[1] Say wisanmi Levadüraynaq Tantata Mikuna fiesta yaykaykämurqanna. Say fiestatami Pascua fiesta niyaq.
[2] Say junaqkunami mandaq cürakuna y ley yachasiqkuna Jesústa imanöpa wanusiyänanpaqpis wilanakuyarqan. Isanqa paypa favornin runakuna sharkuyänanta mansakurmi prësu sarisiyta kamäpakuyarqansu.
[3] Say hörami Judas Iscariotipa shonqunman Satanás yaykurqan. Judasqa Jesúspa chunka ishkay discïpulunkunapita jukmi karqan.
[4] Paymi mandaq cürakunaman y templu täpaq wardiakunapa capitanninkunaman aywaykur nirqan Jesústa imanöpa reqisinanpaqpis.
[5] Sayno niptinmi kushikuyashpan pägayänanpaq niyarqan.
[6] Sayno niyaptinmi Judas shuyararqan runakuna mana kayashqan höra Jesús kaqman pushananpaq.
[7] Levadüraynaq Tantata Mikuna fiesta qalaykunan junaqmi Pascuacho mikuyänanpaq carnishta pishtayaq.
[8] Saymi Pedruta y Juanta kachashpan Jesús nirqan: “Pascua mikuyta mikunansipaq kamarikayämuy”.
[9] Sayno niptinmi paykuna tapur niyarqan: “Taytay, ¿maychötaq kamarikayämushaq?”
[10] Sayno niyaptinmi Jesús nirqan: “Jerusalénman charmi juk runa uylluwan yakuta apaykaqta tariyanki. Say runapa qepalanta aywayanki may wayimanpis chashqanyaq.
[11] Saycho wayiyuqta niyanki: ‘¿Mayninchöshi cuartu kaykan discïpulunkunawan Pascua mikuyta Jesús mikunanpaq?’
[12] Sayno niyaptikimi altuscho jatun cuartu kamarish kaykaqta rikasiyäshunki. Saycho mikunansipaq kamarikuyanki”.
[13] Saymi paykuna aywar Jesús nishqannöla tariyarqan. Saychömi Pascua mikuyta kamariyarqan.
[14] Mikuy höra chämuptinnami apostolninkunawan mësaman Jesús jamakuyarqan.
[15] Saychömi Jesús nirqan: “Seqaypami munashkä manaraq wanushqäyaq kay Pascua mikuyta qamkunawan mikuyta.
[16] Noqa kaynömi nï: Mananami kay meriendata mikushaqnasu Tayta Dios mandaykashqancho yapay mikushqäyaq”.
[17] Nirkurnami vïnuyuq väsuta aptarkushpan Tayta Diosta agradëcikur apostolninkunata nirqan: “Kaypita lapayki upuyay.
[18] Noqa kaynömi nï: Tayta Dios mandaykashqan chämushqanyaq manami vïnuta yapay upushaqnasu”.
[19] Saynöpis tantata aptarkur Tayta Diosta päkilä nirqan. Tantata pakiparmi nirqan: “Kayqa cuerpümi. Kay tantata mikur qamkuna rayku wanushqäta yarpäyanki”.
[20] Saynölami meriendayta ushaskir vïnuyuq väsuta aptarkur nirqan: “Kay vïnuqa yawarnïmi kaykan. Qamkuna rayku wanur yawarnïta jichaptïmi Tayta Dios mushuq pactuta ruranqa.
[21] Chikimaqnïkunawan prësu sarisimänanpaq kaq runapis noqansiwanmi kay mësacho kaykan.
[22] Rasunpaypami Runapa Surinqa Tayta Dios munashqannöla nakar wanunqa. Payta prësusiq runami isanqa pasaypa kuyapaypaq kanqa”.
[23] Sayno niptinmi jukninpis jukninpis apostolninkuna tapunakur niyarqan: “¿Mayqansiraq kaykansi?”
[24] Saypitanami apostolkuna mas mandaq kayta munar kikinpura rimanakuykäyarqan.
