[1] Roma nahu yohona ahuhabang-kaisar Tiberius égé esumu asuféri beri ahu éné soho ékému bahana yohoki hafuféri beri sufébégé 14 nahangkungguka, damu sufébégé harahaimu osuri baha. Damu ahuhabang-kaisar égé kubumu yohoni ahuhabang méké asuféri bahana yoho ememere bahana: Pontius Pilatus égé Yudea soho fikoyaha ékému ahuhabang-gubernur kiri ahu ékému bahana yohoki hafuféri etori baha. Damu ahuhabang-raja Herodes égé Galilea soho fikoyaha ahu ékému bahana yoho hafuféri etori baha. Damu ahuhabang-raja Herodes égé éné yahagisi besing fe Filipus égé ahuhabang-raja kiri Iturea damu Trakhonitis soho fikoyaha égena ékému ahu ékému bahana yohoki hafuféri etori baha. Damu ahuhabang-raja Lisanias égé Abilene soho fikoyaha yeri ahu ékému bahana yohoki hafuféri etori baha.
[2] Damu ahu-imam Ala bake aguto kurosumahana yohona ahuhabang esumu asuféri bahana yoho Hanas damu Kayafas. Ememere égena égéki, Ala ahu-imam Zakharia énamu Yohanes bake u yoho. Yohanes égé siyanto soho ékému baha.
[3] Emohoni, Yohanes égé busu-busu uré Yordan ita égena hamu hori damu Ala Éné u ememere yobuwoméri yosumoho, "Gugu guguna dosa yahana égéki ukuni tafe fani dosa afénan de meneféyanéka, damu Ala Éné u dari bunané. Damu baptisnané, emohoni Ala guguna dosa kemesumahana égéki tobunsumoné," emiyoho.
[4] Ememere Yohanes égé Ala Éné u yobuwoméri yosuméri baha égéki mahasuyaha ahu-nabi Yesaya égé Ala Éné u dari Ala Éné Buku ékému ememere kara uwangki: "Embahae ahu fe siyanto soho kumu u hanggeramu ememere yosumoné: Nugunabo Ahuyaha awe defené mohoni, gugu femu wayamu fengfénané. Damu Égé gebufunan niye guguna modu wayamu fengfénané.
[5] Soho haibe siyaha fu negemoho hamu égena égéki esemu soho kobahaméri kufunané. Damu soho haibe siyaha hamu égena kumu soho buni hori bahana hamu égena kumu ememere kuri uwahahamusakunané. Yedi oto-matomoho hamu égena égéki esemu wayamu ayoméri enané. Damu yedi ogu-musumoho hamu égena égéki uwahahamusakunané.
[6] Damu Ala kusumohoni Nugunabo Ahuyaha awe deri nuguna dosa tobunsuméri umburomusumoné égéki ahu emu-hori-daha yohosé awe etohonané."
[7] Ememere ahu-nabi Yesaya kara uwangki hamemere Yohanes égé emesumoho. Damu ahu aburoho yoho Yohanes bake marahana. Yohanes yohoki baptismon niye marahana. Emohote, Yohanes égé yoho marahana égéki etori u hanggeramu kefari yori emiyoho, "Ha gugu usi keiyong éné go gahakumu guguna modu keiyongkéri bahana yohoniya, makemohore gugu nu bake dahanae? Nu awe guguki baptismekumaki, Ala awe kakumu gugu bake poréyahamu emoné moho égéki awe karakiné ememere fimahanae? Karawoho, gugu dosa yahanani, Ala esumu awe gugu bake poréyahamu emoné.
[8] Emohoni, gugu mumangge esumu guguna dosa yahana égéki ukuni meneféyanéka, damu Ala Éné u dari bunané. Damu mo gugu ahu isige-isige wayamu haiyangméri bunané. Emohoni, ahu fe yohote gugu wayamu bahana égéki etori nafamenané. Damu gugu fani ememere fimenan deyoho, 'Nugu Abraham éné go we: U feki Ala nuguki kubumu yohoni Énahu kiri beriya. Emohoni, Ala nugu dosa yariya égéki fani poréyahamu emon deyoho,' fani ememere fimenan deyoho. Menefeyané! Nu u nogoki yahaeni, maha finané! Ala hanikingkumaki, Égé esumu habigiyomohoni, iyobégé égena nogo féri nuguna yahae Abraham éné go yohoki emoné.
