[1] Yesus Égé Éné murid yoho bake tafe u aseméri yoho, "Ahu fe toto aburoho baha. Damu ahu toto aburoho baha éné kukuwoho damu aneséyang etori baha nesi de baha. Sawa feki énabo égé dagini ahu éné aneséyang etori baha égé éné aneséyang damu éné toto égena égéki abutakumoho.
[2] Emohoni, énabo égé ahu aneséyang etori baha égé bake yohoni, daha. Damu égé bake abamu yoho, 'Nu daréni gu gané furubo yeri poréyahamu emoho. U nogoki nu bake ayoméri nou. Damu gu nané toto damu nané aneséyang emu-hori-daha mése poréyahamu emoho égéki kara nouka, damu nu bake kubunu. Damu ememere enuka, gu fani tafe nané aneséyang etori bohon deyoho, menefé!' emiyoho.
[3] "Damu ahu aneséyang etori baha nesi égé ememere fimoho, 'Nabo mése nu éné aneséyang etori bere nokumu yohoni, muni. Emohoni, nute katugo nogo makerahae eme? Nu fani habigiyoméri soho kuwori kukuwoho fani kuhungsuméré deyoho. Damu ahu fe yoho bake kukuwoho feni yahae méréte, hosungkiné,' ememere fimoho.
[4] Damu hakureyaha égé sifing fe fimoho, 'Nu esumu wayamu eme méré nogoki nafaméré. Emohoni, nabo nu bake undomoné fani aneséyang afe deyoho égéki, ahu de bohonané, nu awe yohona afahang kumu bahae,' ememere fimoho.
[5] "Damu aneséyang etori baha nesi égé ahu énabo aneséyang kemahanate, fani dakamu kemerahana de yoho ahu isige-isige bake yohoni, dahana. Ahu mumange daha égé bake yori emiyoho, 'Gu nabo éné aneséyang makemere kemohoe?'
[6] Emiyohoni, ahu égé utuhu hamoho, '100 jerigen oho-minyak gobona we,' emiyoho. Damu ahu aneséyang etori baha égé yori emiyoho, 'Hogi, nogoki nabo éné kukuwoho burahae yaki éné kara kéré. Damu nokumu beri kakumu ékému 50 ememere kara nou!'
[7] Ememere damu ahu fe bake emiyoho, 'Gu nabo éné aneséyang makemere kemohoe?' Ahu égé utuhu hamoho, 'Kamu du-gandum mutu 1.000mu yaré,' emiyoho. Ahu aneséyang etori baha égé emiyoho, 'Hogi, nogoki gané kara aneséyang burahae yaha kéré. 800 ememere kara nou,' emiyoho.
[8] Damu ahu énabo éné aneséyang etori baha égé yahamu poréyahamu emesumoho égéki, énabo égé dagi. Damu ahu égé yahamu emohote, énabo énaukuni emiyoho, 'Ahu égé uku esumu aburohomu nafaméri baha. Embahae nu égé bake aneséyang fani kurahae deyoho égéki, égé makemere bohoné moho égéki fengféyoho,' ememere yori énaukunggu." Ememere Yesus sisi feyahafungguka, damu Égé u aseméri yoho égéki Éné murid yoho bake ayoméri yoho, "Ahu soho nokumu fani Ala kotoféyahana de yoho yohona aneséyang damu toto féri yohona hogigiyoho kumu kotoféri wayamu bohonané mahana égéki wayamu nafamahana. Emohote, ahu Ala kotoféyahana yoho yohona toto damu aneséyang féri yohona hogigiyoho kumu wayamu bohonané mahana égéki fani wayamu nafamahana deyoho.
[9] Emohoni, Nu katugo gugu bake u yahae méré nogoki femu narané: Ahu Alani fimiri bahana gugu guguna toto damu aneséyang soho nokumu égena nogoki ahu aneséyang damu kukuwohoni fimiri bahana yoho bake kemenorohoné. Emohoni, ahu énéyuhuwohote gugunahu kinané. Damu embahae gugu awe akumenanéka, damu fani toto damu aneséyang fani fimenan deyoho. Damu gugu bohonané embahae posu-posukiné mohoto ékému atunané mahana égéki, gugunahu yohote awe guguki hanikéri wayamu emenané.