[25] Saymi Jesús nirqan: “Nacionkunata mandaq reykunaqa runakunata munayashqantami rurasiyan. Sayno mandaqkunata ali runa kashqantami niyan.
[26] Qamkunaqa ama sayno kayaysu. Saypa trukanqa munayyuq karpis wamrano humildi kayay. Mandaq karpis ashmaynöla yanapäkuq kayay.
[27] Shumaq tantiyakuyay. ¿Mësacho jamaqku o mikuy qaraq ashmayku mas mandaq? ¿Manaku mësacho jamaq mas mandaq? Sayno kaptinpis noqaqa qamkunacho ashmaynölami kaykä.
[28] “Ima nakaycho kaptïpis noqawanmi imaypis qamkuna kayashkanki.
[29] Saymi mandaq kanäpaq Papänï churamashqanno qamkunatapis mandaq kayänaykipaq churayäshayki.
[30] Sayno churaptïmi mandaykashqächo noqawan mikuyanki y upuyanki. Saynöpis trönucho jamayanki chunka ishkay trïbu Israel runakunata mandayänaykipaq”.
[31] Saypitanami Pedruta Jesús nirqan: “Simón, Simón, Satanásmi Tayta Diosta manakush trïguta shuyshuqno qamkunapa yärakuynikikunata ushakäsinanpaq.
[32] Saymi Tayta Diosta manakushkä yärakuyniki mana ushakänanpaq. Saymi noqaman yapay yärakamarna discïpulu mayikikunata shakyäsinki shumaq noqaman yärakayämunanpaq”.
[33] Sayno niptinmi Pedro nirqan: “Carcilman apayäshuptikipis manami kachashaykisu, taytay. Wanusiyäshuptikipis qamwanmi wanushaq”.
[34] Saymi Jesús nirqan: “Pedro, noqa kaynömi nï: Kanan sakay kakash manaraq cantaptinmi kimsa kuti mana reqimashqaykita ninkipaq”.
[35] Saypitanami apostolninkunata Jesús tapurqan: “Qellayniynaqta, qepiynaqta y lanqiynaqta wilakuyänaykipaq kachaptï ¿imalapis pishïyäshurqaykiku?” Saymi paykuna niyarqan: “Manami imapis pishïyämarqansu, taytay”.
[36] Sayno niyaptinmi Jesús nirqan: “Kananpitaqa qellaytapis qepitapis apayanki. Espädayki mana kaptinqa punchuykita rantikuykur rantiyanki.
[37] Noqa kaynömi nï: Tayta Diospa palabrancho noqapaq kayno nirmi qelqaraykan: ‘Jusayuq runanölami wanurqan’. Say qelqaraykashqannölami noqata päsamanqa”.
[38] Saymi apostolninkuna niyarqan: “Taytay, kaycho kaykan ishkay espädakuna”. Niptinmi Jesús nirqan: “¡Saykunata churaykuyay!”
[39] Saypitanami Jesús aywarqan cadala aywashqanno Olivos lömaman. Qepantami discïpulunkunapis aywayarqan.
[40] Sayman chaykurnami nirqan: “Tayta Diosta manakuyay Satanásta ichipäyänaykipaq”.
[41] Sayno nirkurmi mas washaläman aywashpan qonqurpakuykur Tayta Diosta manakur
[42] nirqan: “Papä, cöpacho winaraykaq castïguykita ama upuykasilämaysu. Isanqa noqa munashqäno ama kasunsu, sinöqa qam munashqaykino kaykuläsun”.
[43] [Sayno lakikur manakuykaptinmi jana pasapita juk ángel shamur valorta qorqan.
[44] Fiyupa lakikurmi Tayta Diosta manakurqan jumpinpis yawarnöraq pasaman jutushqanyaq.]
[45] Saypita discïpulunkuna kaqman kutirmi lakikuypita punukash kaykäyaqta Jesús tarirqan.
[46] Saymi Jesús nirqan: “¡Imanirtaq punukuyanki! Sharkur Tayta Diosta manakuyay Satanásta ichipäyänaykipaq”.
[47] Jesús sayno parlaykaptinraqmi apostolnin Judas Iscariote charqan aska runakunata pushash. Nirkurmi Jesúsman witiykur qaqlancho musaykurqan.
