[1] Juk kutimi Tayta Diospa ali wilakuyninta templu patiucho Jesús yachaykäsiptin mandaq cürakuna, ley yachasiqkuna y mayor runakunapis chäyarqan.
[2] Paykunami tapuyarqan: “¿Pipa munayninwantaq rantikuqkunata qarqushkanki? ¿Pitaq nishushkanki sayno qarqunaykipaq?” nir.
[3] Sayno tapuyaptinmi Jesús nirqan: “Qamkunatapis mä tapushayki.
[4] ¿Pitaq Juanta kachamush bautizananpaq? ¿Tayta Diosku o runakunalaku?”
[5] Sayno tapuptinmi kikinpura ninakuyarqan: “Tayta Dios kachamushqanta nishqaqa: ‘¿Imanirtaq chaskikuyashkankisu?’ nimäshunmi.
[6] Runakuna kachayämushqanta nishqaqa runakuna samqarpis ushaykamäshunmi. Lapanmi yarpäyan Juan profëta kashqanta”.
[7] Saymi Jesústa niyarqan: “Manami musyayäsu pï kachamushqantapis”.
[8] Sayno niyaptinmi Jesús nirqan: “Noqapis manami wilayäshaykisu pipa munayninwan rantikuqkunata qarqushqäta”.
[9] Saypitanami tinkusiypa runakunata yachasir Jesús nirqan: “Juk runashi chakranman üvata plantasinaq. Nirkurshi say chakranta arriendakuykur juklä markapa aywakunaq.
[10] “Cosëcha qalaykuptinnashi juk ashmayninta kachanaq arriendunpita cobrakamunanpaq. Say ashmay chaptinshi fiyupa maqarkur jinaylata qarquskiyänaq.
[11] Sayshi chakrayuq runa juk ashmayninta yapay kachanaq. Saytapis ashlirkur y maqarkurshi jinaylata qarquskiyänaq.
[12] Saypitashi juk ashmaynintana yapay kachanaq. Paytapis saynölashi maqar ushaskir yawarlatana qarquskiyänaq.
[13] “Sayshi chakrayuq yarpachakur ninaq: ‘Kanan ¿imatami rurashaq? Kuyay surïtami kachashaq. Paytaqa chaskikuyanqami’.
[14] “Sayshi surin aywaykaqta rikayashpan chakra arriendaqkuna wilanakur niyänaq: ‘Taqaymi kay chakrawan quëdananpaq kaykan. Noqansina chakranwan quëdakunansipaq wanuskasishun’.
[15] Chaykuptinnashi wilanakuyashqannöla üva chakrapita jukläman apaykur wanusiyänaq”. Sayno wilaparkurmi Jesús nirqan: “Say üva chakrayuq ¡imataraq ruranqa say runakunata!
[16] ¿Manasuraq lapanta wanusir ushanqa? Nirkurqa chakrantapis juktanami arriendakuykunqa”. Sayno niptinmi runakuna niyarqan: “¡Sayno kanantaqa Tayta Dios ama munaykuläsunsu!”
[17] Sayno niyaptinmi paykunata rikärir Jesús nirqan: “Tayta Diospa palabrancho kayno qelqaraykashqanta tantiyakuyay: “ ‘Wayi sharkasiqkuna “kay rumi manami alisu” nir jitariyashqanmi wayi esquïnan cimientuchöna churaraykan’.
[18] Pipis say rumiman tuniq kaqqa ushakanqami. Saynölami pipa jananmanpis say rumi charqa pasaypa ushakäsinqa”.
[19] Sayno yachasiptinmi mandaq cürakuna y ley yachasiqkuna paykunapa contran parlaykashqanta tantiyar prësu sarisiyta munayarqan. Sayno munarpis runakunata mansapäyashpanmi sarisiyarqansu.
[20] Saymi gobernadorman prësu apasiyänan kash Jesús kaqman runakunata kachayarqan ali shimilanpa parlapar lutanta parlasiyänanpaq.
[21] Chaykurmi say runakuna Jesústa niyarqan: “ Rabí, noqakuna musyayämi imata yachasirpis parlarpis rasun kaqlata nikashqaykita. Manami runakuna alabashunaykita munarsu yachasinki, saypa trukanqa Tayta Dios munashqannölami.
[22] Romacho mandaq Césarpaq ¿impuestuta pägashwanku o manaku?”
