[1] Saypitanami Jericó markapa Jesús päsaykarqan.
[2] Say markachömi Zaqueo jutiyuq rïcu runa tarqan. Paymi impuestu cobraqkunapa mandaqnin karqan.
[3] Say runami imanöpapis Jesústa reqiyta munarqan. Isanqa takshala karmi aska runakunapa chawpincho aywaptin rikayta kamäpakurqansu.
[4] Saymi cörrila nawpaskir sicómoro jachaman yarkuskirqan Jesús päsaqta rikananpaq.
[5] Saypa päsaykashqanchömi Zaqueuta rikärir Jesús nirqan: “Zaqueo, jukla yarpamuy. Posädasimänaykipaqmi wayikiman aywaykä”.
[6] Sayno niptinmi Zaqueo jukla yarpamur wayinman Jesústa kushish pusharqan.
[7] Sayta rikaykurmi runakuna Jesústa jamurar niyarqan: “¡Imanirtaq jusasapa runapa wayincho posädakun!”
[8] Wayinchönami Zaqueo ichirkur Jesústa nirqan: “Lapan imaykäkunapitapis pulantami muchuqkunata qoykushaq, taytay. Pipa imantapis qechush karqa chusku kuti mastami kutisishaq”.
[9] Sayno niptinmi Jesús nirqan: “Kananmi kay wayiman salvación chämush. Kay runapis rasunpaypami Abrahampa ayllun kaykan.
[10] Oqrakashkunata ashir salvananpaqmi Runapa Surin shamush”.
[11] Jesús sayno parlashqanta wiyar y Jerusalénman chänanpaqna kaptinmi runakuna yarpäyarqan Tayta Dios mandaykashqan qalaykunanpaqna kashqanta. Sayno yarpäyaptinmi Jesús tinkusiypa yachasir
[12] nirqan: “Juk rïcu runashi juklä nacionman aywanaq rey kananpaq cargu chaskimuq.
[13] Manaraq aywarshi chunka ashmayninkunata qayaykasir juknintapis juknintapis aska qellayta aypur ninaq: ‘Kutimushqäyaq kay qellaywan aruykäyanki’.
[14] Sayno nir aywaskiptinnashi marka mayinkuna payta chikiyashpan qepanta comisionta kachayänaq cargu qoqta niyänanpaq: ‘Manami say runa mandayämaqnï rey kananta munayäsu’.
[15] “Sayno niyaptinpis rey kananpaq carguta chaskimunäshi. Saypita markanman kutiykurnashi qellayninpa wachayninta musyananpaq qellaynin chaskiq ashmayninkunata qayasinaq.
[16] Sayshi punta chaskiq kaq chaykur ninaq: ‘Taytay, qellayniki chunka kuti masmi mirash’.
[17] “Sayshi patronnin ninaq: ‘Ali ashmaymi qam kanki. Walkalapitapis qellaynïta mirasishqaykipitami chunka markapa mandaqnin kanaykipaq churashayki’.
[18] “Jukaqpis chaykurshi ninaq: ‘Taytay, qellayniki pisqa kuti masmi mirash’.
[19] “Sayshi paytapis ninaq: ‘Pisqa markapa mandaqnin kanaykipaqmi qamtapis churashayki’.
[20] “Jukaq ashmayninnashi chaykur ninaq: ‘Kaychömi kaykan qellayniki, taytay. Qepinawan qepirkurmi churaykurqä.
[21] Qamqa mana churashqaykipitami shuntanki y mana murushqaykipitami cosechanki. Sayno yaqa kashqaykita musyarmi mansapakur churaykurqä’.
[22] “Sayshi patronnin ninaq: ‘¡Mana yärakuypaq ashmaymi kanki! Kikikipa shimilaykiwanmi condenakuykanki. Yaqa kashqäta musyaykar, mana churashqäpita jipishqäta musyaykar y mana murushqäpita cosechashqätapis musyaykarqa
[23] ¿imanirtaq qellaynïta banculamanpis churarqaykisu kutimur mirashtana shuntakunäpaq?’
