[1] Saypitanami qanchis chunka ishkay (72) discïpulunkunata akraykur Señor Jesús ishkaq ishkaq kacharqan pay chänanpaq kaq markakunaman.
[2] Kacharmi nirqan: “Cosëcha shuntaypaq kaykaqnömi saysika runakuna Tayta Diospa wilakuyninta chaskikuyänanpaq kaykäyan. Sayno kaptinpis walkaqlami wilakuqkuna kaykäyan. Tayta Diosta manakuyay wilakuqkunata kachananpaq”.
[3] “Kanan wilakuq aywayay. Löbukunaman uyshakunata qaykuqnömi qamkunata kachaykä.
[4] Ama apayankisu qellaynikikunata, qepikikunata ni lanqikikunatapis. Cuidätaq nänicho piwanpis parlar shukiräkuyankiman.
[5] “Pipa wayinmanpis charqa niyanki: ‘Jawka kaway qamkunacho kaykuläsun’.
[6] Ali chaskiyäshuptikiqa niyashqaykinömi ali kaway kanqa. Mana chaskiyäshuptikimi isanqa ali kaway kanqasu.
[7] Wayin wayinqa ama puriyankisu, saypa trukanqa chaskishuqnikikunapa wayilancho posädaräyanki. Qarayäshushqaykita mikuyanki y upuyanki. Arupakuq runa päguta chaskinanpaq derëchun kashqannömi qamkunapapis qarayäshunaykipaq derëchuykikuna kaykan.
[8] “May markamanpis chäyaptiki chaskikuyäshushpayki qarayäshushqaykita mikuyanki.
[9] Say markacho qeshyaykaqkunata aliyäsir niyanki: ‘¡Tayta Dios mandaykashqan chämushnami!’
[10] May markachöpis mana chaskiyäshuptikiqa cälliman yarqurir niyanki:
[11] ‘Jusayuq kayashqaykita musyayänaykipaqmi markaykikunapa polvun chakïkunacho kaykaqtapis tapshiyä. Ima kaptinpis musyayay Tayta Dios mandaykashqan chämushqanta’.
[12] “Noqa kaynömi nï: Sodoma runakunata castigashqanpitapis peormi juiciu final junaqcho say runakunata Tayta Dios castiganqa.
[13] “¡Wawalaw, Corazín runakuna! ¡Wawalaw, Betsaida runakuna! Markaykikunacho milagrukunata rurashqäno Tiro markacho y Sidón markacho milagrukunata rurash kaptïqa maynami jusalikuykunata wanakuyashpan qachqa mödanata jatikurkur uchpa janancho jamaräyanman karqan.
[14] Saymi Tiro y Sidón runakunata castigashqanpitapis peor juiciu finalcho Tayta Dios castigayäshunki.
[15] Capernaúm runakuna, ¿jana pasaman chäyänaykipaq kashqantaku yarpaykäyanki? Qamkunaqa Hadesman qaykushqami kayanki”.
[16] Sayno nirkushpanmi discïpulunkunata nirqan: “Qamkuna wilakuyashqaykita chaskikurqa noqatami chaskikayäman. Qamkunata mana chaskikuyäshushpaykiqa noqatapis manami chaskikayämansu. Noqata mana chaskikayämarqa kachamaqnïtapis manami chaskikuyansu”.
[17] Qanchis chunka ishkay (72) kachashqan discïpulunkuna kushish kutirmi Jesústa wilar niyarqan: “Jutikicho qarquyaptï ¡ supaykunapis wiyakayämashqami, taytay!”
[18] Saymi Jesús nirqan: “Noqa rikashkämi jana pasapita maqakuynöraq Satanás jeqamuqta.
[19] Qamkunatami munaynïta qoshkä culebrakunata y alacrankunata jaruyänaykipaq y Satanás imata ruraptinpis vinciyänaykipaq. Satanásta ichipäyaptikipis manami imapis päsayäshunkisu.
[20] Supaykuna wiyakuyäshushqaykipita kushikurpis jana pasacho jutikikuna qelqaraykashqanpita mas kushikuyay”.
[21] Saychömi Espíritu Santupa munayninwan kushikushpan Tayta Diosta manakur Jesús nirqan: “Jana pasacho y kay pasacho munayyuq Papä, qamtami alabä. Manami yachaq tukuqkunatasu yarpaykashqaykikunata musyasishkanki, saypa trukanqa wamrano kaqkunalatami. Sayno kanantami munashkanki, Papä”.