[48] Saymi Jesús nirqan: “Judas, Runapa Surinta ¿musaypaku reqisinki?”
[49] Jesústa prësu sariq shayämushqanta tantiyayashpanmi discïpulunkuna niyarqan: “Taytay, ¿espädäkunawanku qokachaskayämushaq?”
[50] Sayno nirmi juk discïpulun mas mandaq cürapa ashmayninpa aluq kaq rinrinta espädanwan wallurirqan.
[51] Saymi Jesús nirqan: “¡Ama sayta rurayaysu!” Nirkurmi say ashmaypa rinrinta yataykur aliyaskasirqan.
[52] Jesústa prësu apayänanpaq shamuqkuna kayarqan mandaq cürakuna, templu täpaq wardiakunapa capitanninkuna y Israel mayor runakunapis. Paykunatami Jesús nirqan: “¿Imanirtaq suwamannöpis espädaykikunawan y garrutikikunawan shayämushkanki?
[53] Waran waran templu patiucho qamkunawan kaykaptï ¿imanirtaq saycho prësu sariyämarqaykisu? Kananmi isanqa höra chämushna Satanáspa munayninta rurayänaykipaq”.
[54] Jesústa prësu sarirkurmi mas mandaq cürapa wayinman apayarqan. Pedrunami karu qepalanta qatirarqan.
[55] Sawan rurinchömi ninata sarirkasir runakuna mashakuykäyarqan. Sayman yaykurirmi Pedrupis paykunawan mashakuykarqan.
[56] Pedro mashakuykaqta rikaykurmi juk ashmay warmi nirqan: “Kay runapis paywanmi purish”.
[57] Saymi Pedro nirqan: “¡Imanankitaq, warmi! Say runata manami reqïsu”.
[58] Maylantanami juk runapis payta rikaykur nirqan: “Qampis say runawan puriqmi kaykanki”. Niptinmi Pedro nirqan: “¡Imanankitaq, runa! Manami imaypis paywan purishkäsu”.
[59] Saypita juk höratanömi jukna nirqan: “Rasunpaypami kay runaqa paywan purish. Galilea runami kanpis”.
[60] Sayno niptinmi Pedro nirqan: “¡Imanankitaq, runa! ¡Manami musyäsu imata nikashqaykitapis!” Pedro sayno nikaptinmi kakash cantarkurqan.
[61] Say hörami Jesús tikraykur Pedruta rikärirqan. Saymi Pedro yarparkurqan Jesús kayno nishqanta: “Manaraq kakash cantaptinmi kimsa kuti mana reqimashqaykita ninkipaq”.
[62] Saymi waqtaman yarquskir seqaypa pësakushpan waqarqan.
[63] Saypitanami prësu sararaykaq runakuna manakaqman churayashpan Jesústa maqayarqan.
[64] Nawinta saparkur [laqyarmi] niyarqan: “Pï maqashushqaykitapis mä niyämay”.
[65] Sayno nirmi tukuyta ashliyarqan.
[66] Pasa wararkuptinnami Israel mayor runakuna, mandaq cürakuna y ley yachasiqkunapis shuntakäyarqan. Paykunapa despächunman chäsiyaptinmi Jesústa tapur niyarqan:
[67] “Mä wilayämay. ¿Rasunpaku Tayta Dios kachamushqan Cristo kaykanki?” Saymi Jesús nirqan: “Niptïpis manami criyiyämankisu.
[68] Tapuptïpis manami contestayämankisu [ni kachariyämankisu].
[69] Kananpitaqa Runapa Surin munayyuq Tayta Diospa aluq kaq nawpanchömi jamaranqa”.
[70] Autoridäkuna tapurmi niyarqan: “Sayno kaptinqa ¿Diospa Surinku kanki?” Sayno niptinmi Jesús nirqan: “Qamkuna niyashqaykinölami kä”.
[71] Saymi niyarqan: “Diospa Surin kaykashqanta kikin nikämashqaqa ¿imapaqnataq testïgutapis ashishun?”