemu hanikinané," emiyoho.
[29] Ahu yoho dukumahanaka, damu ahu aburoho yoho tafe dukumahana. Ememere égena égéki, Yesus yoho bake emiyoho, "Gugu ahu keiyongkéri bahana, damu gugu fani Nané u dari bahana deyoho. Gugu ememere bahanani, Nu bake Ala Éné habigiyo féri ukukuwoho-mujizat enu ememere tinibiyakuni yohona. Emohote, ahu keiyongkéri bahana gugu bake Nu fani Ala Éné habigiyo féri ukukuwoho-mujizat fe fani eme deyoho, mite kamu ukukuwoho-mujizat kamisige anggo posuyaha nuguna yahae ahu-nabi Yunus égé emaki égé remu kubumu yahae, emohoni gugu awe nafamenané.
[30] Anggo posuyahaki Niniwe nahu yoho Yunus emesuméri baki égéki etori Ala Yunus kusumohoni daha ememere nafamakena. Hamemere Ahu Ala bahato ékému dere Nusé awe ahu soho kukumahanato ékému sawa ukumasiyo asu ukumasiyo ékému oguri bahaeka, dakamu dotohoi. Emohoni, katugo ahu yoho Nu emesuméri bere nogoki etori Ala Nuki kusumohoni dere ememere nafamenané.
[31] "Damu ahuhabang yang-ratu égé anggo posuyahaki soho tuhu sawa musuguto hokumu hamane baha. Emohote, Yahudi nahu yohona yahae ahuhabang-raja Salomo égé sifing wayamu fimiri wayamu emesuméri bahani, ahuhabang yang-ratu égé éné mokang mungguka, musuri ahuhabang-raja Salomo bake deri éné u daki. Maha gugu femu narané! Ahuhabang-raja Salomo fani kirimu nafamoho deyohote, Yesus Nusé esumu kirimu nafaméri bere. Nu katugo soho nokumu deri guguna sama kumu Ala Éné u yoréte, gugu fani Nané u areyonané bemahana deyoho. Emohoni, embahae sawa akimamaga Ala ahu emu-hori-daha yoho keiyongmu emesumahana égéki efefeméri yori inggeméri feyahafumoné. Sawa égéki ahuhabang yang-ratu égé kumu ahu katugo soho nokumu bahana gugu kumu kotoféri dakamu dotohonanéka, damu Ala Éné sama kumu kotoféri méséri éyonané. Damu ahuhabang yang-ratu égé ahu katugo soho nokumu bahana gugu bake ememere ditini yohonané, 'Yesus esumu kirimu nafamoho Égé guguna soho ékému deri gugu bake u yohote, gugu fani Éné u dakena deyoho. Emohoni, Ala guguki esumu poréyahamu emoné!' ememere ditini yohoné.
[32] Damu hamemere anggo posuyahaki Niniwe nahu yoho bakena. Emohote, Ala Yahudi nahu guguna yahae Yunus égé bake yohoni, Yunus égéte Ala Éné u dari Niniwe nahu yoho bake hori yo haki. Emohoni, yohote Ala Éné u dari yohona dosa kemahana égéki ukuni munggunaka, damu Ala Éné u dari bakena. Yunus égé amiféri bahate, Ahu esumu asuféri bere Nusé soho nokumu deri Ala Éné u yoréte, ahu katugo soho nokumu bahana gugu fani Nané u dari dosa yahana égéki modinanéka, damu Ala Éné u dari bahana deyoho. Emohoni, embahae sawa akimamaga égéki ahu Niniwe busu fikoyaha kumu bakena nahu yoho damu ahu katugo bahana gugu kotoféri awe dakamu dotohonanéka, damu awe Ala Éné sama kumu kotoféri méséri éyonané. Ahu Niniwe busu fiko kumu bakena nahu yohosé ahu katugo bahana gugu bake ememere ditini yohonané, 'Yesus esumu asuféri baha Égé gugu bake deri u yohote, gugu fani Éné u dari guguna dosa yakena égéki ukuni mungguna deyoho. Emohoni, Ala guguki esumu poréyahamu emoné,' ememere ditini yohonané," emiyoho.
[33] Damu Yesus tafe u aseméri emiyoho, "Ahu fe siya-pelita hamiri damu afahang kumu yeri fani kukuwoho fikoyaha féri fani ketamon deyoho. Damu abuge fu kumu fani kufiyon deyoho. Emohote, siya-pelita égéki hamiri damu siyaha kufiyosumahanato ékému kufiyoné. Emohoni, ahu isige-isige afahang osuri uwaneri égéni, etohonané.
