[1] Sawa feki ahu aneséyang kemesuméri ahuhabang-kaisar bake kurosumahana nahu aburoho yoho Yesus bake dahana. Damu ahu tuhuremu dosa kemesumahana nahu aburoho yoho hate Yesus bake dahana. Ahu énéyuhuwoho Yesus Éné u areyona niye Égé bake deri dukumahana.
[2] Ememere ahu énéyuhuwoho Yesus bake deri dukumahana égéki Farisi nahu yoho damu bafa-guru Musa éné hukum yokukubumahana nahu yoho etohonaka, damu hakereméri kutumu yori dirimeféri yohona, "Ahu nogoki ahu dosa kemesumahana yoho kumu kotoféyahanaka, damu ohoru énggena," emiyohona.
[3] Emohoni, Yesus u aseméri yoho bake yori emiyoho,
[4] "Ahu fe éné wi-domba 100mu égena. Damu égé soho haibe siyaha wi-domba yoku hatang énggamsumahanato ékému wi-domba kamisige anigiyongkumaki, égé makemere emone? Égé esemu 99 wi-domba damu soho haibe siyaha ékému kufiyonéka, damu hori wi-domba kamisige anigigi égéki agugumoné.
[5] Damu égé wi-domba égé gebufungkumaki, esumu hanikiné. Damu tongyeri berokiyo teyo kumu kufiyori yeri daha.
[6] Damu éné afahang dahaka, damu éné hogigiyoho damu ahu éné afahang ita égena yoho égé bake hori éné afahang defenan niye yori emiyoho, 'Nohogigiyohoniya, deri nu kumu kotoféri hanikiyowa. Nu nané wi-domba anigigi égéki gebuuri. Emohoni, nu kotoféri hanikiyowa,' emiyoho.
[7] Nu katugo gugu bake u yahae méré nogoki femu narané: Ahu fe dosa yaha égéki ukuni modinéka, damu Ala Éné u dari bohoné mohoni, Ala Éné modu esumu hanikigi. Éné modu hanikigi égéki ahu wi-domba anigigi égéki mése gebuuri hanikigi hamemere hanikigi: Ahu 99mu bahana yoho mése yohona dosa yahana égéki ukuni nafaméri dosa fani tafe afénan de Ala Éné u dari haiyangmu bahana. Emohoni, Ala Éné busu mene baha Égésé mése etori hanikigi. Emohote, ahu dosa kemesumoho kamisige égé dosa yaha égéki ukuni modinéka, katugo Ala Éné u dari bohongkumaki, Ala damu Éné malaikat yoho Ala bahato ékému esumu aburohomu hanikinané."
[8] Yesus tafe u feki ahu yoho dukuméri bahana yoho bake aseméri yoho, "Yang fe égé aneséyang-dirham bibirikuma (10) kufiyohoni égé. Égé fimohoni aneséyang bibirikuma égéki uku énéné esumu wayamu égé. Damu égé kamisige anigiyongkumaki, égé awe siya-pelita haimohoka, damu afahang pu tobuni wayamu efefeméri dakamu gebufuni.
[9] Ememere égé aneséyang égé gebufungkumaki, awe énohogigiyoho damu énahu éné afahang ita égena yoho bake yori emiyohoné, 'Nu nané aneséyang anigigi égéki mése gebuuri. Emohoni, gugu nu kotoféri hanikiyowa!' emiyohoné.
[10] Nu katugo gugu bake u yahae méré nogoki femu narané: Hamemere sawa feki ahu kamisige dosa kemesumoho égé dosa égéki ukuni modinéka, Ala Éné u dari baha égéki malaikat Ala Éné sama kumu dukuméri égena yoho Ala kumu kotoféri esumu aburohomu hanikinané," emiyoho.
[11] Yesus tafe u feki Farisi nahu yoho damu bafa-guru Musa éné hukum yokukubumahana nahu yoho bake u aseméri yoho, "Ahu fe égé énamu besing ukuma de bahana.
[12] Sawa feki ahu énamu kuda égé énabo bake emiyoho, 'Nabo, nu fani kidabahaeni, gu damu baha nogo féri gané kukuwoho gu akumonéka, nu bake kurohoné nané na kiné moho égéki nu bake kuro,' emiyoho. Emohoni, énabo égé éné toto égéki agiyoméri énamu ukuma yoho bake kemerohoni, énamu dumori égéte éné na yaha.
[13] Sawa yahamuto mahana égéki ofo dung égé éné toto emu-hori-daha égéki aneséyang tokuné mohoka, damu musuri yohona mokang fe esemu hamamu égé ékému hoho. Hokumu égé soho nokumu ukukuwoho esemu poréyahamu égenani, égé hanikéri fimoho égéki emesuméri aneséyang égéki abutakunggu: Uku oho miri wambumoho damu kubu geiri damu yang hu kei kemesumahana yoho kotoféri kunu igina ememere emesumoho.