[10] "Ahu u unaware égena égéki énabo éné u dari habigiyoméri emongkumaki, ahu égé u fikoyaha égena égéki hate etori awe habigiyoméri emoné. Damu ahu u ware etori fani haiyangmu emon dekumaki, hate hamemere u fikoyahamu égena égéki fani haiyangmu emon deyoho.
[11] Emohoni, gu kukuwoho damu toto soho nokumu égena égéki gabo éné u dari fani habigiyoméri wayamu emon dekumaka, emohoni ukukuwoho Ala Éné modu hanikiné moho égéki awe fani hamemere emon deyoho.
[12] Damu Ala soho nokumu guguna na kuroho égé fani hanikéri kuyomu emenan dekumaka, emohoni Ala Éné busu mene bahato ékému guguna na awe fani gugu bake kurohon deyoho.
[13] "Ukusi fe nogoki femu wayamu finané: Ahu fe égé énabo ahuyaha ukumamu de bohonangkumaka, ahu égé fani habigiyoméri yohona furubo yeri ukumamu égena égéki kotoféri wayamu emon deyoho. Égé esemu énabo fe modinéka, damu énabo fe remu worumoné. Damu hate awe énabo kamisige éné furubo afénéka, damu fani munggu de tafe esemu emesumoné, mite énabo feni fani fimiri éné furubo wayamu emon deyoho. Ahu énabo ahuyaha ukumamu de bahana hamemere gugu Alani hanikéri fimiri bahana, damu hate kotoféri aneséyangni hanikéri fimiri bahana ememere gugu fani bohonan deyoho, meneféyané," emiyoho.
[14] Farisi nahu yoho Yesus u kageto ememere yoho yaki égéki dagenaka, yoho aneséyangni hanikéri fimiri bahanani, Yesus Égéki dirimeféri yohona.
[15] Emohote, Yesus yoho bake emiyoho, "Damu gugu yahamu ahu manggoho gahakumu bahanani, ahu fe yoho etori ahu nogo yoho esemu manggohokigi ememere aukumenan niye pafufomahana. Emohote, guguna modu ememere keiyongkéri égé égéki Ala mése nafamoho. Ahu yoho ukukuwoho soho nokumu égena égéki etori aukunggunate, Alasé fani ukukuwoho égéki aukunggu deyoho, mite Égésé etori hakeremoho kéré.
[16] "Yahudi nahu yoho Ala Éné u dari bohonan niye Musa éné Buku damu ahu-nabi yohona Buku ékému kara uwangkena égéki yokukubuméri éyahanani, embahae baptismusumoho nahu Yohanes égé maraha. Marari fani kebekigi de Ala soho nokumu Ahuhabang kiri Énahu yoho age hafuféri etori bohoné moho éné u égéki yobuwoméri yoho. Damu katugo nogo Nu kumu Nané murid yoho kumu ememere hate u nogoki yobuwoméri éyoriya. Emohoni, ahu aburoho yoho Ala yohona Ahuhabang kiri yohoki hafuféri etori bohon niye fisini yori pafufomahana.
[17] Emohote, Musa éné hukum égena womu ékému ka unaware égena éné ka fe anigiyon deyoho. Damu u emu-hori-daha égena égéki awe esemu haiyangmu éyoné. Soho kumu hou kumu ememere anigiyoné, mite Musa éné hukum égéki fani anigiyon deyoho.
[18] Ukusi fe égéki ememere égé: Ahu menohosé énahamo untohomohoka, yang fe aféngkumaki, ahu égé yang muno égéki hahafemoho. Damu ahu besing menohosé yang mése énuhu untohomoho baha égéki aféngkumaki, ahu besing égé mése yang égéki hahafemoho," emiyoho.
