[1] Genesaret qocha kuchuncho Jesús yachaykäsiptinmi Tayta Diospa wilakuyninta yachasishqanta wiyayta munar aska runakuna kichkiypa juntapäyarqan.
[2] Saychömi Jesús rikarqan ishkay büquikuna qocha kuchuncho kaykäyaqta. Say büquikunapita yarqurirmi pescaqkuna redninkunata taqshaykäyarqan.
[3] Saymi Simónpa büquinman Jesús wisarkur qocha kuchunpita mas ruriläman apananpaq nirqan. Apaskiptinnami büquiman jamaykur runakunata yachasirqan.
[4] Yachasiyta ushaskirnami Simónta nirqan: “Kananqa mas chawpi niraqmanna büquikita apaykur pescädukunata sariyämunaykipaq rednikita jitayay”.
[5] Sayno niptinmi Simón nirqan: “Taytay, warati pescaykarpis manami ni juklaylatapis sariyashkäsu. Imano kaptinpis nikämaptikiqa mä rednïkunata yapay jitayäshaq”.
[6] Sayno nishpan jitarmi redninpis rachinashqanyaq saysika pescädukunata sariyarqan.
[7] Saymi yanapäyänanpaq jukaq büquicho pescaq mayinkunata qemlakuyarqan. Chaykurmi ishkan büquikuna talpunäyashqanyaq pescädukunata winayarqan.
[8] Sayta rikaykurmi Simón Pedro Jesúspa nawpanman qonqurpakuykur nirqan: “Taytay, nawpäpita witikulay. Jusasapa runami kä”.
[9] Sayno nirqan saysika pescäduta sarishqanpita fiyupa mansakashpanmi. Saynölami paywan kaykaqkunapis
[10] y Zebedeupa surinkuna Santiaguwan Juanpis mansakash rikakuyarqan. Paykunami Simónpa pescaq mayinkuna kayarqan. Saymi Simónta Jesús nirqan: “Ama mansakaysu. Noqami yachasiyäshayki runakunatana pescayänaykipaq”.
[11] Sayno niptinmi büquinkunata sakiman jipiskir lapanta saycho kachariykuyashpan Jesúswan aywayarqan.
[12] Juk markacho Jesús kaykaptinmi leprawan fiyupa qeshyaykaq runa charqan. Jesústa rikaykurmi urkunpis pasaman töpashqanyaq qonqurpakuykur nirqan: “Taytay, voluntäniki kaptinqa aliyaykasilämay”.
[13] Sayno ruwakuptinmi Jesús yataykur nirqan: “Aliyash kanaykita munämi”. Sayno niptinmi jinan höra aliyaskirqan.
[14] Nirkurnami Jesús nirqan: “Aliyäsishqäta ama pitapis wilapankisu. Saypa trukanqa cüraman ayway aliyashqaykita rikashunaykipaq. Nirkur Moisés qelqashqancho nishqannöla purificakunaykipaq ofrendaykita templuman apay. Saynöpami aliyashqaykita musyayanqa”.
[15] “Ama wilakunkisu” nikaptinpis maysaychömi runakuna musyayarqan. Saymi saysika shuntakäyarqan yachasishqankunata wiyayänanpaq y qeshyaykashqanpitapis aliyäsinanpaq.
[16] Jesúsqa sunyaqninman aywaykurmi imaypis Tayta Diosta manakuq.
[17] Juk wayicho Jesús yachaykäsiptinmi saycho jamaraykäyarqan fariseukuna y ley yachasiqkunapis. Paykunami kayarqan Galileacho kaykaq markakunapita, Judea provinciapita y Jerusalénpitapis. Qeshyaqkunata aliyäsinanpaqmi Tayta Diospa munayninwan Jesús kaykarqan.
[18] Paralïticu runata kirmawan runakuna chaykasirmi imaykanöpapis Jesúspa nawpanman yaykasiyta munayarqan.
[19] Saysika runakuna kichkiräyaptinmi punkupa yaykasiyta kamäpakuyarqansu. Saymi wayi jananman wisarkasir qataraykashqanta kichariyashpan kirmantinta Jesúspa nawpanman uräsiyarqan.
