[1] Bafata hakurya y'ikiyaga mu gihugu c'Abageraseni.
[2] Avuye mu bwato, umuntu yinjiwemwo n'impwemu ihumanye ava mu masenga y'imva, aca aramusanganira.
[3] Yaba muri ayo masenga, ntihagira uwuba akibona ico ashobora kumubohesha, n'iyo woba umunyororo;
[4] kuko bamubohesheje iminyororo ku maguru no ku maboko kenshi, iyo amaboko akayicagagura, iyo amaguru akayivutagura. Ntihagira umuntu afise inkomezi zomustinda.
[5] Maze imisi yose ku murango no mw'ijoro yama muri ayo masenga no ku misozi, ataka, yikebesha amabuye.
[6] Abonye Yesu akiri kure, arirukanga, arunama,
[7] asemerera n'ijwi rirenga ati: “Duhuriye hehe ga Yesu Mwana w'Imana Isumbavyose? Ndakurahiye Imana, ntubabaze ushinyagurira.”
[8] Kuko yari amubariye ati: “Va mu muntu, wa mpwemu ihumanye.”
[9] Aramubaza ati: “Witwa nde?” Aramwishura ati: “Gitero ni ryo zina ryanje kuko turi benshi.”
[10] Aramwinginga cane ngo ntazirukane muri ico gihugu.
[11] Kandi kuri uwo musozi hari ubusho bwinshi bw'ingurube zirisha;
[12] izo mpwemu mbi ziramwinginga ziti: “Turungike muri ziriya ngurube, tuzinjiremwo.”
[13] Arazemerera. Izo mpwemu zihumanye zimusokorotsemwo, zinjira muri nya ngurube, umukuku wirukira ku gatembwe, zisuka mu kiyaga, zari nk'ibihumbi bibiri, amazi araziniga.
[14] Abaziragira barahunga, babivuga mu gisagara no mu misozi; na bo baza kuraba ibibaye ivyo ari vyo.
[15] Bashika aho Yesu ari, basanga uwari yinjiwemwo n'abadayimoni yicaye, yambaye, ubwenge bwagarutse, umwe nyene yari yinjiwemwo na ca gitero; baratinya.
[16] Ababibonye babadondera ivyo uwari yinjiwemwo n'abadayimoni n'ivyo ingurube.
[17] Batangura kwinginga Yesu ngo ave mu ntara yabo.
[18] Ariko aratambukira mu bwato, uwari yinjiwemwo n'abadayimoni aramwinginga ngo agume kuri we.
[19] Ntiyamukundira, ariko aramubarira ati: “Ja i muhira i wawe mu b'i wanyu, ubabarire ivyo Umwami Imana igukoreye vyose, kandi ingene ikugiriye ikigongwe.”
[20] Aragenda, atangura gukwiza i Dekapoli ivyo Yesu yamukoreye vyose, abantu bose baratangara.
[21] Nuko Yesu agenda mu bwato, asubira hakurya, ishengero ryinshi rikoranira kuri we; yari i ruhande y'ikiyaga.
[22] Haza umwe mu bakuru b'isengero ry'Abayuda, yitwa Yayiro, amubonye amwitembagaza imbere y'ibirenge,
[23] aramwinginga cane ati: “Akana kanje k'agakobwa kari ku mpfiro, ndakwinginze, ni uze se, umurambikeko ibiganza, akire, abeho.”
[24] Aragenda, ajana na we. Ishengero ryinshi riramukurikira rimubanda.
[25] Kandi umugore atakaza amaraso menshi yari abimaranye imyaka icumi n'ibiri,
[26] yababajwe cane n'abavuzi benshi bamumarisha ibintu vyiwe vyose abitangamwo ingemu, ntihagira ico bamumarira, mbere arushiriza kurwara;
[27] yumvise ivya Yesu, araza, aca hagati y'ishengero, amuturuka inyuma, akora ku mpuzu yiwe.
[28] Yari yibwiye ati: “N'iyo nokora ku mpuzu ziwe gusa, nokira.”
[29] Uwo mwanya isoko y'amaraso irakama, amenya mu mubiri wiwe yuko akize ico cago.
[30] Ako kanya Yesu yumva muri we ubushobozi bumuvamwo, ahindukira abandana n'ishengero, arababaza ati: “Ni nde akoze ku mpuzu zanje?”
[31] Abigishwa biwe baramwishura bati: “Ubone abantu bariko barakubanda, nawe ukagira ngo ni nde ankozeko?”
[32] Aberaguzamwo amaso, ngo abone uwumukozeko.
[33] Uwo mugore aratinya, ahinda agashitsi, kuko azi ikimubayeko, araza amwikubita imbere, amubarira ivyo ukuri vyose.
[34] Yesu aramubwira ati: “Mwana wanje, ukwizera kwawe kuragukijije, genda amahoro, ukire rwose icago cawe.”
[35] Akivuga, haza abavuye kwa wa mukuru w'isengero ry'Abayuda bati: “Wa mwana wawe aracikanye, uracagorera iki Umwigisha?”
[36] Ariko Yesu ntiyashira umutima kw'ijambo rivuzwe, abarira uwo mukuru w'isengero ry'Abayuda ati: “Ntutinye, wizere gusa.”
[37] Ntiyakundira uwundi muntu kujana na we, atari Petero, Yakobo na Yohana mwene nyina wa Yakobo.
[38] Bashitse ku nzu y'uwo mukuru w'isengero ry'Abayuda, asanga bariko barakoma induru barira baboroga cane.
[39] Yinjiye arababaza ati: “Ni igiki gitumye mukoma induru murira? Umwana ntahwereye, ariko arasinziriye.
[40] Baramutwenga bamushimanga. Arabakumira bose, ajana se w'umwana na nyina n'abari kumwe na we, yigira haruguru aho ikiziga kiri,
[41] afata ukuboko kw'ikiziga, arakibarira ati: “Talisa kumi;” bisobanurwa ngo Gakobwa, ndakubariye nti: “Vyuka.”
[42] Umukobwa aca avyuka uwo mwanya, aragendagenda, kuko yari amaze imyaka icumi n'ibiri avutse: baca baratangara cane.
[43] Arabihanikiriza cane, ngo ntihagire umuntu n'umwe abimenya, arababarira ngo bamugaburire.