[1] دَاهُو اللّٰهْ يِدَمِّرْ الْأَرْض وَ يِسَوِّيهَا خَرَابْ. هُو يِتَلِّفْ وِجِهْ الْأَرْض وَ يِشَتِّتْ سُكَّانْهَا.
[2] وَ مِنْ شِدَّةْ التَّعَبْ، رَاجِلْ الدِّينْ يَبْقَى // مِثِلْ وَاحِدْ مِنْ الشَّعَبْ وَ السِّيدْ يَبْقَى مِثِلْ عَبْدَهْ وَ السِّتّ يَبْقَى مِثِلْ خَادِمْهَا وَ الْبَايِعْ يَبْقَى مِثِلْ الْمُشْتَرِي وَ الْيِعَتِّلْ يَبْقَى // مِثِلْ الْيِعَتُّلُوهْ وَ الْيِدَيِّنْ يَبْقَى // مِثِلْ الْيِدَيُّنُوهْ.
[3] وَ كُلَّ الْأَرْض تِدَّمَّرْ دَمَارْ كَامِلْ وَ يَنْهَبَوْهَا مَرَّةْ وَاحِدْ أَشَانْ دَا كَلَامْ اللّٰهْ // الْهُو قَالَهْ.
[4] الْأَرْض تِجِفّ وَ تَيْبَسْ أَيْوَى، الْعَالَمْ يَضْعَفْ وَ يَكْسَلْ وَ كُبَارَاتْ شَعَبْ الْأَرْض يَضْعَفَوْا.
[5] وَ الْأَرْض، سُكَّانْهَا يِنَجُّسُوهَا أَشَانْ هُمَّنْ مَا طَبَّقَوْا الْوَصَايَا وَ خَالَفَوْا الْقَوَانِينْ وَ قَطَعَوْا الْمُعَاهَدَةْ الدَّايْمَةْ.
[6] وَ سُكَّانْ الْأَرْض يِلْعَاقَبَوْا بِسَبَبْ خَطَاهُمْ وَ فِي شَانْ دَا بَسْ، اللَّعَنَةْ تَلْحَقْ الْأَرْض. وَ بَيْدَا، سُكَّانْ الْأَرْض يَحْرَقَوْا وَ يِفَضُّلُوا مِنْهُمْ شِيَّةْ بَسْ.
[7] وَ الْخَمَرْ الْجَدِيدْ يَبْقَى شِيَّةْ وَ شَدَرْ الْعِنَبْ يَمْرَضْ. وَ النَّاسْ الْأَوَّلْ قُلُوبْهُمْ فَرْحَانِينْ هَسَّعْ قَاعِدِينْ يَقُنْتُوا.
[8] وَ حِسّ التَّنَابِلْ الْحَلُو يَقِيفْ وَ عَايِطْ الْفَرْحَانِينْ يِكَمِّلْ وَ ضَرِبِينْ الْجِقِنْدِيَّةْ الْحَلُو // كُلَ يَقِيفْ.
[9] مَا يَشَرْبَوْا خَمَرْ بِغِنَيْ وَ الْخَمَرْ الْبِسَكِّرْ يَبْقَى مُرّ // لِلشَّرَّابِينْ.
[10] الْحِلَّةْ الْخَرْبَانَةْ تِلْكَسَّرْ وَ أَيِّ بَيْت يِلْقَفَّلْ وَ مَا عِنْدَهْ مَدَخَلْ.
[11] وَ يَصْرَخَوْا فِي الشَّوَارِعْ أَشَانْ الْخَمَرْ يَبْقَى مَا فِيهْ. وَ كُلَّ الْفَرَحْ يَبْقَى مَا فِيهْ وَ السُّرُورْ يِوَدِّرْ مِنْ الْبَلَدْ.
[12] وَ فِي الْمَدِينَةْ يِنْشَافْ إِلَّا الْخَرَابْ، الْبِيبَانْ يِلْكَسَّرَوْا وَ يِدَّمَّرَوْا.
[13] وَ خَلَاصْ فِي أُسْط الْأَرْض وَ بَيْن الشُّعُوبْ // مَا يِفَضِّلْ شَيّءْ مِثِلْ الزَّيْتُونْ بَعَدْ الْقَطِعْ وَ الْعِنَبْ الْفَضَّلْ كِشَّيْب.
[14] الْفَضَّلَوْا حَيِّينْ يَرْفَعَوْا حِسُّهُمْ وَ يَفْرَحَوْا بِعَظَمَةْ اللّٰهْ. وَ وَكِتْ يَجُوا مِنْ الْغَرِبْ، يِعِيطُوا بِفَرَحْ.
[15] مَجُّدُوا اللّٰهْ فِي الصَّبَاحْ! مَجُّدُوا أُسُمْ اللّٰهْ إِلٰـهْ بَنِي إِسْرَائِيلْ // فِي جَزَايِرْ الْبَحَرْ!
[16] وَ مِنْ طَرَفْ الْأَرْض، نَسْمَعَوْا غِنَيْ الْبُقُولْ: «الْمَجْد لِلّٰهْ الصَّادِقْ!» وَ لَاكِنْ أَنَا نُقُولْ: «أَنَا وَدَّرْت! أَنَا وَدَّرْت! الْعَذَابْ لَيِّ أَنَا! الْخَايْنِينْ خَانَوْا. خِيَانَةْ! الْخَايْنِينْ خَانَوْا.»
[17] خَوْف وَ نُقْرَةْ وَ شَرَكْ لَيْكُو إِنْتُو، يَا سُكَّانْ الْأَرْض!
[18] الْيَجْرِي مِنْ الْحِسّ الْيِخَوِّفْ يَقَعْ فِي النُّقْرَةْ وَ الْيَمْرُقْ مِنْ النُّقْرَةْ، الشَّرَكْ يَكُرْبَهْ. أَشَانْ بِيبَانْ السَّمَاءْ يِنْفَتْحُوا وَ أَسَاسْ الْأَرْض يَرْجِفْ.
[19] وَ الْأَرْض تِشَّقَّقْ وَ الْأَرْض تِلْفَتْفَتْ وَ الْأَرْض تِنْهَزَّ.
[20] الْأَرْض تِتَّرْتَعْ مِثِلْ السَّكَّارِي وَ تِنْهَزَّ مِثِلْ عِلِّيَّةْ فِي الرِّيحْ. عِصْيَانْهَا يَبْقَى لَيْهَا تَقِيلْ وَ هِي تَقَعْ مَرَّةْ وَاحِدْ مَا تَقْدَرْ تُقُمّ.
[21] وَ فِي الْيَوْم دَا، اللّٰهْ يِعَاقِبْ قُوَّاتْ السَّمَاءْ فَوْق وَ مُلُوكْ الْأَرْض تِحِتْ.
[22] وَ يِلِمُّوهُمْ وَ يَكُرْبُوهُمْ مَسَاجِينْ // فِي النُّقْرَةْ. وَ يِقَفُّلُوهُمْ فِي السِّجِنْ وَ بَعَدْ مُدَّةْ طَوِيلَةْ، يِعَاقُبُوهُمْ.
[23] الْقَمَرْ يَخْجَلْ وَ الْحَرَّايْ تَلْقَى الْعَيْب أَشَانْ اللّٰهْ الْقَادِرْ يَحْكِمْ. وَ يِبَيِّنْ مَجْدَهْ قِدَّامْ كُبَارَاتْ شَعَبَهْ فِي جَبَلْ صَهْيُون وَ فِي مَدِينَةْ الْقُدُسْ.