[23] Lutanta parlasinanpaq tapuyashqanta tantiyarmi Jesús nirqan:
[24] “Mä impuestu pägana qellayta rikasiyämay. Kay qellaycho ¿pipa reträtuntaq kaykan? Saynöpis ¿pipa jutintaq qelqaraykan?” Sayno tapuptinmi niyarqan: “Mandaq Césarpami”.
[25] Saymi Jesús nirqan: “Césarpa kaqta Césarta qoykuyay. Tayta Diospa kaqtaqa Tayta Diosta qoykuyay”.
[26] Runakunapa nawpancho imatapis lutanta parlasiyta mana kamäpakuyashpanmi say runakuna espantash upälakuyarqanna.
[27] Saypitanami wakin saduceukuna Jesústa tapuq aywayarqan. Paykuna manami criyiyansu wanuqkuna kawariyämunanpaq kashqanta.
[28] Saymi Jesústa tapur niyarqan: “ Rabí, Moisés qelqashqancho nikan: ‘Warmiyuq runa suriynaq wanuptin wawqinmi cuñädan viüdawan tanqa. Saynöpami wamrankuna kaptin say wanuq wawqinpa surinkunano kayanqa’.
[29] Kanan niyäshayki. Juk markachöshi qanchis wawqikuna kayänaq. Qechpa kaqshi juk warmita ashinaq. Payshi manaraq surin kaptin wanunaq.
[30] Sayshi shulka kaq wawqinna say viüdawan tänaq. [Paypis surin manaraq kaptinshi wanunaq.]
[31] Saypita mas shulkan kaqnashi say viüdawan tänaq. Saynölashi lapan wawqinkuna say viüdawan täyänaq. Surin manaraq kaptinshi lapanpis wanuyänaq.
[32] Saypitanashi say viüdapis wanukunaq.
[33] Wanushkuna kawariyämunan junaqqa ¿mayqanpa warminraq kanqa, qanchis wawqiwan tash kaykaptinqa?”
[34] Sayno niyaptinmi Jesús nirqan: “Kay vïdalachömi majasakayqa kaykan.
[35] Juk vïdaman chäyänanpaq akrash kaqkunaqa kawarirkamur manami majasakäyanqanasu.
[36] Saychöqa angilkunanömi mana wanuq kayanqa. Kawarimush karmi Tayta Diospa wamrankunana kayanqa.
[37] “Wanushkuna kawariyämunanpaq kashqantaqa Moiséspis qelqashqancho tantiyasimansimi. Paytami rupaykaq shirakacho yuripaykur Tayta Dios nirqan: ‘Abrahampa, Isaacpa y Jacobpa Diosninmi kaykä’.
[38] Tayta Diosqa manami wanushkunapa Diosninsu, saypa trukanqa kawaykaqkunapa Diosninmi. Paypaqqa wanushkunapis kawaykäyanmi”.
[39] Sayno niptinmi ley yachasiqkuna wakin niyarqan: “Rabí, ¡alitami niykushkanki!”
[40] Saypitaqa manami imatapis tapupayta almitiyarqannasu.
[41] Saypitanami Jesús nirqan: “¿Imanirtaq runakuna niyan Davidpa Surin Cristo kashqanta?
[42] Kikin Davidpis Salmo librucho kaynömi qelqarqan: “ ‘Mandamaqnïtami Tayta Dios nirqan: “Aluq kaq nawpäman jamakamuy
[43] lapan chikishuqnikikunata munaynikiman churashqäyaq” ’.
[44] Kikin Davidpis mandaqnin kashqanta nikaptinqa ¿imanöpataq Cristuqa Davidpa Surin kanman?”
[45] Lapan runakuna wiyaykäyaptinmi discïpulunkunata Jesús nirqan:
[46] “Cuidä ley yachasiqkunanötaq kayankiman. Paykunaqa runa tukuyashpanmi chaki puntanyaq sotänan jatish puriyan. Pläzakunachöpis runakuna winchikur ali rikayänantami munayan. Sinagögakunachöpis punta puntamanraqmi jamakuyan. Mikuyänanpaq qayasiyaptinpis mësamanraqmi jamakuyan.
[47] Viüdakunapa pobrëzalantapis qechuyan. Nirkurmi santu tukuyashpan may höra Tayta Diosta manakuyan. Sayno kayashqanpitami Tayta Dios mana kuyapaypa mas fiyupa castiganqa”.