[1] Sawa-Sabat feki Yesus kumu Éné murid yoho hohoi du-gandum giyong égena ékému bohohona. Bohohona égéki, Yesus Éné murid yoho du yakiginani, hohoi du-gandum éné ero guni bero féri sesebumahanaka, damu énggena.
[2] Ememere emahana égéki Farisi nahu yahamuto ékému égena yoho etohona. Etohonaka, Yesus Éné murid yoho hohoi du-gandum éné ero gunggunani, sawa ahu gemu bahana égéki furubo yahana ememere fimiri Yesus damu Éné murid bake emiyohona, "Gugu ahu gemu bahana éné sawa égéki makemohore hukum anggenekigina égéki emahanae? Gugu sawa nogoki kukuwoho fani ememere furubo afénan deyoho," emiyohona.
[3] Damu Yesus dari utuhu haméri yori emiyoho, "Nabo Ala Éné Buku kumu anggo posuyahaki guguna yahae ahuhabang-raja Daud emaki égéki gugu fani etori nafamahana deyohoe? Yahae, haiyangne. Gugu mése etakena. Ahuhabang-raja Daud ememere emaki: Égé kumu éné matahai yoho kumu esumu areyakiginate, ohoru karakigi. Emohoni, Daud égésé Ala Éné Afahang tenda féri saka sigina ékému osuri ahu-imam yohona ahuhabang esumu asuféri baha égé bake fisini yohoni, égéte Ala Éné aguto du-roti égéki kurohoni Daud yeri énggéka, damu éné matahai yoho bake kurohoni hate éyangkena. Ala Éné aguto du-roti égéki kamu ahu-imam yohona na we, emohoni kamu yohosé énggamsumahana. Emohote, Daud damu éné matahai yoho Ala Éné aguto du-roti énggenate, Ala égé damu éné matahai yoho bake poréyahamu emahana ememere fani yoho deyoho," emiyoho.
[5] Damu Yesus tafe yoho bake emiyoho, "Ahu Ala bahato ékému dere Nusé Nané na habigiyo de égéni, Sawa-Sabat égéki ukukuwoho makerahare ahu yoho emenané mahana égéki yori inggeme," emiyoho.
[6] Sawa-Sabat feki Yesus Yahudi nahu yohona sunafahang ékému osuri ahu yoho bake yokukubumoho. Damu ékému ahu bero afi auwa mene darukigi égé de baha.
[7] Damu ékému bafa-guru Musa éné hukum yokukubumahana nahu yoho kumu Farisi nahu yoho kumu ememere de bahana. Yoho ékému éri Yesus u fe emoné etori ditini yohonan niye égena. Sawa-Sabat égéki Yesus ahu ahafu aféngkumaki, Égé sawa gemu bahana égéki furubo yaha ememere ditini yohonan niye bemahana.
[8] Emohote, Yesus Égé yohona sifing mése nafamoho. Emohoni, Égé ahu éné bero darukigi égé bake yoho, "Marari ahu emu-hori-daha yohona sama nokumu méséri ena, emohoni ahu emu-hori-daha nokumu bahana yoho guki etohonané," emiyoho. Damu ahu égé dagika, damu méséri sama ékému égé.
[9] Damu Yesus ahu ékému égena yoho bake emiyoho, "Nu gugu bake yahae. Ala Éné hukum Musa bake kuroho égéki yohoni Sawa-Sabat égéki nugu fani poréyahamu eman deyoho damu fani ahu fuwan deyoho, emohote ahu yohoki mahamu eméri umburomané awe bohonané damu esumu menemu emowané. Nugu ememere esumu emériya égéki de haiyangmu égé," ememere yoho.
[10] Damu Yesus yohoki etori awiwiméri damu ahu darukigi égé bake yori emiyoho, "Gané bero kusunu ahainé." Emiyohoni, ahu égé hamemere emohoni, éné bero gogeriméri haniyakigi.
[11] Emohote, bafa-guru Musa éné hukum yokukubumahana nahu yoho kumu Farisi nahu yoho kumu ememere esemu hagiyakigina, damu emiyohona, "Nugu Yesus bake makerahae emowane?" Ememere u kutumu yori dagena.
[12] Sawa feki Yesus soho haibe siyaha fe ékému Ala bake u yohon niye ogusugu. Damu asu yorung Égé Ala bake u yoho.
