[1] Imaypis mana ajayaypa Tayta Diosta manakuyänanpaq discïpulunkunata Jesús imamanpis tinkusiypa yachasirmi
[2] nirqan: “Juk markachöshi Tayta Diosta mana mansapakuq ni runakunatapis mana respitaq juez kanaq.
[3] Say markachöshi juk viüda warmipis tänaq. Payshi say juezman kutin kutin aywar ninaq: ‘Quejakushqäta arreglaykalämay, taytay’.
[4] Sayno aywaptinpis juez manashi cäsunaqsu. Nirkurnashi yarpachakur shonqulancho ninaq: ‘Diosta mana mansapakurpis ni runakunata mana respitarpis
[5] kay warmipa demandunta jukla arreglashaq. Mana arreglaptïqa umäta nanäsirmi imay hörapis kutiykämunqa’ ”.
[6] Sayno wilaparkurmi Señor Jesucristo nirqan: “Mana ali juez imata nishqantapis shumaq tantiyakuyay.
[7] ¿Manasuraq Tayta Diospis akrashqankunata yanapanqa paqasta junaqta manakuyaptin? Mana shuyaräsiylapami yanapanqa.
[8] Noqa kaynömi nï: Manakuq kaqtaqa Tayta Dios mana shuyaräsiylapami yanapanqa. Sayno kaykaptinpis Runapa Surin kay pasaman kutimur ¿tarinqasuraq pilapis Tayta Diosman yärakuykaqta?”
[9] Runa mayinta manakaqman churaq runakunapaqmi Jesús tinkusiypa wilapar nirqan:
[10] “Ishkay runashi Diosta manakuyänanpaq templuman aywayänaq. Jukaqshi fariseo kanaq y jukaqnashi impuestu cobraq kanaq.
[11] Sayshi fariseo kaqqa ichirkur Tayta Diosta manakur ninaq: ‘Tayta Dios, qamta agradëcikü wakin runakunano mana kashqäpitami. Paykunaqa suwa, jusasapa y majanta jarukuqmi kakuyan. Noqa manami taqay impuestu cobraq runanösu kä.
[12] Ayunäpis semänacho ishkay kutimi. Saynölami lapan gänashqäpita imaypis templuman diezmüta apä’.
[13] “Impuestu cobraq kaqshi isanqa karulacho ichikuykur jana pasaman rikäriylapis rikärinaqsu. Saypa trukanqa fiyupa lakikur makinta soqpakurkurshi ninaq: ‘Kuyapaykalämay, Tayta Dios. Noqaqa jusasapa runami kä’.
[14] “Noqa kaynömi nï: Impuestu cobraq runami jusanpita perdonashna wayinman kutirqan. Fariseo kaqtami isanqa Tayta Dios perdonarqansu. Runa tukuqkunaqa penqayman churashqami kayanqa. Qollmi shonqu kaqkunami isanqa aliman churash kayanqa”.
[15] Saypitanami wamrakunata Jesús kaqman apayarqan umankunata yataykur Tayta Diosta manakunanpaq. Sayta rikarmi discïpulunkuna michäyarqan.
[16] Saymi wamrakunata qayaykur discïpulunkunata Jesús nirqan: “Wamrakunata apakayämunanta ama michäyaysu. Wamrano kaqkunapaqmi Tayta Dios mandaykashqan kaykan.
[17] Rasunpami nï: Pipis Tayta Dios mandaykashqanta wamrano mana chaskikurqa manami pay mandaykashqanman yaykunqasu”.
[18] Juk mandaq runami Jesústa nirqan: “ Rabí, ali runami kanki. ¿Imatataq ruräman mana ushakaq kawayta tarinäpaq?”
[19] Saymi Jesús nirqan: “¿Imanirtaq ali runa kashqäta nimanki? Tayta Dioslami aliqa.