[22] Nirkurnami saycho kaykaq runakunata nirqan: “Taytämi lapantapis munaynïman churamush. Surin kashqäta paylami musyan. Saynöpis noqalami musyä Taytä kashqanta. Saymi noqa tantiyasishqä kaqkunala Taytä imano kashqantapis musyayan”.
[23] Saypitanami discïpulunkunalata nirqan: “Kanan päsaykashqankunata rikarmi kushish kaykäyanki.
[24] Noqa kaynömi nï: Unay profëtakunapis y reykunapis rikayashqaykita rikayta munarpis manami rikayarqansu. Wiyayashqaykita wiyayta munarpis manami wiyayarqansu”.
[25] Juk kutichömi Jesús yachashqanta o mana yachashqantapis musyayta munar ley yachasikuq runa tapurqan: “ Rabí, ¿imatataq ruräman mana ushakaq kawayta tarinäpaq?” nir.
[26] Niptinmi nirqan: “¿Ima nikantaq Tayta Diospa leynincho? Liyir ¿imatataq tantiyanki?”
[27] Saymi say runa nirqan: “Tayta Diospa leynincho kaynömi nikan: ‘Tayta Diosta kuyanki lapan shonquykiwan, lapan voluntänikiwan, lapan kalpaykiwan y lapan yarpaynikiwan. Runa mayikitapis kikiki kuyakushqaykino kuyanki’ ”.
[28] Niptinmi Jesús nirqan: “Alitami nishkanki. Say nishqaykita rurarqa mana ushakaq kawaytami tarinki”.
[29] Saymi say runa yachaq tukushpan tapur nirqan: “¿Pitaq say runa mayïqa?”
[30] Sayno tapuptinmi Jesús wilapar nirqan: “Juk runashi Jerusalénpita Jericó markaman aywaykänaq. Aywaykaptinshi asaltantikuna fiyupa maqarkur qepinta y jatirashqan mödananta qechuyänaq. Nirkurshi wanunaykaqta kachaskir aywakuyänaq.
[31] “Say nänipashi juk cüra päsaykänaq. Say runata rikaykarpis mana rikaq tukushpanshi päsakunaq.
[32] Saynölashi levitapis say runa jitaraykashqan kaqman chänaq. Paypis mana rikaq tukushpanshi päsakunaq.
[33] “Paykunapa qepantanashi Samaria runapis chänaq. Payshi isanqa jitaraykaqta tariykur kuyapänaq.
[34] Sayshi aceitiwan y vïnuwan jampiykur träpukunawan watapänaq. Nirkurnashi ashnunman loqarkasir posädakuna wayiman apaykur shumaq jampinaq.
[35] Waraynin aywakurnashi ishkay junaq jornalpa chaninta pägar wayiyuqta ninaq: ‘Qeshyaqnïta rikaykälanki, taytay. Masta gastaptikipis kutimurnami pägaläshayki’ ”.
[36] Sayno wilaparkurmi Jesús tapurqan: “Say kimsan runakunapita ¿mayqan kaqtaq runa mayinta kuyaparqan?”
[37] Niptinmi nirqan: “Samaria runami, taytay”. Saynami Jesús nirqan: “Kanan qampis say runanöla runa mayikita kuyapay”.
[38] Saypita discïpulunkunawan Jesús aywarmi juk taksha markaman charqan. Saychömi Marta jutiyuq warmi wayinman posädasirqan.
[39] Martapa nananmi karqan María. Paymi Jesús yachasishqanta wiyar nawpancho jamaraykarqan.
[40] Martami isanqa wayicho aska rurayninkunata ruraykarqan. Saymi Jesúsman witiykur nirqan: “Taytay, ¿imanirtaq nanä saycho jamaräkun japalä nakaykaptï? ¡Yanapämänanpaq niykulay!”
[41] Saymi Señor Jesús nirqan: “Ä Marta, Marta, ruraynikikunalaman umayki churakashqami kaykanki.
[42] Lapanpitapis juklaylami mas ali kaykan. Saytami nanayki Maríaqa akrash. Pay yachakushqantaqa manami pipis qechunqasu”.