[19] Yesus tafe Farisi nahu yoho bake usisi yoho, "Damu ahu fe égé éné toto aburoho bahani, damu éné ifita-tahano-mamana-piyaha esemu manggohomu égé. Damu ifita égena égéki tahano kuyokigi éné ka aneséyang esemu siyahakigi féri emahana. Damu égé baha égéki sawa hamu kubu iri ohoru esemu manggohomu égena égéki éni baha.
[20] Damu ahu toto kara nahu fe éné fi Lazarus de baha. Ahu yoho égéki yeri hori ahu toto aburoho baha éné afahang afiteto takenamu égé ékému kufiyahanani baha. Éné haha esumu peso wiyahakigi.
[21] Égé areyakigi. Emohoni, égé ahu toto aburoho baha éné abuge ohoru énggenato ékému ohoru ganggise pesanggi miyoné arené kudukin niye fimiri baha. Damu éné haha égéki peso aburoho bahanani, anggi yohote deri éné peso égéki tetemigina.
[22] "Sawa feki ahu toto karakigi nesi égé kunggu. Damu égé Ala Énahu kiri bahani, malaikat yoho deri éné bana yeri hori Ala Éné busu mene bahato Abraham baha éné ima afi kumu kufiyahanani baha.
[23] Damu ahu toto aburoho baha nesi uku hate kungguni, soho kungguna. Damu égé ahu hosanggigina yoho hori kidabahanato ékému hori esumu poréyahamu kugutoméri baha. Damu ékému kerohori siyaha kumu etohoni Abraham hama kumu baha, damu ahu toto karakigi nesi Lazarus égé Abraham éné ima afi kumu de baha.
[24] "Damu égé u hanggeramu yori Abraham éné fi iri emiyoho, 'Nabo Abrahamwa, nu worunu. Nu indo womu nokumu esemu kugutoméri bere. Emohoni, nouni, Lazarus éné bero womu mageme féri oho kumongka, yeri deri nané fage nokumu oho kumoné suhukiné,' emiyoho.
[25] Emohote, Abraham utuhu hamoho, 'Namuwa, finu! Gu soho kumu sifing féri baha égéki gu mése kukuwoho manggohomu égena égéki kemoho, mite Lazarus kukuwoho poréyahamu égena égéki kemoho. Emohoni, nokumu éné modu hanikéri égé, damu gu ékému kugutomoho.
[26] Damu hate nugu beriya damu gu baha womu ékému Ala mése soho haibe kurumu emohoni, nugu beriya nokumu tinggeméri gu bake fani murowan deyoho. Damu hate gu baha ékému tinggeméri nugu beriya nokumu fani muronan deyoho,' emiyoho.
[27] "Damu ahu toto aburoho baha égé emiyoho, 'Nabo Abraham, ememere éyongkumaki, nu gu bake fisini yahae. Nabo éné afahang kumu nané yahagisi besinggiyoho birikuma de bahana. Damu gu Lazarus bake nouni, égé nabo éné afahang kumu hori damu yoho bake yohona akiya yohoné. Emohoni, yoho dosa yahana égéki ukuni fani tafe afénan de Ala Éné u dari bohonané. Emohoni, yoho fani nokumu deri kugutoméri bohonan deyoho,' " emiyoho.
[29] Emohote, Abraham égé bake utuhu hamoho, "Musa éné hukum kara uwangki éné Buku de égena, damu ahu-nabi yoho kara uwangkena yohona Buku de égena. Emohoni, gané yahagisi besing yoho Buku égena égéki etori nafaméri hamemere eméri bohonané," emiyoho.
[30] Emohote, ahu toto aburoho baha nesi égé emiyoho, "Nabo Abraham, u yoho égéki fani hamu hanigi deyoho. Emohote, ahu mése honubakigina ékému ahu fe dotori yoho bake ahaingkumaki, yoho awe dosa yahana égéki ukuni fani tafe afénan de Ala Éné u dari bohonané."
[31] Emiyohote, Abraham égé bake utuhu hamoho, "Yoho Musa damu ahu-nabi yoho kara uwangkena égéki fani etori hamemere bohonan dekumaka, ahu kunggu dakamu dotori hori yoho bake yohonanéte, yoho fani énéné fimiri fani haiyangne ememere fimenan deyoho."