[9] Katugo Ala ahu nogo gahakumu ememere mése fengféyori égé: Ahu fe debahae hayo maga kumu aun niye habu mése fengféyoho. Damu debahae hamu yo fani wayamu fiyon dekumaka, awe gouri damu woumomu otori indo aroné. Hamemere Ala awe gugu fani guguna dosa yahana égéki ukuni meneféyanéka, damu fani Ala Éné u dari wayamu haiyangméri bohonan dekumaka, Ala awe gugu bake poréyahamu emoné," emiyoho.
[10] Ememere dagenaka, ahu aburoho yoho Yohanes bake abamu yohona, "Ememere éyongkumaki, nugu makerahare esemu emowane? Emohoni, Ala nuguki fani poréyahamu emon deyohoe?"
[11] Ememere abamu yohonani, Yohanes égé ahu yoho bake utuhu hamoho, "Ahu mekenohosé ifita-mamana ukuma éyongkumaki, ahu fe ifita-mamana karakigi égé bake ifita fe kamisige esumu kunoro. Damu ahu mekenohosé ohoru de éyongkumaki, emohoni hamemere ohoru fe kunoro," emiyoho.
[12] Ahu aneséyang kemesuméri yeri Roma nahu yohona ahuhabang-kaisar bake kurosumahana nahu yoho hate Yohanes bake dahana. Yohanes yohoki baptismon niye marari égé bake abamu yohona, "Bafa-guruwa, nugu makerahare esemu emowane? Emohoni, Ala nugu fani poréyahamu emon deyohoe?"
[13] Yohanes utuhu haméri yori emiyoho, "Gugu ahuhabang-kaisar aneséyang yori inggemoho égéki hamemere gugunahu yohona aneséyang neriyané, mite fani komukuni afénan deyoho, meneféyané!"
[14] Damu ahu-tentara yoho hate égé bake abamu yohona, "Nabo, mite nuguri yoho? Nugu makerahare esumu emowane?" ememere abamu yohona. Yohanes utuhu haméri yoho bake yori emiyoho, "Fani yohona kukuwoho bero atetamu afén deyoho, damu fani yahamu ditini yori yohona aneséyang afénan deyoho. Kamu gané tentara éné aneséyang kurohona kemesumoho égé remu etori enané," emiyoho.
[15] Damu ahu aburoho yoho katugo Kristus Égéki hanikéri kidabahanani, yoho yohona modu fimiri dakamu yoku yoho bake abubaméri fimahana, "Yohanes nogoki Kristus Égésé rahamohoe?"
[16] Ememere fimahanani, Yohanes ahu emu-hori-daha yoho bake yori emiyoho, "Ahu yoho mése dosa kemesumahana égéki ukuni modinanéka, abuméri Ala bake dahana ememere kubumenan niye nu nuku oho féri katugo baptismusuméré. Emohote, Ahu fe nané mo defené moho Yesus Égésé Ala Éné Ubana Hayo kumu indo kumu kotoféri guguki baptismoné. Égé esumu Éné habigiyo asuféri bahani, nu fani habigiyoméri Éné bégésabo yuhu fani abuwome deyoho.
[17] Damu Ahu nané mo defené moho Égésé ahu nogo gahakumu baha: Ahu égé mése kukuwoho-niru mése yeri hohoi du-padi emu-hori-daha tobunsumoné. Emohoni, éné tama damu pu degemu pesanggi miyoné, damu du-padi degemu éyoné. Damu du-padi yeri hohoi du-padi kufiyosumahanato ékému kufiyori gogokumoné. Emohote, éné tama awe indo fani bunéri égéto ékému pemoné otori aroné. Hamemere Ahu fe nané mo defené moho Égé ahu Ala Éné u dari haiyangmu bahana yoho degemu kufiyoné, damu ahu fani Ala Éné u dari bahana de yoho hate degemu kufiyoné. Damu Égé ahu Éné u dari haiyangmu bahana yoho bake wayamu emoné, mite ahu fani Ala Éné u dari bahana de yoho bake esumu poréyahamu emoné," emiyoho.
[18] Yohanes égé ememere yoho, damu u aburohomu yori ahu yoho Ala bake deri Éné u dari bohonan niye yokunggu. Damu ahu aburoho yoho bake hate Kristus, u feki Ala Énamuki kubumu yohoni Ahuhabang kiri defené moho éné sisi manggoho égéki yosumoho.
