[1] Saypitanami Pilatuman lapan autoridäkuna Jesústa apayarqan.
[2] Saychönami Pilatuta niyarqan: “Kay runatami tariyashkä nacionninsipa contran sharkuyänanpaq runakunata shimita qoykaqta. Manami munansu impuestuta mandaq Césarpaq pägayänantapis. Saynöpis nikan Cristo kar rey kashqantami”.
[3] Saymi Jesústa Pilato tapurqan: “¿Rasunpaku Israel runakunapa mandaqnin rey kanki?” nir. Saymi Jesús nirqan: “Rasun kaqtami nikanki”.
[4] Saymi mandaq cürakunata y saycho shuntakash kaykaq runakunatapis Pilato nirqan: “Kay runapa ima jusantapis manami tarïsu”.
[5] Sayno niptin masraqmi niyarqan: “¡Kay runaqa autoridäkunapa contran sharkuyänanpaqmi runakunata shimita qoykan! Galileapita qalaykur kay Judeachönami shimita qoykan”.
[6] Sayta wiyarmi Pilato tapurqan: “¿Galileapitaku kay runa?” nir.
[7] “Awmi” niyaptinmi Galileacho mandaq Herodesman Jesústa apasirqan juzgananpaq. Say junaqkunami Herodespis Jerusaléncho kaykarqan.
[8] Jesúspaq parlayashqanta wiyashpan y milagru ruraykaqta rikayta munarmi nawpapita pasa Herodes reqiyta munarqan. Saymi Jesústa rikaykur kushikurqan.
[9] Saycho yaparir yaparir Herodes tapuptinpis Jesús manami imatapis parlakurqansu.
[10] Saychömi mandaq cürakuna y ley yachasiqkunapis Jesúspa contran imaykatapis niyarqan.
[11] Saymi reypa cäpanta aylluparkur soldädunkunawan Herodes asipäyashpan Jesústa manakaqman churayarqan. Nirkurnami Pilato kaqman kutisirqan.
[12] Say junaqmi Herodeswan Pilato chikinakuyashqanpita amistayarqan.
[13] Jesústa kutiykasiptinnami mandaq cürakunata, autoridäkunata y lapan runakunata qayaykasir
[14] Pilato nirqan: “Qamkunaqa kay runata apayämushkanki: ‘Autoridäkunapa contran sharkuyänanpaq runakunatami shimita qoykan’ nirmi. Sayno niyaptikipis nawpaykikunacho tapur manami ima jusantapis tarishkäsu niyashqaykinöqa.
[15] Herodespis ima jusantapis mana tarirmi kayman kutisimush. Kay runa manami imatapis jusalikushsu wanusish kananpaqnöqa.
[16] Saymi astarkasilar kacharishaq”.
[17] [Cada watami Pascuacho Pilato juk prësuta kachariq.]
[18] Saymi Jesústa kachariyta munaptin lapan qaparar niyarqan: “¡Say runaqa wanusun! ¡Barrabásta kachariyqa!”
[19] Barrabásqa carcilcho wichqaraykarqan gobiernupa contran Jerusaléncho sharkushqanpita y wanusikushqanpitami.
[20] Saymi runakunata Pilato yapay nirqan Jesústa kacharinanpaq.
[21] Niptinpis masraqmi qayarar niyarqan: “¡Crucificay! ¡Crucificay!”
[22] Saymi Pilato yapay nirqan: “¿Ima mana alitataq rurash? Wanunanpaqqa manami ima jusantapis tarïsu. Astarkasilarmi kacharishaq”.
[23] Sayno niptinpis crucificash kananta munarmi masraq qayaräyarqan. [Mandaq cürakuna y] runakuna sayno qayaräyaptinmi Pilato awnirqan.
[24] Saymi runakuna manakuyashqanno Jesústa wanusiyänanpaq kachapariykurqan.
[25] Gobiernupa contran sharkush kaykaptinpis y wanusikuq kaykaptinpis runakuna munayashqannölami Barrabásta kacharirqan. Jesústami isanqa wanusiyänanpaq paykunapa makinman kachaykurqan.
[26] Jesústa crucificayänanpaq apaykäyaptinmi chakrapita kutiykämurqan Simón jutiyuq runa. Payqa Cirene nacionpitami karqan. Paytami niyarqan Jesús apaykashqan cruzta umrurkur Jesúspa qepanpa apananpaq.
[27] Saysika runakunami Jesúspa qepanta aywaykäyarqan. Paykunawanmi askaq warmikunapis lakikuyashpan waqaraykar aywaykäyarqan.
[28] Say warmikunata rikaykurmi Jesús nirqan: “Jerusalén warmikuna, ama noqapaq waqayaysu. Saypa trukanqa kikikikunapaq y wawaykikunapaq waqayay.