[14] Emohoni, éné aneséyang damu karakigina. Égé yohona mokang kumu baha ékému ahu yoho ohoru arenané mahana égéki karakiginani, égé hate kukuwoho karakéri damu areyakigi.
[15] Damu ofo dung égé furubo afén niye ahu bahana ékému ahu fe bake hori yoho. Hori yohoni, ahu égéte égé bake furubo kuroho. Furubo égéki uku wi yoho wi busu kumu égena égéki ohoru kemeroho.
[16] Damu ofo dung égé areyakigini, égé wi yoho yohona ohoru énggena éné ganggene égéki arené bemoho. Emohote, ahu fe yoho ohoru fe fani égé bake kurohona deyoho.
[17] "Ememereya égé makerahae esemu emumoho égéki dakamu ukuni nafamoho. Damu égé ukuné modu kumu fimiri emiyoho, 'Ahu nabo éné furubo yahana yoho ohoru wayamu énggenate, énamu nu nokumu bere nogoki esemu areyakigini, kugutoméri bere.
[18] Emohoni, nu awe hori damu nabo bake yahae, "Nabo, nu mése Ala Éné sama kumu damu nabo gané sama kumu dosa yaré.
[19] Nu fani habigiyoméré deyoho. Emohoni, nabo, gu fani nure namu kéré fani ememere yohon deyoho. Nouni, nabo gané furubo yahana nahu kiri gané furubo afe."' Ememere ukuné modu kumu fimiri emiyoho.
[20] Damu égé musuri kusumu énabo bake hoho yaki, afahang fani takenamoho de damu hamane égé. "Emohote, énabo mése égéki etoho. Énabo éné modu esemu woruméri boniri hori gebuuri berahae yeri damu wofunggu.
[21] Ofo dumori égé yori emiyoho, 'Nabo, nu Ala damu nabo gu bake mése dosa yaré. Nu fani habigiyoméré deyoho. Emohoni, gu fani nure emiyoho, "Namu kéré." Fani ememere yohon deyoho,' emiyoho.
[22] Emohote, énabo yohoni, ahu éné furubo yahana nahu yoho marahanana, damu yori emiyoho, 'Gugu kakumu ifita esumu manggohomu égé égéki yeri damu égé bake kunané, damu égé namukéri baha ememere kubumon niye kukuwoho bero butong womu kumona yeri éné bero kumu kunané. Damu bégésabo éné bégé kumu kunané.
[23] Damu ememere emahanaka, damu wi-sapi amuke akungbaha yeri haunggunané. Damu nugu awe hanikéri damu areya.
[24] Namu nogoki mése kunggu, mite mése dakumu dotoho. Damu égé mése anigiyaki, damu mése dakamu gebuuriya.' Emiyohoka, yoho damu kubu igina.
[25] "Ememere éyahanani, énamu woro égé de giyong kumu égé yaki kusumu afahang hoho. Oguri afahangki botakenamoho égéki, kine uri kubu iri gong ékigina éné pou dagi.
[26] Emohoni, égé yohoni, ahu fe éné u dari éné furubo yeri baha nesi daha. Damu énamu woro égé abamu yoho, 'Makemohore kubu iginae?' ememere abamu yoho.
[27] Damu ahu éné furubo yaha nesi égé utuhu haméri yoho, 'Nabo, gukuda dakamu daha. Damu gabo égé énamu dakamu wayamu daha, nemohoni égé yohoni wi-sapi amuke kuberi égé égéki haunghungguna,' emiyoho.
[28] Ofo besing yoho égé esemu hakeremoho. Emohoni, égé afahang fani osugu deyoho. Damu ememere emohoni, égé afahang atuné moho égéki énabo musuri agogoméri éyaha.
[29] Emohote, ofo besing yoho égé énabo bake yori emiyoho, 'Sufébégé gegemoho nabo gané furubo yeri esumu habigiyoméri furubo emesuméré. Damu nu fani gané u yoho égéki muni deyoho. Emohote, nabo nu bake wi-kambing amuke nu awe nané matahai yoho kumu kotoféri kubu iri hanikiyowané mériya égéki fani kuroho deyoho.
[30] Emohote, gamu égé mése gané toto tuhuremu abutakunggu, damu yang hu kei osusumahana yoho bake kemeroho. Emohote, égé dakamu dahani, nabo gu énéné wi-sapi amuke kuberi égé égéki haunghunggu,' emiyoho.
[31] "Damu énabo yori emiyoho, 'Namuwa, gu nu kotoféri beriya, damu kukuwoho nané na égena nogoki gané na we.
[32] Emohote, gukuda égé mése kunggu, mite katugo dakamu dotoho. Égé mése anigigi, mite égé dakamu gebuuriya. Emohoni, nugu esemu kubu iri hanikiya.'" Yesus ememere yori feyahafunggu.