[1] Saypitanami juk jamay junaqcho Jesús aywarqan mandaq fariseupa wayinman mikuq. Saycho kaykaq runakunami Jesústa rikaraykäyarqan “mä imatashi ruranqa” niyashpan.
[2] Intëru cuerpun jakapäkuykaq runata Jesús rikarmi
[3] ley yachasiqkunata y fariseukunata tapurqan: “Qeshyaq runata jamay junaqcho ¿aliyäsishwanku o manaku?” nir.
[4] Sayno niptinmi paykunaqa imatapis parlakuyarqansu. Saymi qeshyaykaq runata Jesús yataykur aliyäsishpan nirqan: “Kananqa wayikipana aywakuy”.
[5] Nirkurmi say runakunata nirqan: “Mayqaykipapis wamrayki o töruyki pözuman jeqaptin jamay junaq kaykaptinpis ¿manaku jinan höra jorquq aywayanki?”
[6] Sayno niptin manami imata parlakuytapis kamäpakuyarqansu.
[7] Qayasishqan runakuna jamakuyänanpaq punta puntamanraq aywaykaqta rikaykurmi Jesús nirqan:
[8] “Casaray fiestaman qayasiyäshuptiki punta puntamanqa ama jamakuyankisu. Capazmi qamkunapita mas respitädu runata qayasish kanman.
[9] Saycho jamayaptikiqa qayasiyäshuqnikimi niyäshunki: ‘Pay jamakunanpaq witikuy’. Sayno niyäshuptikimi penqaytukush qepaman aywar jamakuyanki.
[10] Saypa trukanqa fiestaman qayasiyäshuptiki qepalaman jamakuyanki. Saymi qayasishuqniki shamur niyäshunki: ‘Amïgu, mas puntaman päsakalämuy’. Sayno jamasiyäshuptikimi qamwan jamakuqkuna respitayäshunki.
[11] Runa tukuqkunaqa penqayman churashqami kayanqa. Qollmi shonqu kaqkunami isanqa aliman churash kayanqa”.
[12] Nirkurmi wayinman pushaq fariseutapis Jesús nirqan: “Mikuyänaykipaq pitapis qayasirqa ama qayasinkisu kuyanakuyashlaykita, wawqikikunalata, aylluykikunalata ni rïcu kaq vecïnulaykikunataqa. Paykunalata qayasiptikiqa tumaykita kutisiyäshunkimi.
[13] Saypa trukanqa qayasinki muchuqkunata, ushukunata, weqrukunata y qaprakunatapis.
[14] Paykuna mana kutisiyäshuptikipis ali ruraq runakuna kawariyämushqan junaqmi Tayta Dios kutisishunkipaq”.
[15] Saymi mësacho Jesúswan jamaraykaq juk runa nirqan: “¡Ima kushishqaraq kayanqa Tayta Dios mandaykashqancho mikuqkuna!”
[16] Sayno niptinmi Jesús nirqan: “Juk runashi aska runakunata qayasinaq wayincho mikuyänanpaq.
[17] Mikuy listuna kaptinshi ashmayninta kachanaq invitashqan runakunata kayno ninanpaq: ‘Lapanpis listunami. Juklashi aywaykuläshun’.
[18] “Say ashmay chaptinshi lapanpis aywayta munayänaqsu. Sayshi juknin ninaq: ‘Rantishqä chakrata rikaqraqmi aywanä kaykan. Noqapita ama jaqayaykuläsunsu’.
[19] “Jukaqnashi ninaq: ‘Pisqa yuntatami rantishkä. Saymi yachasiq aywaykä. Noqapita ama jaqayaykuläsunsu’.
[20] “Jukaqnashi ninaq: ‘Sayraqmi warmita ashishkä. Saymi aywayta kamäpakushaqsu’.
[21] “Sayshi kachashqan ashmay kutiykur runakuna imano niyashqantapis patronninta wilanaq. Wilaptinshi patronnin fiyupa rabyakur ashmayninta ninaq: ‘Pläzakunapa y cällikunapa jukla aywar muchuqkunata, ushukunata, weqrukunata y qaprakunatapis pushamuy’.
[22] “Nishqanno pushaykurshi patronninta ninaq: ‘Nimashqaykinölami pushamushkä, taytay. Sayno kaptinpis wayikiman manaraqmi juntäyanraqsu’.
[23] “Saynashi patronnin ninaq: ‘Nänikunapa y chakrakunapapis aywar tarishqayki kaqta wayïman juntashqanyaq imaykanöpapis pushamuy.
[24] Noqa kaynömi nï: Puntata qayasishqä runakuna yanukasishqä mikuyta manami yawayanqasu’ ”.
[25] Askaq runakuna qatiräyaptinmi Jesús nirqan:
[26] “Pipis discïpulü kayta munarqa mamanta, taytanta, warminta, surinkunata, wawqinkunata, paninkunata y kikinpa vïdanta kuyashqanpitapis noqata mas kuyamäsun. Sayno mana kuyamarqa manami discïpulü kayanmansu.
[27] Cruzninta apaqno mana qatirämarqa manami discïpulü kayanmansu.
[28] “Mayqaykipis wayita rurayänaykipaq shumaqraqmi yarpachakuyanki qellayniki aypashqanta o mana aypashqantapis.
[29] Cimientuykular kachaykuptikiqa lapan rikaqkunami jamurar niyäshunki:
[30] ‘¡Kay runaqa manapis puëdiykarmi wayita sharkasir qalaykasish!’
[31] “Mayqan reypis juk nacionwan manaraq pelyar ¿manaku puntata shumaqraq yarpachakun kayno nir: ‘Ishkay chunka waranqa (20,000) soldädukunata chunka waranqa (10,000) soldäduläwan vincishaqsuraq o manasuraq’?
[32] Mana vincinanpaq kashqanta tantiyarqa contran rey karulachöraq kaykaptinmi manana pelyayänanpaq wilakuqkunata kachan.
[33] Saynölami mayqaykipis noqa rayku imaykikunatapis mana kacharirqa discïpulü kayta kamäpakuyankisu”.
[34] “Kachiqa alimi kaykan. Qamyakäkurmi isanqa imapaqpis välinnasu.
[35] Chakrapaqpis ni iskapaqpis manana väliptinmi jitariykunsina. ¡Rinriyuq kaqkunaqa nishqäkunata wiyakuyäsun!”