[1] Nirkurnami discïpulunkunata Jesús nirqan: “Runa mayinta jusalikasiqkuna imaypis kayanqami. ¡Say runakunaqa pasaypa kuyapaypaqmi kayanqa!
[2] Juk wamralatapis jusalikasiptinqa mas alimi kanman mulinu rumita kunkanman shequparkur lamarman qarpuriyaptinpis.
[3] ¡Sayno kaykaptinqa pitapis ama jusalikasiyaysu! “Runa mayiki rabyanäsishuptikiqa lutanta ruraykashqanta tantiyasinki. Tantiyasiptiki chaskikuptinqa perdonanki.
[4] Juk junaqlacho qanchis kuti rabyanäsishuptikipis qanchis kuti ‘perdonaykalämay’ nishuptikiqa perdonanki”.
[5] Sayno niptinmi apostolninkuna Señor Jesústa niyarqan: “Yanapaykayämay mas yärakuyänäpaq”.
[6] Saymi Señor Jesús nirqan: “Ñäbuspa murunno ichiklapis yärakuyniki kaptinqa kay sicómoro jachata ‘jaqwapita lukikaskir lamarman jawikamuy’ niyaptikipis nishqaykinömi kanman”.
[7] “Mayqaykipapis ashmayniki arushqanpita o misikushqanpita chämuptin manami ‘jamaykulay mikunaykipaq’ niyankisu.
[8] Saypa trukanqa niyanki: ‘Yanukamuyraq qaramänaykipaq. Mikuskiptïraqmi qam mikunki’.
[9] Mandashqaykita ruraykaptinpis manami ashmaynikita päkilä niyankisu.
[10] “Qamkunapis Tayta Dios niyäshushqaykita rurayashpayki niyay: ‘Noqansiqa Diospa ashmaylan kar nimashlansitami ruraykansi’ ”.
[11] Jerusalénpa aywarmi Samaria y Galilea kuchulanpa Jesús päsarqan.
[12] Taksha markaman chänanpaq kaykaptinmi leprawan qeshyaykaq chunka runakuna tinkupäyänanpaq yarqayämurqan. Paykunami karulapitana
[13] qayakur niyarqan: “¡Tayta Jesús, kuyapaykayälämay!”
[14] Saymi Jesús rikärir nirqan: “Rikayäshunaykipaq cürakunaman aywayay”. Sayno niptinmi aywaykäyashlanchöna kachakaskiyarqan.
[15] Saymi kachakashqanta tantiyaskir juk runa Tayta Diosta alabaraykar Jesús kaqman kutirqan.
[16] Chaykurmi urkunpis pasaman töpashqanyaq Jesúspa puntanman qonqurpakuykur nirqan: “¡Päkilä, taytay!” Say runaqa Samariapitami karqan.
[17] Saymi Jesús nirqan: “Aliyaqkunaqa ¿manaku chunkaq kayarqan? ¿Maytaq wakin kaqqa?
[18] Kay jäpa runalami Tayta Diosta agradëcikur kutimush”.
[19] Nirkurmi say runata nirqan: “Kananqa sharkur aywakuyna. Yärakamashqaykipitami Tayta Dios kachakäsishushkanki”.
[20] Juk kutimi fariseukuna Jesústa tapur niyarqan: “Tayta Dios mandaykashqan ¿imaytaq chämunqa?” nir. Sayno tapuyaptinmi nirqan: “Tayta Dios mandaykashqan chämunanpaqqa manami ima señaltapis rikayankisu.
[21] Manami pipis ninqasu: ‘Kaychömi kaykan, wakchömi kaykan’. Tayta Dios mandaykashqanqa qamkuna kaqchönami kaykan”.
[22] Saypitanami discïpulunkunata nirqan: “Shamuq watakunachömi Runapa Surin juk junaqlapis mandaq kashqanta rikayta munayanki. Mayjina rikayta munarpis manami rikayankisu.
[23] ‘Kaychömi kaykan, wakchömi kaykan’ niyäshuptikipis ama cäsuyankisu ni rikaqpis aywayankisu.
[24] Elqukuptin ciëlupa juk kuchunpita jukaq kuchunyaq asikyashqanta rikayashqannömi Runapa Surin kutimuptin lapanpis rikayanqa.
[25] Sayno manaraq kaptinmi kanan wisan runakuna payta chikir seqaypa nakasiyanqa.
[26] “Noé kawashqan wisan runakuna kawayashqannömi Runapa Surin shamushqan wisanpis kawaykäyanqa.
[27] Arcaman Noé yaykushqan junaqyaqmi runakuna mikur, upyar y majasakar kaykäyarqan. Sayno kaykäyaptinmi diluviu shamur lapan runakunata ushakäsirqan.
[28] “Saynölami Lot kawashqan wisanpis runakuna mikur, upyar, rantir, rantikur, murupakur y wayitapis sharkasir kaykäyarqan.
[29] Sodoma markapita Lot yarqushqan junaqmi azufriyuq nina ciëlupita tamyamur lapan runakunata ushakäsirqan.
[30] Saynölami kanqa Runapa Surin kutimushqan junaqpis.
[31] “Say junaqqa wayi janancho kaykaqkuna imankunata jorquyänanpaqpis ama wayinman yaykuyäsunsu. Chakracho kaykaqkunapis wayinman amana kutiyäsunsu.
[32] ¡Yarpäyay Lotpa warminta ima päsashqantapis!
[33] Vïdanta salvayta munaqkunaqa vïdanta oqrayanqami. Vïdanta oqraqkunami isanqa vïdanta salvayanqa.
[34] “Noqa kaynömi nï: Say sakaymi juk cämalacho ishkaq punuykaqpita jukaqta pushakunqa y jukaqta kachaykunqa.
[35] Maraycho ishkaq warmikuna aqakuykaqpitami jukaqta pushakunqa y jukaqta kachaykunqa.
[36] [Chakracho ishkaq runakuna aruykaqpitami jukaqta pushakunqa y jukaqta kachaykunqa]”.
[37] Sayno niptinmi tapur niyarqan: “¿Maychötaq sayqa kanqa, taytay?” Saymi Jesús nirqan: “Maychöpis wanushkuna jitaraykäyashqanmanmi wiskurkuna juntakäyanqa”.