[24] Nirkurnashi saycho kaykaq runakunata ninaq: ‘¡Sararashqan qellaynïta qechuskir chunka kuti mas mirasiq kaqta qoykuyay!’
[25] Sayno niptinshi niyänaq: ‘Taytay, payqa maynami chunka kuti masta sararaykan’.
[26] “Niyaptinshi patronnin ninaq: ‘Yärakuypaq kaqtaqa mastami kamaripanqa. Mana yärakuypaq kaqtami isanqa sararashlantapis qechunqa.
[27] Rey kanäta mana munar chikimaqkunataqa ¡kayman apaykamur nawpächo waqranta apasiyay!’ ”
[28] Sayno wilaparkurmi Jerusalénpa Jesús aywarqan.
[29] Olivos lömacho Betfagé y Betania markakunaman chaykarnami ishkay discïpulunkunata kachar
[30] nirqan: “Taqay markaman aywayay. Chäyashpaykimi pipis manaraq loqakushqan ashnu wataraykaqta tariyanki. Say ashnuta paskarir apayämuy.
[31] Saycho pipis ‘¿imanirtaq ashnuta paskaykäyanki?’ niyäshuptikiqa ‘Señor Jesúsmi munaykan’ niyanki”.
[32] Saymi discïpulunkuna aywar Jesús nishqannöla tariyarqan.
[33] Ashnuta paskaykäyaptinmi ämunkuna tapuyarqan: “¿Imanirtaq ashnüta paskaykäyanki?” nir.
[34] Sayno niptinmi niyarqan: “Señor Jesúsmi munaykan”.
[35] Ashnuta chaykasir punchunkunata karunaparkuyaptinmi Jesús loqakurqan.
[36] Loqash aywaptinnami runakuna kushikur punchunkunata näniman mashtayarqan.
[37] Olivos lömata urämunanpaqna kaykaptinmi milagrukunata rikayashqanpita kushikur saysika discïpulunkuna Tayta Diosta lapan shonqunwan alabar
[38] niyarqan: “¡Tayta Diospa jutincho shamuq rey alabash kaykuläsun! ¡Tayta Dioswan alina kawashun! ¡Jana pasachöpis alabash kaykuläsun!”
[39] Saymi runakunapa chawpincho aywaq wakin fariseukuna niyarqan: “ Rabí, qatiräshuqnikikuna upälakuyänanpaq olqutupay”.
[40] Sayno niyaptinmi Jesús nirqan: “Noqa kaynömi nï: Paykuna upälakuyaptinqa rumikunapis alabayanqami”.
[41] Jerusalénman chaykashqanchömi markata rikärishpan Jesús waqar
[42] nirqan: “¡Ima aliraq kaykunman Tayta Dioswan ali kawayänaykipaq kaqta kanan junaqlapis tantiyakuyaptiki! ¡Sayno kaykaptinpis manami tantiyayankisu!
[43] Saymi nakayänaykipaq kaq junaqkuna chämunqa. Say junaqkunami marka murällaykikuna waqtanman alpata qotur chikishuqnikikuna jiruruypa atacayäshunki.
[44] Wayikunatapis juchusirmi wamraykikunatawan wanusiyäshunki. Manami ni juk rumilapis perqaranqanasu. Sayno kanqa Tayta Dios watukaykäshuptikipis mana chaskikuyashqaykipitami”.
[45] Saypitanami templu patiuman Jesús yaykuykur saycho rantikuykaqkunata [y rantiykaqkunata] qarqur
[46] nirqan: “Tayta Diospa palabrancho kaynömi qelqaraykan: ‘Wayïqa kanqa runakuna manakayämänanpaqmi’. Sayno nikaptinpis qamkunaqa suwakunapa machayninmanmi tikrasiyashkanki”.
[47] Nirkurnami templu patiucho waran waran Jesús yachasirqan. Mandaq cürakuna, ley yachasiqkuna y autoridäkunanami imanöpapis Jesústa wanusiyta munayarqan.
[48] Isanqa Jesús yachasishqanta lapan runakuna kushish chaskikuyaptinmi ima ruraytapis kamäpakuyarqansu.