[29] Fiyupa nakay junaqkunami chämunqa. Say wisanmi runakuna niyanqa: ‘¡Ima kushishqaraq kaykäyan qoluq warmikuna y itita mana chuchuq warmikuna!’
[30] Say wisanmi runakuna pasaypa nakar jirkakunata niyanqa: ‘¡Jukla ushakäyänäpaq janäkunaman juchumuy!’ Qaqakunatapis niyanqa: ‘¡Jukla nitikarkayämay!’
[31] Winaykaq jachatapis kayno ruraykarqa sakish qerutaqa ¡imataraq rurayanqa!”
[32] Jesústawanmi ishkay jusasapa runakunatapis crucificaq apayarqan.
[33] Calavëra niyashqanman chaykasirnami Jesústa crucificayarqan. Apayashqan jusasapa runakunatami juknin kaqta Jesúspa aluqnin kaqman y jukaqtana isuqnin kaqman crucificayarqan.
[34] [Say hörami Jesús nirqan: “Taytay, kay runakunata perdonaykulay. Manami musyayansu imata ruraykäyashqantapis”.] Soldädukunanami Jesúspa mödananpaq suertita jitayarqan mayqanpis gänaq kaq apakunanpaq.
[35] Saycho runakuna rikaraykäyaptinmi autoridäkuna Jesústa burlakur niyarqan: “Tayta Dios akrashqan Cristo kaykarqa jukta salvashqannöla mä kanan kikinpis salvakusun”.
[36] Saynölami soldädukunapis burlakuyashpan pochquq vïnuta shoqusiyta munar
[37] niyarqan: “Israel runakunapa mandaqnin rey kaykarqa mä kikiki salvakuy”.
[38] Cruzpa puntanchömi juk letrëru nirqan: “Kay runaqa Israel runakunapa mandaqnin reymi”. [Say qelqaraykarqan griëgucho, latíncho y hebreo idiömakunachömi.]
[39] Saynölami crucificaraykaq jukaq runapis Jesústa manakaqman churar nirqan: “Tayta Dios kachamushqan Cristo karqa mä kikiki salvakur noqakunatapis salvayämay”.
[40] Sayno niptinmi juknin kaq olqutupar nirqan: “Qampis payno nakaykarqa ¿manaku Tayta Diosta mansakunki?
[41] Noqansiqa jusansikunapitami nakaykansi. Payqa manami imatapis jusalikushsu”.
[42] Nirkurnami Jesústa nirqan: “Mandaq kayta qalaykur noqaläta yarparkalämanki”.
[43] Niptinmi Jesús nirqan: “Rasunpami nï: Kananpitaqa paraísuchömi noqawan kanki”.
[44] Pulan junaqpita malway intiyaqmi pasa sakakurpurqan.
[45] Intipis manami asikyarqansu. Say hörami templu rurincho kaq cortïnapis pulanpa rachikäkurirqan.
[46] Saypitanami Jesús sinchipa nirqan: “¡Papä! ¡Makikimanmi almäta churaykamü!” Sayno niskirnami päsarpurqan.
[47] Saykunata rikaykurmi soldädukunapa capitannin Tayta Diosta alabar nirqan: “¡Rasunpaypami kay runa jusaynaq kash!”
[48] Saycho kaykaq runakunapis fiyupa pësakurmi qasqunta kutaraykar aywakuyarqan.
[49] Jesúswan reqinakuqkunami karulapita lakish rikaraykäyarqan. Paykunawanmi Galileapita pasa qatiraq warmikunapis kaykäyarqan.
[50] Juk runami karqan José jutiyuq. Payqa Israel runakunapa autoridänin y Tayta Dios munashqanno kawaq ali runami karqan.
[51] Judeacho kaykaq Arimatea markapitami karqan. Paypis Tayta Dios mandaykashqantami shuyaraykarqan. Wakin autoridäkuna Jesústa wanusiyänanpaq wilanakuyaptinpis pay manami munarqansu.
[52] Paymi Pilato kaqman aywaykur manakurqan: “Jesúspa ayanta pampanäpaq kachapaykalämay”.
[53] Awniptinmi Jesúspa ayanta cruzpita jorquskir lïnupita rurash säbanaswan piturqan. Nirkurmi manaraq pitapis pampayashqan qaqacho uchkush sepultüraman pamparqan.
[54] Sayno pamparqan jamay junaqpaq kamarikuyänan junaq ushaykaptinnami. Jamay junaq qalaykunanpaqna kaykarqan.
[55] Galileapita Jesúswan shamuq warmikuna Josépa qepanpa aywarmi rikayarqan sepultüra maycho kashqanta y Jesúspa ayanta imano churayashqantapis.
[56] Saypita wayinkunaman kutiykuyashpanmi mushkuq jachakunata y perfümikunata shuntayarqan Jesúspa ayanman winapäyänanpaq. Puestukuskirnami mandamientu nishqanno jamay junaq kaptin jamayarqan.