[1] Arikora avayo, aja mu gihugu c'i Yudaya no hakurya ya Yorodani, ishengero ryongera gukoranira kuri we, yongera kubigisha nk'uko yamenyereye.
[2] Abafarisayo baza kuri we, baramugeza bati: “Mbega biremerwa ko umuntu yirukana umugore wiwe?”
[3] Na we arababaza ati: “Mose yabagereye iki?”
[4] Baramwishura bati: “Mose yemeye ko handikwa ikete ryo kuvavanura, akamwirukana.”
[5] Yesu arababwira ati: “Gukomantara kw'imitima yanyu ni kwo kwamwandikishije ico cagezwe.”
[6] Ariko uhereye kw'itanguriro ry'ukuremwa, Imana yabaremye bari uburyo bubiri.
[7] Ni co gituma umuntu azosiga se na nyina, akabana n'umugore wiwe ubutakivana,
[8] bompi bakaba umubiri umwe. Bituma batakiri babiri, ariko baba babaye umubiri umwe.
[9] Nuko ico Imana yamatanije umuntu ntazokimature.
[10] Yinjiye mu nzu abigishwa bongera kumubaza iryo jambo.
[11] Arababwira ati: “Umuntu wese yirukana umugore wiwe, akarongora uwundi, aba asambanye kandi amuhemukiye.”
[12] Kandi na we ubwiwe, ni yahukana n'umugabo wiwe, akarongorwa n'uwundi, azoba asambanye.”
[13] Maze bamuzanira abana bato, ngo abakoreko; abigishwa barabakankamira.
[14] Maze Yesu abibonye, araraka, arababarira ati: “Ni mureke abana bato baze aho ndi, ntimubabuze, kuko ubwami bw'Imana ari ubwo abameze batyo.”
[15] Ndababwire ukuri, uwutazokwakira ubwami bw'Imana nk'umwana muto, ntazobwinjiramwo na gatoya.
[16] Arabarera, arabahezagira, abarambitseko ibiganza.
[17] Agisohoka ngo akomeze urugendo, haza umuntu kuri we yirukanga, aramupfukamira, aramubaza ati: “Mwigisha mwiza, nkore iki, ngo nze ndagwe ubugingo budashira?”
[18] Yesu aramubaza ati: “Unyitira iki mwiza? Nta mwiza, atari umwe, ni we Mana.”
[19] Ko uzi ivyagezwe, ngo Ntukice, ntugasambane, ntukibe, ntukagirize abandi ibinyoma, ntukagunge, wubahe so na nyoko.
[20] Aramubwira ati: “Mwigisha, ivyo vyose naravyitondeye, mpereye mu buto bwanje.”
[21] Yesu amwitegereje aramukunda, aramubwira ati: “Uhajije kimwe: genda, ushore ivyo utunze vyose, ugabire aboro, ni ho uzogira itunga mw'ijuru, uteko uze, unkurikire.”
[22] Yumvise iryo jambo arijirwa, agenda ababaye, kuko yarafise itunga ryinshi.
[23] Yesu yeraguza amaso, abwira abigishwa biwe ati: “Erega biragoye ko aba vyinshi binjira mu bwami bw'Imana!”
[24] Abigishwa batangazwa n'amajambo yiwe. Yesu yongera kubabwira ati: “Bana banje, erega biragoye ko abizigiye ubutunzi binjira mu bwami bw' Imana!
[25] Icoroshe ni uko ingamiya yoca mu zuru ry'urushinge biruta umutunzi ko yinjira mu bwami bw' Imana.”
[26] Baratangara rwose bati: “None rero, ni nde ashobora gukizwa?”
[27] Yesu arabitegereza, arababwira ati: “Kubwo abantu ntigishoboka, ariko ku Mana si uko, kuko vyose bishobokera Imana.”
[28] Maze Petero atangura kumubwira ati: “Raba, twebwe twaretse vyose turagukurikira.”