[20] Musyankimi mandamientukuna nishqanta: ‘Majaykita ama jarukunkisu. Runa mayikita ama wanusinkisu. Ama suwakunkisu. Manakaqta pitapis ama tumpankisu. Mamaykitapis taytaykitapis ali rikanki’ ”.
[21] Sayno niptinmi say runa nirqan: “Saykunataqa wamra kashqäpita pasami lapanta cumplishkä”.
[22] Saymi Jesús nirqan: “Kaykanraqmi cumplinaykipaq. Lapan imaykaykikunatapis rantikuykur say qellayta muchuqkunata aypuy. Sayno ruraptikiqa jana pasachömi riquëzayki kanqa. Nirkur qatirämay”.
[23] Sayno niptinmi pasaypa rïcu kar say runa lakikurqan.
[24] Lakish kaykaqta rikarmi Jesús nirqan: “¡Pasaypa ajami kaykan rïcu runakuna Tayta Dios mandaykashqanman yaykuyänanpaq!
[25] Rïcu runa Tayta Dios mandaykashqanman yaykushqanpitaqa mas raslami camëllupis awja uchkupa ushturinman”.
[26] Sayno niqta wiyaqkunami Jesústa tapuyarqan: “Sayno kaptinqa ¿piraq salvakunman?”
[27] Niyaptin Jesús nirqan: “Runakunapaq aja karpis Tayta Diospaqqa manami ajasu”.
[28] Saymi Pedro nirqan: “Noqakuna lapan imaykäkunatapis kachaykurmi qamta qatiraykäyä, taytay”.
[29] Sayno niptinmi Jesús nirqan: “Rasunpami nï: Pipis wayinta, mamanta, taytanta, wawqinkunata, paninkunata, warminta o surinkunata Tayta Dios mandaykashqan rayku kacharirqa
[30] kay vïdacho mas askatami chaskinqa. Saynölami juk vïdachöpis mana ushakaq kawayta tarinqa”.
[31] Chunka ishkay discïpulunkunata qayaykurmi Jesús nirqan: “Jerusalénman chänansipaq walkalanami pishin. Saychömi profëtakuna qelqayashqannöla Runapa Surinta lapanpis päsanqa.
[32] Mana Israel autoridäkunapa makinmanmi churayanqa. Paykunami asipäyanqa, ashliyanqa y toqapäyanqa.
[33] Astarkurmi wanusiyanqa. Sayno kaptinpis kimsa junaqtaqa kawarimunqami”.
[34] Sayno niptin discïpulunkuna manami tantiyayarqansu imapita parlaykashqantapis.
[35] Saypitanami Jericó markaman Jesús yaykuykaptinna juk qapra runa caridäta manakur nänicho jamaraykarqan.
[36] Aska runakuna aywaykäyaqta mayarmi ima päsaykashqantapis tapukurqan.
[37] Saymi wilayarqan: “Nazaretpita kaq Jesúsmi päsaykan” nir.
[38] Sayno niyaptinmi qayakur nirqan: “¡ Davidpa Surin Jesús, kuyapaykalämay!”
[39] Sayno niptinmi puntanta aywaykaqkuna olqutupäyarqan upälakunanpaq. Olqutupäyaptinpis masraqmi qayakur nirqan: “¡Davidpa Surin, kuyapaykalämay ari!”
[40] Saymi Jesús ichiykur say qaprata qayasirqan. Nawpanman chaykasiyaptinnami tapur nirqan:
[41] “¿Imacho yanapänätataq munanki?” Saymi qapra nirqan: “¡Nawï rikanantami munä, tayta!”
[42] Niptinmi Jesús nirqan: “¡Rikayna! Yärakamashqaykipitami nawiki rikanqana”.
[43] Sayno niptinmi jinan höra nawin kichakaskiptin Tayta Diosta alabaraykar Jesúspa qepanpa aywarqan. Sayta rikaykurmi lapan runakunapis Tayta Diosta alabayarqan.