[13] Ala bake u yohoka, damu igiri mimiki Égé Éné murid aburoho yoho bake yohoni, Éné murid aburoho yohote Égé bake dahana. Damu Éné murid aburoho bahana ékému ahu bibirikuma-ketahafi-ukuma (12) yohona fi igika, damu yoho ahu-rasul kinan niye ememere emiyoho, "Ahu nonéyuhuwoho nogoki Yesus Nusé kukubumeni, yohote Nané u yo ahanané," ememere yoho. Yohona fi ememere égena:
[14] Simon, Yesus Simon éné fi feki emiyoho, "Petrus." Énukuda besing Andreas, Yakobus damu énukuda Yohanes, Filipus, Bartolomeus,
[15] Matius damu Tomas, Alfeus énamu Yakobus, Simon. Simon uku Zelot nahu fe kéré.
[16] Hate Yakobus énamu Yudas. Damu Kariot busu nahu, Yudas embahae égésé Yesus awe sésémoné.
[17] Yesus kumu Éné murid yoho kumu kotoféri soho haibe siyaha ékému miri damu soho feyangha kumu ukuri damu méséri égena. Soho ékému Éné murid esumu aburoho Égé kotoféyahana yoho dukuméri égena. Damu ahu aburoho yoho tuhuremu busu-busu hamu Yudea soho fikoyaha emu-hori-daha ékému dahana. Damu ahu aburoho tuhuremu Yerusalem busu fikoyaha ékému dahana, damu ahu tuhuremu busu-busu hamu Tirus damu Sidon soho fikoyaha kiyohou haisa emu-hori-daha bahana ékému dahana.
[18] Yoho Yesus Éné u areyonan niye dahana, damu yoho kumangkesemahanani, Yesus emoné gogeriméri karakinan niye dahana. Damu ahu hohoi keiyong osusuméri bahana yohoki Yesus hohoi keiyong yohoki uwahafungguni gogeriméri karakigina.
[19] Yesus Égé Éné habigiyo féri ahu emu-hori-daha yohoki ahafu yahani, gogeriméri karakigina. Emohoni, ahu emu-hori-daha yohote Yesus Éné haha gohomenan niye apasigina.
[20] Yesus ahu aburoho égena ékému Éné murid Égé kotoféyahana yohoki hafumu etotoméri damu yoho bake emiyoho, "Ahu toto karakigina yohoniya, gugu Nu kotoféyahanani, Ala Énamkesiyo kiri bahana. Emohoni, katugo guguna modu hanikinané.
[21] Ahu areyakigina yohoniya, Embahae gugu awe arenané kudukinané. Emohoni, katugo guguna modu hanikinané! Katugo guguna modu budiyahangféri efe uguna yohoniya, embahae Ala guguki mahamu emoné, gugu hanikéri abegenané. Emohoni, katugo guguna modu hanikinané!
[22] Anggo posuyahaki ahu yohona yahae yoho ahu-nabi yohoki ifiyo-tifiyomahanani, kugutoméri bakena. Hamemere gugu Ahu Ala bahato ékému dere Nu kotoféyahanani, ahu yoho gugu bake hakereméri dirimeféri yori inanggena, damu ahu yoho guguki muni undomahana, damu ahu yoho yahamu guguna u poréyahamu ahu fe yoho bake yohona. Gugu ememere bahana égéki, guguna modu hanikinané, damu hate guguna modu tafe kirimu hanikéri gong akinané! Maha femu narané! Guguna kukuwoho fikoyaha égéki de Ala Éné busu mene ékému gugu niye Ala Égésé mése fengféyoho. Emohoni, katugo guguna modu esumu hanikinané!
[24] Emohote, katugo ahu fani Nu kotoféyahana de toto aburoho kufuri bahana yohoniya, embahae gugu kukuwoho awe afénané mahana égéki katugo mése soho nokumu yeri hanikéri bahana. Emohoni, guguna ha kumenané.
[25] Katugo ahu fani Nu kotoféyahana de ohoru aburoho énggenani, kudukigina yohoniya, embahae gugu aren karakinané. Emohoni, guguna ha kumenané. Katugo ahu fani Nu kotoféyahana de ahu abegegena yohoniya, embahae gugu awe guguna modu budiyahangféri efe aunané. Emohoni, guguna ha kumenané.
[26] Anggo posuyahaki bafa guru yoho deri yahamu u ememere yakena, 'Nugu ahu-nabi kéré.' Ememere yori u yahamu yosumahanate, ahu yohona yahae yoho bafa-guru yohonaukuwangkena. Hamemere katugo ahu emu-hori-daha yoho gugunaukumenangkumaka, gugunaukumahana égéki gugu yahamu u yokukubumahana ememere kubumoho. Emohoni, guguna ha kumenané."