[29] Yesu arababwira ati: “Ndababwire ukuri, Nta waretse inzu, canke abavukanyi biwe, canke bashiki biwe, canke nyina, canke se, canke abana, canke itongo, kubwanje no ku bwo ubutumwa bwiza,
[30] atazobishumbushwa ijana muri iki gihe ca none, inzu, n'abavukanyi biwe, na bashiki biwe, na ba nyina, n'abana, n'itongo, bisukiranijwe no guhamwa, kandi mu gihe kizoza azohabwa ubugingo budashira.”
[31] Ariko benshi b'imbere bazoba abo inyuma, kandi abo inyuma bazoba abo imbere.
[32] Bari mu nzira baduga i Yerusalemu. Yesu yari abagiye imbere, baratangara, abamukurikira baratinya. Yongera kujana bamwe icumi na babiri bari ukwabo, atangura kubabarira ibigira bimubeko
[33] ati: “Ehe, turaduze i Yerusalemu, kandi Umwana w'umuntu azoshirwa mu maboko y'abaherezi bakuru n'abahinga b'ivyanditswe, bazomucira urubanza rwo gupfa, bamuhe abanyamahanga,
[34] bamushinyagurire, bamuvume amate, bamukubite cane, bamwice, maze imisi itatu ishize azozuka.”
[35] Yakobo na Yohana abana ba Zebedayo baramwegera baramubwira bati: “Mwigisha, turagomba ko uduha ico tugusaba cose.”
[36] Arababaza ati: “Mugomba ko ndabaha iki?”
[37] Baramwishura bati: “Uduhe ngo tuzokwicare, umwe i buryo bwawe uwundi i bubamfu, mu bwiza bwawe.”
[38] Maze Yesu arabishura ati: “Ntimuzi ico musaba. Mwoshobora kunywera ku gikombe nywerako, canke kubatizwa umubatizo mbatizwa jewe?”
[39] Baramwishura bati: “Turashobora.” Yesu arababwira ati: “Igikombe nywerako, muzokinywerako, kandi muzobatizwa umubatizo mbatizwa jewe.”
[40] Ariko gutanga ivyicaro i buryo bwanje canke mu bubamfu, si ivyanje, kiretse abo vyateguriwe.
[41] Bamwe icumi bavyumvise batangura kwitonganiriza ivya Yakobo na Yohana.
[42] Yesu arabahamagara, arababwira ati: “Murazi yuko abavugwa ko baganza amahanga bayatwaza amanyama, kandi n'abakuru bayo bayagirako ububasha.
[43] Ariko muri mwebwe si ko biri. Yamara uwugomba kuba mukuru muri mwebwe, azobe umukozi wanyu.
[44] Kandi uwugomba kuba uwo imbere, azobe umushumba wa mwese.
[45] Kuko na none Umwana w'umuntu atazanywe no gukorerwa, atari ugukorera abandi, no gutanga ubugingo bwiwe ko incungu ya benshi.”
[46] Nuko bashika i Yeriko. Akivana i Yeriko n'abigishwa biwe n'ishengero ryinshi, umwana wa Timayo yitwa Barutimayo, impumyi yasegerereza, yari yicaye i ruhande y'inzira.
[47] Yumvise ko ari Yesu Umunyanazareti atangura gutakamba ati: “Yesu, mwana wa Dawidi, ngirira imbabazi.”
[48] Abantu benshi baramuzibiranya ngo ahore, ariko arushiriza cane gutakamba ati: “Mwana wa Dawidi, ngirira imbabazi.”
[49] Yesu arahagarara, arababarira ati: “Ni mumuhamagare.” Bahamagara iyo mpumyi, barayibwira bati: “Humura, va hasi, araguhamagaye.”
[50] Na yo ita impuzu zayo, ihaguruka vuba, yegera Yesu.
[51] Yesu arayibaza ati: “Ugomba ko ndagukorera iki?” Ino mpumyi iramwishura iti: “Ndagomba guhumuka, Mwigisha.”
[52] Yesu arayibwira ati: “Genda, ukwizera kwawe kuragukijije.” Aca arahumuka, amukurikira ku nzira.