[34] Guguna kiyo égé siya-pelita gahakumu égé. Guguna kiyo wayamu éyongkumaki, gugu kukuwoho emu-hori-daha égena égéki wayamu etohonané. Emohote, kiyo égé fani wayamu éyong dekumaki, gugu fani wayamu etohonan de esemu asugugutokéri éyoné.
[35] Emohoni, guguna modu hate ememere égé. Guguna modu kakani hori égé égéki asukéri égé rahamo kara rahamo ememere etotoméri bunané.
[36] Damu guguna modu esemu kakani hori égéni, fe fani asukéri bohonan dekumaka, siya-pelita guguna afahang kumu kakani hori sifuhuni égé hamemere gugu sifing féri bohonané mahana égéki esemu kakani hori éyoné."
[37] Ememere Yesus u yori feyahafungguka, Farisi nahu fe Yesus bake éné afahang hori ohoru arenan niye yoho. Emohoni, Yesus Égé ahu kefo kiri ékému hori arenané mahanato ékému beri ohoru arené bemoho.
[38] Farisi nahu égé etohoni Yesus bero oho fani uroho kunggu de homereyaha béénggé. Emohoni, égé fani hanikigi deyoho, damu habang gugubemoho.
[39] Emohoni, Nugunabo Yesus ahu égé bake emiyoho, "Ha Farisi nahu yohoniya, gugu kamu supahang damu ume mobigi oho uroho kunggunate, supahang damu ume womu kane niniya uri damu bahana. Hamemere gugu guguna bero oho uroho kunggunate, guguna modu keiyongkéri égé égéki fani hafuféri etori bahana deyoho, damu ahu yoho bake yahamu yori aneséyang kemahana.
[40] Ha ahu emuméri bahana yohoniya, gugu u nogoki fani nafamahana deyoho: Anggo posuyahaki Ala soho féri ahu emoho égéki, ahu éné aduwosoho damu ahu éné modu kotoféri emaki kéré. Emohoni, yoho fani kamu yohona aduwosoho remu oho uroho kuni tobunsumenan deyoho, mite yoho hate yohona modu kotoféri tobunsuméri wayamu emenané.
[41] Emohoni, guguna na, kukuwoho kumu aneséyang kumu ememere ahu toto karakigina yoho bake kemerohonané. Gugu ememere emenangkumaka, Ala fimohoni guguna aduwosoho kumu guguna modu kumu kotoféri esumu tobunsuméri wayamu égena.
[42] "Emohote, ha Farisi nahu yohoniya, guguna ha kumenané! Gugu bumbu-selasi, inggu, damu hamu égena ememere ohoru kokuni kufiyohonani houng ukohoiné égéki Ala bake kurohona. Gugu guguna bumbu égena égéki giyong kumu yahanaka, damu gogo bibirikuma (10) kufiyahanaka, gogo kamisige Ala bake kurohona. Ememere emahanate, gugu Musa éné hukum esemu asuféri bodukéri égena égéki fani emahana deyoho: Guku fani ahu yoho bake haiyangméri wayamu emahana deyoho, damu fani Alaki esumu worumahana deyoho. Emoho nemohoni, Farisi nahu yohoniya, guguna ha kumenané! Gugu, Musa éné hukum esumu asuféri bodukéri égena égéki esumu enané. Damu hate Musa éné hukum sahaekéri égena égéki hate esumu fani gagabumenan deyoho.
[43] Ha Farisi nahu yohoniya, guguna ha kumenané! Damu Yahudi nahu yohona sunafahang osuri sembayang yeri Ala Énaukumenané mahana égéki, gugu abuge-kurusi esemu siyahamu égé ékému hanikéri bahana. Emohoni, ahu fe yohote guguki etori ahu asuféri bahana ememere fimiri gugunaukumenané. Damu toto tokunsumahanato ékému hohona égéki ahu yoho yoho bake yohonaukumenan niye habang gonggongmahana égéki etori hanikigina. Gugu ememere guguna modu kokokéri emesumahanani, Farisi nahu yohoniya, guguna ha kumenané!
[44] Damu ahu soho kukumahana yohona béng fani kurukéri égé de gahakumu hamemere gugu bahana. Ahu yoho béng ememere égé éné teyo kumu asisiméri hohona égéki ahu soho kukumahana yohona béng womu kumu kamu bégé remu éri niniya uri bahana égéki fani nafamahana de homereyaha asisiméri hohona. Hamemere guguna modu esumu keiyongkéri damu Ala Éné u yoho égéki dogusumu kuni bahana égéki ahu fe yohosé fani nafamahana deyoho. Emohoni, ahu fe yoho gugu kotoféyahana. Damu gugu ememere fake emohoni, ahu yohote homereyaha poréyahamu emahana. Emohoni, guguna ha kumenané!"