[27] Yesus Éné murid yoho bake damu u tafe yoho, "Emohote, Nu awe Nané u dari bahana gugu bake yahae. Guguna kufe yoho hanikéri worunané, damu ahu gugu bake hakeremahana yohoki wayamu enané.
[28] Ahu gugu bake guni yohona yoho niye Ala bake nouwané. Emohoni, Ala yoho bake wayamu emoné. Damu hate ahu gugu bake keiyongkéri emahana yoho niye Ala bake nouwané. Emohoni, Ala yoho bake wayamu emoné.
[29] Ahu menohosé gané muhubégé afi pohomokumaka, hate hamemere égé bake afi kumu kunoro, emohoni égéte tafe pohomoné. Damu ahu menohosé gané ifita-mamana piyaha ahu bero atatamu aféngkumaka, gané ifita hate égé bake kunoro.
[30] Damu ahu menohosé gu bake kukuwoho nogo kuro emiyohongkumaki, kunoro. Ahu mekenohosé gané na bero atatamu aféngkumaka, fani égé bake nané na égéki dakumu kuro ememere ditini yohon deyoho.
[31] Damu ahu yoho gugu bake wayamu emenangkumaka, gugu hanikigina égéki hamemere ahu fe yoho bake wayamu enané. Emohoni, ahu fe yoho hate gugu bake hamemere wayamu emenané.
[32] "Ala Éné u dari bahana gugu ahu emu-hori-daha yohoki fani worumahana de ahu fe guguki worumohoni, gugu kamu ahu égé remu kutumu worumenangkumaka, égé fani wayamu égé deyoho. Ahu fani Ala Éné u dari bahana de yoho hate hamemere emahana. Emohoni, Ala fani gugunaukumon deyoho.
[33] Damu gugu ahu emu-hori-daha yohoki fani wayamu emahana de kamu ahu fe égé gugu bake wayamu emohoni, gugu kamu égé remu kutumu wayamu emenangkumaka, égé fani haiyangmu égé deyoho. Ahu Ala Éné u fani dari bahana de yoho hate hamemahana. Emohoni, Ala fani gugu bake gugunaukumon deyoho.
[34] Damu gugu fani ahu emu-hori-daha yoho bake homereyaha aneséyang kurohonan de ahu fe gugu bake aneséyang afénéka, dakamu hamu kurohoné ememere fisini fimiri baha égé remu aneséyang kurohonangkumaka, u égéki fani haiyangmu égé deyoho. Ahu Ala Éné u fani dari bahana de yoho hamemere ahu emu-hori-daha yoho bake aneséyang fani homereyaha kemerohonan deyoho. Emohoni, Ala fani gugunaukumon deyoho.
[35] "Emohote, ahu fani degi kuroho ememere fani nafamahana de yohoki damu ahu keiyongkéri bahana yohoki Alasé wayamu emoho. Emohoni, gugu hate guguna kufe yohoki worunané; yoho bake wayamu enané; yoho aneséyang afénané fimenangkumaka, fani dakamu kurohonané ememere fimenan de homereyaha kemenorohoné. Ememere emenangkumaka, Ala gugu bake kukuwoho esemu wayamu égé kurohoné moho égéki awe gugu bake kemerohoné, damu Ala esemu asuféri baha Énamkesiyo kiri bahana ememere kubumu yohonané.
[36] Nugunabo Ala esumu Éné modu kuyoméri baha hamemere gugu hate ahu yoho bake kuyoméri enané," emiyoho.
[37] Damu Yesus Éné murid yoho bake tafe emiyoho, "Ahu fe yohona u feki efefeméri ahuhabang gahakumu kakumu yori inggeméri ditini yohonan deyoho. Ememere emenangkumaka, Ala Égé hate gugu bake hamemere emoné. Damu ahu fe ukukuwoho emoho égéki gugusé etori fani hanikéri égé bake ememere yori ditini yohonan deyoho, 'Gu keiyongmu emoho.' Ememere fani emenan dekumaka, Ala hate gugu ukukuwoho emahana égéki etori fani hanikéri gugu bake ememere ditini yohon deyoho, 'Gu keiyongmu emoho.' Damu ahu fe yoho gugu bake poréyahamu emahana égéki, kakumu u kutumu yori bero ayoméri feyahafunané. Emohoni, Ala gugu poréyahamu emahana égéki awe tobunsumoné.
