[1] Bavukanyi, ivyo ingabire za Mpwemu, singomba ko mutabimenya.
[2] Murazi yuko mukiri injabuka mwakwegwa, mukaja ku bigirwamana bitazi kuvuga, nk'uko mwabikwegeweko.
[3] Ni co gituma ndabamenyesha yuko ata muntu avugishwa na Mpwemu w'Imana, avuga ati: “Yesu n'ikivume, kandi ata muntu ashobora kuvuga ati: 'Yesu n'Uhoraho, atabivugishijwe na Mpwemu Yera.'”
[4] Yamara hariho ingabire z'uburyo bwinshi, ariko Mpwemu n'umwe.
[5] Kandi hari amabango menshi, ariko Umwami ni umwe.
[6] Kandi hariho uburyo bwinshi bwo gukora, ariko Imana n'imwe, ikorera vyose muri bose.
[7] Yamara, umuntu wese ahabwa ikimwerekanako Mpwemu, kugira ngo bigire ikimazi.
[8] Kuko umwe aheshwa na Mpwemu ijambo ry'ubwenge, uwundi agaheshwa n'uwo Mpwemu ijambo ryo kumenya.
[9] Uwundi agaheshwa n'uwo Mpwemu ukwizera, uwundi agaheshwa n'uwo Mpwemu umwe ingabire zo gukiza indwara.
[10] Uwundi agahabwa gukora ibitangaza, uwundi agahabwa kuvugishwa n'Imana, uwundi agahabwa kurobanura impwemu, uwundi agahabwa kuvuga indimi nyinshi, uwundi agahabwa gusobanura indimi.
[11] Ariko ivyo vyose uwo Mpwemu umwe ni we abikorera muri bo, agabira umuntu wese uko agomba.
[12] Nk'uko umubiri ari umwe, ukagira ingingo nyinshi, kandi ingingo z'umubiri zose naho ari nyinshi ari umubiri umwe, ni ko na Kristo ari.
[13] Kuko muri Mpwemu umwe, twese ari ho twabatijwe ngo tube umubiri umwe, naho boba Abayuda canke Abagiriki, naho boba abakozi canke abidegemvya. Kandi twese twanyweshejwe Mpwemu umwe.
[14] Umubiri si urugingo rumwe, ariko ni nyinshi.
[15] Ikirenge covuga kiti: “Ko ntari ikiganza sindi uwo ku mubiri; ivyo ntivyotuma kitaba ico ku mubiri.”
[16] Kandi ugutwi kwovuga kuti: “Ko ntari ijisho, sindi uwo ku mubiri; ivyo ntivyotuma kutaba ukwo ku mubiri.”
[17] Iyo umubiri wose uba ijisho, kwumva kwobaye hehe? Iyo wose uba kwumva, kumoterwa kwobaye hehe?
[18] Ariko noneho Imana yashizeho ingingo z'umubiri, urugingo rwose aho yagomvye.
[19] Kandi iyo zose ziba urugingo rumwe, umubiri wobaye hehe?
[20] Ariko noneho, ingingo ni nyinshi, umubiri ukaba umwe.
[21] Ijisho ntiryoshobora kubarira ikiganza, ngo nta co umariye; canke umutwe kubarira ibirenge, ngo nta co mumariye.
[22] Ariko uretse ivyo, ingingo z'umubiri ziyumvirwa ko ari izo intege nke inyuma y'izindi, ni zo zitohara;
[23] kandi izo ku mubiri twiyumvira ko zidafise icubahiro, ni zo zirushiriza kuronka icubahiro; kandi ingingo zacu ziteye isoni ni zo zirushiriza gusharizwa.
[24] Yamara izidateye isoni ntizirinda kwambikwa. Ariko Imana yafatanije umubiri hamwe, urugingo rukenye icubahiro iruha icubahiro kirushiriza,
[25] kugira ngo umubiri ntiwireme ibice, ariko ingingo zibabarane kumwe.
[26] Kandi urugingo rumwe iyo rubabaye, ingingo zose zirababazanywa na rwo; canke iyo urugingo rumwe ruhawe icubahiro, ingingo zose zihimbaranwa na rwo.
[27] Namwe muri umubiri wa Kristo, kandi umuntu wese wo muri mwebwe ni urugingo rwawo.
[28] Kandi Imana yabanje gushira mw'ishengero bamwe baba intumwa, hanyuma aba kabiri ibashiraho kuba abavugishwa na yo, maze aba gatatu, ibashiraho kuba abigisha, yongera ishiraho abakora ibitangaza, maze ishiraho abahawe ingabire zo gukiza indwara, n'abahawe gufasha abandi, n'abahawe kurongora n'abahawe kuvuga indimi nyinshi.
[29] Mbega bose ni intumwa? Bose ni abavugishwa n'Imana? Bose n'abigisha? Bose bakora ibitangaza?
[30] Bose bafise ingabire zo gukiza indwara? Bose bavuga izindi ndimi? Bose basobanura indimi?
[31] Ariko mwifuze cane ingabire ziruta izindi. Kandi ndabereka inzira irushiriza kuba nziza.