[1] Muri iyo misi hongera kuba ishengero ryinshi, babura ivyo kurya; ahamagara abigishwa, arababarira
[2] ati: “Ishengero rinteye akagongwe, kuko uwu ari umusi ugira gatatu turi kumwe, none ntibagira ico barya.
[3] Nobasezera ngo basubire i wabo bashonje, bogwira isari mu nzira, kandi bamwe ari aba kure.”
[4] Abigishwa biwe baramubaza bati: “Umuntu yokura hehe imitsima yo guhaza aba bantu, ko hano ari mu bugararwa?”
[5] Arababaza ati: “Mufise imitsima ingahe?” Na bo bati: “Ni indwi.”
[6] Abarira ishengero ngo ryicare hasi; yakira ya mitsima indwi, ayishimira Imana, arayimanyagura, ayihereza abigishwa biwe, ngo bayibagaburire; bayigaburira ishengero.
[7] Kandi bari bafise udufi duke; araduhezagira, avuga ko batubagaburira na two.
[8] Bararya, barahaga, begeranya utumanyagu tw'imisigazwa, twuzura ibiseke indwi.
[9] Bari nk'ibihumbi bine; arabasezera.
[10] Uwo mwanya atambukira mu bwato, bo n'abigishwa biwe, aja ahegereye i Dalamanuta.
[11] Haza Abafarisayo, batangura kumuhaririza, bamuronderako ikimenyetso kiva mw'ijuru, bamugeza.
[12] Aruhutsa umutima cane ati: “Ni igiki gitumye abo iki gihe barondera ikimenyetso? Ndababwira ukuri abo iki gihe bakazohabwa ikimenyetso!”
[13] Abasiga hano, yongera gutambukira mu bwato, ajabuka hakurya.
[14] Kandi bari bibagiye gutekera imitsima, nta yo bari bafise mu bwato, atari irobe rimwe.
[15] Arabihanikiriza ati: “Mumenye, mwirinde umwambiro w'Abafarisayo n'umwambiro wa Herode.”
[16] Baravugana bati: “Ntidufise imitsima.”
[17] Yesu arabimenya, arababaza ati: “Ni igiki gitumye mwiburanya ngo nta mitsima mufise?” Ntimuraruha mubimenya canke mubitahura? Mbega mufise imitima ikomantaye?
[18] Amaso ko muyafise ntimuruha mubona? Mufise amatwi, ntimwumva, kandi ntimwibuka?
[19] Hamwe namanyagurira ya mitsima itanu ibihumbi bitanu, mwegeranije ibiseke bingahe vyuzuye utumanyagu?” Baramwishura bati: “Ni icumi na bibiri.”
[20] Kandi hamwe namanyagurira ya mitsima indwi ibihumbi bine, mwatororokanije ibiseke bingahe vyuzuye utumanyagu? Baramwishura bati: “Ni indwi.”
[21] Arababaza ati: “Ntimuraruha mubitahura?”
[22] Baraza bashika i Betsayida. Bamuzanira impumyi, baramwinginga ngo ayikoreko.
[23] Afata iyo mpumyi ukuboko, ayikura mu mihana, acira amate mu maso yayo, ayirambikako ibiganza, arayibaza ati: “Hari ico ubona?”
[24] Iraramura amaso, iramwishura iti: “Ndabona abantu kuko mbona ibisa n'ibiti bigendagenda.”
[25] Yongera kurambika ibiganza ku maso yayo, iritegereza, irakira, yihweza vyose neza.
[26] Amurungika i we ati: “Ntuje no muri iyi mihana.”
[27] Yesu avanayo n'abigishwa biwe, aja mu mihana y'i Kayisariya mu bwa Filipo. Bari mu nzira, abaza abigishwa biwe ati: “Abantu bagira ngo ndi nde?”
[28] Baramwishura bati: “Bagira ngo uri Yohana Umubatizi, abandi ngo uri Eliya,” “abandi ngo uri umwe mu bavugishwa n' Imana.”
[29] Na we arababaza ati: “Ariko mweho mugira ngo ndi nde?” Petero aramwishura ati: “Uri Kristo.”
[30] Arabihanikiriza ngo ntihagire umuntu babwira ivyiwe.
[31] Atangura kubigisha ati: “Umwana w'umuntu akwiye kuzobabazwa uburyo bwinshi, no kuzokwankwa n'abashingantahe, abakuru b'abaherezi, abahinga b'ivyanditswe, no kuzokwicwa, maze hashize imisi itatu akazuka.”
[32] Avuga iryo jambo ataguhishangiza. Petero aramwihererana, atangura kumwamira.
[33] Arahindukira, abona abigishwa biwe, akankamira Petero ati: “Herera inyuma yanje, Satani, kuko ivyo Imana atari vyo ubabaye, ariko ni ivyo abantu.”
[34] Ahamagara ishengero bo n'abigishwa biwe, arababwira ati: “Umuntu ni yagomba kunkurikira, ni yiyanke, yikorere umusaraba wiwe, ankurikire;
[35] kuko uwugomba gukiza ubugingo bwiwe azobubura, ariko uwuzoheba ubugingo bwiwe kubwanje no ku bugingo bwo ubutumwa bwiza, azobukiza.”
[36] Kandi umuntu vyomumarira iki kwunguka ivyo mw'isi vyose, abitangiye ubugingo bwiwe ko iciru?
[37] Mbega umuntu yotanga iki ngo acungure ubugingo bwiwe?
[38] Kuko umuntu wese bizotera isoni kunyemera no kwemera amajambo yanje muri iki gihe c'ubusambanyi kandi c'ikinyavyaha, n'Umwana w'umuntu bizomutera isoni kumwemera, aho azozira afise ubwiza bwa Se, azananye n'abamarayika bera.