[38] Ahu yoho kukuwoho fimiri bohonangkumaka, yoho bake kunoro. Gugu ememere emenangkumaka, Ala hate gugu kukuwoho fimahana égéki awe kurohoné. Damu Ala gugu bake dakamu kurohoné moho égéki ememere tafe kurohoné: Gugu du mutu ware ahu yoho bake kurohonangkumaka, Ala hate du mutu gugu mése kuraki égéki damu fimiri tafe kurohoné. Égé du mutu fiko yeri du komukuni nanggu-nangguméri bong baha, damu tafe kokuni nahangkunggu, emohoni tuhuremu pesanggi miyoné ememere kurohoné," emiyoho.
[39] Damu Yesus tafe Éné murid yoho bake u aseméri emiyoho, "Ahu kiyo ketanggini baha égé ahu kiyo ketanggini baha fe égéki hafuféri emone? Karawoho. Ememere hafuféri emongkumaki, ahu ukuma yoho awe sohoto kumu akimu kuni oguwonané.
[40] Bafa-guru yohona murid yoho fani yohona bafa-guru gahakumu esumu asuféri nafaméri bahana deyoho. Emohote, bafa-guru kirimu nafamoho égé wayamu yokukubumoho, emohoni murid égé awe éné bafa-guru nafamoho gahakumu nafaméri bohoné."
[41] Damu Yesus tafe u aseméri hanggeramu Éné murid yoho bake emiyoho, "Ahu fe uku éné kiyo debahae womu bago baha gahakumu éné dosa fikomu égéte, dosa fikoyaha égéki ureyafuri baha. Emohote, éné yahagisi fe éné kiyo debahae koro baha gahakumu éné dosa unaware yahani, etori nafamahana. Gugu ememere etori nafamahana égéki poréyahakigi.
[42] Damu ahu éné kiyo debahae womu bago baha égéki ureyafugute, égé éné yahagisi éné kiyo debahae koro baha égéki etori kokokéri égé bake emiyoho, 'Maha, nu gané kiyo womu kumu debahae koro baha égéki dungsume,' emiyoho. Ememere emiyoho égéki poréyahamu emoho kéré. Ha ahu yahamu manggoho gahakumu bahana yohoniya, mumangge guguna kiyo debahae womu bago égéki dungsunané. Emohoka, damu guguna kiyo wayamu kakani hori femu etohonanéka, guguna yahagisi yohona kiyo debahae koroyaha baha égéki dungsunané," emiyoho.
[43] Yesus Éné murid yoho bake tafe u emiyoho, "Damu debahae esemu wayamu osuri égé égéki éné yo esumu manggohomu égé. Mite, debahae fani wayamu égé de égéki éné yo fani wayamu éyon deyoho.
[44] Damu debahae kukuma yomohong ékému fani peyo afénan deyoho. Debahae yomohong ékému debahae-anggur yo fani afénan deyoho. Emohoni, debahae hamu égena égéki éné ero égéki etori debahae awe nafamenané.
[45] Hamemere ahu wayamu baha égé éné modu wayamu égé, emohoni égé wayamu emesumoho. Emohote, ahu fani wayamu baha de égé éné modu keiyongmu égé. Emohoni, égé keiyongmu emesumoho. Emoho nemohoni, ahu éné modu kumu égena égé féri u yo hoho: Ahu éné modu poréyahamu éyongkumaka, égé u poréyahamu yoho, mite ahu éné modu wayamu éyongkumaka, égé u wayamu yoho," emiyoho.
[46] Yesus Éné murid yoho bake u tafe emiyoho, "Gugu Nu u yoré égéki fani dari emahana deyoho, emohoni fani Na fi iri 'Nabo Ahuyaha, Nabo Ahuyaha' ememere iri yohonan deyoho.
[47] Ahu tuhuremu yoho Nu bake deri Nu u yoré nogoki dari damu hamemere eméri bahana. Ahu nonéyuhuwoho ahu menoho gahakumu bahana égéki yahae.
[48] Yoho ahu fe nogo gahakumu bahana: Ahu égé soho kurumu kuwori kane kokuni afahang sigini, esumu botokigi. Sawa feki a kigini ahai deri afahang égé bukumoho. Emohote, ahu égé mése soho kurumu kuwokuni afahang égéki sigini, ahai fikoyaha deri afahang égé bukumohote, afahang égé fani aiyomoho deyoho.
[49] Emohote, ahu tuhuremu yoho Nané u dari fani hamemere emahana deyoho. Ahu nonéyuhuwoho ahu fe nogo gahakumu bahana: Ahu égé soho dahaemu kuwori kane kokuni afahang sigini, fani botokigi deyoho. Emohoni, a kiri ahai fikoyaha deri bukumohoni, afahang égé gahari hori unggusaféri abutakunggu," emiyoho.