[45] Yesus ememere yohoka, damu bafa-guru Musa éné hukum yokukubumoho nahu égé Yesus bake emiyoho, "Bafa-guru, Gu u ememere Farisi nahu yoho bake yoho égéki nugu dariyaka, Gu hate nuguki inani yohoni, nugu hate hosumériya," emiyoho.
[46] Damu Yesus dagika, damu utuhu hamoho, "Ha bafa-guru Musa éné hukum yokukubumahana yohoniya, guguna ha kumenané! Ahu toto esumu boduyahakigi égéki ahu fe yohona berokiyo teyo kumu kufiyohona. Hamemere gugu ahu yoho bake Yahudi nahu yohona yahae akiya esumu agefekigi égéki emenan niye ahu yoho bake ditini yohonate, fani ahu yoho akiya égéki emenan niye mahamu emahana deyoho. Emohoni, bafa-guru Musa éné hukum yokukubumahana yohoniya, guguna ha kumenané!
[47] Gugu guku anggo posuyaha guguna yahae ahu-nabi yohoki uri kufiyakenaka, damu yohona wosoho soho kukumahana yohona béng iyobégé esumu manggohomu égena égé féri gogofuméri hahasemahana. Emohoni, guguna ha kumenané!
[48] Anggo posuyaha guguna yahae ahu-nabi yohoki uri kufiyakenaka, damu katugo nogoki bafa-guru Musa éné hukum yokukubumahana gugu ahu-nabi uri kufiyakena yohona wosoho soho kukumahana yohona béng iyobégé féri gogofuméri hahasemahana. Damu gugu ememere eméri kubumahanani, guguna yahae ahu-nabi yoho uri kufiyakena nogoki fani degemu emahana deyoho, mite haiyangmu emahana.
[49] "Gugu ememere keiyongkéri emesumahanani, Ala esumu aburohomu nafaméri haiyangmu fimiri emesumoho Égésé emiyoho, 'Nu awe kusumeni ahu-nabi yoho damu ahu-rasul yoho tafe Yahudi nahu gugu bake deri Nané u yosumenané. Emohote, ahu tuhuremu yohoki gugusé awe uri kufiyonané, damu ahu tuhuremu yohoki gugusé ifiyo-tifiyomenané yohote kugutoméri bohonané,' emiyoho.
[50] Emohoni, anggo posuyahaki ahu-nabi yohoki homuuri bakena arohori embahae niyaki ememere emahana égéki Ala awe ahu katugo soho nokumu bahana gugu bake poréyahamu emoné. Anggo posuyahaki Ala soho damu hou yori emaki ékému arohori guguna yahae ahu-nabi yoho ememere uri kufiyakena: Anggo posuyahaki guguna yahae Habel haiyangmu manggohomu baha égéki guguna yahae Kain égé uri kufiyakika, damu ékému ahu homuuri bahana embahae guguna yahae ahu-imam Zakhariaki uri kufiyakena. Zakharia égéki Ala Éné Afahang pama kumu abuge-aguto duri kurosumahanato womu ékému uri kufiyakena. Emohoni, Nu katugo gugu bake u yahae méré nogoki haiyangne: Anggo posuyahaki ahu-nabi yohoki homuuri bakena arohori embahae niyaki ememere emahana égéki Ala awe guguna yahae yohona go katugo soho nokumu bahana gugu bake poréyahamu emoné.
[52] "Ha bafa-guru Musa éné hukum yokukubumahana yohoniya, guguna ha kumenané! Gugu guku bafa-guru Ala Énahu yoho bake yokukubumahana énahu kiginate, gugu modinani ahu yoho fani Ala nafamahana deyoho. Damu guku Ala fani femu wayamu nafamahana deyoho. Damu gugu hate ahu Ala haiyangmu nafamenané mahana yohoki abusahagiyomahana, nemohoni ahu yohote Ala fani femu wayamu nafamahana deyoho. Emohoni, bafa-guru Musa éné hukum yokukubumahana yohoniya, guguna ha kumenané!"
[53] Damu Yesus Égé ékému mungguka, damu kusumu hoho. Emohoni, sawa égéki bafa-guru Musa éné hukum yokukubumahana nahu yoho kumu Farisi nahu yoho kumu ememere u hanggeramu yori Yesus Égéki ansakuméri bamahana. Yoho Yesus Éné u fe gebufunan niye u aburohomu agefekigi égéki Égé bake abubaméri éyohona.
[54] Ememere yori Yesus u fe degemu poréyahamu yohongkumaki, Égé u degemu yoho égéki yori ditini yohonan niye kidaégena.