[20] Say runakuna payman yärakuyashqanta musyarmi qeshyaykaq runata Jesús nirqan: “Lapan jusaykipita perdonashnami kaykanki”.
[21] Sayno niptinmi ley yachasiqkuna y fariseukuna yarpachakur niyarqan: “¡Pitaq kay runaqa Dios tukunanpaqqa! Tayta Dioslami jusalikuqkunataqa perdonan”.
[22] Sayno yarpaykäyashqanta musyarmi Jesús nirqan: “¿Imanirtaq sayno yarpaykäyanki?
[23] ¿Mayqantaq mas aja kaykan? ¿Runapa jusankunata perdonayku? ¿O qeshyaqta aliyäsiyku?
[24] Runapa Surin kay pasacho runakunata perdonananpaq munayyuqmi kaykan. Saytami kanan musyayanki”. Nirkurmi paralïticu runata nirqan: “¡Sharkuy! Kirmaykita apakurkur wayikipa aywakuy”.
[25] Sayno niptinmi lapan rikaraykäyaptin jinan höra aliyashna sharkurkurqan. Nirkurmi kirmanta apakurkur Tayta Diosta alabaraykar wayinpa aywakurqan.
[26] Sayta rikaykurmi runakuna kushikuyashpan Tayta Diosta alabayarqan. Pasaypa admirash rikakurmi niyarqan: “¡Pay rurashqantanöqa manami imaypis rikashkansisu!”
[27] Saypita aywakurmi Jesús rikarqan Leví jutiyuq runa impuestuta cobrar jamaraykaqta. Saymi nirqan: “Qatirämay”.
[28] Sayno niptinmi lapanta kachariykur Jesúswan aywakurqan.
[29] Saypitanami Jesúswan mikuyänanpaq wayincho banquëtita Leví rurasirqan. Paykunawanmi impuestuta cobraqkuna y wakin runakunapis mikuykäyarqan.
[30] Sayta rikaykurmi fariseukuna y ley yachasiqkuna jamurpäyashpan Jesúspa discïpulunkunata niyarqan: “¿Imanirtaq qamkuna impuestu cobraqkunawan y jusasapa runakunawanpis mikuyanki y upuyanki?”
[31] Saymi Jesús nirqan: “Sänu kaqkunaqa manami mëdicuta nistäyansu, sinöqa qeshyaykaqkunalami.
[32] Noqa manami jusaynaq runakunamansu shamushkä, saypa trukanqa jusalikuyta wanakuyänanpaq jusasapa runakunamanmi”.
[33] Saypitanami Jesústa tapuyarqan: “Juanpa discïpulunkuna y fariseukunapa discïpulunkunaqa Tayta Diosta manakur imaypis ayunayanmi. Qampa discïpuluykikunaqa ¿imanirtaq ayunayansu?”
[34] Saymi Jesús nirqan: “Casarakuq maqta kaykaptinqa casaray fiestaman qayasishqan invitädunkuna ¿ayunayanmansuraq?
[35] Casarakuq maqtata wanusiyaptinmi isanqa ayunayanqa”.
[36] Saymi Jesús mastapis nirqan: “Manami pipis mushuq mödanata rachinsu makwa mödanata shilpananpaq. Sayno rurarqa mushuq mödanatapis perdisinmi. Saynöpis mushuq mödanapita rachishqan ratashqa makwa mödanacho manami kamaransu.
[37] “Saynöpis manami pipis sayraq rurash vïnuta makwa urpumanqa winansu. Winaptinqa vïnu poqur laksiriykunqami. Sayno kaptinqa vïnupis y urpupis ushakanqami.
[38] Saymi sayraq rurash vïnuta sänu urpuman winansi. [Sayno rurashqaqa vïnupis manami jichanqasu ni urpupis ushakanqasu.]
[39] “Saynöpis manami pipis poqush vïnuta yawarkur sayraq rurash vïnuta upuyta munansu ‘poqush vïnuqa masmi mishkin’ nir”.