[1] Arababwira ati: “Ndababwira ukuri; muri aba bahagaze hano harimwo bamwe batazobona urupfu gushitsa aho bazobonera ubwami bw'Imana buzananye n'ubushobozi.”
[2] Imisi itandatu ishize, Yesu ajana Petero, Yakobo na Yohana, abadugana igisozi kirekire ari bonyene. Ahinduka ukundi imbere yabo,
[3] impuzu ziwe zirakayangana, zera derere, kandi nta mumesuzi kw'isi yoshoboye kuzeza atyo.
[4] Maze Eliya na Mose barabiyereka, bavugana na Yesu.
[5] Petero abwira Yesu ati: “Mwigisha, bitubereye vyiza ko turi hano, nuko duce uburaro butatu, bumwe rwawe, ubundi bwa Mose, ubundi bwa Eliya.”
[6] Ntiyari azi ico akwiye kuvuga, kuko bari baguye igihumura.
[7] Maze igicu kiraza kibatera igitutu, ijwi riva muri nya gicu riti: “Nguwu Umwana wanje nkunda, ni mumwumve.”
[8] Maze baraba hirya no hino, ntibaba bakigira uwundi babona, atari Yesu wenyene, ari kumwe na bo.
[9] Bariko baramanuka ico gisozi, arabihanikiriza ngo ntihagire umuntu badondera ivyo babonye, Umwana w'umuntu atarazuka avuye mu bapfuye.
[10] Babika iryo jambo, babazanya ivyo ukuzuka mu bapfuye ivyo ari vyo.
[11] Baramubaza bati: “Mbega abahinga b'ivyanditswe ko bavuga yuko Eliya akwiye kubanza kuza?”
[12] Arabishura ati: “Eliya abanza kuza koko, akaroranya vyose neza.” Ariko vyanditswe bite ku Mwana w'umuntu yuko azobabazwa vyinshi, agatiturwa?
[13] Ariko ndababwira yuko Eliya yamaze kuza, kandi bamugiriye uko bagomba kwose, nk'uko vyanditswe kuri we.
[14] Bariko barashikira abigishwa, babona ishengero ryinshi ribakikije, n'abahinga b'ivyanditswe baharira na bo.
[15] Uwo mwanya ishengero ryose rimurabutswe riratangara rwose, barirukanga baramusanganira, baramuramutsa.
[16] Arababaza ati: “Mwariko murabahaririza ibiki?”
[17] Umwe muri iryo shengero aramwishura ati: “Mwigisha, nari nakuzaniye umwana wanje, yinjiwemwo n'impwemu y'ikiragi.
[18] Aho imufatiye hose, imutura hasi, akabimba ifuro, akazyegenya amenyo, akagenda arananuka; ndabarira abigishwa bawe ngo bayirukane, irabananira.”
[19] Arabishura ati: “Yemwe abo iki gihe mutizera, nzogeza ryari kubana namwe? Nzogeza ryari kubihanganira? Ni mumunzanire.”
[20] Baramuzana. Iyo mpwemu imubonye ica iramujegeza cane, aratemba, arigaragura, abimba ifuro.
[21] Yesu abaza se ati: “Amaze igihe kingana iki bimutera bityo?” Aramwishura ko vyahereye mu bwana bwiwe. “
[22] Kenshi cane imuta mu muriro no mu mazi ngo imwice. Ariko namba hari ico woshobora, tugirire akagongwe udutabare.
[23] Yesu aramwishura ati: “Uvuze uti: 'Namba wobishobora?” Erega vyose bishobokera uwizeye.
[24] Se w'uwo mwana aca aturika cane ati: “Ndizeye, fasha ukutizera kwanje.”
[25] Yesu abonye abantu bagwirirana biruka, akankamira iyo mpwemu ihumanye ati: “Yewe mpwemu y'ikiragi kandi y'igipfamatwi, ubwanje ndakubariye muvemwo, ntukamugarukemwo namba.”
[26] Iratakamba, iramujegeza cane, imuvamwo, amera nk'uwuhwereye, bituma abenshi bavuga bati: “Arahwereye.”
[27] Yesu amufata ukuboko, aramuvyura, arahagarara.
[28] Yinjiye mu nzu, abigishwa biwe bamubaza biherereye bati: “Tweho mbega ko vyatunaniye kuyirukana?”
[29] Arabishura ati: “Bene irya ntikurwamwo n'ikindi atari ugusenga no kwisonzesha.”
[30] Bavayo, baca i Galilaya, agomba ko hatogira uwubimenya.
[31] Kuko yigisha abigishwa biwe ati: “Umwana w'umuntu azoshirwa mu maboko y'abantu, bazomwica, hashize imisi itatu bamwishe, azozuka.”
[32] Ariko bayoberwa iryo jambo, batinya kurimubaza.
[33] Bashika i Kaperinawumu. Yinjiye mu nzu arababaza ati: “Mwaharira ibiki mu nzira?”
[34] Barihorera, kuko mu nzira baharira umukuru wabo uwo ari we.
[35] Aricara, ahamagara bamwe icumi na babiri, arababwira ati: “Umuntu ni yagomba kuba uwo imbere, ni abe inyuma ya bose, ni abe n'umukozi wa bose.”
[36] Yakira akana, agahagarika hagati yabo; arakarera, arababwira
[37] ati: “Uwuzokwakira umwe mu twana nk' aka mw'izina ryanje, azoba anyakiriye; kandi uwunyakira, si jewe yakira, ariko yakira uwantumye.”
[38] Yohana aramubwira ati: “Mwigisha, twabonye umuntu yirukana abadayimoni mw'izina ryawe, turamubuza, kuko atadukurikira.”
[39] Yesu aramwishura ati: “Ntimumubuze, kuko ata muntu azokora igitangaza mw'izina ryanje, azoshobora guca amvuga nabi.”
[40] Kuko uwutari umwansi wacu ari mu ruhande rwacu.
[41] Umuntu wese azobaha n'urwato rw'amazi kuko muri mw'izina rya Kristo, ndababwire ukuri, ntazobura impera yiwe.
[42] Kandi uwuzotsitaza n'umwe muri abo bato banyizera, iciza ni uko yohambirirwa urusyo ruremereye kw'izosi, agatererwa mu kiyaga.”
[43] Ukuboko kwawe ni kwagutsitaza, uguce igikonjo; vyokubera vyiza kwinjira mu bugingo ucitse igikonjo, hako uja muri Gehinomu mu muriro utazima, ufise amaboko yompi; [
[44] aho inyo zabo zidapfa, kandi n'umuriro utazima.]
[45] N'ikirenge cawe ni cagutsitaza, ugice; vyokubera vyiza kwinjira mu bugingo ucitse ikirenge, hako utererwa muri Gehinomu, ufise ibirenge vyose; [
[46] aho inyo zabo zidapfa, kandi n'umuriro utazima.]
[47] N'ijisho ryawe ni ryagutsitaza, urinogore; vyokubera vyiza kwinjira mu bwami bw'Imana upfuye ijisho, hako utererwa muri Gehinomu ufise amaso yompi;
[48] aho inyo zabo zidapfa, kandi n'umuriro utazima.
[49] Kandi umuntu wese azoryoshwa n'umuriro, nk'uko umunyu uryosha.
[50] Umunyu ni mwiza, ariko umunyu woshira uburyohe, mwoba mukiwuryohesha iki? Mugire umunyu mu mitima yanyu, kandi mubane amahoro.