[19] Emohote, ahuhabang-raja Herodes ahu Galilea soho kumu bahana yohoki hafuféri baha égésé éné yahagisi fe énahamo Herodias égéki yaha, damu égé u aburoho fe keiyongkéri emoho. Emohoni, Yohanes ahuhabang-raja Herodes poréyahamu emoho égéki etori singhafusuméri emiyoho, "Ahuhabang-raja Herodes dosa yaha," emiyoho.
[20] Ememere damu ahuhabang-raja Herodes égé éné tentara yoho bake yohoni, yohote Yohanes égéki berahae yeri bui womu kumu kungguna. Ememere ahuhabang-raja Herodes égé u aburoho keiyongkéri emesumoho ékému tafe ememere keiyongmu emoho.
[21] Emohote, ahuhabang-raja Herodes yohoni ahu éné furubo yahana yoho fani Yohanes bui kumu kufiyohonan de, dakasuhumu sisi mumangge ememere égé yaki: Yohanes ahu aburoho yoho bake baptismu éyaha égéki, uku hate Yesus baptismoho. Damu Yesus Uku Ala kumu u éyohoni hou tanderi hoho.
[22] Damu Ala Éné Ubana Hayo Égésé é-merpati gahakumu kibikubuméri Égé bake monu miri éné haha teyo kumu ogusugu. Damu dagenani Ala Éné u yosumoho migini yori emiyoho, "Guki Namu kéré. Nu esumu Guki woruméré. Gusé Nané modu yahani Nané modu hanikéré," ememere yosumoho migi.
[23] Yesus Éné sufébégé 30 kigi égéki, Ala kubumu yohoni Ahuhabang kiri baha Éné furubo égéki habigiyoméri afén niye bemoho. Ahu yoho fimahanani Égé Yusuf énamu, Yusuf énabo Eli.
[24] Eli énabo Matat, Matat énabo Lewi, Lewi énabo Malkhi, Malkhi énabo Yanai, Yanai énabo Yusuf.
[25] Yusuf énabo Matica, Matica énabo Amos, Amos énabo Nahum, Nahum énabo Hesli, Hesli énabo Nagai.
[26] Nagai énabo Maat, Maat énabo Matica, Matica énabo Simei, Simei énabo Yosekh, Yosekh énabo Yoda.
[27] Yoda énabo Yohanan, Yohanan énabo Resa, Resa énabo Zerubabel, Zerubabel énabo Sealtiel, Sealtiel énabo Neri.
[28] Neri énabo Malkhi, Malkhi énabo Adi, Adi énabo Kosam, Kosam énabo Elmadam, Elmadam énabo Er.
[29] Er énabo Yesua, Yesua énabo Eliezer, Eliezer énabo Yorim, Yorim énabo Matat, Matat énabo Lewi.
[30] Lewi énabo Simeon. Simeon énabo Yehuda, Yehuda énabo Yusuf, Yusuf énabo Yonam, Yonam énabo Elyakim.
[31] Elyakim énabo Melea, Melea énabo Mina, Mina énabo Matata, Matata énabo Natan, Natan énabo Daud.
[32] Daud énabo Isai, Isai énabo Obed, Obed énabo Boas, Boas énabo Salmon, Salmon énabo Nahason.
[33] Nahason énabo Aminadab, Aminadab énabo Admin, Admin énabo Arni, Arni énabo Hezron, Hezron énabo Peres, Peres énabo Yehuda.
[34] Yehuda énabo Yakub, Yakub énabo Ishak, Ishak énabo Abraham, Abraham énabo Terah, Terah énabo Nahor.
[35] Nahor énabo Serug, Serug énabo Rehu, Rehu énabo Peleg, Peleg énabo Eber, Eber énabo Salmon.
[36] Salmon énabo Kenan, Kenan énabo Arpakhsad, Arpakhsad énabo Sem, Sem énabo Nuh, Nuh énabo Lamekh.
[37] Lamekh énabo Metusalah, Metusalah énabo Henokh, Henokh énabo Yared, Yared énabo Mahalaleel, Mahalaleel énabo Kenan.
[38] Kenan énabo Enos, Enos énabo Set, Set énabo Adam, Adam énabo Ala.